14. එවං කිලෙසමලධොවං{2} විජ්ජන්තෙ අමතන්තළෙ න ගවෙසති තං තළාකං න දොසො අමතන්තළෙ.
15. යථා අරීහි පරිරුද්ධො විජ්ජන්තෙ ගමනංපථෙ{3}. න පලායති සො පුරිසො න දොසො අඤ්ජසස්ස සො.
16. එවං කිලෙසපරිරුද්ධො විජ්ජමානෙ සිවෙ පථෙ න ගවෙසති තං මග්ගං න දොසො සිවමඤ්ජසෙ.
17. යථ’පි බ්යාධිතො පුරිසො විජ්ජමානෙ තිකිච්ඡකෙ න තිකිච්ඡාපෙති තං ව්යාධිං න සො දොසො තිකිච්ඡකෙ.
18. එවං කිලෙසව්යාධීහි දුක්ඛිතො පරිපීළිතො{4}. න ගවෙසති තං ආචරියං න සො දොසො{5}. විනායකෙ.
19. යථා’පි කුණපං පුරිසො කණ්ඨෙ බද්ධං ජිගුච්ඡිය මොචයිත්වාන ගච්ඡෙය්ය සුඛී සෙරී සයං වසී.
20. තථෙ’විමං පූතිකායං නානා කුණපසඤ්චයං{6} ඡඩ්ඩයිත්වාන{7} ගච්ඡෙය්යං අනපෙඛො{8} අනත්ථිකො.
21. යථා උච්චාරඨානම්හි{9} කරීසං නරනාරියො ඡඩ්ඩයිත්ථාන{7} ගච්ඡන්ති අනපෙඛා අනත්ථිකා.
22. එවමෙවා’හං ඉමං කායං නානා කුණපපූරිතං ඡඩ්ඩයිත්වාන ගච්ඡිස්සං වච්චං කත්වා යථා කුටිං.
23. යථා’පි ජජ්ජරං නාවං පලුග්ගං උදකගාහිනිං{1} සාමී ඡඩ්ඩෙත්ව{2} ගච්ඡන්ති අනපෙඛා අනත්ථිකා.
24. එවමෙවාහං ඉමං කායං නවච්ඡිද්දං ධුවස්සවං ඡඩ්ඩයිත්වාන ගච්ඡිස්සං ඡින්නනාවං’ව සාමිකා.
25. යථා’පි පුරිසො චොරෙහි ගච්ඡන්තො භණ්ඩමාදිය භණ්ඩච්ඡෙදභයං දිස්වා ඡඩ්ඩයිත්වාන ගච්ඡති.
26. එවමෙවමයං කායො මහාචොරසමො විය පහායිමං ගමිස්සාමි කුසලච්ඡෙදනා භයා.
27. එවා’හං චින්තයිත්වාන නෙකකොටිසතං ධනං නාථානාථානං දත්වාන හිමවන්තමුපාගමිං.
28. හිමවන්තස්ස අවිදූරෙ{3} ධම්මකො නාම පබ්බතො අස්සමො සුකතො මය්හං පණ්ණසාලා සුමාපිතා.
29. චඞ්කමං තත්ථ මාපෙසි පඤ්චදොසවිවජ්ජිතං අට්ඨගුණසමුපෙතං අභිඤ්ඤාබලමාහරිං.
30. සාටකං පජහිං තත්ථ නවදොසමුපාගතං වාකචීරං නිවාසෙසිං ද්වාදසගුණමුපාගතං{4}
31. අට්ඨදොසසමාකිණ්ණං පජහිං පණ්ණසාලකං උපාගමිං රුක්ඛමූලං ගුණෙදසහුපාගතං{5}.
32. වාපිතං රොපිතං ධඤ්ඤං පජහිං නිරවසෙසතො අනෙකගුණසම්පන්නං පවත්තඵලමාදියිං.
33. තත්ථ පධානං{6} පදහිං නිසජ්ජට්ඨානචඞ්කමෙ අබ්භන්තරම්හි සත්තාහෙ අභිඤ්ඤාබලමපාපුණිං{7}
34. එවං මෙ සිද්ධිප්පත්තස්ස වසීභූතස්ස සාසනෙ දීපඞ්කරො නාම ජිනො උප්පජ්ජි ලොකනායකො.
35. උප්පජ්ජන්තෙ ච ජායන්තෙ බුජ්ඣන්තෙ ධම්මදෙසනෙ චතුරො නිමිත්තෙ නාද්දසං ඣානරතිසමප්පිතො.
36. පච්චන්තදෙසවිසයෙ නිමන්තෙත්වා තථාගතං තස්ස ආගමනං මග්ගං සොධෙන්ති තුට්ඨමානසා.
37. අහං තෙන සමයෙන නික්ඛමිත්වා සකස්සමා ධුනන්තො වාකචීරානි ගච්ඡාමි අම්බරෙ තදා.
38. වෙදජාතං ජනං දිස්වා තුට්ඨහට්ඨං පමොදිතං ඔරොහිත්වාන ගගනා මානුසෙ පුච්ඡිං තාවදෙ.
39. තුට්ඨහට්ඨො පමුදිතො “වෙදජාතො මහාජනො කස්ස සොධීයති මග්ගො අඤ්ජසං වටුමායනං.
40. තෙ මෙ පුට්ඨා බ්යාකරිංසු{1} බුද්ධො ලොකෙ අනුත්තරො දීපඞ්කරො නාම ජිනො උප්පජ්ජී ලොකනායකො. තස්ස සොධීයතො මග්ගො{2} අඤ්ජසං වටුමායනං.
41. බුද්ධො’ති මම සුත්වාන පීති උප්පජ්ජි තාවදෙ ‘බුද්ධො බුද්ධො’ති කථයන්තො සොමනස්සං පවෙදයිං.
42. තත්ථ ඨත්වා විචින්තෙසිං තුට්ඨො සංවිග්ගමානසො ඉධ බීජානි රොපිස්සං ඛණො චෙ මා උපච්චගා.
43. යදි බුද්ධස්ස සොධෙථ එකොකාසං දදාථ මෙ අහම්පි සොධයිස්සාමි අඤ්ජසං වටුමායනං.
44. අදංසු තෙ මමොකාසං සොධෙතුං අඤ්ජසං තදා ‘බුද්ධො බුද්ධො’ති චින්තෙන්තො මග්ගං සොධෙමහං තදා.
45. අනිට්ඨිතෙ මමොකාසෙ දීපඞ්කරො මහාමුනි චතූහි සතසහස්සෙහි ඡළභිඤ්ඤෙහි තාදිහි ඛීණාසවෙහි විමලෙහි පටිපජ්ජි අඤ්ජසං ජිනො.
46. පච්චුග්ගමනා වත්තන්ති වජ්ජන්ති භෙරියො බහු අමොදිතා නරමරූ සාධුකාරං පවත්තයුං.
47. දෙවා මනුස්සෙ පස්සන්ති මනුස්සාපි ච දෙවතා උභො’පි තෙ පඤ්ජලිකා අනුයන්ති තථාගතං.
48. දෙවා දිබ්බෙහි තුරියෙහි මනුස්සා මානුසෙහි{1} ච උභො’පි තෙ වජ්ජයන්තා අනුයන්තී තථාගතං.
49. දිබ්බං මන්දාරවං පුප්ඵං පදුමං පාරිච්ඡත්තකං දිසො දිසං ඔකිරන්ති ආකාසනභගතා මරූ.
50. චම්පකං සලලං නීපං නාගපුන්නාගකෙතකං දිසො දිසං උක්ඛිපන්ති භූමිතලගතා නරා.
51. කෙසෙ මුඤ්චිත්වහං තත්ථ වාකචීරඤ්ච චම්මකං කලලෙ පත්ථරිත්ථාන අවකුජ්ජො නිපජ්ජහං.
52. අක්කමිත්වාන මං බුද්ධො සහ සිස්සෙහි ගච්ඡතු මා නං කලලෙ අක්කමිත්ථො හිතාය මෙ භවිස්සති.
53. පඨවියං{2} නිපන්නස්ස එවං මෙ ආසි චෙතසො ඉච්ඡමානො අහං අජ්ජ කිලෙසෙ ඣාපයෙ මමං
54. කිං මෙ අඤ්ඤාතවෙසෙන ධම්මං සච්ඡිකතෙනිධ සබ්බඤ්ඤුතං පාපුණිත්වා බුද්ධො හෙස්සං සදෙවකෙ.
55. කිං මෙ එකෙන තිණ්ණෙන පුරිසෙන ථාමදස්සිනා සබ්බඤ්ඤුතං පාපුණිත්වා සන්තාරෙස්සං සදෙවකෙ.
56. ඉමිනා මෙ අධිකාරෙන කතෙන පුරිසුත්තමෙ සබ්බඤ්ඤුතං පාපුණිත්වා{3} තාරෙමි ජනතං බහු.
57. සංසාරසොතං ඡින්දිත්වා විද්ධංසෙත්වා තයො භවෙ ධම්මනාවං සමාරුය්හ සන්තාරෙස්සං සදෙවකෙ.
58. මනුස්සත්තං ලිඞ්ගසම්පත්ති හෙතු සත්ථාරදස්සනං පබ්බජ්ජාගුණසම්පත්ති අධිකාරො ච ඡන්දතා අට්ඨධම්මසමොධානා අභිනීහාරො සමිජ්ඣති.
59. දීපඞ්කරො ලොකවිදූ ආහුතීනං පටිග්ගහො උස්සීසකෙ මං ඨත්වාන ඉදං වචනමබ්රුවි.
60. පස්සථ ඉමං තාපසං ජටිලං උග්ගතාපනං අපරිමෙය්යෙ ඉතො කප්පෙ බුද්ධො ලොකෙ භවිස්සති.
61. අහු{1} කපිලව්හයා රම්මා නික්ඛමිත්වා තථාගතො පධානං පදහිත්වාන කත්වා දුක්කරකාරිකං{*}
62. අජපාලරුක්ඛමූලස්මිං නිසීදිත්වා තථාගතො{*} තත්ථ පායාසමග්ගය්හ{2} නෙරඤ්ජරමුපෙහිති
63. නෙරඤ්ජරාය තීරම්හි පායාසං ආදාය{3} සො ජිනො පටියත්තවරමග්ගෙන බොධිමූලං හි එහිති.
64. තතො පදක්ඛිණං කත්වා බොධිමණ්ඩං අනුත්තරො{4} අස්සත්ථරුක්ඛමූලම්හි බුජ්ඣිස්සති මහායසො.
65. ඉමස්ස ජනිකා මාතා මායා නාම භවිස්සති පිතා සුද්ධොදනො නාම අයං හෙස්සති ගොතමො.
66. අනාසවා වීතරාගා{5} සන්තචිත්තා සමාහිතා කොලිතො උපතිස්සො ච අග්ගා හෙස්සන්ති සාවකා.
67. ආනන්දො නාමුපට්ඨාකො උපට්ඨිස්සති තං ජිනං ඛෙමා උප්පලවණ්ණා ච අග්ගා හෙස්සන්ති සාවිකා.
68. අනාසවා වීතරාගා{5} සන්තචිත්තා සමාහිතා බොධි තස්ස භගවතො අස්සත්ථො’ති පවුච්චති.
69. චිත්තො ච හත්ථාළවකො අග්ගා හෙස්සන්තූපට්ඨකා උත්තරා නන්දමාතා ච අග්ගා හෙස්සන්තුපට්ඨිකා. ආයු වස්සසතං තස්ස ගොතමස්ස යසස්සිනො.
70. ඉදං සුත්වාන වචනං අසමස්ස මහෙසිනො ආමොදිතා නරමරූ බුද්ධබීජඞ්කුරො අයං.
71. උක්කුට්ඨිසද්දං වත්තෙන්ති{1} අප්ඵොටෙන්ති හසන්ති ච කතඤ්ජලී නමස්සන්ති දසසහස්සී සදෙවකා.
72. යදිමස්ස ලොනාථස්ස විරජ්ඣිස්සාම සාසනං අනාගතම්හි අද්ධානෙ හෙස්සාම සම්මුඛා ඉමං.
73. යථා මනුස්සා නදිං තරන්තා පටිතිත්ථං විරජ්ඣිය හෙට්ඨා තිත්ථෙ ගහෙත්වාන උත්තරන්ති මහානදිං.
74. එවමෙව මයං සබ්බෙ යදිමුඤ්චාමිමං ජිනං අනාගතම්හි අද්ධානෙ හෙස්සාම සම්මුඛා ඉමං.
75. දීපඞ්කරො ලොකවිදූ ආහුතීනං පටිග්ගහො මම කම්මං පකිත්තෙත්වා දක්ඛිණං පදමුද්ධරි.
76. යෙ තත්ථාසුං ජිනපුත්තා පදක්ඛීණමකංසු මං දෙවා මනුස්සා අසුරා ච අභිවාදෙත්වාන පක්කමුං.
77. දස්සනං මෙ අතික්කන්තෙ සසඞ්ඝෙ ලොකනායකෙ සයනා වුට්ඨහිත්වාන පල්ලඞ්කමාභුජිං තදා.
78. සුඛෙන සුඛිතො හොමි පාමොජ්ජෙන පමොදිතො පීතියා ච අභිස්සන්තො පල්ලඞ්කං ආභුජිං තදා.
79. පල්ලඞ්කෙන නිසීදිත්වා එවං චින්තෙසහං තදා වසීභූතො අහං ඣානෙ අභිඤ්ඤාපාරමිං ගතො.
80. සහස්සියම්හි ලොකම්හි ඉසයො නත්ථි මෙ සමා අසමො ඉද්ධිධම්මෙසු අලභිං ඊදිසං සුඛං.
81. පල්ලඞ්කාභූජෙන මය්හං දසසහස්සාධිවාසිනො මහානාදං පවත්තෙසුං ධුවං බුද්ධො භවිස්සසි.
82. යා පුබ්බෙ බොධිසත්තානං පල්ලඞ්කවරමාභුජෙ නිමිත්තානි පදිස්සන්ති තානි අජ්ජ පදීස්සරෙ.
83. සීතං ව්යපගතං හොති උණ්හඤ්ච උපසම්මති තානි අජ්ජ පදිස්සන්ති ධුවං බුද්ධො භවිස්සසි.
84. දසසහස්සී ලොකධාතු නිස්සද්දා හොති නිරුකුලා තානි අජ්ජ පදිස්සන්ති ධුවං බුද්ධො භවිස්සසි.
85. මහාවාතා න වායන්ති න සන්දන්ති සවන්තියො තානි අජ්ජ පදිස්සන්ති ධුවං බුද්ධො භවිස්සසි.
86. ථලජා දකජා පුප්ඵා සබ්බෙ පුප්ඵන්ති තාවදෙ තෙපජ්ජ පුප්ඵිතා සබ්බෙ ධුවං බුද්ධො භවිස්සසි.
87. ලතා වා යදි වා රුක්ඛා ඵලභාරා හොන්ති තාවදෙ තෙපජ්ජ ඵලිතා සබ්බෙ ධුවං බුද්ධො භවිස්සසි.
88. ආකාසට්ඨා ච භුම්මට්ඨා රතනා ජොතන්ති තාවදෙ තෙපජ්ජ රතනා ජොතන්ති ධුවං බුද්ධො භවිස්සසි.
89. මානුසකා ච දිබ්බා ච තුරියා වජ්ජන්ති තාවදෙ තෙපජ්ජුභො අභිරවන්ති ධුවං බුද්ධො භවිස්සසි.
90. විචිත්තපුප්ඵා ගගනා අභිවස්සන්ති තාවදෙ තෙපි අජ්ජ පදිස්සන්ති ධුවං බුද්ධො භවිස්සසි.
91. මහාසමුද්දො ආභුජති දසසහස්සී පකම්පති තෙපජ්ජුභො අභිරවන්ති ධුවං බුද්ධො භවිස්සසි.
92. නිරයෙසු දසසහස්සී{1} අග්ගී නිබ්බන්ති තාවදෙ තෙපජ්ජ නිබ්බුතා අග්ගී ධුවං බුද්ධො භවිස්සසි.
93. විමලො හොති සුරියො සබ්බා{2} දිස්සන්ති තාරකා තෙ’පි අජ්ජ පදිස්සන්ති ධුවං බුද්ධො භවිස්සසි.
94. අනොවට්ඨෙන උදකං මහියා උබ්හිජ්ජි තාවදෙ තම්පජ්ජුබ්හිජ්ජතෙ මහියා ධුවං බුද්ධො භවිස්සසි.
95. තාරාගණා විරොචන්ති නක්ඛත්තා ගගනමණ්ඩලෙ විසාඛා චන්දිමයුත්තා ධුවං බුද්ධො භවිස්සසි.
96. බිලාසයා දරීසයා නික්ඛමන්ති සකාසයා තෙපජ්ජ ආසයා ඡුද්ධා ධුවං බුද්ධො භවිස්සසි.
97. න හොති අරති සත්තානං සන්තුට්ඨා හොන්ති තාවදෙ. තෙපජ්ජ සබ්බෙ සන්තුට්ඨා ධුවං බුද්ධො භවිස්සසි.
98. රොගා තදුපසම්මන්ති ජිගච්ඡා ච විනස්සති තානි අජ්ජ පදිස්සන්ති ධුවං බුද්ධො භවිස්සසි.
99. රාගො තදා තනු හොති දොසො මොහො විනස්සති තෙ’ පජ්ජ විගතා සබ්බෙ ධුවං බුද්ධො භවිස්සසි.
100. භයං තදා න භවති අජ්ජපෙතං පදිස්සති තෙන ලිඞ්ගෙන ජානාම ධුවං බුද්ධො භවිස්සසි.
101. රජොනුද්ධංසති උද්ධං අජ්ජපෙතං පදිස්සති තෙන ලිඞ්ගෙන ජානාම ධුවං බුද්ධො භවිස්සසි.
102. අනිට්ඨගන්ධො පක්කමති දිබ්බගන්ධෙ පවායති සොපජ්ජ වායති ගන්ධො ධුවං බුද්ධො භවිස්සසි.
103. සබ්බෙ දෙවා පදිස්සන්ති ඨපයිත්වා අරූපිනො තෙ’පජ්ජ සබ්බෙ දිස්සන්ති ධුවං බුද්ධො භවිස්සසි.
104. යාවතා නිරයා නාම සබ්බෙ දිස්සන්ති තාවදෙ තෙ’පජ්ජ සබ්බෙ දිස්සන්ති ධුවං බුද්ධො භවිස්සසි.
105. කුඩ්ඩා කවාටා සෙලා ච න හොන්තාවරණා{1} තදා ආකාසභූතා තෙ’ පජ්ජ ධුවං බුද්ධො භවිස්සසි.
106. චුතී ච උපපත්ති ච ඛණෙ තස්මිං න විජ්ජති තානි අජ්ජ පදිස්සන්ති ධුවං බුද්ධො භවිස්සසි.
107. දළ්හං පග්ගණ්හ විරියං මා නිවත්ති{2} අභික්කම මයම්පෙතං පජානාම ධුවං බුද්ධො භවිස්සසීති.
108. බුද්ධස්ස වචනං සුත්වා දසසහස්සීන චූභයං තුට්ඨහට්ඨො{3} පමුදිතො එවං චින්තෙසහං තදා.
109. අද්වෙජ්ඣාවචනා බුද්ධා අමොඝවචනා ජිනා විතථං නත්ථි බුද්ධානං ධුවං බුද්ධො භවාමහං
110. යථා ඛිත්තං නභෙ ලෙඩ්ඩු ධුවං පතති භූමියං තථෙ’ව බුද්ධසෙට්ඨානං වචනං ධුවසස්සතං විතථං නත්ථි බුද්ධානං ධුවං බුද්ධො භවාමහං
111. යථා’පි සබ්බසත්තානං මරණං ධුවසස්සතං තථෙ’ව බුද්ධසෙට්ඨානං වචනං ධුවසස්සතං විතථං නත්ථි බුද්ධානං ධුවං බුද්ධො භවාමහං.
112. යථා රත්තික්ඛයෙ පත්තෙ සුරියස්සුග්ගමනං ධුවං තථෙ’ව බුද්ධසෙට්ඨානං වචනං ධුවසස්සතං විතථං නත්ථි බුද්ධානං ධුවං බුද්ධො භවාමහං.
113. යථා නික්ඛන්තසයනස්ස සීහස්ස නදනං ධුවං තථෙව බුද්ධසෙට්ඨානං වචනං ධුවසස්සතං විතථං නත්ථි බුද්ධානං ධුවං බුද්ධො භවාමහං.