25. යථා මනුස්සා නදිං තරන්තා පටිතිත්ථං විරජ්ඣිය හෙට්ඨා තිත්ථෙ ගහෙත්වාන උත්තරන්ති මහානදිං.
26. එව’මෙව මයං සබ්බෙ යදි මුඤ්චාමි’මං ජිනං අනාගතම්හි අද්ධානෙ හෙස්සාම සම්මුඛා ඉමං.
27. තස්සා’පි වචනං සුත්වා භිය්යො චිත්තං පසාදයිං උත්තරිං වතමධිට්ඨාසිං දසපාරමි පූරියා.
28. චම්පකං නාම නගරං අසමො නාම ඛත්තියො අස්මා නාම ජනිකා පදුමස්ස මහෙසිනො.
29. දසවස්සසහස්සානි අගාරමජ්ඣසො වසි උත්තරවසුයසුත්තරා{1}. තයො පාසාදමුත්තමා.
30. තෙත්තිංස සතසහස්සානි නාරියො සමලඞ්කතා උත්තරා නාම සා නාරි රම්මො නාමා’සි අත්රජො.
31. නිමිත්තෙ චතුරො දිස්වා රථයානෙන නික්ඛමී අනූනඅට්ඨමාසානි{2} පධානං පදහී ජිනො.
32. බ්රහ්මුනා යාචිතො’සන්තො පදුමො ලොකනායකො වත්ති චක්කං මහාවීරො ධනඤ්ජයුය්යානමුත්තමෙ.
33. සාලො ච උපසාලො ච අහෙසුං අග්ගසාවකා වරුණො නාමු’පට්ඨාකො පදුමස්ස මහෙසිනො.
34. රාධා චෙ’ව සුරාධා’ච අහෙසුං අග්ගසාවිකා බොධි තස්ස භගවතො මහාසොණො’ති වුච්චති.
35. භිය්යො චෙව අසමො ච අහෙසුං අග්ගු’පට්ඨකා රුචී ච නන්දරාමා ච අහෙසුං අග්ගුපට්ඨිකා.
36. අට්ඨපඤ්ඤාසරතනං අච්චුග්ගතො මහාමුනී පභා නිද්ධාවති තස්ස අස්මා සබ්බතො දිසා.
37. චන්දප්පභා සුරියප්පභා රතනග්ගි-මණිප්පභා{3} සබ්බා’පි තා හතා හොන්ති පත්වා ජිනපභුත්තමං.
38. වස්සසතසහස්සානි ආයු විජ්ජති තාවදෙ තාවතා තිට්ඨමානො සො තාරෙසි ජනතං බහුං.
39. පරිපක්කමානසෙ සත්තෙ බොධයිත්වා අසෙසතො සෙස’ඤ්ඤෙ{4} අනුසාසිත්වා නිබ්බුතො සො සසාවකො.
40. උරගොව තචං ජිණ්ණං වද්ධං{5} පත්තං’ව පාදපො ජහිත්වා සබ්බසඞ්ඛාරෙ නිබ්බුතො සො යථා සිඛී.
41. පදුමො ජිනවරො සත්ථා ධම්මාරාමම්හි නිබ්බුතො ධාතුවිත්ථාරිකං ආසි තෙසු තෙසු පදෙසතො.
පදුමබුද්ධවංසො අට්ඨමො.
9. නාරද බුද්ධවංසො
1. පදුමස්ස අපරෙන සම්බුද්ධො දිපදුත්තමො නාරදො නාම නාමෙන අසමො අප්පටිපුග්ගලො.
2. සො බුද්ධො චක්කවත්තිස්ස ජෙට්ඨො දයිතඔරසො ආමුත්තමාලාභරණො{1} උය්යානං උපසඞ්කමි.
3. තත්ථා’සි{2} රුක්ඛො යසවිපුලො අභිරූපො බ්රහා සුචී තමජ්ඣප්පත්වා උපනිසීදි මහාසොණස්ස හෙට්ඨතො,
4. තත්ථ ඤාණවරුප්පජ්ජි අනන්තං වජිරූපමං තෙන විචිනි සඞ්ඛාරෙ උක්කුජ්ජම’වකුජ්ජකං.
5. තත්ථ සබ්බ කිලෙසානි අසෙසමභිවාහයී පාපුණි කෙවලං බොධිං බුද්ධඤාණො ච චුද්දස.
6. පාපුණිත්වාන සම්බොධිං ධම්මචක්කං පවත්තයී කොටිසතසහස්සානං පඨමාභිසමයො අහූ.
7. මහාදොණං නාගරාජං විනයන්තො මහාමුනි පාටිහෙරං තදාකාසි දස්සයන්තො සදෙවකෙ.
8. තදා දෙවමනුස්සානං තම්හි ධම්මප්පකාසනෙ නවුතිකොටිසහස්සානි තරිංසු සබ්බසංසයං.
9. යම්හි කාලෙ මහාවීරො ඔවදි සකමත්රජං අසීතිකොටි සහස්සානං තතියා’භිසමයො අහු.
10. සන්නිපාතා තයො ආසුං නාරදස්ස මහෙසිනො කොටිසතසස්සානං පඨමො ආසි සමාගමො.
11. යදා බුද්ධො බුද්ධගුණං සනිදානං පකාසයී නවුතිකොටිසහස්සානි සමිංසු විමලා තදා.
12. යදා වෙරොචනො නාගො දානං දදාති සත්ථුනො තදා සමිංසු ජිනපුත්තා අසීතිසතසහස්සියො{1}.
13. අහං තෙන සමයෙන ජටිලො උග්ගතාපනො, අන්තලික්ඛචරො ආසිං පඤ්චාභිඤ්ඤාසු පාරගූ.
14. තදා’ප’හං{2} අසමසමං සසඞ්ඝං සපරිජ්ජනං අන්නපානෙන තප්පෙත්වා චන්දනෙනා’භිපූජයිං.
15. සො’පි මං බුද්ධො{3} ව්යාකාසි, නාරදො ලොක නායකො අපරිමෙය්යෙ ඉතො කප්පෙ අයං බුද්ධො භවිස්සති.
16. අහු කපිලව්හයා රම්මා නික්ඛමිත්වා තථාගතො පධානං පදහිත්වාන කත්වා දුක්කරකාරිකං.
17. අජපාලරුක්ඛමූලස්මි නිසීදිත්වා තථාගතො තත්ථ පායාසමග්ගය්හ නෙරඤ්ජරමුපෙහිති.
18. නෙරඤ්ජරාය තීරම්හි පායාසං ආදාය සො ජිනො පටියත්තවරමග්ගෙන බොධිමූලම්හි එහිති.
19. තතො පදක්ඛිණං කත්වා බොධිමණ්ඩං අනුත්තරො අස්සත්ථරුක්ඛමූලම්හි බුජ්ඣිස්සති මහායසො.
20. ඉමස්ස ජනිකා මාතා මායා නාම භවිස්සති පිතා සුද්ධොදනො නාම අයං හෙස්සති ගොතමො.
21. කොලිතො උපතිස්සො ච අග්ගා හෙස්සන්ති සාවකා ආනන්දො නාමු’පට්ඨාකො උපට්ඨිස්සති තං ජිනං.
22. ඛෙමා උප්පලවණ්ණා ච අග්ගා හෙස්සන්ති සාවිකා බොධි තස්ස භගවතො අස්සත්ථො’ති පවුච්චති.
23. චිත්තො ච හත්ථාළවකො අග්ගා හෙස්සන්තු’පට්ඨකා උත්තරානන්දමාතා ච අග්ගා හෙස්සන්තුපට්ඨිකා ආයු වස්සසතං තස්ස ගොතමස්ස යසස්සිනො.
24. ඉදං සුත්වාන වචනං අසමස්ස මහෙසිනො ආමොදිතා නරමරූ බුද්ධබීජඞ්කුරො අයං.
25. උක්කුට්ඨිසද්දං වත්තෙන්ති අප්ඵොටෙන්ති හසන්ති ච කතඤ්ජලී නමස්සන්ති දසසහස්සී සදෙවකා.
26. යදි’මස්ස ලොකනාථස්ස විරජ්ඣිස්සාම සාසනං. අනාගතම්හි අද්ධානෙ හෙස්සාම සම්මුඛා ඉමං.
27. යථා මනුස්සා නදිං තරන්තා පටිතිත්ථං විරජ්ඣිය හෙට්ඨා තිත්ථෙ ගහෙත්වාන උත්තරන්ති මහානදිං.
28. එවමෙව මයං සබ්බෙ යදි මුඤ්චාමි’මං ජිනං අනාගතම්හි අද්ධානෙ හෙස්සාම සම්මුඛා ඉමං.
29. තස්සා’පි වචනං සුත්වා භිය්යො භාවෙත්ව{1} මානසං අධිට්ඨහිං වතං උග්ගං දසපාරමිපූරියා.
30. නගරං ධඤ්ඤවතී නාම සුදෙවො නාම ඛත්තියො අනොමා නාම ජනිකා නාරදස්ස මහෙසිනො.
31. නවවස්සසහස්සානි අගාරමජ්ඣසො වසී ජිතො විජිතො විජිතා’භිරාමො{2} තයො පාසාද මුත්තමා.
32. තිචත්තාරීසසහස්සානි නාරියො සමලඞ්කතා විජිතසෙනා.{3} නාම නාරී නන්දුත්තරො නාම අත්රජො.
33. නිමිත්තෙ චතුරො දිස්වා ප සා{4} ගමනෙන නික්ඛමී සත්තාහං පධනචරියං{5}. අචරී ලොකනායකො.
34. බ්රහ්මුනා යාචිතො සන්තො නාරදො ලොකනායකො වත්ති චක්කං මහාවීරො ධනඤ්ජයු’ය්යාන මුත්තමෙ.
35. භද්දසාලො ජිතමිත්තො අහෙසුං අග්ගසාවකා වාසෙට්ඨො නාමු’පට්ඨාකො නාරදස්ස මහෙසිනො.
36. උත්තරා ඵග්ගුනී චෙ’ව අහෙසුං අග්ගසාවිකා බොධි තස්ස භගවතො මහාසොනො’ති වුච්චති.
37. උග්ගරින්දො ච වසභො ච අහෙසුං අග්ගුපට්ඨකා ඉන්දීවරී ච උන්දී ච{1} අහෙසුං අග්ගු’පට්ඨිකා.
38. අට්ඨාසීතිරතනානි අච්චුග්ගතො මහාමුනි කඤ්චනග්ඝියසංකාසො දසසහස්සී විරොචති{2}.
39. තස්ස ව්යාමප්පභා කායා නිද්ධාවති දිසොදිසං නිරන්තරං දිවාරත්තිං යොජනං ඵරතෙ තදා{3}.
40. න කෙචි තෙන සමයෙන සමන්තා යොජනෙ ජනා උක්කා පදීපෙ උජ්ජාලෙන්ති{4} බුද්ධරංසෙන ඔත්ථටා.
41. නවුතිවස්සසහස්සානි අයු විජ්ජති තාවදෙ තාවතා තිට්ඨමානො සො තාරෙසි ජනතං බහුං.
42. යථා උළුහි ගගනං විචිත්තං උපසොභති තථෙ’ව සාසනං තස්ස අරහන්තෙහි සොභති.
43. සංසාරසොතං තරණාය සෙසකෙ පටිපන්තකෙ ධම්මසෙතුං දළ්හං කත්වා නිබ්බුතො සො නරාසභො.
44. සො’පි බුද්ධො අසමසමො තෙ’පි ඛීණාසවා අතුලතෙජා සබ්බං සමන්තරහිතං නනු රිත්තා සබ්බසඞ්ඛාරා.
45. නාරදො ජිනවසභො නිබ්බුතො සුදස්සනෙ පුරෙ තත්ථෙ’ව ජිනථූපවරො චතුයොජන’මුග්ගතො’ති.
නාරද බුද්ධවංසො නවමො.
10. පදුමුත්තර බුද්ධවංසො
1. නාරදස්ස අපරෙන සම්බුද්ධො දිපදුත්තමො{1} පදුමුත්තරො නාම ජිනො අක්ඛොභො{2} සාගරූපමො.
2. මණ්ඩකප්පො’ව සො ආසි යම්හි බුද්ධො{3} අජායථ උස්සන්තකුසලා ජනතා තම්හි කප්පෙ{4} අජායථ.
3. පදුමුත්තරස්ස භගවතො පඨමෙ ධම්මදෙසනෙ කොටිසතසහස්සානං ධම්මාභිසමයො අහු.
4. තතො පරම්පි වස්සන්තෙ තප්පයන්තෙ ච පාණිනො සත්තතිංසසතසහස්සානං දුතියා’භිසමයො අහූ.
5. යම්හි කාලෙ මහාවීරො ආනන්දං උපසඞ්කමි පිතුසන්තිකමුපාගන්ත්වා අහනි{5} අමතදුන්දුභිං.
6. ආහතෙ{6} අමතභෙරිම්හි{7} වස්සන්තෙ ධම්මවුට්ඨියා{8} පඤ්ඤාසසතසහස්සානං තතියා’භිසමයො අහු.
7. ඔවාදකො විඤ්ඤාපකො තාරකො සබ්බපාණිනං දෙසනාකුසලො බුද්ධො තාරෙසි ජනතං බහුං.
8. සන්නිපාතා තයො ආසුං පදුමුත්තරස්ස සත්ථුනො කොටිසතසහස්සානං පඨමො ආසි සමාගමො.
9. යදා බුද්ධො අසමසමො වසී වෙහාරපබ්බතෙ නවුතිකොටිසහස්සානං දුතියො ආසි සමාගමො.
10. පුන චාරිකං පක්කන්තෙ ගාමනිගමරට්ඨතො අසීතිකොටිසහස්සානං තතියො ආසි සමාගමො.
11. අහං තෙන සමයෙන ජටිලො නාම රට්ඨිකො සම්බුද්ධපමුඛං සඞ්ඝං සහත්තං දුස්සම’දාස’හං.
12. සො’පි මං බුද්ධො{1} ව්යාකාසි සඞ්ඝමජ්ඣෙ නිසීදිය සතසහස්සෙ ඉතො කප්පෙ අයං බුද්ධො භවිස්සති.
13. අහු කපිලව්හයා රම්මා නික්ඛමිත්වා තථාගතො. පධානං පදහිත්වාන කත්වා දුක්කරකාරිකං.
14. අජපාලරුක්ඛමූලස්මිං නිසීදිත්වා තථාගතො තත්ථ පායාසමග්ගය්හ නෙරඤ්ජරමුපෙහිති.
15. නෙරඤ්ජරාය තීරම්හි පායාසං ආදාය සො ජිනො පටියත්තවරමග්ගෙන බොධිමූලම්හි එහිති.
16. තතො පදක්ඛිණං කත්වා බොධිමණ්ඩං අනුත්තරො අස්සත්ථරුක්ඛමූලම්හි බුජ්ඣිස්සති මහායසො.
17. ඉමස්ස ජනිකා මාතා මායා නාම භවිස්සති පිතා සුද්ධොදනො නාම අයං හෙස්සති ගොතමො.
18. කොලිතො උපතිස්සො ච අග්ගා හෙස්සන්ති සාවකා ආනන්දො නාමු’පට්ඨාකො උපට්ඨිස්සති තං ජිනං.
19. ඛෙමා උප්පලවණ්ණා ච අග්ගාහෙස්සන්ති සාවිකා බොධි තස්ස භගවතො අස්සත්ථොති පවුච්චති.
20. චිත්තො ච හත්ථාළවකො අග්ගා හෙස්සන්තු’පට්ඨකා උත්තරා නන්දමාතා ච අග්ගා හෙස්සන්තු’පට්ඨිකා ආයු වස්සසතං තස්ස ගොතමස්ස යසස්සිනො.
21. ඉදං සුත්වාන වචනං අසමස්ස මහෙසිනො ආමොදිතා නරමරූ බුද්ධබීජඞ්කුරො අයං.
22. උක්කුට්ඨිසද්දං වත්තෙන්ති අප්ඵොටෙන්ති හසන්ති ච කතඤ්ජලී නමස්සන්ති දසසහස්සී සදෙවකා.
23. යදි’මස්ස ලොකනාථස්ස විරජ්ඣිස්සාම සාසනං අනාගතම්හි අද්ධානෙ හෙස්සාම සම්මුඛා ඉමං.
24. යථා මනුස්සා නදිං තරන්තා පටිතිත්ථං විරජ්ඣිය හෙට්ඨා තිත්ථෙ ගහෙත්වාන උත්තරන්ති මහානදිං.
25. එව’මෙව මයං සබ්බෙ යදි මුඤ්චාමි’මං ජිනං අනාගතම්හි අද්ධානෙ හෙස්සාම සම්මුඛා ඉමං.
26. තස්සා’පි වචනං සුත්වා උත්තරිං වතමධිට්ඨහිං අකාසි’මුග්ගං දළ්හධීතිං දසපාරමිපූරියා.
27. ව්යාහතා{1} තිත්ථියා සබ්බෙ විමනා දුම්මනා තදා න තෙසං කෙචි පරිචරන්ති රට්ඨතො නිච්ඡුභන්ති තෙ.
28. සබ්බෙ තත්ථ සමාගන්ත්වා උපගඤ්ඡුං{2} බුද්ධසන්තිකෙ තුවං නාථො මහාවීර සරණං හොහි චක්ඛුම{3}.
29. අනුකම්පකො කාරුණිකො හිතෙසී සබ්බපාණිනං සම්පත්තෙ තිත්ථියෙ සබ්බෙ පඤ්චසීලෙ පතිට්ඨහි.
30. එවං නිරාකුලං ආසි සුඤ්ඤකං තිත්ථියෙහි තං විචිත්තං අරහන්තෙහි වසීභූතෙහි තාදිහි.
31. නගරං හංසවතීනාම{4} ආනන්දො නාම ඛත්තියො සුජාතා නාම ජනිකා පදුමුත්තරස්ස මහෙසිනො.
32. දස{5}වස්සසහස්සානි අගාරමජ්ඣසො වසී නරවාහනො යසො වසවත්තී තයො පාසාදමුත්තමා.
33. තිචත්තාරීසසහස්සානි නාරියො සමලඞ්කතා වසුදත්තා නාම නාරී උත්තරො නාම අත්රජො.
34. නිමිත්තෙ චතුරො දිස්වා පාසාදෙනා’භිනික්ඛමි සත්තාහං පධානචාරං අචරී පුරිසුත්තමො.