2. සො’පි තදා අමතභෙරිං{1} අහනී{2} මෙඛලෙ පුරෙ, ධම්මසඞ්ඛසමායුත්තං නවඞ්ගං ජිනසාසනං.
3. නිජ්ජිනිත්වා{3} කිලෙසෙ සො{4} පත්වා සම්බොධි’මුත්තමං මාපෙසි නගරං සත්ථා{5} සද්ධම්මපුරවරුත්තමං.{6}
4. නිරන්තරං අකුටිලං උජුං{7} විපුල විත්ථතං මාපෙසි සො මහාවීථිං සතිපට්ඨානවරුත්තමං.
5. ඵලෙ චත්තාරි සාමඤ්ඤෙ චතස්සො පටිසම්භිදා ඡළභිඤ්ඤාට්ඨ සමාපත්ති පසාරෙසි තත්ථ වීථියං.
6. යෙ අප්පමත්තා අඛිලා හිරි විරියෙහු’පාගතා තෙ තෙ ඉමෙ ගුණවරෙ ආදියන්ති යථා සුඛං.
7. එවමෙතෙන යොගෙන උද්ධරන්තො මහාජනං බොධෙසි පඨමං සත්ථා කොටිසතසහස්සියො.
8. යම්හි කාලෙ මහාවීරො ඔවදි{8} තිත්ථියෙ ගණෙ කොටි සහස්සාභිසමිංසු{9} දුතියෙ ධම්මදෙසනෙ.
9. යදා දෙවා මනුස්සා ච සමග්ගා එකමානසා නිරොධ පඤ්හං පුච්ඡිංසු සංසයඤ්චා’පි මානසං.{10}
10. තදා’පි ධම්මදෙසනෙ{11} නිරොධ පරිදීපනෙ{12} නවුති කොටි සහස්සානං තතියා’භිසමයො{13} අහු.
11. සන්නිපාතා තයො ආසුං සුමනස්ස මහෙසිනො ඛීණාසවානං විමලානං සන්ත චිත්තාන තාදිනං.
12. වස්සං වුත්ථස්ස භගවතො අභිඝුට්ඨෙ{1} පවාරණෙ කොටිසතසහස්සෙහි පවාරෙසි තථාගතො.
13. තතො පරං සන්නිපාතෙ විමලෙ කඤ්චන පබ්බතෙ නවුතිකොටිසහස්සානං දුතියො ආසි සමාගමො.
14. යදා සක්කො දෙවරාජා බුද්ධදස්සනු’පාගමි අසීතිකොටිසහස්සානං තතියො ආසි සමාගමො.
15. අහං තෙන සමයෙන නාගරාජා මහිද්ධිකො අතුලො නාම නාමෙන උස්සන්නකුසලසඤ්චයො.{2}
16. තදා’හං නාගභවනා නික්ඛමිත්වා ස ඤාතිහි නාගානං දිබ්බතුරියෙහි සසඞ්ඝං ජිනමුපට්ඨහිං.
17. කොටි සත සහස්සානං අන්නපානෙන තප්පයිං{3} පච්චෙකං{4} දුස්සයුගං දත්වා සරණං තං උපාගමිං.
18. සොපි මං බුද්ධො ව්යාකාසි සුමනො ලොක නායකො අපරිමෙය්යෙ ඉතො කප්පෙ අයං බුද්ධො භවිස්සති.
19. අහු කපිලව්හයා රම්මා නික්ඛමිත්වා තථාගතො පධානං පදහිත්වාන කත්වා දුක්කරකාරිකං.
20. අජපාලරුක්ඛමූලස්මිං නිසීදිත්වා තථාගතො තත්ථ පායාසමග්ගය්හ නෙරඤ්ජර මුපෙහිති.
21. නෙරඤ්ජරාය තීරම්හි පායාසං ආදාය සො ජිනො පටියත්තවරමග්ගෙන බොධිමූලම්හි එහිති.
22. තතො පදක්ඛිණං කත්වා බොධිමණ්ඩං අනුත්තරො අස්සත්ථ රුක්ඛමූලම්හි බුජ්ඣිස්සති මහායසො.
23. ඉමස්ස ජනිකා මාතා මායා නාම භවිස්සති පිතා සුද්ධොදනො නාම අයං හෙස්සති ගොතමො.
24. කොලිතො උපතිස්සො ච අග්ගාහෙස්සන්ති සාවකා ආනන්දො නාමු’පට්ඨාකො උපට්ඨිස්සති තං ජිනං.
25. ඛෙමා උප්පලවණ්ණා ච අග්ගා හෙස්සන්ති සාවිකා බොධි තස්ස භගවතො අස්සත්ථො’ති පවුච්චති.
26. චිත්තො ච හත්ථාළවකො අග්ගා හෙස්සන්තු’පට්ඨකා උත්තරා නන්දමාතා ච අග්ගා හෙස්සන්තු’පට්ඨිකා ආයු වස්ස සතං තස්ස ගොතමස්ස යසස්සිනො.
27. ඉදං සුත්වාන වචනං අසමස්ස මහෙසිනො ආමොදිතා නරමරූ බුද්ධ බීජඞ්කුරො අයං.
28. උක්කුට්ඨි සද්දං වත්තෙන්ති අප්ඵොටෙන්ති හසන්ති ච කතඤ්ජලී නමස්සන්ති දස සහස්සී සදෙවකා.
29. යදි’මස්ස ලොක නාථස්ස විරජ්ඣිස්සාම සාසනං අනාගතම්හි අද්ධානෙ හෙස්සාම සම්මුඛා ඉමං.
30. යථා මනුස්සා නදිං තරන්තා පටිතිත්ථං විරජ්ඣිය හෙට්ඨා තිත්ථෙ ගහෙත්වාන උත්තරන්ති මහානදිං.
31. එව’මෙව මයං සබ්බෙ යදි මුඤ්චාමි’මං ජිනං අනාගතම්හි අද්ධානෙ හෙස්සාම සම්මුඛා ඉමං.
32. තස්සා’පි වචනං සුත්වා භිය්යො චිත්තං පසාදයිං උත්තරිං වතමධිට්ඨාසිං දසපාරමි පූරියා.
33. මෙඛලං නාම{1} නගරං සුදත්තො නාම ඛත්තියො සිරිමා නාම ජනිකා සුමනස්ස මහෙසිනො.
34. නව වස්ස සහස්සානි අගාරමජ්ඣ සො වසී{2} චන්දො සුචන්දො වටංසො ච තයො පාසාදමුත්තමා.
35. තෙ සට්ඨිසහස්සානි{1} නාරියො සමලඞ්කතා, වටංසිකා{2} නාම නාරී අනුපමො නාම අත්රජො.
36. නිමිත්තෙ චතුරො දිස්වා හත්ථියානෙන නික්ඛමි අනූනදසමාසානි පධානං පදහී ජිනො.
37. බ්රහ්මුනා යාචිතො සන්තො සුමනො ලොක නායකො වත්ති චක්කං මහාවීරො මෙඛලෙ පුරමුත්තමෙ.{3}
38. සරණො භාවිතත්තො ච අහෙසුං අග්ගසාවකා උදෙනො නාමු’පට්ඨාකො සුමනස්ස මහෙසිනො.
39. සොණා ච උපසොණා ච අහෙසුං අග්ගසාවිකා සො’පි බුද්ධො අමිතයසො නාගමූලෙ අබුජ්ඣථ.
40. වරුණො ච සරණො ච අහෙසුං අග්ගු’පට්ඨකා චාලා ච උපචාලා ච අහෙසුං අග්ගුපට්ඨිකා.
41. උච්චත්තනෙන{4} සො බුද්ධො නවුතිහත්ථසමුග්ගතො කඤ්චනග්ඝිය සංකාසො දස සහස්සී විරොචති.{5}
42. නවුති වස්ස සහස්සානි ආයුවිජ්ජති තාවදෙ තාවතා තිට්ඨමානො සො තාරෙසි ජනතං බහුං.
43. තාරණීයෙ තාරයිත්වා බොධනීයෙ ච බොධයී පරිනිබ්බායි සම්බුද්ධො උළුරාජා’ච අත්ථමී.{6}
44. තෙ’පි ඛීණාසවා භික්ඛු සො ච බුද්ධො අසාදිසො අතුලං පහං දස්සයිත්වා නිබ්බුතා තෙ මහායසා.
45. තඤ්ච ඤාණං අතුලියං තානි චා’තුලියානි රතනානි සබ්බං සමන්තරහිතං නනු රිත්තා සබ්බසඞ්ඛාරා.
46. සුමනො යසධරො බුද්ධො අඞ්ගාරමම්හි නිබ්බුතො තත්වෙ’ව තස්ස ජිනථූපො චතුයොජන මුග්ගතො’ති.
සුමන බුද්ධවංසො චතුත්ථො.
5. රෙවත බුද්ධවංසො
1. සුමනස්ස අපරෙන රෙවතො නාම නායකො අනුපමො අසදිසො අතුලො උත්තමො ජිනො.
2. සො’පි ධම්මං පකාසෙසි බ්රහ්මුනා අභියාචිතො ඛන්ධධාතුවවත්ථානං අප්පවත්තං භවා’භවෙ.
3. තස්සා’භිසමයා තීණි අහෙසුං ධම්මදෙසනෙ ගණනාය න වත්තබ්බො පඨමා’භිසමයො අහු.
4. යදා අරින්දමං රාජං විනෙසි රෙවතො මුනි තදා කොටිසහස්සානං{1} දුතියා’භිසමයො අහු.
5. සත්තා’හං පටිසල්ලානා වුට්ඨහිත්වා නරාසභො කොටිසතං නරමරූනං{2} විනෙසි උත්තමෙ ඵලෙ.
6. සන්නිපාතා තයො ආසුං රෙවතස්ස මහෙසිනො ඛීණාසවානං විමලානං සුවිමුත්තාන’ තාදිනං.{3}
7. අතික්කන්තා ගණනපථං{4} පඨමං යෙ සමාගතා කොටිසතසහස්සානාං දුතියො ආසි සමාගමො.
8. යො’පි{5} පඤ්ඤාය අසමො තස්ස චක්කානුවත්තකො සො තදා ව්යාධිතො ආසි පත්තො ජීවිතසංසයං.
9. තස්ස ගිලානපුච්ඡාය{6} යෙ තදා උපගතා මුනි කොටිසතසහස්සා{7} අරහන්තො තතියො ආසි සමාගමො.
10. අහං තෙන සමයෙන අතිදෙවො නාම බ්රාහ්මණො උපගන්ත්වා රෙවතං බුද්ධං සරණං තස්ස ගච්ඡහං.
11. තස්ස සීලං සමාධිඤ්ච පඤ්ඤාගුණමනුත්තමං{8} ථොමයිත්වා යථාථාමං උත්තරීය’මදාස’හං.
12. සො’පි මං බුද්ධො ව්යාකාසි රෙවතො ලොකනායකො අපරිමෙය්යෙ ඉතො කප්පෙ අයං බුද්ධො{9} භවිස්සති.
13. අහු කපිලව්හයා රම්මා නික්ඛමිත්වා තථාගතො පධානං පදහිත්වාන කත්වා දුක්කරකාරිකං.
14. අජපාලරුක්ඛමූලස්මිං නිසීදිත්වා තථාගතො තත්ථ පායාසමග්ගය්හ නෙරඤ්ජරමුපෙහිති.
15. නෙරඤ්ජරාය තීරම්හි පායාසං ආදාය සො ජිනො පටියත්තවරමග්ගෙන බොධිමූලම්හි එහිති.
16. තතො පදක්ඛිණං කත්වා බොධිමණ්ඩං අනුත්තරො අස්සත්ථරුක්ඛමූලම්හි බුජ්ඣිස්සති මහායසො.
17. ඉමස්ස ජනිකා මාතා මායා නාම භවිස්සති පිතා සුද්ධොදනො නාම අයං හෙස්සති ගොතමො.
18. කොලිතො උපතිස්සො ච අග්ගා හෙස්සන්ති සාවකා ආනන්දො නාමු’ පට්ඨාකො උපට්ඨිස්සති තං ජිනං.
19. ඛෙමා උප්පලවණ්ණා ච අග්ගා හෙස්සන්ති සාවිකා බොධි තස්ස භගවතො අස්සත්ථො’ති පවුච්චති.
20. චිත්තො ච හත්ථාළවකො අග්ගා හෙස්සන්තු’ පට්ඨකා උත්තරා නන්දමාතා ච අග්ගා හෙස්සන්තු’ පට්ඨිකා ආයු වස්සසතං තස්ස ගොතමස්ස යසස්සිනො.
21. ඉදං සුත්වාන වචනං අසමස්ස මහෙසිනො ආමොදිතා නරමරූ බුද්ධබීජඞ්කුරො අයං.
22. උක්කුට්ඨිසද්දං වත්තෙන්ති අප්ඵොටෙන්ති හසන්ති ච කතඤ්ජලී නමස්සන්ති දසසහස්සී සදෙවකා.
23. යදි’මස්ස ලොකනාථස්ස විරජ්ඣිස්සාම සාසනං අනාගතම්හි අද්ධානෙ හෙස්සාම සම්මුඛා ඉමං.
24. යථා මනුස්සා නදිං තරන්තා පටිතිත්ථං විරජ්ඣිය හෙට්ඨා තිත්ථෙ ගහෙත්වාන උත්තරන්ති මහානදිං.
25. එව’මෙව මයං සබ්බෙ යදි මුඤ්චාමි’ මං ජිනං අනාගතම්හි අද්ධානෙ හෙස්සාම සම්මුඛා ඉමං.
26. තස්සා’පි වචනං සුත්වා භිය්යො චිත්තං පසාදයිං උත්තරිං වත’මධිට්ඨාසිං දසපාරමිපූරියා.
27. තදා’පි මං{1} බුද්ධධම්මං සරිත්වා අනුබ්රූහයිං ආහරිස්සාමි තං ධම්මං යං මය්හං{2} අභිපත්ථිතං.
28. නගරං සුධඤ්ඤවති{3} නාම විපුලො නාම ඛත්තියො විපුලා නාම ජනිකා රෙවතස්ස මහෙසිනො.
29. ඡබ්බස්සසහස්සානි{4} අගාරමජ්ඣ සො වසී සුදස්සනො ච රතනග්ඝි{5} ආවෙළො{6} ච විභූසිතො පුඤ්ඤකම්මාභිනිබ්බත්තා තයො පාසාද මුත්තමා.
30. තෙත්තිංස සහස්සානි{7} නාරියො සමලඞ්කතා සුදස්සනා නාම දෙවී වරුණො නාම අත්රජො.
31. නිමිත්තෙ චතුරො දිස්වා රථයානෙන නික්ඛමි අනූනසත්තමාසානි පධානං පදහී ජිනො.
32. බ්රහ්මුනා යාචිතො සන්තො රෙවතො ලොක නායකො වත්ති චක්කං මහාවීරො වරුණා රාමෙ සිරීඝරෙ.{8}
33. වරුණො බ්රහ්මදෙවො ච අහෙසුං අග්ග සාවකා සම්භවො නාමුපට්ඨාකො රෙවතස්ස මහෙසිනො.
34. භද්දා චෙව සුභද්දා ච අහෙසුං අග්ගසාවිකා සො’පි බුද්ධො අසමසමො නාගමූලෙ අබුජ්ඣථ.
35. පදුමො කුඤ්ජරො චෙව අහෙසුං අග්ගු’පට්ඨකා සිරිමා චෙව යසවතී අහෙසුං අග්ගු’පට්ඨිකා.
36. උච්චත්තනෙන{9} සො බුද්ධො අසීති හත්ථ මුග්ගතො ඔභාසෙති දිසා සබ්බා ඉන්දකෙතූව උග්ගතො.
37. තස්ස සරීරෙ නිබ්බත්තා පභා මාලා අනුත්තරා දිවා වා යදිවා රත්තිං සමන්තා ඵරති{1} යොජනං.{2}
38. සට්ඨිවස්සසහස්සානි ආයු විජ්ජති තාවදෙ තාවතා තිට්ඨමානො සො තාරෙසි ජනතං බහුං.
39. දස්සයිත්වා බුද්ධබලං අමතං ලොකෙ පකාසයං නිබ්බායි අනුපාදානො යථ’ග්ගු’පාදානසඞ්ඛයා.
40. සො ච කායො රතනනිභො සො ච ධම්මො අසාදිසො සබ්බං සමන්තරහිතං නනු රිත්තා සබ්බසඞ්ඛාරා.
41. රෙවතො යසධරො බුද්ධො නිබ්බුතො සො මහාමුනි{3} ධාතුවිත්ථාරිකං ආසී තෙසු තෙසු පදෙසතො’ති.
රෙවත බුද්ධවංසො පඤ්චමො.
6. සොභිත බුද්ධවංසො
1. රෙවතස්ස අපරෙන සොභිතො නාම නායකො සමාහිතො සන්තචිත්තො අසමො අප්පටිපුග්ගලො.
2. සො ජිනො සකගෙහම්හි මානසං විනීවට්ටයී{1} පත්වාන කෙවලං බොධිං ධම්මචක්කං පවත්තයී{2}.
3. යාව හෙට්ඨා අවීචිතො භවග්ගාචා’පි උද්ධතො{3} එත්ථන්තරෙ එකපරිසා අහොසි ධම්මදෙසනෙ.
4. තාය පරිසාය සම්බුද්ධො ධම්මචක්කං පවත්තයී ගණනාය න වත්තබ්බො පඨමා’භිසමයො අහු.
5. තතො පරම්පි දෙසෙන්තෙ{4} මරූනං ච{5} සමාගමෙ නවුතිකොටිසහස්සානං දුතියා’භිසමයො අහු.
6. පුනාපරං රාජපුත්තො ජයසෙනො නාම ඛත්තියො ආරාමං රොපයිත්වාන බුද්ධෙ නියාදයි තදා.
7. තස්ස යාගං පකිත්තෙන්තො ධම්මං දෙසෙසි චක්ඛුමා තදා කොටිසහස්සානං තතියා’භිසමයො අහු.
8. සන්නිපාතා තයො ආසුං සොභිතස්ස මහෙසිනො ඛීණාසවානං විමලානං සන්තචිත්තාන’තාදිනං.
9. උග්ගතො නාම සො රාජා දානං දෙති නරුත්තමෙ තම්හි දානෙ සමාගඤ්ඡුං අරහන්තා සතකොටියො.
10. පුනාපරං පුරගණො{6} දෙති දානං නරුත්තමෙ තදා නවුතිකොටීනං දුතියො ආසි සමාගමො.