43. ධම්මතළාකං මාපෙත්වා සීලං දත්වා විලෙපනං ධම්මදුස්සං නිවාසෙත්වා ධම්මමාලං විභජ්ජිය{1}
44. ධම්මවිමලමාදාසං ඨපයිත්වා මහාජනෙ කෙචි නිබ්බානං පත්ථෙන්තා පස්සන්තු මෙ අලඞ්කරං.
45. සීලකඤ්චුකං දත්වාන ඣානකවචවම්මිතං{2} ධම්මචම්මං පාරුපිත්වා දත්වා සන්තාහ’මුත්තමං.
46. සතිඵලකං දත්වාන තිඛිණං ඤාණකුන්තිමං ධම්මඛග්ගවරං දත්වා සීලං{3} සංසග්ගමද්දනං
47. තෙවිජ්ජ{1} භූසනං දත්වා ආවෙලං චතුරො ඵලෙ ඡළභිඤ්ඤාභරණං දත්වා ධම්මපුප්ඵිපිලන්ධනං.
48. සද්ධම්මපණ්ඩරච්ඡත්තං{2} දත්වා පාපනිවාරණං මාපයිත්වා’භයං{3} පුප්ඵං නිබ්බුතො සො සාවකො.
49. එසො හි සම්මා සම්බුද්ධො අප්පමෙය්යො දුරාසදො එසොහි ධම්මරතනො ස්වාක්ඛාතො එහිපස්සිකො.
50. එසො හි සඞ්ඝරතනො සුප්පටිපන්නො අනුත්තරො සබ්බං සමන්තරහිතං නනු රිත්තා සබ්බසඞ්ඛාරා.
51. සො කස්සපො ජිනවරො සත්ථා සෙත්යාරාමම්හි නිබ්බුතො තත්ථෙ’ව තස්ස ජිනථූපො යොජනුබ්බෙධමුග්ගතො’ති.
කස්සප බුද්ධවංසො චතුවීසතිමො.
25. ගොතම බුද්ධවංසො
1. අහමෙ’තරහි සම්බුද්ධො{1} ගොතමො සක්යවඩ්ඪනො{2} පධානං පදහිත්වාන පත්තො සම්බොධිමු’ත්තමං.
2. බ්රහ්මුනා යාචිතො සන්තො ධම්මචක්කං පවත්තයිං අට්ඨාරසන්නං කොටීනං පඨමා’භි සමයො අහු.
3. තතො පරඤ්ච දෙසෙන්තෙ නරමරූනං{3} සමාගමෙ ගණනාය න වත්තබ්බො දුතියා’භි සමයො අහු.
4. ඉධෙවා’හං එතරහි ඔවදිං මම{4} අත්රජං ගණනාය න වත්තබ්බො තතියා’භි සමයො අහු.
5. එකො’ව{5} සන්නිපාතො මෙ සාවකානං මහෙසිනං අඩ්ඪතෙළසසතානං භික්ඛුනාසි සමාගමො.
6. විරොචමානො විමලො භික්ඛුසඞ්ඝස්ස මජ්ඣගො දදාමී පත්ථිතං සබ්බං මණී’ව සබ්බකාමදො.
7. ඵලමා’කඞ්ඛමානානං භවච්ඡන්දජහෙසිනං චතුසච්චං පකාසෙමි{6} අනුකම්පාය පාණිනං.
8. දසවීසසහස්සානං ධම්මාභිසමයො අහු එකද්වින්නං අභිසමයො ගණනාතො අසඞ්ඛියො.
9. විත්ථාරිකං බාහුජඤ්ඤං{7} ඉද්ධං ඵීතං සුඵුල්ලිතං ඉධ මය්හං සක්යමුනිනො සාසනං සුවිසොධිතං
10. අනාසවා වීතරාගා සන්තචිත්තා සමාහිතා භික්ඛූ’නෙක සතා සබ්බෙ පරිවාරෙන්ති මං සදා
11. ඉදානි යෙ එතරහි ජහන්ති-මානුසං භවං අප්පත්තමානසා සෙඛා තෙ භික්ඛු විඤ්ඤූගරහිතා
12. අරියඤ්ජසං ථොමයන්තා සදා ධම්මරතා ජනා බුජ්ඣිස්සන්ති සතිමන්තො සංසාරසරිතා නරා.
13. නගරං කපිලවත්ථු මෙ රාජා සුද්ධොදනො පිතා මය්හං ජනෙත්තිකා මාතා මායා දෙවී’ති වුච්චති.
14. එකූනතිංස වස්සානි අගාරමජ්ඣහං වසිං රම්මො සුරම්මො සුභකො{1} තයො පාසාද මුත්තමා.
15. චත්තාරීස සහස්සානි නාරියො සමලඞ්කතා භද්දකච්චානා{2} නාම නාරී රාහුලො නාම අත්රජො.
16. නිමිත්තෙ චතුරො දිස්වා අස්සයානෙන නික්ඛමිං ඡබ්බස්සං පධානචාරං අචරිං දුක්කරං අහං.
17. බාරාණසියං ඉසිපතනෙ ජිනචක්කං පවත්තිතං{3} අහං ගොතම සම්බුද්ධො සරණො{4} සබ්බපාණිනං.
18. කොලිතො උපතිස්සො ච ද්වෙ භික්ඛු අග්ගසාවකා ආනන්දො නාමු’පට්ඨාකො සන්තිකාවචරො මම.
19. ඛෙමා උප්පලවණ්ණා ච භික්ඛුනී අග්ග සාවිකා චිත්තො ච හත්ථාළවකො අග්ගුපට්ඨාකු’පාසකා.
20. උත්තරා නන්දමාතා ච අග්ගුපට්ඨීකු’පාසිකා අහං අස්සත්ථමූලම්හි පත්තො සම්බොධි මුත්තමං.
21. බ්යාමප්පභා සදා මය්හං සොළසහත්ථමුග්ගතා{5} අප්පං වස්සසතං ආයු ඉදානෙ’තරහි විජ්ජති තාවතා තිට්ඨමානො’හං තාරෙමි ජනතං බහුං.
22. ඨපයිත්වාන ධම්මුක්කං{1} පච්ඡිමං ජනබොධනං අහ’ම්පි{2}න චිරස්සෙව සද්ධිං සාවකසඞ්ඝතො ඉධෙ’ව පරිනිබ්බිස්සං අග්ගී’වාහාරසඞ්ඛයා.
23. තානි ච අතුලතෙජානි ඉමානි ච දසබලානි ඉද්ධියො{3} අයං ච ගුණධරවරදෙහො{4} ද්වත්තිංස ලක්ඛණවිචිත්තො{5}.
24. දස දිසා පභාසෙත්වා සතරංසී’ව ජප්පභා සබ්බා සමන්තරහෙස්සන්ති නනු රිත්තා සබ්බසඞ්ඛාරා’ති.
ගොතම බුද්ධවංසො පඤ්චවීසතිමො.
බුද්ධපකිණ්ණක කණ්ඩො
1. අපරිමෙය්යෙ ඉතො කප්පෙ චතුරො ආසුං විනායකා තණ්හඞ්කරො මෙධඞ්කරො අථො’පි සරණඞ්කරො දීපඞ්කරො ච සම්බුද්ධො එකකප්පම්හි තෙ ජිනා.
2. දීපඞ්කරස්ස අපරෙන කොණ්ඩඤ්ඤො නාම නායකො එකො’ව එක කප්පම්හි තාරෙසි ජනතං බහුං.
3. දීපඞ්කරස්ස භගවතො කොණ්ඩඤ්ඤස්ස ච සත්ථුනො එතෙසං අන්තරා කප්පා ගණනාතො අසඞ්ඛියා.
4. කොණ්ඩඤ්ඤස්ස අපරෙන මඞ්ගලො නාම නායකො තෙසම්පි අන්තරා කප්පා ගණනාතො අසඞ්ඛියා.
5. මඞ්ගලො ච සුමනො ච රෙවතො සොභිතො මුනි තෙපි බුද්ධා එක කප්පෙ චක්ඛුමන්තො පභඞ්කරා.
6. සොභිතස්ස අපරෙන අනොමදස්සී මහායසො තෙසම්පි අන්තරා කප්පා ගණනාතො අසඞ්ඛියා.
7. අනොමදස්සී පදුමො නාරදො චා’පි නායකො තෙ’ පි බුද්ධා එකකප්පෙ තමන්තකාරකා මුනී.
8. නාරදස්ස අපරෙන පදුමුත්තරො නාම නායකො එකකප්පම්හි උප්පන්නො තාරෙසි ජනතං බහුං.
9. නාරදස්ස භගවතො පදුමුත්තරස්ස සත්ථුනො තෙසම්පි අන්තරා කප්පා ගණනාතො අසඞ්ඛියා.
10. කප්පසතසහස්සම්හි එකො ආසි මහාමුනි පදුමුත්තරො ලොකවිදූ ආහුතීනං පටිග්ගහො.
11. තිංසකප්පසහස්සම්හි දුවෙ ආසුං විනායකා සුමෙධො ච සුජාතො ච ඔරතො පදුමුත්තරා{1}.
12. අට්ඨාරසෙ කප්පසතෙ තයො ආසුං විනායකා පියදස්සී අත්ථදස්සී ධම්මදස්සී ච නායකා ඔරතො{1} ච සුජාතස්ස සම්බුද්ධා ද්විපදුත්තමා.
13. චතුනවුතෙ ඉතො කප්පෙ එකො ආසි මහාමුනි සිද්ධත්ථො සො ලොකවිදූ සල්ලකත්තො අනුත්තරො.
14. ද්වෙනවුතෙ ඉතො කප්පෙ දුවෙ ආසුං විනායකා තිස්සො ඵුස්සො ච සම්බුද්ධො අස්මා අප්පටි පුග්ගලා.
15. එකනවුතෙ ඉතො කප්පෙ විපස්සී නාම නායකො සො’පි බුද්ධො කාරුණිකො සත්තෙ මොචෙසි බන්ධනා.
16. එකතිංසෙ ඉතො කප්පෙ දුවෙ ආසුං විනායකා සිඛී ච වෙස්සභූ චෙ’ව අස්මා අප්පටිපුග්ගලා.
17. ඉමම්හි භද්දකෙ කප්පෙ තයො ආසුං විනායකා කකුසන්ධො{2} කොණාගමනො කස්සපො චා’පි නායකො අහ’මෙතරහි සම්බුද්ධො මෙත්තෙය්යො චා’පි හෙස්සති.
18. එතෙ’පි පඤ්ච සම්බුද්ධා{3} ධීරා ලොකානුකම්පකා එතෙසං ධම්මරාජූනං අඤ්ඤෙසං නෙක කොටිනං ආචික්ඛිත්වාන තං මග්ගං නිබ්බුතා තෙ සසාවකා’ති.
බුද්ධපකිණ්ණකකණ්ඩො නිට්ඨිතො.
ධාතුභාජනීය කථා
1. මහාගොතමො ජිනවරො කුසිනාරාය{1} නිබ්බුතො ධාතු විත්ථාරිකං ආසි තෙසු තෙසු පදෙසතො.
2. එකො අජාතසත්තුස්ස එකො වෙසාලියාපුරෙ එකො කපිලවත්ථුම්හි එකො ච අල්ලකප්පකෙ.
3. එකො ච රාමගාමම්හි එකො ව වෙඨදීපකෙ එකො පාවෙය්යකෙ මල්ලෙ එකො ච කොසිනාරකෙ.
4. කුම්භස්ස ථූපං කාරෙසි බ්රාහ්මණො දොණ සව්හයො අඞ්ගාරථූපං කාරෙසුං මොරියා තුට්ඨ මානසා.
5. අට්ඨසාරීරිකා ථූපා නවමො කුම්භචෙතියො අඞ්ගාර ථූපො දසමො තදායෙව පතිට්ඨිතො.
6. එකා දාඨා තිදසපුරෙ එකා නාගපුරෙ අහු එකා ගන්ධාර විසයෙ එකා කාලිඞ්ගරාජිනො{a}
7. චත්තාළීස සමාදන්තා කෙසා ලොමා ච සබ්බසො දෙවා හරිංසු එකෙකං චක්කවාළ පරම්පරා.
8. මධුරායං භගවතො පත්තො දණ්ඩඤ්ච චීවරං නිවාසනං කුසඝරෙ පච්චත්ථරණං කපිලව්හයෙ.
9. පාටලිපුත්තනගරෙ කරකං කායබන්ධනං චම්පායමුදකසාටිකා උණ්ණලොමඤ්ච කොසලෙ.
10. කාසාවඤ්ච බ්රහ්මලොකෙ වෙඨනං තිදසෙ පුරෙ පාසාණකෙ පදං සෙට්ඨං යඤ්චාපි අච්චුතිප්පදං නිසීදනං අවන්ති පුරෙ රට්ඨෙ අත්ථරණං තදා
11. අරණී ච මිථිලායං විදෙහෙ පරිස්සාවනං වාසි සූචිඝරඤ්චා’පි ඉන්දපත්තෙ පුරෙ තදා.
12. පරික්ඛාරං අවසෙසං ජනපදෙ අපරන්තකෙ පරිභුත්තඤ්ච මුනිනා අකංසු මනුජා තදා.
13. ධාතු විත්ථාරිකං ආසි ගොතමස්ස මහෙසිනො පාණිනං අනුකම්පාය ආහු පොරාණිකා තදා.
ධාතුභාජනීයකථා නිට්ඨිතා.
බුද්ධවංසො නිට්ඨිතො.