මෙහි මේ අයුරින් ආයුෂ්මත් කිංකණිපුප්ඵිය ස්ථවිරයන් වහන්සේ මේ ගාථාවන් වදාළ සේකි.
කිංකණිපුප්ඵිය ස්ථවිරාවදානය නවවැනි යි.
200. යූථිකාපුප්ඵිය ස්ථවිරාවදානය
2266. ලෝකයාගේ පූජාවන් පිළිගන්නා වූ පස්මරුන් ජයගත් පසැස් ඇති පදුමුත්තර බුදුරජහු වනයෙන් නික්ම විහාරයට වඩිති.
2267. උතුම් සීනිද්ද මල් දෝතින් ගෙන මෙත්සිත් ඇති තාදී ගුණ යුත් බුදුරජුන් පිදීමි.
2268. ඒ චිත්තප්රසාදයෙන් සම්පත් අනුභව කොට මම කල්ප ලක්ෂයක් මුළුල්ලෙහි දුගතියක නො උපනෙමි.
2269. මෙයින් පණස්වෙනි කපෙහි මහත් මහත් බල ඇති ජනාධිපති වූ සමිත්තනන්දන නම් සක්විති රජෙක් වීමි.
2270. සිවුපිළිසිඹියාවෝ ද අෂ්ටවිමෝක්ෂයෝ ද ෂඩභිඥාවෝ ද සාක්ෂාත් කරණ ලදහ. බුදුරජානන් වහන්සේගේ සස්න කරණ ලදී.
මෙහි මේ අයුරින් ආයුෂ්මත් යූථිකාපුප්ඵිය ස්ථවිරයන් වහන්සේ මේ ගාථාවන් වදාළ සේකි.
යූථිකාපුප්ඵිය ස්ථවිරාවදානය දසවැනි යි.
උද්දානය:
තමාලී තිණසන්ථාර - ඛණ්ඩඵුල්ලි අසෝකිය අඞ්කොලකි කිසලය - තීන්දුක නෙලපුප්ඵිය කිඞ්කණික යූථික දැ යි - දසවත් අටපණස් ගී.
තමාලපුප්ඵිය වර්ගය විසිවැනියි.
යලි වගෙහි උද්දානය:
භික්ඛාදායී පරිවාර - සෙරෙය්ය සොභිත සහ ඡත්ත බන්ධුජීව - සුපාරිචරිය ද කුමුද කුජට සහ - තමාලීවහ දැයි දස සසිය සසැට ගයෙකි - ඉන් වැඩියෙකුදු වේ ම ය.
භික්ෂාවර්ගදශකය යි.
ද්විතීය ශතකය සමාප්තයි
21. කණිකාරපුප්ඵිය වර්ගය
201. කණිකාරපුප්ඵිය ස්ථවිරාවදානය
2271. මම එකල්හි පිපුණු කිණිහිරි රුකක් දැක චතුරෝඝයන් තරණය කළා වූ තාදී ගුණ ඇති තිස්ස බුදුරජානන් වහන්සේට (ඒ මල් නෙලා) පිදීමි.
2272. මෙයින් දෙඅනූවන කපෙහි යම් පුෂ්ප පූජාවක් කෙළෙම් ද, (ඒ හේතුවෙන්) දුගතියක් නො දනිමි. බුද්ධපූජාවෙහි මේ විපාක යි.
2273. මෙයින් පන්තිස්වන කපෙහි සත්රුවනින් ආඪ්ය වූ මහත් බල ඇති අරුණපාණී යැ යි ප්රකට වූ සක්විති රජෙක් වීමි.
2274. සිවුපිළිසිඹියාවෝ ද අෂ්ටවිමෝක්ෂයෝ ද ෂඩභිඥාවෝ ද සාක්ෂාත් කරණ ලදහ. බුදුරජානන් වහන්සේගේ සසුන කරණ ලදී.
මෙහි මේ අයුරින් ආයුෂ්මත් කණිකාරපුප්ඵිය ස්ථවිරයන් වහන්සේ මේ ගාථාවන් වදාළ සේකි.
කණිකාරපුප්ඵිය ස්ථවිරාවදානය පළමුවැනි යි.
202. මිනෙලපුප්ඵිය ස්ථවිරාවදානය
2275. හිරුමෙන් ප්රතාපවත් වූ ස්වර්ණවර්ණ වූ මෙත් සිත් ඇති සිඛී භාග්යවත්හු සක්මනට නැගුනාහ.
2276. එ දවස් මම පහන් සිත් ඇත්තෙම් සොම්නස් වූයෙම් ශ්රේෂ්ඨඥාන ඇති බුදුරජුන්හට වැඳ මිනෙල පුෂ්පයන් ගෙණ (එම) බුදුරජුන්හට පිදීමි.
2277. මෙයින් එක්තිස්වන කපෙහි යම් පුෂ්ප පූජාවක් කෙළෙම් ද, (ඒ හේතුවෙන්) දුගතියක් නො දනිමි. බුද්ධපූජාවෙහි මේ විපාකය යි.
2278. එකුන්තිස්වන කපෙහි සත්රුවනින් ආඪ්ය වූ මහත්බල ඇති සුමේධයස නම් වූ සක්විති රජෙක් වීමි.
2279. සිවුපිළිසිඹියාවෝ ද අෂ්ටවිමෝක්ෂයෝ ද ෂඩභිඥාවෝ ද සාක්ෂාත් කරණ ලදහ. බුදුරජානන් වහන්සේගේ සස්න කරණ ලදී.
මෙහි මේ අයුරින් ආයුෂ්මත් මිනෙලපුප්ඵිය ස්ථවිරයන් වහන්සේ මේ ගාථාවන් වදාළ සේකි.
මිනෙලපුප්ඵිය ස්ථවිරාවදානය දෙවැනි යි.
203. කිඞ්කිණිකපුප්ඵිය ස්ථවිරාවදානය
2280. රන් ඇගෑවක් මෙන් බබලන සර්වඥ වූ ලෝකනායක බුදුරජ තෙමේ සිසිල් දිය සහිත විලකට බැස ජලස්නානය කෙළේය.
2281. මම කිඞ්කිණික මල් ගෙණ ඔදවැඩි සිත් ඇත්තෙම් සොම්නස් වූයෙම් ද්විපදෝත්තම වූ තාදීගුණ ඇති විපස්සී බුදුරජුන්හට පිදීමි.
2282. මෙයින් එක් අනූවන කපෙහි යම් පුෂ්ප පූජාවක් කෙළෙම් ද, (ඒ හේතුවෙන්) දුගතියක් නො දනිමි. බුද්ධපූජාවෙහි මේ විපාකය යි.
2283. සත්විසිවන කපෙහි සත් රුවනින් යුත් මහත් බල ඇති භීමරථ නම් සක්විති රජෙක් වීමි.
2284. ප්රතිසම්භිදාවෝ ද අෂ්ටමෝක්ෂයෝ ද ෂඩභිඥාවෝ ද සාක්ෂාත් කරණ ලදහ. බුදුරජානන් වහන්සේගේ සසුන කරණ ලදී.
මෙහි මේ අයුරින් ආයුෂ්මත් කිඞ්කිණිකපුප්ඵිය ස්ථවිරයන් වහන්සේ මේ ගාථාවන් වදාළ සේකි.
කිඞ්කිණිකපුප්ඵිය ස්ථවිරාවදානය තෙවැනි යි.
204. තරණිය ස්ථවිරාවදානය
2285. ද්විපදෝත්තම වූ නරශ්රේෂ්ඨ වූ භාග්යවත් අත්ථදස්සී බුදුරජානන් වහන්සේ ශ්රාවකයන් විසින් පිරිවරණ ලදසේක් ගංතෙරට එළඹි සේක.
2286. මම මුවවිට දක්වා සමව පිරුණු කපුටුවනට පවා ඉවුරෙහි සිට පැන් පානය කළ හැකි සේ දියෙන් පිරී ගිය තරණය කොට එතර යාම දුෂ්කර වූ (ඒ ගඟින්) ද්විපදෝත්තම වූ බුදුරජුන් ද භික්ෂු සඞ්ඝයා ද එතර කරවීමි.
2287. එක්දහස් අටසියවන කපෙහි වූ එකල්හි යම් කර්මයක් කෙළෙම් ද, (ඒ හේතුවෙන්) දුගතියක් නො දනිමි. (ගඟින්) තරණය කරවීමෙහි මේ විපාකය යි.
2288. මෙයින් එක්දහස් තෙසියවන කපෙහි සත්රුවනින් යුත් මහත් බල ඇති සබ්ගොගවා නම් පස් සක්විති රජකෙනෙක් වූහ.
2289. මම මේ පශ්චිම භවයෙහි බමුණු කුලයෙහි උපනිමි. යහළුවන් තිදෙනකු සමග ශාස්තෘශාසනයෙහි පැවිදි වීමි.
සිවුපිළිසිඹියාවෝ ද අෂ්ටවිමෝක්ෂයෝ ද ෂඩභිඥාවෝ ද සාක්ෂාත් කරණ ලදහ. බුදුරජානන් වහන්සේගේ සසුන කරණ ලදි.
මෙහි මේ අයුරින් ආයුෂ්මත් තරණිය ස්ථවිරයන් වහන්සේ මේ ගාථාවන් වදාළ සේකි.
තරණිය ස්ථවිරාවදානය සිවුවැනි යි.
205. නිග්ගුණ්ඩිපුප්ඵිය ස්ථවිරාවදානය
2290. මම විපස්සී බුදුරජානන් වහන්සේගේ ආරාමිකයෙක් වීමි. (ඒ මම) නික මල් ගෙණ බුදුරජානන් වහන්සේට පිදීමි.
2291. මෙයින් එක් අනූවන කපෙහි යම් පුෂ්පපූජාවක් කෙළෙම් ද, (ඒ හේතුවෙන්) දුගතියක් නො දනිමි. බුද්ධපූජාවෙහි මේ විපාකය යි.
2292. මෙයින් පන්තිස්වන කපෙහි මහත් බල ඇති ජනාධිපති වූ මහාපතාප නම් සක්විති රජෙක් වීමි.
2293. සිවුපිළිසිඹියාවෝ ද අෂ්ටවිමෝක්ෂයෝ ද ෂඩභිඥාවෝ ද සාක්ෂාත් කරණ ලදහ. බුදුරජානන් වහන්සේගේ සසුන කරණ ලදී.
මෙහි මේ අයුරින් ආයුෂ්මත් නිග්ගුණ්ඩිපුප්ඵිය ස්ථවිරයන් වහන්සේ මේ ගාථාවන් වදාළ සේකි.
නිග්ගුණ්ඩිපුප්ඵිය ස්ථවිරාවදානය පස්වැනියි.
206. උදකදායක ස්ථවිරාවදානය
2294. මම පැහැදුනු ඉඳුරන් ඇති කෙලෙස් කැලඹිලි නැති වළඳන්නා වූ ශ්රමණයන් වහන්සේ දැක ඒ සිද්ධාර්ත්ථ බුදුරජුන්හට කළයෙන් දිය ගෙණවුත් දුනිමි.
2295. මම අද පහ වූ සැක ඇතියෙම් පිරිසිදු වූයෙම් නිර්මල වූයෙම් වෙමි. (ඒ හේතුවෙන්) භවයෙහි උපදනා කල්හි යහපත් විපාක ඇති වේ.
2296. මෙයින් සිවු අනූවන කපෙහි වූ එකල්හි යම් ජලදානයක් දුනිම් ද, (ඒ හේතුවෙන්) දුගතියක් නො දනිමි. උදකදානයාගේ මේ විපාකය යි.
2297. මෙයින් එක් සැටවනු කපෙහි සත්රුවනින් යුත් මහත් බල ඇති විමල නම් සක්විති රජෙක් වීමි.
2298. සිවුපිළිසිඹියාවෝ ද අෂ්ටවිමෝක්ෂයෝ ද ෂඩභිඥාවෝ ද සාක්ෂාත් කරණ ලදහ. බුදුරජානන් වහන්සේගේ සසුන කරණ ලදී.
මෙහි මේ අයුරින් ආයුෂ්මත් උදකදායක ස්ථවිරයන් වහන්සේ මේ ගාථාවන් වදාළ සේකි.
උදකදායක ස්ථවිරාවදානය සවැනි යි.
207. සලලමාලිය ස්ථවිරාවදානය
2299. කිණිහිරි රුකක් මෙන් බබළමින් පර්වතයන් අතුරෙහි හුන් සියලු දිගුන් හෙළි කරන්නා වූ සිද්ධාර්ත්ථ බුදුරජුන් දිටිමි.
2300. එකල්හි මම දුන්න නිසැක කොට හීය යොදා (විද) නටු සහිත මලක් කඩා බුදුරජුන්හට පිදීමි.
2301. මෙයින් සිවු අනූවන කපෙහි යම් පුෂ්පපූජාවක් කෙළෙම් ද, (ඒ හේතුවෙන්) දුගතියක් නො දනිමි. බුද්ධපූජාවෙහි මේ විපාකය යි.
2302. මෙයින් එක් පණස්වනු කපෙහි සත්රුවනින් යුත් මහත් බල ඇති ජුතින්ධර නම් සක්විති රජෙක් වීමි.
2303. සිවුපිළිසිඹියාවෝ ද අෂ්ටවිමෝක්ෂයෝ ද ෂඩභිඥාවෝ ද සාක්ෂාත් කරණ ලදහ. බුදුරජානන් වහන්සේගේ සසුන කරණ ලදී.
මෙහි මේ අයුරින් ආයුෂ්මත් සලලමාලිය ස්ථවිරයන් වහන්සේ මේ ගාථාවන් වදාළ සේකි.
සලලමාලිය ස්ථවිරාවදානය සත්වැනි යි.
208. කොරණ්ඩපුප්ඵිය ස්ථවිරාවදානය
2304. සක් ලකුණෙන් බබලන තබන ලද ශ්රී පාද සටහන් දැක (මම ඒ) විපස්සී බුදුරජුන්ගේ පියවර සටහන් අනුව යන්නෙම්-
2305. පිපුණු කොරණ්ඩ වෘක්ෂයක් දැක සතුටු වූයෙම් මුලසිට ම ඇති ඒ සියලු මල් මා විසින් (බුදුරජුන්හට) පුදන ලදී. සතුටු සිතින් ම උතුම් පා වැන්දෙමි.
2306. මෙයින් එක්අනූවන කපෙහි යම් පුෂ්පපූජාවක් කෙළෙම් ද, (ඒ හේතුවෙන්) දුගතියක් නො දනිමි. පියවර සටහන් පිදීමෙහි මේ විපාකය යි.
2307. සත්පණස්වන කපෙහි සත්රුවනින් යුත් මහත් බල ඇති වීතමල නම් එක් සක්විති රජෙක් වීමි.
2308. සිවුපිළිසිඹියාවෝ ද අෂ්ටවිමෝක්ෂයෝ ද ෂඩභිඥාවෝ ද සාක්ෂාත් කරණ ලදහ. බුදුරජානන් වහන්සේගේ සසුන කරණ ලදී.
මෙහි මේ අයුරින් ආයුෂ්මත් කොරණ්ඩපුප්ඵිය ස්ථවිරයන් වහන්සේ මේ ගාථාවන් වදාළ සේකි.
කොරණ්ඩපුප්ඵිය ස්ථවිරාවදානය අටවැනි යි.
209. ආධාරදායක ස්ථවිරාවදානය
2309. ලෝකබන්ධු වූ සිඛී බුදුරජුන්හට මා විසින් ආධාරකයක් (පාත්රාධාරයක්) පුදන ලදී. මම (ඒ හේතුවෙන්) ධනය සහිත මේ මුළු පොළොව ම දරමි.
2310. මා විසින් සියලු කෙලෙස් දවන ලදී. සියලු භවයෝ වනසන ලදහ. සම්බුදු සසුනෙහි අන්තිම ශරීරය ද දරමි.
2311. මෙයින් සත්විසිවනු කපෙහි මහත් බල ඇති සමන්තචරණ නම් සිවු සක්විති රජකෙනෙක් වූහ.
2312. සිවුපිළිසිඹියාවෝ ද අෂ්ටවිමෝක්ෂයෝ ද ෂඩභිඥාවෝ ද සාක්ෂාත් කරණ ලදහ. බුදුරජානන් වහන්සේගේ සසුන කරණ ලදී.
මෙහි මේ අයුරින් ආයුෂ්මත් ආධාරදායක ස්ථවිරයන් වහන්සේ මේ ගාථාවන් වදාළ සේකි.
ආධාරදායක ස්ථවිරාවදානය නවවැනි යි.
210. වාතාතපනිවාරිය ස්ථවිරාවදානය
2313. දෙවියනට දෙවි වූ තාදී ගුණ ඇති තිස්ස බුදුරජුන්හට පැහැදුනු සිතින් එක් ඡත්රයක් මා විසින් පුදන ලදී.
2314. ඒ හේතුවෙන් මාගේ පව් වැළැක්කේ විය. (තමා වෙත) කුශලයන්ගේ පැමිණීම විය. අහසෙහි ඡත්ර දරත්. පූර්ව (ඡත්රදානමය ) කර්මයාගේ මේ විපාකය යි.
2315. (මා විසින්) සියලු භවයෝ නසන ලදහ. මෙය මාගේ අන්තිම භවයයි. සම්බුදු සසුනෙහි අන්තිම ශරීරය ද දරමි.
2316. මෙයින් දෙයානූවන කපෙහි වූ එකල්හි යම් ඡත්රදානයක් දුනිම් ද, (ඒ හේතුවෙන්) දුගතියක් නො දනිමි. ඡත්රදානයාගේ මේ විපාකය යි.
2317. මෙයින් දෙසැත්තෑවන කපෙහි ජනාධිපති වූ මහානිදාන නම් අට සක්විති රජකෙනෙක් වූහ.
2318. සිවුපිළිසිඹියාවෝ ද අෂ්ටවිමෝක්ෂයෝ ද ෂඩභිඥාවෝ ද සාක්ෂාත් කරණ ලදහ. බුදුරජානන් වහන්සේගේ සසුන කරණ ලදී.
මෙහි මේ අයුරින් ආයුෂ්මත් වාතාතපනිවාරිය ස්ථවිරයන් වහන්සේ මේ ගාථාවන් වදාළ සේකි.
වාතාතපනිවාරිය ස්ථවිරාවදානය දසවැනි යි.
උද්දානය:
කණිකාර මිනෙලි - කිඞ්කිණි සහ තරණ ද තිග්ගුණ්ඩිපුප්ඵි උදකද - සලලකුරණ්ඩක ද ආධාරක ආතපවාරි යයි දස - අටසාළිස් ගයින් බැඳී.
කණිකාරපුප්ඵියවර්ගය එක්විසිවැනි යි.