4. 5 සුක්කාපදානං
1214. එකනවුතෙ ඉතො කප්පෙ විපස්සී නාම නායකො උප්පජ්ජි චාරුනයනො{1} සබ්බධම්මවිපස්සකො.
1215. තදා’හං බන්ධුමතියං ජාතා අඤ්ඤතරෙ කුලෙ ධම්මං සුත්වාන මුනිනො පබ්බජිං අනගාරියං.
1216. බහුස්සුතා ධම්මධරා පටිභානවතී තථා විචිත්තකථිකා චාපි ජිනසාසනකාරිකා.
1217. තදා ධම්මකථං කත්වා ජනතාය හිතං බහුං තතො චුතා’හං තුසිතං උපපන්නා යසස්සිනී.
1218. එකතිංසෙ ඉතො කප්පෙ සිඛී විය සිඛී ජිනො තපන්තො යසසා ලොකෙ උප්පජ්ජි වදතං වරො.
1219. තදාපි පබ්බජිත්වාන බුද්ධසාසනකොවිදා ජොතෙත්වා ජිනවාක්යානි තතොපි තිදිවං ගතා.
1220. එකතිංසෙ ඉතො කප්පෙ වෙස්සභූ නාම නායකො උප්පජ්ජිත්ථ මහාඤාණී තදාපි ච තථෙවහං.
1221. පබ්බජිත්වා ධම්මධරා ජොතයිං ජිනසාසනං ගන්ත්වා මරුපුරං රම්මං අනුභොසිං මහාසුඛං.
1222. ඉමම්හි භද්දකෙ කප්පෙ කකුසන්ධො ජිනුත්තමො උප්පජ්ජි නරසද්දූලො{1} තදාපි ච තථෙවහං.
1223. පබ්බජිත්වා මුනිමතං ජොතයිත්වා යථායුකං තතො චුතා’හං තිදිවං අගං සභවනං යථා.
1224. ඉමස්මිං යෙව කප්පම්හි කොණාගමන නායකො. උප්පජ්ජි ලොකසරණො සබ්බසත්තානමුත්තමො.
1225. තදාපි පබ්බජිත්වාන සාසනෙ තස්ස තාදිනො බහුස්සුතා ධම්මධරා ජොතයිං ජිනසාසනං.
1226. ඉමස්මිංයෙව කප්පම්හි කස්සපො පුරිසුත්තමො උප්පජ්ජි ලොකනයනො අරණො මරණන්තගූ.{2}
1227. තස්සාපි නරවීරස්ස පබ්බජිත්වාන සාසනෙ පරියාපුතසද්ධම්මා පරිපුච්ඡාවිසාරදා.
1228. සුසීලා ලජ්ජිනී චෙව තීසු සික්ඛාසු කොවිදා බහුං ධම්මකථං කත්වා යාවජීවං හිතාවහං{3}.
1229. තෙන කම්මෙන සුකතෙන චෙතනාපණිධීහි ච ජහිත්වා මානුසං දෙහං තාවතිංසං අගච්ඡහං.
1230. පච්ඡිමෙ ච භවෙ’දානි ගිරිබ්බජපුරුත්තමෙ ජාතා සෙට්ඨිකුලෙ ඵීතෙ මහාරතනසඤ්චයෙ.
1231. යදා භික්ඛුසහස්සෙන පරිතො ලොකනායකො උපාගමි රාජගහං සහස්සක්ඛෙන වණ්ණිතො.
1232. “දන්තො දන්තෙහි සහ පුරාණජටිලෙහි විප්පමුත්තො විප්පමුත්තෙහි සිඞ්ගීනික්ඛසවණ්ණො රජාගහං පාවිසි භගවා.”
1233. දිස්වා බුද්ධානුභාවං තං සුත්වා ච ගුණසඤ්චයං බුද්ධෙ චිත්තං පසාදෙත්වා පූජයිං තං යථාබලං.
1234. අපරෙන ච කාලෙන ධම්මදින්නාය සන්තිකෙ අගාරා නික්ඛමිත්වාන පබ්බජිං අනගාරියං.
1235. කෙසෙසු ඡිජ්ජමානෙසු කිලෙසෙ ඣාපයිං අහං උග්ගහිං සාසනං සබ්බං පබ්බජිත්වා ‘චිරෙනහං.
1236. තතො ධම්මමදෙසෙසිං මහාජනසමාගමෙ ධම්මෙ දෙසියමානම්හි ධම්මාභිසමයො අහු.
1237. නෙකපාණසහස්සානං තං විදිත්වා’තිවිම්හිතො අභිප්පසන්නො මෙ යක්ඛො භමිත්වාන ගිරිබ්බජං.
1238. “කිං මෙ කතා රාජගහෙ මනුස්සා මධු පීතාව අච්ඡරෙ යෙ සුක්කං න උපාසන්ති දෙසෙන්තිං අමතං පදං.
1239. තඤ්ච අප්පටිවානීයං අසෙචනකමොජවං පිවන්ති මඤ්ඤෙ සප්පඤ්ඤා වලාහකමිවද්ධගූ”
1240. ඉද්ධියා ච වසී හොමි දිබ්බාය සොතධාතුයා චෙතොපරියඤාණස්ස වසී හොමි මහාමුනි.
1241. පුබ්බෙ නිවාසං ජානාමි දිබ්බචක්ඛු විසොධිතං සබ්බාසවා පරික්ඛීණා නත්ථි’දානි පුනබ්භවො.
1242. අත්ථධම්මනිරුත්තීසු පටිභානෙ තථෙව ච ඤාණං මම මහාවීර උප්පන්නං තව සන්තිකෙ.
1243-1245. කිලෙසා ඣාපිතා මය්හං -පෙ- කතං බුද්ධස්ස සාසනං.
ඉත්ථං සුදං සුක්කා භික්ඛුනී භගවතො සන්තිකෙ ඉමා ගාථායො අභාසිත්ථාති.
සුක්කාථෙරියාපදානං පඤ්චමං.
4. 6 රූපනන්දාපදානං.
1246. එකනවුතෙ ඉතො කප්පෙ විපස්සී නාම නායකො උප්පජ්ජි චාරුනයනො සබ්බධම්මෙසු චක්ඛුමා.
1247. තදා’හං බන්ධුමතියං ඉද්ධෙ ඵීතෙ මහාකුලෙ ජාතා සුරූපා දයිතා පූජනීයා ජනස්ස ච.
1248. උපගන්ත්වා මහාවීරං විපස්සිං ලොකනායකං ධම්මං සුණිත්වා සරණං උපෙසිං නරනායකං
1249. සීලෙසු සංවුතා හුත්වා නිබ්බුතෙ ච නරුත්තමෙ ධාතුථූපස්ස උපරි සොණ්ණච්ඡත්තං අපූජයිං.
1250. මුත්තචාගා සීලවතී යාවජීවං තතො චුතා ජහිත්වා මානුසං දෙහං තාවතිංසූපගතා අහං.
1251. තදා දසහි ඨානෙහි අධිභොත්වාන සෙසකෙ රූපසද්දෙහි ගන්ධෙහි රසෙහි ඵුසනෙහි ච.
1252. ආයුනා’පි ච වණ්ණෙන සුඛෙන යසසාපි ච තථෙවාධිපතෙය්යෙන අධිගය්හ විරොචහං.
1253. පච්ඡිමෙ ච භවෙ’දානි ජාතාහං කපිලව්හයෙ ඨිතා ඛෙමකසක්කස්ස නන්දානාමා’තිවිස්සුතා.
1254. අභිරූපං උපපදං අහු මෙ කන්තිසූචකං යදා’හං යොබ්බනප්පත්තා රූපලාවඤ්ඤභූසිතා.
1255. තදා මමත්ථං{1} සක්යානං විවාදො සුමහා අහු පබ්බාජෙසි තතො තතො මා සක්යා විනස්සිසුංති.{2}
1256. පබ්බජිත්වා තථාගතං{3} රූපදෙස්සිං නරුත්තමං සුත්වාන නොපගච්ඡාමි මම රූපෙන ගබ්බිතා.
1257. ඔවාදම්පි න ගච්ඡාමි බුද්ධදස්සනභීරුකා තදා ජිනො උපායෙන උපනෙත්වා සසන්තිකං.
1258. තිස්සො’ත්ථියො නිදස්සෙසි ඉද්ධියා මග්ගකොවිදො අච්ඡරාරූපසදිසං තරුණිං ජරිතං මතං.
1259. තායො දිස්වා සුසංවිග්ගා විරත්තා සෙ කලෙබරෙ අට්ඨාසිං භවනිබ්බින්නා තදා මං ආහ නායකො.
1260. “ආතුරං අසුචිං පූතිං පස්ස නන්දෙ සමුස්සයං උග්ඝරන්තං පග්ඝරන්තං බාලානං අභිනන්දිතං.
1261. අසුභාය චිත්තං භාවෙහි එකග්ගං සුසමාහිතං යථා ඉදං තථා එතං යථා එතං තථා ඉදං.
1262. එවමෙතං අවෙක්ඛන්තී රත්තින්දිවමතන්දිතා තතො සකාය පඤ්ඤාය අභිනිබ්බීජ්ජ වච්ඡසි.”
1263. තස්සා මෙ අප්පමත්තාය විහරන්ත්යා’ධ යොනිසො යථාභූතං අයං කායො දිට්ඨො සන්තරබාහිරො.
1264. අථ නිබ්බින්ද’හං කායො අජ්ඣත්තං ච විරජ්ජ’හං අප්පමත්තා විසංයුත්තා උපසන්තා’ම්හි නිබ්බුතා.
1265. ඉද්ධිසු ච වසී හොමි දිබ්බාය සොතධාතුයා චෙතොපරියඤාණස්ස වසී හොමි මහාමුනි.
1266. පුබ්බෙ නිවාසං ජානාමි දිබ්බචක්ඛු විසොධිතං සබ්බාසවා පරික්ඛීණා නත්ථි’දානි පුනබ්භවො.
1267. අත්ථධම්මනිරුත්තීසු පටිභානෙ තථෙව ච ඤාණං මම මහාවීර උප්පන්නං තව සන්තිකෙ.
1268-1270. කිලෙසා ඣාපිතා මය්හං -පෙ- කතං බුද්ධස්ස සාසනං.
ඉත්ථං සුදං රූපනන්දා භික්ඛුනී භගවතො සන්තිකෙ ඉමා ගාථායො අභාසිත්ථාති.
රූපනන්දාථෙරියාපදානං ඡට්ඨං.
4. 7 අඩ්ඪකාසී අපදානං
1271. ඉමම්හි භද්දකෙ කප්පෙ බ්රහ්මබන්ධු මහායසො කස්සපො නාම නාමෙන උප්පජ්ජි වදතං වරො.
1272. තදාහං පබ්බජිත්වාන තස්ස බුද්ධස්ස සාසනෙ සංවුතා පාතිමොක්ඛස්මිං ඉන්ද්රියෙසු ච පඤ්චසු.
1273. මත්තඤ්ඤුනී ච අසනෙ යුත්තා ජාගරියෙපි ච වසන්තී යුත්තයොගා’හං භික්ඛුනිං විගතාසවං.
1274. අක්කොසිං දුට්ඨචිත්තාහං “ගණිකෙ”ති ච භණිං තදා තෙන පාපෙන කම්මෙන නිරයම්හි අපච්චිසං.
1275. තෙනෙව කම්මසෙසෙන අජායිං ගණිකාකුලෙ බහුසොව පරාධීනා පච්ඡිමාය ච ජාතියං.
1276. කාසිසු සෙට්ඨිකුලජා බ්රහ්මචරියඵලෙනහං අච්ඡරා විය දෙවෙසු අහොසිං රූපසම්පදා.
1277. දිස්වාන දස්සනීයං මං ගිරිබ්බජපුරුත්තමෙ ගණිකත්තෙ නිවෙසෙසුං අක්කොසනඵලෙන මෙ.
1278. සා’හං සුත්වාන සද්ධම්මං බුද්ධසෙට්ඨස්ස දෙසිතං පුබ්බවාසෙසම්පන්නා පබ්බජිං අනගාරියං.
1279. තතොපසම්පදත්ථාය ගච්ඡන්තී ජිනසන්තිකං මග්ගෙ ධුත්තෙ ඨිතෙ සුත්වා ලභිං දූතොපසම්පදං.
1280. සබ්බං කම්මං පරික්ඛීණං පුඤ්ඤං පාපං තථෙව ච සබ්බසංසාරමුත්තිණ්ණා ගණිකත්තං ච ඛෙපිතං.
1281. ඉද්ධීසු ච වසී හොමි දිබ්බාය සොතධාතුයා චෙතොපරියඤාණස්ස වසී හොමි මහාමුනෙ.
1282. පුබ්බෙ නිවාසං ජානාමි දිබ්බචක්ඛු විසොධිතං සබ්බාසවා පරික්ඛීණා නත්ථි’දානි පුනබ්භවො.
1283. අත්ථධම්මනිරුත්තීසු පටිභානෙ තථෙව ච ඤාණං මම මහාවීර උප්පන්නං තව සන්තිකෙ.
1284-1286. කිලෙසා ඣාපිතා -පෙ- කතං බුද්ධස්ස සාසනං.
ඉත්ථං සුදං අඩ්ඪකාසී භික්ඛුනී භගවතො සම්මුඛා ඉමා ගාථායො අභාසිත්ථාති.
අඩ්ඪකාසීථෙරියාපදානං සත්තමං.
4. 8 පුණ්ණාපදානං
1287. විපස්සිනො භගවතො සිඛිනො වෙස්සභුස්ස ච කකුසන්ධස්ස මුනිනො කොණාගමනතාදිනො.
1288. කස්සපස්ස ච බුද්ධස්ස පබ්බජිත්වාන සාසනෙ භික්ඛුනී සීලසම්පන්නා නිපකා සංවුතින්ද්රියා.
1289. බහුස්සුතා ධම්මධරා ධම්මත්ථපරිපුච්ඡිකා උග්ගහෙතා ච ධම්මානං සොතා පයිරුපාසිකා.
1290. දෙසෙන්තී ජනමජ්ඣෙ’හං අහොසිං ජිනසාසනෙ බාහුසච්චෙන තෙනා’හං පෙසලා අතිමඤ්ඤිසං.
1291. පච්ඡිමෙ ච භවෙ’දානි සාවත්ථියං පුරුත්තමෙ. අනාථපිණ්ඩිනො ගෙහෙ ජාතා’හං කුම්භදාසියා.
1292. ගතා උදකහාරිකං සොත්ථියං දිජමද්දසං සීතට්ටං තොයමජ්ඣම්හි තං දිස්වා ඉදමබ්රවිං.
1293. උදහාරී අහං සීතෙ සදා උදකමොතරිං අය්යානං දණ්ඩභයභීතා වාචාදොසභයට්ටිතා.
1294. කස්ස බ්රාහ්මණ ත්වං භීතො සදා උදකමොතරි වෙධමානෙහි ගත්තෙහි සීතං වෙදයසෙ භුසං.
1295. ජානන්ති වත මං භොති පුණ්ණිකෙ පරිපුච්ඡසි කරොන්තං කුසලං කම්මං රුන්ධන්තං කතපාපකං.
1296. යො වුඩ්ඪො දහරො වාපි පාපකම්මං පකුබ්බති දකාභිසිඤ්චනා හොති පාපකම්මා පමුච්චති.
1297. උත්තරන්තස්ස අක්ඛාසිං ධම්මත්ථසංහිතං පදං තං ච ඤත්වා ස සංවිග්ගො පබ්බජිත්වා’රහා අහු.
1298. පූරෙන්ති ඌනකසතං ජාතා දාසිකුලෙ යතො තතො ‘පුණ්ණා’ති නාමං මෙ භුජිස්සං මං අකංසු’තෙ.
1299. සෙට්ඨිං තතොනුමොදෙත්වා පබ්බජිං අනගාරියං න චිරෙනෙව කාලෙන අරහත්තං අපාපුණිං.
1300. ඉද්ධීසු ච වසී හොමි දිබ්බාය සොතධාතුයා චෙතොපරියඤාණස්ස වසී හොමි මහාමුනෙ.
1301. පුබ්බෙ නිවාසං ජානාමි දිබ්බචක්ඛු විසොධිතං සබ්බාසවා පරික්ඛීණා නත්ථි’දානි පුනබ්භවො.
1302. අත්ථධම්මනිරුත්තීසු පටිභානෙ තථෙව ච ඤාණං මම විමලං සුද්ධං බුද්ධසෙට්ඨස්ස වාහසා.
1303. භාවනාය මහාපඤ්ඤා සුතෙන ච සුතාවිනී මානෙන නිචකුලජා න හි කම්මං විනස්සති.
1304-1306. කිලෙසා ඣාපිතා -පෙ- කතං බුද්ධස්ස සාසනං.
ඉත්ථං සුදං පුණ්ණා භික්ඛුනී ඉමා ගාථායො අභාසිත්ථාති.
පුණ්ණාථෙරියාපදානං අට්ඨමං.
4. 9 අම්බපාලී අපදානං
1307. යො රංසිඵුසිතාවෙලො ඵුස්සො නාම මහාමුනි තස්සා’හං භගිනී ආසිං අජායිං ඛත්තියෙ කුලෙ
1308. තස්ස ධම්මං සුණිත්වා’හං විප්පසන්නෙන චෙතසා මහාදානං දදිත්වාන පත්ථයිං රූපසම්පදං.