35. බ්රහ්මුනා යාචිතො සන්තො පදුමුත්තරො විනායකො{1} වත්ති චක්කං මහාවීරො මීථිලුය්යානමුත්තමෙ.
36. දෙවලො ච සුජාතො ච අහෙසුං අග්ගසාවකා සුමනො නාමුපට්ඨාකො පදුමුත්තරස්ස සත්ථුනො{2}.
37. අමිතා අස්මා චෙව අහෙසුං අග්ගසාවිකා බොධි තස්ස භගවතො සලලො’ති පවුච්චති.
38. විතිණ්ණො චෙව තිස්සො ච අහෙසුං අග්ගු’පට්ඨකා හත්ථා චෙව විචිත්තා ච අහෙසුං අග්ගු’පට්ඨිකා.
39. අට්ඨපඤ්ඤාසරතනං{3} අච්චුග්ගතො මහාමුනි කඤ්චනග්ඝිය{4} සංකාසො ද්වත්තිංසවරලක්ඛණො.
40. කුඩ්ඩා කවාටා භිත්තී ච රුක්ඛා නගසිලුච්චයා න තස්සා’වරණං අත්ථි සමන්තා ද්වාදසයොජනෙ.
41. වස්සසතසහස්සානි ආයු විජ්ජති තාවදෙ තාවතා තිට්ඨමානො සො තාරෙසි ජනතං බහුං.
42. සන්තාරෙත්වා බහුජනං ඡින්දිත්වා සබ්බසංසයං ජලිත්වා අග්ගික්ඛන්ධො’ව නිබ්බුතො සො සසාවකො.
43. පදුමුත්තරො ජිනො බුද්ධො නන්දාරාමම්හි නිබ්බුතො තත්ථෙ’ව තස්ස{5} ථූපවරො ද්වාදසුබ්බෙධ යොජනො’ති.
පදුමුත්තරබුද්ධවංසො දසමො.
11. සුමෙධ බුද්ධවංසො
1. පදුමුත්තරස්ස අපරෙන සුමෙධො නාම නායකො දුරාසදො උග්ගතෙජො සබ්බලොකුත්තමො{1} මුනි.
2. පසන්නනෙත්තො සුමුඛො බ්රහා උජු පතාපවා හිතෙසී සබ්බසත්තානං බහූ මොචෙසි බන්ධනා.
3. යදා බුද්ධො පාපුණිත්වා කෙවලං බොධිමුත්තමං සුදස්සනම්හි නගරෙ ධම්මචක්කං පවත්තයි,
4. තස්සාභිසමයා තීණි අහෙසුං ධම්මදෙසනෙ කොටිසතසහස්සානං පඨමා’භිසමයො අහු.
5. පුනාපරං කුම්භකණ්ණං යක්ඛං සො දමයී ජිනො නවුති කොටිසහස්සානං දුතියාභි සමයො අහු.
6. පුනාපරං අමිතයසො චතුසච්චං පකාසයි අසීති කොටිසහස්සානං තතියාභිසමයො අහු.
7. සන්නිපාතා තයො ආසුං සුමෙධස්ස මහෙසිනො ඛීණාසවානං විමලානං සන්තචිත්තාන’තාදිනං{2}.
8. සුදස්සනං නගරවරං උපගඤ්ඡි ජිනො යදා තදා ඛීණාසවා භික්ඛු සමිංසු සතකොටියො.
9. පුනාපරං දෙවකූටෙ භික්ඛූනං කඨිනත්ථතෙ තදා නවුති කොටීනං දුතියො ආසි සමාගමො.
10. පුනාපරං දසබලො යදා චරති චාරිකං තදා අසීතිකොටීනං තතියො ආසි සමාගමො.
11. අහං තෙන සමයෙන උත්තරො නාම මාණවො අසීතිකොටියො මය්හං ඝරෙ සන්නිචිතං ධනං.
12. කෙවලං සබ්බං දත්වාන සසඞ්ඝෙ ලොකනායකෙ{1} සරණං තස්සු’පාගඤ්ජිං පබ්බජ්ජඤ්චා’භිරොචයි{2}.
13. සො’පි මං බුද්ධො{3} ව්යාකාසි කරොන්තො අනුමොදනං තිංසකප්පසහස්සම්හි අයං බුද්ධො භවිස්සති.
14. අහු කපිලව්හයා රම්මා නික්ඛමිත්වා තථාගතො පධානං පදහිත්වාන කත්වා දුක්කරකාරිකං.
15. අජපාලරුක්ඛමූලස්මිං නිසීදිත්වා තථාගතො තත්ථපායාසමග්ගය්හ නෙරඤ්ජරමුපෙහිති.
16. නෙරඤ්ජරාය තීරම්හි පායාසං ආදාය සො ජිනො පටියත්තවරමග්ගෙන බොධිමූලම්හි එහිති.
17. තතො පදක්ඛිණං කත්වා බොධිමණ්ඩං අනුත්තරො අස්සත්ථරුක්ඛමූලම්හි බුජ්ඣිස්සති මහායසො.
18. ඉමස්ස ජනිකා මාතා මායා නාම භවිස්සති පිතා සුද්ධොදනො නාම අයං හෙස්සති ගොතමො.
19. කොලිතො උපතිස්සො ච අග්ගා හෙස්සන්ති සාවකා ආනන්දො නාමුපට්ඨාකො උපට්ඨිස්සති තං ජිනං.
20. ඛෙමා උප්පලවණ්ණා ච අග්ගා හෙස්සන්ති සාවකා බොධි තස්ස භගවතො අස්සත්ථො’ති පවුච්චති.
21. චිත්තො ච හත්ථාළවකො අග්ගා හෙස්සන්තු’පට්ඨකා උත්තරා නන්දමාතා ච අග්ගා හෙස්සන්තු’පට්ඨිකා ආයු වස්සසතං තස්ස ගොතමස්ස යසස්සිනො.
22. ඉදං සුත්වාන වචනං අසමස්ස මහෙසිනො ආමොදිතා නරමරූ බුද්ධබීජඞ්කුරො අයං.
23. උක්කුට්ඨිසද්දං වත්තෙන්ති අප්ඵොටෙන්ති හසන්තී ච කතඤ්ජලී නමස්සන්ති දසසහස්සී සදෙවකා.
24. යදි’මස්ස ලොකනාථස්ස විරජ්ඣිස්සාම සාසනං අනාගතම්හි අද්ධානෙ හෙස්සාම සම්මුඛා ඉමං.
25. යථා මනුස්සා නදිං තරන්තා පටිතිත්ථං විරජ්ඣිය හෙට්ඨා තිත්ථෙ ගහෙත්වාන උත්තරන්ති මහානදිං.
26. එව’මෙව මයං සබ්බෙ යදි මුඤ්චාමි’මං ජිනං අනාගතම්හි අද්ධානෙ හෙස්සාම සම්මුඛා ඉමං.
27. තස්සා’පි වචනං සුත්වා භිය්යො චිත්තං පසාදයිං උත්තරිං වතමධිට්ඨාසිං දසපාරමි පූරියා.
28. සුත්තන්තං විනයඤ්චාපි නවඞ්ගං සත්ථුසාසනං සබ්බං පරියාපුණිත්වාන සොභයිං ජිනසාසනං.
29. තත්ථ’ප්පමත්තො විහරන්තො නිසජ්ජට්ඨානචඞ්කමෙ අභිඤ්ඤාසු පාරමිං ගන්ත්වා බ්රහ්මලොකමගඤ්ඡ’හං.{1}
30. සුදස්සනං නාම නගරං සුදත්තො නාම ඛත්තියො සුදත්තා නාම ජනිකා සුමෙධස්ස මහෙසිනො.
31. නවවස්සසහස්සානි අගාරමජ්ඣසො වසී සුචන්දනක කොඤ්ච සිරිවඩ්ඪා{2} තයො පාසාද මුත්තමා.
32. ති සොළසසහස්සානි නාරියො සමලඞ්කතා සුමනා නාම සා නාරීපුනබ්බ සුමිත්තෙ{3} නාම අත්රජො.
33. නිමිත්තෙ චතුරො දිස්වා හත්ථියානෙන නික්ඛමි අනූනකං අට්ඨමාසං{4} පධානං පදහී ජිනො.
34. බ්රහ්මුනා යාචිතො සන්තො සුමෙධො ලොකනායකො වත්ති චක්කං මහාවීරො සුදස්සනුය්යානමුත්තමෙ.
35. සරණො සබ්බකාමො ච අහෙසුං අග්ගසාවකා සාගරො නාමුපට්ඨාකො සුමෙධස්ස මහෙසිනො.
36. රාමා චෙව සුරාමා ච අහෙසුං අග්ගසාවිකා බොධි තස්ස භගවතො මහානීපොති{1} වුච්චති.
37. උරුවෙලො ච යසවො ච අහෙසුං අග්ගු’පට්ඨකා යසොධරා සිරිමා ච අහෙසුං අග්ගුපට්ඨිකා.
38. අට්ඨාසීති රතනානි අච්චුග්ගතො මහාමුනි ඔභාසෙසි{2} දිසා සබ්බා චන්දො තාරාගණෙ{3} යථා.
39. චක්කවත්තිමණි නාම යථා තපති යොජනං තථෙ’ව තස්ස රතනං සමන්තා ඵරති යොජනං.
40. නවුතිවස්සසහස්සානි ආයු විජ්ජති තාවදෙ තාවතා තිට්ඨමානො සො තාරෙසි ජනතං බහුං.
41. තෙවිජ්ජඡළභිඤ්ඤෙහි බලප්පත්තෙහි තාදිහි සමාකුලමිදං ආසි අරහන්තෙහි සාධුහි{4}.
42. තෙ’පි සබ්බෙ අමිතයසා විප්පමුත්තා නිරූපධී ඤාණාලොකං දස්සයිත්වා නිබ්බුතා තෙ මහායසා.
43. සුමෙධො ජිනවරො බුද්ධො මෙධාරාමම්හි නිබ්බුතො ධාතුවිත්ථාරිකං ආසි තෙසු තෙසු පදෙසතො’ති.
සුමෙධ බුද්ධවංසො.
12. සුජාත බුද්ධවංසො
1. තත්ථෙ’ව මණ්ඩකප්පම්හි සුජාතො නාම නායකො සීහහනු’සභක්ඛන්ධො අප්පමෙය්යා දුරාසදො.
2. චන්දො’ව විමලො සුද්ධො සතරංසී’ච පතාපවා{1} එවං සොභති සම්බුද්ධො ජලන්තො සිරියා සදා{2}.
3. පාපුණිත්වාන සම්බුද්ධො කෙවලං බොධිමුත්තමං සුමඞ්ගලම්හි නගරෙ ධම්මචක්කං පවත්තයී.
4. දෙසෙන්තෙ පවරං ධම්මං සුජාතෙ ලොකනායකෙ අසීතිකොටි අභිසමිංසු පඨමෙ ධම්මදෙසනෙ.
5. යදා සුජාතො අමිතයසො දෙවෙ වස්සං උපාගමී සත්තතිංසසහස්සානං දුතියාභිසමයො අහු.
6. යදා සුජාතො අසමසමො උපගඤ්ඡි{3} පිතුසන්තිකං සට්ඨිසතසහස්සානං තතියාභිසමයො අහු.
7. සන්නිපාතා තයො ආසුං සුජාතස්ස මහෙසිනො ඛීණාසවානං විමලානං සන්තචිත්තානතාදිනං.
8. අභිඤ්ඤාබලත්තානං අප්පත්තානං{4} භවාභවෙ සට්ඨිසතසහස්සානි{5} පඨමං සන්නිපතිංසු තෙ.
9. පුනාපරං සන්නිපාතෙ තිදීවොරොහනෙ ජිනෙ පඤ්ඤාසසතසහස්සානං දුතියො ආසි සමාගමො.
10. උපසඞ්කමන්තො නරවසභං{6} තස්ස යො අග්ගසාවකො චතුහි සත සහස්සෙහි සම්බුද්ධං උපසඞ්කමි.
11. අහං තෙන සමයෙන චතුදීපම්හි ඉස්සරො අන්තලික්ඛචරො ආසිං චක්කවත්ති මහබ්බලො
12. ලොකෙ අච්ඡරියං දිස්වා අබ්භුතං ලොමහංසනං උපගන්ත්වාන වන්දිං සො සුජාතං ලොකනායකං.
13. චතුදීපෙ මහාරජ්ජං රතනෙ සත්ත උත්තමෙ බුද්ධෙ නිය්යාදයිත්වාන පබ්බජිං තස්ස සන්තිකෙ.
14. අරාමිකා ජානපදා{1} උට්ඨානං පටිපිණ්ඩිය{2} උපනෙන්ති භික්ඛුසඞ්ඝස්ස පච්චයං සයනාසනං.
15. සො’පි මං බුද්ධො{3} ව්යාකාසි දසසහස්සිම්හි ඉස්සරො ති සකප්පසහස්සම්හි අයං බුද්ධො භවිස්සති.
16. අහු කපිලව්හයා රම්මා නික්ඛමිත්වා තථාගතො පධානං පදහිත්වාන කත්වා දුක්කරකාරිකං.
17. අජපාලරුක්ඛමූලස්මිං නිසීදිත්වා තථාගතො. තත්ථ පායාසමග්ගය්හ නෙරඤ්ජමුපෙහිති.
18. නෙරඤ්ජරාය තීරම්හි පායාසං ආදාය සො ජිනො. පටියත්තවරමග්ගෙන බොධිමූලම්හි එහිති.
19. තතො පදක්ඛිණං කත්වා බොධිමණ්ඩං අනුත්තරො අස්සත්ථරුක්ඛමූලම්හි බුජ්ඣිස්සති මහායසො.
20. ඉමස්ස ජනිකා මාතා මායා නාම භවිස්සති පිතා සුද්ධොදනො නාම අයං හෙස්සති ගොතමො.
21. කොලිතො උපතිස්සො ච, අග්ගා හෙස්සන්ති සාවකා ආනන්දො නාමුපට්ඨාකො උපට්ඨිස්සති තං ජිනං.
22. ඛෙමා උප්පලවණ්ණා ච අග්ගා හෙස්සන්ති සාවිකා බොධි තස්ස භගවතො අස්සත්ථො’ති පවුච්චති.
23. චිත්තො ච හත්ථාළවකො අග්ගා හෙස්සන්තු’පට්ඨකා උත්තරා නන්දමාතා ච අග්ගා හෙස්සන්තු පට්ඨිකා ආයු වස්සසතං තස්ස ගොතමස්ස යසස්සිනො.
24. ඉදං සුත්වාන වචනං අසමස්ස මහෙසිනො ආමොදිතා නරමරූ බුද්ධබීජඞ්කුරො අයං.
25. උක්කුට්ඨි සද්දං වත්තෙන්ති අප්ඵොටෙන්ති හසන්ති ච කතඤ්ජලී නමස්සන්ති දසසහස්සී සදෙවකා.
26. යදි’මස්ස ලොකනාථස්ස විරජ්ඣිස්සාම සාසනං අනාගතම්හි අද්ධානෙ හෙස්සාම සම්මුඛා ඉමං.
27. යථා මනුස්සා නදිං තරන්තා පටිතිත්ථං විරජ්ඣිය හෙට්ඨා තිත්ථෙ ගහෙත්වාන. උත්තරන්ති මහානදිං.
28. එව’මෙව මයං සබ්බෙ යදි මුඤ්චාමි’මං ජිනං අනාගතම්හි අද්ධානෙ හෙස්සාම සම්මුඛා ඉමං.
29. තස්සා’පි වචනං සුත්වා භිය්යො හාසං ජනෙස’හං අධිට්ඨාහිං වතං උග්ගං දසපාරමිපූරියා.
30. සුත්තන්තං විනයඤ්චා’පි නවඞ්ගං සත්ථුසාසනං සබ්බං පරියාපුණිත්වාන සොභයිං ජිනසාසනං.
31. තත්ථ’ප්පමත්තො විහරන්තො බ්රහ්මං භාවෙත්ව භාවනං අභිඤ්ඤාපාරමිං ගන්ත්වා බ්රහ්මලොකමගච්ඡහං.
32. සුමඞ්ගලං නාම නගරං උග්ගතො නාම ඛත්තියො මාතා පභාවතී නාම සුජාතස්ස මහෙසිනො.
33. නවවස්සසහස්සානි අගාරමජ්ඣසො වසී සිරී උපසිරී නන්දා තයො පාසාදමුත්තමා.
34. තෙවිසතිසහස්සානි නාරියො සමලඞ්කතා සිරිනන්දා නාම නාරී උපසෙනො නාම අත්රජො.
35. නිමිත්තෙ චතුරො දිස්වා අස්සයානෙන නික්ඛමි අනූනනවමාසානි පධානං පදහී ජිනො.
36. බ්රහ්මුනා යාචිතො සන්තො සුජාතො ලොක නායකො වත්ති චක්කං මහාවීරො සුමඞ්ගලූ’ය්යානමුත්තමෙ.
37. සුදස්සනො ච දෙවො{1} ච අහෙසුං අග්ගසාවකා නාරදො නාමුපට්ඨාකො සුජාතස්ස මහෙසිනො.
38. නාගා ච නාගසමාලා ච අහෙසුං අග්ගසාවිකා බොධි තස්ස භගවතො මහාවෙලූ’ති වුච්චති.
39. සො ච රුක්ඛො ජාතරුචිරො{2} අච්ඡිද්දො හොති පත්තකො{3} උජුවංසො බ්රහා හොති දස්සනීයො මනොරමො.
40. එකක්ඛන්ධො පවට්ඨිත්වා{4} තතො සාඛා පභිජ්ජථ{5} යථා සුබද්ධො මොරහත්ථො එවං සොභති සො දුමො.
41. න තස්ස කණ්ටකා{6} හොන්ති නා’පි ඡිද්දං මහා අහු විත්ථිණ්ණසාඛො අවිරලො සන්දච්ඡායො මනොරමො.
42. සුදත්තො චෙව චිත්තො ච අහෙසුං අග්ගු’පට්ඨකා සුභද්දා චෙව පදුමා ච අහෙසුං අග්ගු’පට්ඨිකා.
43. පඤ්ඤාස රතනො ආසි උච්චත්තනෙන{7} සො ජිනො සබ්බාකාරවරූපෙතො සබ්බගුණමුපාගතො.
44. තස්සප්පභා අසමසමා නිද්ධාවති සමන්තතො අප්පමාණො අතුලියො ච ඔපන්තෙහි අනූපමො.