114. යථා ආපන්නසත්තානං භාරමොරොනං ධුවං තථෙව බුද්ධසෙට්ඨානං වචනං ධුවසස්සතං විතථං නත්ථි බුද්ධානං ධුවං බුද්ධො භවාමහං
115. හන්ද බුද්ධකරෙ ධම්මෙ විවිනාමි ඉතො චිතො උද්ධං අධො දසදිසා යාවතා ධම්මධාතුයා,
116. විචිනන්තො තදා දක්ඛිං{1} පඨමං දානපාරමිං පුබ්බකෙහි මහෙසීහි අනුචිණ්ණං මහාපථං.
117. ඉමං ත්වං පඨමං තාව දළ්හං කත්වා සමාදිය දානපාරමිතං ගච්ඡ යදි බොධිං පත්තුමිච්ඡසි.
118. යථා’පි කුම්භො සම්පුණ්ණො යස්ස කස්සචි අධොකතො වමතෙ උදකං නිස්සෙසං න තත්ථ පරිරක්ඛති
119. තථෙව යාචකෙ දිස්වා හීනමුක්කට්ඨමජ්ඣිමෙ දදාහි දානං නිස්සෙසං කුම්භො විය අධොකතො
120. න හෙ තෙ එත්තකායෙව බුද්ධධම්මා භවිස්සරෙ අඤ්ඤෙ’පි විචිනිස්සාමි යෙ ධම්මා බොධිපාචනා
121. විචිනන්තො තදාදක්ඛිං{1} දුතියං සීලපාරමිං පුබ්බකෙහි මහෙසීහි අසෙවිතනිසෙවිතං.
122. ඉමං ත්වං දුතියං තාව දළ්හං කත්වා සමාදිය සීලපාරමිතං ගච්ඡ යදි බොධිං පත්තුමිච්ඡසි.
123. යථාපි චමරී වාලං{2} කිස්මිචි{3} පතිලග්ගිතං උපෙති මරණං තත්ථ න විකොපෙති වාලධිං.
124. තථෙව ත්වං චතුසු භූමිසු සීලානි පරිපූරය පරිරක්ඛ සබ්බදා සීලං චමරී විය වාලධිං.
125. න හෙතෙ එත්තකායෙව බුද්ධධම්මා භවිස්සරෙ අඤ්ඤෙ’පි විචිනිස්සාමි යෙ ධම්මා බොධිපාචනා.
126. විචිනන්තො තදා දක්ඛිං තතියං නෙක්ඛම්මපාරමිං පුබ්බකෙහි මහෙසීහි ආසෙවිතනිසෙවිතං.
127. ඉමං ත්වං තතියං තාව දළ්හං කත්වා සමාදිය නෙක්ඛම්මපාරමි{1} ගච්ඡ යදි බොධිං පත්තුමිච්ඡසි.
128. යථා අන්දුඝරෙ පුරිසො චිරවුත්ථො දුඛද්දිතො ත තත්ථ රාගං අභිජනෙති මුත්තිං යෙව ගවෙසති.
129. තථෙව ත්වං සබ්බභවෙ පස්ස අන්දුඝරෙ විය නෙක්ඛම්මාභිමුඛො හොහි භවතො පරිමුත්තියා.
130. න හෙතෙ එත්තකායෙව, බුද්ධධම්මා භවිස්සරෙ අඤ්ඤෙ’පි විචිනිස්සාමි යෙ ධම්මා බොධිපාචනා.
131. විචිනන්තො තදා දක්ඛිං චතුත්ථං පඤ්ඤාපාරමිං පුබ්බකෙහි මහෙසීහි ආසෙවිතනිසෙවිතං.
132. ඉමං ත්වං චතුත්ථං තාව දළ්හං කත්වා සමාදිය පඤ්ඤාපාරමිතං{2} ගච්ඡ යදි බොධිං පත්තුමිච්ඡසි.
133. යථා’පි{3} භික්ඛු භික්ඛන්තො හීනමුක්කට්ඨමජ්ඣිමෙ කුලානි න විවජ්ජෙන්තො එවං ලභති යාපනං.
134. තථෙව ත්වං සබ්බකාලං පරිපුච්ඡන්තො බුධං ජනං පඤ්ඤාපාරමිතං{2} ගන්ත්වා සම්බොධිං පාපුණිස්සසි.
135. න හෙතෙ එත්තකායෙව බුද්ධධම්මා භවිස්සරෙ අඤ්ඤෙපි විචිනිස්සාමි යෙ ධම්මා බොධිපාචනා.
136. විචිනන්තො තදා දක්ඛිං පඤ්චමිං විරිය පාරමිං{4} පුබ්බකෙහි මහෙසීහි ආසෙවිතනිසෙවිතං.
137. ඉමං ත්වං පඤ්චමං තාව දළ්හං කත්වා සමාදිය විරිය පාරමිතං ගච්ඡ යදි බොධිං පත්තුමිච්ඡසි.
138. යථා’පි සීහො මිගරාජා නිසජ්ජට්ඨානචඞ්කමෙ අලීනචිරියො හොති පග්ගහිතමනො තදා
139. තථෙව ත්වං{1} සබ්බභවෙ පග්ගණ්හ විරියං දළ්හං විරියපාරමිතං ගන්ත්වා සම්බොධිං පාපුණිස්සසි.
140. න හෙතෙ එත්තකායෙව බුද්ධධම්මා භවිස්සරෙ අඤ්ඤෙ’පි විචිනිස්සාමි යෙ ධම්මා බොධිපාචනා.
141. විචිනන්තො තදා දක්ඛිං ඡට්ඨමං ඛන්තිපාරමිං පුබ්බකෙහි මහෙසීහි ආසෙවිතනිසෙවිතං.
142. ඉමං ත්වං ඡට්ඨමං තාව දළ්හං කත්වා සමාදිය තත්ථ අද්වෙජ්ඣමනසො{2} සම්බොධිං පාපුණිස්සසි.
143. යථා’පි පඨවී{3} නාම සුචිම්පි අසුචිම්පි ච සබ්බං සහති නික්ඛෙපං න කරොති පටිඝං දයං{4}
144. තථෙ’ව ත්වම්පි සබ්බෙසං සම්මානාවමානක්ඛමො{5} ඛන්තිපාරමිතං ගන්ත්වා සම්බොධිං පාපුණිස්සසි.
145. න හෙතෙ එත්තකායෙව බුද්ධධම්මා භවිස්සරෙ අඤ්ඤෙපි විචිනිස්සාමි යෙ ධම්මා බොධිපාචනා.
146. විචිනන්තො තදා දක්ඛිං සත්තමං සච්චපාරමිං පුබ්බකෙහි මහෙසීහි ආසෙවිතනිසෙවිතං.
147. ඉමං ත්වං සත්තමං තාව දළ්හං කත්වා සමාදිය තත්ථ අද්වෙජ්ඣවචනො සම්බොධිං පාපුණිස්සසි.
148. යථා’පි ඔසධී නාම තුලාභූතා සදෙවකෙ සමයෙ උතුවස්සෙ{1} වා නෙවොක්කමති{2} වීථිතො.
149. තථෙ’ව ත්වම්පි සච්චෙසු මා ඔක්කමි හි{3} වීථිතො සච්චපාරමිතං ගන්ත්වා සම්බොධිං පාපුණිස්සසි.
150. න හෙතෙ එත්තකායෙව බුද්ධධම්මා භවිස්සරෙ අඤ්ඤෙ’පි විචිනිස්සාමි යෙ ධම්මා බොධිපාචනා.
151. විචිනන්තො තදා දක්ඛිං අට්ඨමං අධිට්ඨානපාරමිං පුබ්බකෙහි මහෙසීහි ආසෙවිතනිසෙවිතං.
152. ඉමං ත්වං අට්ඨමං තාව දළ්හං කත්වා සමාදිය තත්ථ ත්වං අචලො හුත්වා සම්බොධිං පාපුණිස්සසි.
153. යථා’පි පබ්බතො සෙලො අචලො සුප්පතිට්ඨිතො න කම්පති භුසවාතෙහි සකට්ඨානෙ’ව තිට්ඨති.
154. තථෙ’ච ත්වම්පි අධිට්ඨානෙ සබ්බදා අචලො භව අධිට්ඨානපාරමිං{4} ගන්ත්වා සම්බොධිං පාපුණිස්සසි.
155. න හෙතෙ එත්තකායෙව බුද්ධධම්මා භවිස්සරෙ අඤ්ඤෙ’පි විචිනිස්සාමි යෙ ධම්මා බොධිපාචනා.
156. විචිනන්තො තදා දක්ඛිං නවමං මෙත්තාපාරමිං පුබ්බකෙහි මහෙසීහි ආසෙවිතනිසෙවිතං.
157. ඉමං ත්වං නවමං තාව දළ්හං කත්වා සමාදිය මෙත්තාය අසමො හොහි යදි බොධිං පත්තුමිච්ඡසි.
158. යථා’පි උදකං නාම කල්යාණෙ පාපකෙ ජනෙ සමං ඵරති සීතෙන පවාහෙති රජොමලං.{5}
159. තථෙ’ව ත්වම්පි හිතාහිතෙ{1} සමං මෙත්තාය භාවය මෙත්තාපාරමිතං ගන්ත්වා සම්බොධිං පාපුණිස්සසි.
160. න හෙතෙ එත්තකායෙව බුද්ධධම්මා භවිස්සරෙ අඤ්ඤෙ’පි විචිනිස්සාමි යෙ ධම්මා බොධිපාචනා.
161. විචිනන්තො තදා දක්ඛිං දසමං උපෙක්ඛාපාරමිං. පුබ්බකෙහි මහෙසීහි ආසෙවිතනිසෙවිතං.
162. ඉමං ත්වං අසමං තාව දළ්හං කත්වා සමාදිය තුලාභූතො දළ්හො හුත්වා සම්බොධිං පාපුණිස්සසි.
163. යථා’පි පඨවී{2} නාම නික්ඛිත්තං අසුචිං සුචිං උපෙක්ඛති උභොපෙතෙ කොපානුනයවජ්ජිතා.
164. තථෙ’ව ත්වම්පි සුඛදුක්ඛෙ තුලාභූතො සදා භව උපෙක්ඛාපාරමිං ගන්ත්වා සම්බොධිං පාපුණිස්සසි.
165. එත්තකායෙ’ව තෙ ලොකෙ යෙ ධම්මා බොධිපාචනා තතුද්ධං නත්ථි අඤ්ඤත්ර දළ්හං තත්ථ පතිට්ඨහ.
166. ඉමෙ ධම්මෙ සම්මසතො සභාවසරසලක්ඛණා.{3} ධම්මතෙජෙන වසුධා දසසහස්සී පකම්පථ.
167. චලති රවති පඨවී{4} උච්ඡුයන්තං ව පීළිතං{5} තෙලයන්තෙ යථා චක්කං එවං කම්පති මෙදිනී.
168. යාවතා පරිසා{6} ආසී බුද්ධස්ස පරිවෙසනෙ පවෙධමානා සා තත්ථ මුච්ඡිතා සෙති භූමියං.
169. ඝටානෙකසහස්සානි කුම්භීනඤ්ච සතා බහූ සඤ්චුණ්ණා මථිතා තත්ථ අඤ්ඤමඤ්ඤං පඝට්ටිතා.{7}
170. උබ්බිග්ගා තසිතා භීතා භන්තා බ්යාධිතමානසා මහාජනා සමාගම්ම දීපඞ්කරමුපාගමුං.
171. කිං භවිස්සති ලොකස්ස කල්යාණමථ පාපකං සබ්බො උපද්දුතො ලොකො තං විනොදෙහි චක්ඛුම.
172. තෙසං තදා සඤ්ඤපෙසි දීපඞ්කරො මහාමුනි විස්සත්ථා හොථ මා භාථ{1} ඉමස්මිං පඨවිකම්පනෙ.
173. යමහං අජ්ජ බ්යාකාසිං බුද්ධො ලොකෙ භවිස්සති එසො සම්මසති ධම්මං පුබ්බකං ජිනසෙවිතං
174. තස්ස සම්මසතො ධම්මං බුද්ධභූමිං අසෙසතො තෙනා’යං කම්පිතා පඨවී{2} දසසහස්සී සදෙවකෙ.
175. බුද්ධස්ස වචනං සුත්වා මනො නිබ්බායි තාවදෙ සබ්බෙ මං උපසඞ්කම්ම පුනාපි අභිවාදයුං{3}
176. සමාදියිත්වා බුද්ධගුණං දළ්හං කත්වාන මානසං දීපඞ්කරං නමස්සිත්වා ආසනා උට්ඨහිං තදා.
177. දිබ්බං මාසුසකං පුප්ඵං දෙවා මානුසකා උභො සමොකිරන්ති පුප්ඵෙහි වුට්ඨාහන්තස්ස ආසනා.
178. වෙදයන්ති ච තෙ සොත්ථිං දෙවා මානුසකා. උභො මහන්තං පත්ථිතං තුය්හං තං ලභස්සු යථිච්ඡිතං.
179. සබ්බීතියො විවජ්ජන්තු සොකො රොගො{4} විනස්සතු මා තෙ භවත්ථවන්තරායො{5} ඵුස ඛිප්පං බොධිමුත්තමං.
180. යථා’පි සමයෙ පත්තෙ පුප්ඵන්ති පුප්ඵිනො දුමා තථෙව ත්වං බුද්ධවීර බුද්ධඤාණෙන පුප්ඵසි.
181. යථා යෙ කෙචි සම්බුද්ධා පූරයුං දසපාරමී තථෙව ත්වං මහාවීර පූරය දසපාරමී.
182. යථා යෙ කෙචි සම්බුද්ධා බොධිමණ්ඩම්හි බුජ්ඣරෙ තථෙව ත්වං මහාවීර බුජ්ඣස්සු ජිනබොධියං.
183. යථා යෙ කෙචි සම්බුද්ධා ධම්මචක්කං පවත්තයුං තථෙව ත්වං මහාවීර ධම්මචක්කං පවත්තය.
184. පුණ්ණමාසෙ යථා චන්දො පරිසුද්ධො විරොචති තථෙව ත්වං පුණ්ණමනො විරොච දසසහස්සියං.
185. රාහුමුත්තො යථා සුරියො තාපෙන අභිරොචති{1} තථෙව ලොකා මුඤ්චිත්වා විරොච සිරියා තුවං.
186. යථා යා කාචි නදියො ඔසරන්ති මහොදධිං එවං සදෙවකා ලොකා ඔසරන්තු{2} තවන්තිකෙ.
187. තෙහි ථුතප්පසත්ථො{3} සො දසධම්මෙ සමාදිය තෙ ධම්මෙ පරිපූරෙන්තො පවනං පාවිසී{4} තදාති.
සුමෙධකථා නිට්ඨිතා
1. දීපඞ්කර බුද්ධවංසො
1. තදා තෙ භොජයිත්වාන සසඞ්ඝං ලොකනායකං උපගඤ්ඡුං සරණං තස්ස{1} දීපඞ්කරස්ස සත්ථුනො.
2. සරණාගමනෙ කඤ්චි නිවෙසෙති{2} තථාගතො කඤ්චි පඤ්චසු සීලෙසු සීලෙ දසවිධෙ පරං
3. කස්සචි දෙති සාමඤ්ඤං චතුරො ඵලමුත්තමෙ කස්සචි අසමෙ ධම්මෙ දෙති සො පටිසම්භිදා.
4. කස්සචි වරසමාපත්තියො අට්ඨ දෙති නරාසභො තිස්සො කස්සචි විජ්ජායො ඡළභිඤ්ඤා පවෙච්ඡති.
5. තෙන යොගෙන ජනකායං ඔවදි සො මහාමුනි තෙන විත්ථාරිකං ආසි ලොකනාථස්ස සාසනං
6. මහාහනූසභක්ඛන්ධො{3} දීපඞ්කරසනාමකො{4}. බහූ ජනෙ තාරයති පරිමොචෙති දුග්ගතිං.
7. බොධනෙය්යං ජනං දිස්වා සතසහස්සෙපි යොජනෙ ඛණෙන උපගන්ත්වාන බොධෙති තං මහාමුනි.
8. පඨමාභිසමයෙ බුද්ධො කොටිසතමබොධයි දුතියාභිසමයෙ නාථො නවුතිකොටිමබොධයී.
9. යදා ච දෙවභවනම්හි බුද්ධො ධම්මමදෙසයි නවුතිකොටිසහස්සානං තතියාභිසමයො අහු.
10. සන්නිපාතා තයො ආසුං දීපඞ්කරස්ස සත්ථුනො කොටිසතසහස්සානං පඨමො ආසි සමාගමො.
11. පුන නාරදකූටම්හි පවිවෙකගතෙ ජිනෙ ඛීණාසවා වීතමලා සමිංසු සතකොටියො.
12. යම්හි කාලෙ මහාවීරො සුදස්සනසිලුච්චයෙ නවුතිකොටිසහස්සෙහි පවාරෙසි{1} මහාමුනි.
13. [අහං තෙන සමයෙන ජටිලො උග්ගතාපනො අන්තලික්ඛම්හි චරණෙ පඤ්චාභිඤ්ඤාසු පාරගූ.{*}]
14. දසවීසසහස්සානං ධම්මාභිසමයො අහු එකද්වින්නං අභිසමයා ගණනාතො අසඞ්ඛියා.
15. විත්ථාරිකං බාහුජඤ්ඤං ඉද්ධං ඵීතං අහූ තදා දීපඞ්කරස්ස භගවතො සාසනං සුවිසොධිතං.
16. චත්තාරිසතසහස්සානි ඡළභිඤ්ඤා මහිද්ධිකා දීපඞ්කරං ලොකවිදුං පරිවාරෙන්ති සබ්බදා.
17. යෙ කෙචි තෙන සමයෙන ජහන්ති මානුසං භවං අප්පත්තමානසා සෙඛා ගරහිතා ව{2} භවන්ති තෙ.
18. සුපුප්ඵිතං පාවචනං අරහන්තෙහි තාදිහි ඛීණාසවෙහි විමලෙහි උපසොභති සබ්බදා{3}
19. නගරං රම්මවතී නාම සුදෙවො නාම ඛත්තියො සුමෙධා නාම ජානිකා දීපඞ්කරස්ස සත්ථුනො.
20. දසවස්සසහස්සානි අගාරමජ්ඣ සො{4} වසී හංසා කොඤ්චා මයූරා ච තයො පාසාදමුත්තමා.
21. තීණි සතසහානි නාරියො සමලඞ්කතා පදුමා නාම සා නාරී උසභක්ඛන්ධො නාම අත්රජො.
22. නිමිත්තෙ චතුරො දිස්වා හත්ථියානෙන නික්ඛමි අනූනදසමාසානි පධානං පදහි ජිනො.
23. පධානචාරං චරිත්වාන අබුජ්ඣි මානසං{1} මුනි බ්රහ්මුනා යාචිතො සන්නො දීපඞ්කරො මහාමුනි.
24. වත්ති චක්කං{2} මහාවීරො නන්දාමෙ සිරීඝරෙ{3} නිසින්නො සිරීසමූලම්හි අකා තිත්ථියමද්දනං.