1309. එකතිංසෙ ඉතො කප්පෙ සිඛී ලොකග්ගනායකො උප්පජ්ජි ලොකපජ්ජොතො තිලොකසරණො ජිනො.
1310. තදා’රුණපුරෙ රම්මෙ බ්රහ්මඤ්ඤකුලසම්හවා විමුත්තචිත්තං කුපිතා භික්ඛුනිං අභිසාපයිං.
1311. “වෙසිකාව අනාචාරා ජිනසාසනදූසිකා” එවං අක්කොසයිත්වාන තෙන පාපෙන කම්මුනා.
1312. දාරුණං නිරයං ගන්ත්වා මහාදුක්ඛසමප්පිතා තතො චුතා මනුස්සෙසු උපපන්නා තපස්සිනී.
1313. දසජාතිසහස්සානි ගණිකත්තමකාරයිං තම්හා පාපා න මුච්චිස්සං භුත්වා දුට්ඨවිසං යථා.
1314. බ්රහ්මචරියමසෙවිස්සං කස්සපෙ ජින සාසනෙ තෙන කම්මවිපාකෙන අජායිං තිදසෙ පුරෙ.
1315. පච්ඡිමභවෙ සම්පත්තෙ අහොසිං ඔපපාතිකා අම්බසාඛන්තරෙ ජාතා අම්බපාලීති තෙන හං.
1316. පරිවුතා පාණකොටීහි පබ්බජිං ජිනසාසනෙ පත්තාහං අචලං ඨානං ඨිතා බුද්ධස්ස ඔරසා.
1317. ඉද්ධීසු ච වසී හොමි සොතධාතුවිසුද්ධියා චෙතො පරියඤාණස්ස වසී හොමි මහාමුනෙ.
1318. පුබ්බෙ නිවාසං ජානාමි දිබ්බචක්ඛු විසොධිතං සබ්බාසවා පරික්ඛීණා නත්ථි’දානි පුනබ්භවො.
1319. අත්ථධම්මනිරුත්තීසු පටිභානෙ තථෙව ච ඤාණං මෙ විමලං සුද්ධං බුද්ධසෙට්ඨස්ස වාහසා.
1320-1322. කිලෙසා ඣාපිතා -පෙ- කතං බුද්ධස්ස සාසනං.
ඉත්ථං සුදං අම්බපාලී භික්ඛුනී ඉමා ගාථායො අභාසිත්ථාති.
අම්බපාලීථෙරියාපදානං නවමං.
4. 10 පෙසලාපදානං
1323. ඉමම්හි භද්දකෙ කප්පෙ බ්රහ්මබන්ධුමහායසො කස්සපො නාම නාමෙන උප්පජ්ජි වදතං වරො.
1324. සාවත්ථියං පුරවරෙ උපාසකකුලෙ අහං පසූතා තං ජිනවරං දිස්වා සුත්වා ච දෙසනං.
1325. තං වීරං සරණං ගන්ත්වා සීලානි ච සමාදියිං කදාචි සො මහාවීරො මහාජනසමාගමෙ.
1326. අත්තනො අභිසම්බොධිං පකාසෙසි නරාසභො “අනනුස්සුතෙසු ධම්මෙසු පුබ්බෙ දුක්ඛාදිකෙසු ච.
1327. චක්ඛු ඤාණං ච පඤ්ඤා ච විජ්ජාලොකො ච ආසි මෙ” තං සුත්වා උග්ගහෙත්වාන පරිපුච්ඡිං ච භික්ඛවො.
1328. තෙන කම්මෙන සුකතෙන චෙතනාපණිධීහි ච ජහිත්වා මානුසං දෙහං තාවතිංසං අගච්ඡහං.
1329. පච්ඡිමෙ ච භවෙ’දානි ජාතා සෙට්ඨිමහාකුලෙ උපෙච්ච බුද්ධං සද්ධම්මං සුත්වා සච්චූපසංහිතං.
1330. පබ්බජිත්වා චිරෙනෙව සච්චත්ථානි විචින්තයං ඛෙපෙත්වා ආසවෙ සබ්බෙ අරහත්තං අපාපුණිං.
1331. ඉද්ධිසු ච වසී හොමි දිබ්බාය සොතධාතුයා චෙතොපරියඤාණස්ස වසී හොමි මහාමුනෙ.
1332. පුබ්බෙ නිවාසං ජානාමි දිබ්බචක්ඛු විසොධිතං සබ්බාසවා පරික්ඛීණා නත්ථි’දානි පුනබ්භවො.
1333. අත්ථධම්මනිරුත්තීසු පටිභානෙ තථෙව ච ඤාණං මෙ විමලං සුද්ධං බුද්ධසෙට්ඨස්ස වාහසා
1334. කිලෙසා ඣාපිතා මය්හං භවා සබ්බෙ සමූහතා, නාගීව බන්ධනං ඡෙත්වා විහරාමි අනාසවා.
1335. ස්වාගතං වත මෙ ආසි මම බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
1336. පටිසම්භිදා චතස්සො ච විමොක්ඛාපි ච අට්ඨි’මෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං පෙසලා භික්ඛුනී ඉමා ගාථායො අභාසිත්ථාති.
පෙසලාථෙරියාපදානං දසමං.
ඛත්තියාවග්ගො චතුත්ථො.
තත්ථුද්දානං:
ඛත්තියා බ්රාහ්මණී චෙව තථා උප්පලදායිකා සිගාලමාතා සුක්කා ච අභිරූපා අඩ්ඪකාසිකා,
පුණ්ණා ච අම්බපාලී ච පෙසලාති ච තා දස ගාථායො ද්විසතානෙත්ථ ද්විචත්තාලීස චුත්තරි.
අථ වග්ගුද්දානං:
සුමෙධා එකූපොසථා කුණ්ඩලකෙසී ඛත්තියා සහස්සං තිසතා ගාථා සත්තතාලිස පිණ්ඩිතා,
සහ උද්දානගාථාහි ගණිතායො විභාවිහි සහස්සං තිසතා ගාථා සත්තපඤ්ඤාසමෙව චා’ති.
ථෙරීඅපදානං සමත්තං.
සමත්තා අපදානපාළි.