25. සුමඞ්ගලො ච තිස්සො ච අහෙසුං අග්ගසාවකා සාගතො නාමුපට්ඨාකො දීපඞ්කරස්ස සත්ථුනො
26. නන්දා චෙව සුනන්දා ච අහෙසුං අග්ගසාවිකා බොධි තස්ස භගවතො පිප්ඵලීති පවුච්චති.
27. තපුස්ස භල්ලිකා{4} නාම අහෙසුං අග්ගූපට්ඨකා සිරිමා සොණා උපට්ඨිකා දීපඞ්කරස්ස සත්ථුනො.
28. අසීති හත්ථමුබ්බෙධො දීපඞ්කරො මහාමුනි {*}සොභති දීපරුක්ඛො’ව සාලරාජා’ව ඵුල්ලිතො
29. සතවස්සසහස්සානි{5} ආයු{6} තස්ස මහෙසිනො තාවතා තිට්ඨමානො සො තාරෙසි ජනතං බහුං.
30. ජොතයිත්වාන සද්ධම්මං සන්තාරෙත්වා මහාජනං{7} ජලිත්වා අග්ගික්ඛන්ධො’ව නිබ්බුතො සො සසාවකො
31. සා ච ඉද්ධි සො ච යසො තානි ච පාදෙසු චක්කරතනානි සබ්බං සමන්තරහිතං නනු රිත්තා සබ්බසඞ්ඛාරාති.
32. දීපඞ්කරො ජිනො සත්ථා නන්දාරාමම්හි නිබ්බුතො තත්ථෙව තස්ස ජිනථූපො ඡත්තිංසුබ්බෙධයොජනොති.
දීපඞ්කරබුද්ධවංසො පඨමො.
2. කොණ්ඩඤ්ඤ බුද්ධවංසො
1. දීපඞ්කරස්ස අපරෙන කොණ්ඩඤ්ඤො නාම නායකො අනන්තතෙජො අමිතයසො අප්පමෙය්යො දුරාසදො
2. ධරණුපමො{1} ඛමනෙන සීලෙන සාගරූපමො සමාධිනා මෙරූසමො{2} ඤාණෙන ගගනූපමො.
3. ඉන්ද්රියබලබොජ්ඣඞ්ග - මග්ගසච්චප්පකාසනං පකාසෙසි සදා බුද්ධො හිතාය සබ්බපාණිනං
4. ධම්මචක්කං පවත්තෙන්තෙ{3} කොණ්ඩඤ්ඤෙ ලොකනායකෙ කොටිසතසහස්සානං පඨමාභිසමයො අහු.
5. තතො පරම්පි දෙසෙන්තෙ නරමරූනං සමාගමෙ නවුතිකොටිසහස්සානං දුතියාභිසමයො අහු.
6. තිත්ථියෙ අභිමද්දන්තො යදා ධම්මමදෙසයි අසීතිකොටිසහස්සානං ධම්මාභිසමයො{4} අහූ.
7. සන්නිපාතා තයො ආසුං කොණ්ඩඤ්ඤස්ස මහෙසිනො ඛීණාසවානං විමලානං සන්තචිත්තාන තාදිනං.
8. කොටිසතසහස්සානං පඨමො ආසි සමාගමො දුතියො කොටිසහස්සානං තතියො නවුතිකොටිනං.
9. අහං තෙන සමයෙන විජිතාවී නාම ඛත්තියො සමුද්දං අන්තමන්තෙන{5} ඉස්සරියං{6} වත්තයාමහං.
10. කොටිසතසහස්සානං විමලානං මහෙසිනං සහ ලොකග්ගානාථෙන පරමන්නෙන තප්පයිං.
11. සො’පි මං බුද්ධො ව්යාකාසි කොණ්ඩඤ්ඤො ලොකනායකො අපරිමෙය්යෙ ඉතො{1} කප්පෙ බුද්ධො ලොකෙ භවිස්සති.
12. අහු කපිලව්හයා රම්මා නික්ඛමිත්වා තථාගතො පධානං පදහිත්වාන කත්වා දුක්කරකාරිකං.
13. අජපාලරුක්ඛමූලස්මිං නිසීදිත්වා තථාගතො තත්ථ පායාසමග්ගය්හ නෙරඤ්ජරමුපෙහිති.
14. නෙරඤ්ජරාය තීරම්හි පායාසං ආදාය සො ජිනො පටියත්තවරමග්ගෙන බොධිමූලම්හි එහිති.
15. තතො පදක්ඛිණං කත්වා බොධිමණ්ඩං අනුත්තරො අස්සත්ථරුක්ඛමූලම්හි බුජ්ඣිස්සති මහායසො.
16. ඉමස්ස ජනිකා මාතා මායා නාම භවිස්සති පිතා සුද්ධොදනො නාම අයං හෙස්සති ගොතමො.
17. කොලිතො උපතිස්සො ච අග්ගා හෙස්සන්ති සාවකා ආනන්දො නාමුපට්ඨාකො උපට්ඨිස්සති තං ජිනං.
18. ඛෙමා උප්පලවණ්ණා ච අග්ගා හෙස්සන්ති සාවිකා බොධි තස්ස භගවතො අස්සත්ථො’ති පවුච්චති.
19. චිත්තො ච හත්ථාළවකො අග්ගාහෙස්සන්තුපට්ඨකා උත්තරා නන්දමාතා ච{2} අග්ගා හෙස්සන්තුපට්ඨිකා. ආයු වස්සසතං තස්ස ගොතමස්ස යසස්සිනො.
20. ඉදං සුත්වාන වචනං අසමස්ස මහෙසිනො ආමොදිතා නරමරූ බුද්ධබීජඞ්කුරො අයං.
21. උක්කුට්ඨීසද්දා වත්තෙන්ති අප්ඵොටෙන්ති හසන්ති ච කතඤ්ජලී නමස්සන්ති දසසහස්සී සදෙවකා.
22. යදිමස්ස ලොකනාථස්ස විරජ්ඣිස්සාම සාසනං අනාගතම්හි අද්ධානෙ හෙස්සාම සම්මුඛා ඉමං.
23. යථා මනුස්සා නදිං තරන්තා පටිතිත්ථං විරජ්ඣිය හෙට්ඨා තිත්ථෙ ගහෙත්වාන උත්තරන්ති මහානදිං.
24. එවමෙව මයං සබ්බෙ යදි මුඤ්චාමිමං ජිනං අනාගතම්හි අද්ධානෙ හෙස්සාම සම්මුඛා ඉමං.
25. තස්සාහං වචනං සුත්වා භිය්යො චිත්තං පසාදයිං තමෙව අත්ථං සාධෙන්තො මහාරජ්ජං ජිනෙ අදං මහාරජ්ජං චජිත්වාන පබ්බජිං තස්ස සන්තිකෙ.
26. සුත්තන්තං විනයඤ්චා’පි නවඞ්ගං සත්ථුසාසනං සබ්බං පරියාපුණිත්වාන සොභයිං ජිනසාසනං.
27. තත්ථප්පමත්තො විහරන්තො නිසජ්ජට්ඨානචඞ්කමෙ අභිඤ්ඤාපාරමිං{1} ගන්ත්වා බ්රහ්මලොකමගච්ඡහං.
28. නගරං රම්මවතී නාම සුනන්දො නාම ඛත්තියො සුජාතා නාම ජනිකා කොණ්ඩඤ්ඤස්ස මහෙසිනො.
29. දසවස්සසහස්සානි අගාරමජ්ඣ සො වසී සුචි සුරුචි සුභො ච තයො පාසාදමුත්තමා{2}
30. තීණි සතසහස්සානි නාරියො සමලඞ්කතා රුචිදෙවී නාම නාරී විජිතසෙනො නාම අත්රජො.
31. නිමිත්තෙ චතුරො දිස්වා රථයානෙන නික්ඛමි අනූනදසමාසානි පධානං පදහී ජිනො.
32. බ්රහ්මුනා යාචිතො සන්තො කොණ්ඩඤ්ඤෙ දීපදුත්තමො{3} වත්ති චක්කං මහාවීරො දෙවානං නගරුත්තමෙ.
33. භද්දො චෙව සුභද්දො ච අහෙසුං අග්ගසාවකා අනුරුද්ධො නාමුපට්ඨාකො කොණ්ඩඤ්ඤස්ස මහෙසිනො.
34. තිස්සා ච උපතිස්සා ච අහෙසුං අග්ගසාවිකා සාලකල්යාණිකො බොධි කොණ්ඩඤ්ඤස්ස මහෙසිනො.
35. සොණො ච උපසොණො ච අහෙසුං අග්ගුපට්ඨකා නන්දා චෙව සිරිමා ච අහෙසුං අග්ගුපට්ඨිකා.
36. සො අට්ඨාසීති හත්ථානි අච්චුග්ගතො මහාමුනී සොභති{1} උළුරාජාව සුරියො මජ්ඣන්තිකෙ{2} යථා.
37. වස්සසතසහස්සානි ආයු විජ්ජති තාවදෙ තාවතා තිට්ඨමානො සො තාරෙසි ජනතං බහුං.
38. ඛීණාසවෙහි විමලෙහි විචිත්තා ආසි මෙදිනී යථාහි ගගනං උළුහි එවං සො උපසොභථ.
39. තෙපි නාගා අප්පමෙය්යා අසංඛොභා දුරාසදා විජ්ජුපාතංච දස්සෙත්වා නිබ්බුතා තෙ මහායසා.
40. සා ච අතුලියා ජිනස්ස ඉද්ධිඤාණපරිභාවිතො ච සමාධි සබ්බං සමන්තරහිතං නනු රිත්තා සබ්බසඞ්ඛාරා’ති.
41. කොණ්ඩඤ්ඤො පවරො බුද්ධො චන්දාරාමම්හි නිබ්බුතො තත්ථෙව චෙතියො චිත්තො සත්තයොජනමුස්සිතො’ති.
කොණ්ඩඤ්ඤ බුද්ධවංසො දුතියො.
3. මඞ්ගල බුද්ධවංසො
1. කොණ්ඩඤ්ඤස්ස අපරෙන මඞ්ගලො නාම නායකො, තමං ලොකෙ නිහන්ත්වාන, ධම්මුක්ක’මභිධාරයි.{1}
2. අතුලා’සි{2} පභා තස්ස, ජිනෙහ’ඤ්ඤෙහි උත්තරිං, චන්ද සුරියප්පභං{3} හන්ත්වා දස සහස්සී විරොචති.{4}
3. සො’පි බුද්ධො පකාසෙසි, චතුරො සච්චවරුත්තමෙ{5} තෙ තෙ සච්ච රසං පීත්වා, විනොදෙන්ති මහාතමං.
4. පත්වාන බොධි’මතුලං, පඨමෙ ධම්මදෙසනෙ, කොටිසතසහස්සානං, පඨමා’භිසමයො{6} අහු.
5. සුරින්දදෙවභවනෙ බුද්ධො ධම්මමදෙසයි,{7} නවකොටිසහස්සානං,{8} දුතියා’භිසමයො අහු.
6. යදා සුනන්දො චක්කවත්ති, සම්බුද්ධං උපසඞ්කමි, තදා අහනි සම්බුද්ධො, ධම්මභෙරිං වරුත්තමං.{9}
7. සුනන්දස්සා’නුචරා ජනතා, තදා’සුං නවුතිකොටියො, සබ්බෙ’පි තෙ නිරවසෙසා, අහෙසුං එහිභික්ඛුකා.
8. සන්නිපාතා තයො ආසුං, මඞ්ගලස්ස මහෙසිනො, කොටිසත සහස්සානං, පඨමො ආසි සමාගමො.
9. දුතියො කොටිසහස්සානං, තතියො නවුති කොටිනං, ඛීණාසවානං විමලානං, තදා ආසි සමාගමො.
10. අහං තෙන සමයෙන සුරුචී නාම බ්රාහ්මණො, අජ්ඣායකො මන්තධරො තිණ්ණං වෙදානං පාරගූ.
11. තමහං උපසඞ්කම්ම, සරණං ගන්ත්වාන සත්ථුනො, සම්බුද්ධපමුඛං සඞ්ඝං ගන්ධමාලෙන පූජයිං පූජෙත්වා ගන්ධමාලෙන ගවපානෙන තප්පයිං.
12. සො’පි මං බුද්ධො ව්යාකාසි මඞ්ගලො දිපදුත්තමො අපරිමෙය්යෙ ඉතො{1} කප්පෙ අයං බුද්ධො භවිස්සති.
13. අහු කපිලව්හයා රම්මා නික්ඛමිත්වා තථාගතො පධානං පදහිත්වාන කත්වා දුක්කරකාරිකං.{2}
14. අජපාලරුක්ඛමූලස්මිං නිසීදිත්වා තථාගතො තත්ථ පායාසමග්ගය්හ නෙරඤ්ජරමුපෙහිති.
15. නෙරඤ්ජරාය තීරම්හි පායාසං ආදාය සො ජිනො පටියත්තවරමග්ගෙන බොධිමූලම්හි එහිති.
16. තතො පදක්ඛිණං කත්වා බොධිමණ්ඩං අනුත්තරො අස්සත්ථරුක්ඛමූලම්හි බුජ්ඣිස්සති මහායසො.
17. ඉමස්ස ජනිකා මාතා මායා නාම භවිස්සති පිතා සුද්ධොදනො නාම අයං හෙස්සති ගොතමො.
18. කොලිතො උපතිස්සො ච අග්ගා හෙස්සන්ති සාවකා ආනන්දො නාමු පට්ඨාකො උපට්ඨිස්සති තං ජිනං.
19. ඛෙමා උප්පලවණ්ණා ච අග්ගා හෙස්සන්ති සාවිකා බොධි තස්ස භගවතො, අස්සත්ථො’ති පවුච්චති.
20. චිත්තො ච හත්ථාළවකො අග්ගා හෙස්සන්තු’පට්ඨකා උත්තරා නන්ද මාතා ච අග්ගා හෙස්සන්තු’පට්ඨිකා ආයු වස්ස සතං තස්ස, ගොතමස්ස යසස්සිනො.
21. ඉදං සුත්වාන වචනං අසමස්ස මහෙසිනො ආමොදිතා නරමරූ බුද්ධ බීජඞ්කුරො අයං.
22. උක්කුට්ඨි සද්දං වත්තෙන්ති අප්ඵොටෙන්ති{1} හසන්ති ච කතඤ්ජලී නමස්සන්ති දස්සසහස්සී සදෙවකා.
23. යදි’මස්ස ලොකනාථස්ස විරජ්ඣිස්සාම සාසනං අනාගතම්පි අද්ධානෙ හෙස්සාම සම්මුඛා ඉමං.
24. යථා මනුස්සා නදිං තරන්තා පටිතිත්ථං විරජ්ඣිය හෙට්ඨා තිත්ථෙ ගහෙත්වාන උත්තරන්ති{2} මහානදිං.
25. එව’මෙව මයං සබ්බෙ යදි මුඤ්චාමි’මං ජිනං අනාගතම්හි අද්ධානෙ හෙස්සාම සම්මුඛා ඉමං.
26. තස්සා’පි වචනං සුත්වා භිය්යො චිත්තං පසාදයිං උත්තරිං{2} වතමධිට්ඨාසිං දස පාරමි පූරියා.
27. තදා පීති{3} මනුබ්රූහන්තො සම්බොධිවර පත්තියා බුද්ධෙ දත්වාන මං ගෙහං පබ්බජිං{4} තස්ස සන්තිකෙ.
28. සුත්තන්තං විනයඤ්චා’පි නවඞ්ගං සත්ථුසාසනං සබ්බං පරියාපුණිත්වාන{5} සොභයිං{6} ජිනසාසනං.
29. තත්ථප්පමත්තො විහරන්තො බ්රහ්මං භාවෙත්ව{7} භාවනං අභිඤ්ඤා පාරමිං ගන්ත්වා බ්රහ්මලොකමගච්ඡහං.{8}
30. නගරං උත්තරං නාම{9} උත්තරො නාම ඛත්තියො, උත්තරා නාම ජනිකා මඞ්ගලස්ස මහෙසිනො.
31. නව වස්සසහස්සානි අගාර මජ්ඣෙ සො වසි යසවා සුචිමා සිරිමා’ තයො පාසාදමුත්තමා.
32. සමතිංස සහස්සානි’ නාරියො සමලඞ්කතා යසවතී නාම නාරී සීවලො නාම අත්රජො.
33. නිමිත්තෙ චතුරො දිස්වා අස්ස යානෙන නික්ඛමි, අනූනකං අට්ඨමාසං{1} පධානං පදහී ජිනො.
34. බ්රහ්මුනා යාචිතො සත්තො මඞ්ගලො ලොකනායකො{2} වත්ති චක්කං මහාවීරො වනෙ සිරි වරුත්තමෙ.
35. සුදෙවො ධම්මසෙනො ච අහෙසුං අග්ගසාවකා, පාලිතො නාමුපට්ඨාකො මඞ්ගලස්ස මහෙසිනො.
36. සීවලා{3} ච අසොකා ච අහෙසුං අග්ගසාවිකා, බොධි තස්ස භගවතො නාගරුක්ඛොති වුච්චති.
37. නන්දො චෙව විසාඛො{4} ච අහෙසුං අග්ගු’පට්ඨකා, අනුලා චෙව සුතනා ච අහෙසුං අග්ගු’පට්ඨිකා.
38. අට්ඨාසීති රතනානි අච්චුග්ගතො මහාමුනී, තතො නිද්ධාවන්ති{5} රංසී අනෙකසතසහස්සියො.
39. නවුතිවස්සසහස්සානි{6} ආයු විජ්ජති තාවදෙ තාවතා තිට්ඨමානො සො තාරෙසි ජනතං බහුං.
40. යථා’පි සාගරෙ ඌමි න සක්කා තා ගණෙතුයෙ, තථෙ’ව සාවකා තස්ස න සක්කා තෙ ගණෙතුයෙ.
41. යාව අට්ඨාසි{7} සම්බුද්ධො මඞ්ගලො ලොකනායකො, න තස්ස සාසනෙ අත්ථි සංකිලෙස{8} මරණං තදා.
42. ධම්මුක්කං{9} ධාරයිත්වාන සන්තාරෙත්වා මහාජනං, ජලිත්වා{10} ධුමකෙතූව නිබ්බුතො සො මහායසො.{11}
43. සඞ්ඛාරානං සහාවන්තං දස්සයිත්වා සදෙවකෙ, ජලිත්වා අග්ගික්ඛන්ධො’ව සුරියො අත්ථංගතො යථා.
44. උය්යානෙ වෙස්සරෙ{12} නාම බුද්ධො නිබ්බායි මඞ්ගලො, තත්ථෙ’ව තස්ස ජිනථූපො තිංස යොජනමුග්ගතො’ති.
මඞ්ගල බුද්ධවංසො තතියො.
4. සුමන බුද්ධවංසො
1. මඞ්ගලස්ස අපරෙන සුමනො නාම නායකො සබ්බධම්මෙහි අසමො සබ්බසත්තාන’ මුත්තමො.