1118. කෙචි පබ්බජිතා අත්ථි සච්චදස්සාවිනො බහූ දෙවා ච කින්නරා නාගා බුජ්ඣිස්සන්ති අනාගතෙ.
1119. අනුභොත්වා යසං සබ්බං පත්වාන සබ්බසම්පදා ත්වයි පසාදං පටිලද්ධා බුජ්ඣිස්සන්ති අනාගතෙ.
1120. අම්හෙ බ්රාහ්මණධීතා තු බ්රහ්මඤ්ඤකුලසම්හවා පෙක්ඛතො නො මහාවීර පාදෙ වන්දාම චක්ඛුම.
1121. උපහතා භවා සබ්බෙ මූලතණ්හා සමූහතා සමුච්ඡින්නා අනුසයා පුඤ්ඤසඞ්ඛාරා දාලිතා.
1122. සමාධිගොචරා සබ්බා සමාපත්තිවසී තථා ඣානෙන ධම්මරතියා විහරිස්සාම නො සදා
1123. භවනෙත්තී අවිජ්ජා ච සඞ්ඛාරා’පි ච ඛෙපිතා සුදුද්දසං පදං ගන්තුං අනුජානාථ නායක.
1124. උපකාරා මමං තුම්හෙ දීඝරත්තං කතාවිනො බහුන්නං සංසයං ඡෙත්වා සබ්බා ගච්ඡන්තු{1} නිබ්බුතිං.
1125. වන්දිත්වා මුනිනො පාදෙ කත්වා ඉද්ධිවිකුබ්බණං. කාචි දස්සෙන්ති ආලොකං අන්ධකාරමථාපරා.
1126. දස්සෙන්ති චන්දසුරියෙ සාගරං ච සමච්ඡකං සිනෙරුපරිභණ්ඩං ච දස්සෙන්ති පාරිඡත්තකං.
1127. තාවතිංසං ච භවනං යාමං දස්සෙන්ති ඉද්ධියා තුසිතං නිම්මිතෙ දෙවෙ වසවත්තී මහිස්සරෙ.
1128. බ්රහ්මානො කාචි දස්සෙන්ති චඞ්කමං ච මහාරහං බ්රහ්මවණ්ණං ච මාපෙත්වා ධම්මං දෙසෙන්ති සුඤ්ඤතං.
1129. නානාවිකුබ්බණං කත්වා ඉද්ධිං දස්සිය සත්ථුනො දස්සයිංසු බලං සබ්බා පාදෙ වන්දිංසු සත්ථුනො.
1130. ඉද්ධිසු ච වසී හොම දිබ්බාය සොතධාතුයා චෙතොපරියඤාණස්ස වසී හොම මහාමුනෙ.
1131. පුබ්බෙනිවාසං ජානාම දිබ්බචක්ඛු විසොධිතං සබ්බාසවා පරික්ඛීණා නත්ථිදානි පුනබ්භවො.
1132. අත්ථධම්මනිරුත්තීසු පටිභානෙ තථෙව ච ඤාණං අම්හං මහාවීර උප්පන්නං තව සන්තිකෙ.
1133. පුබ්බානං ලොකනාථානං සඞ්ගමං නො නිදස්සිතං අධිකාරා බහූ අම්හං තුය්හත්ථාය මහාමුනෙ.
1134. යං අම්හෙහි කතං කම්මං කුසලං සරතං මුනෙ තුය්හත්ථාය මහාවීර පුඤ්ඤා’නුපචිතානි නො.
1135. සතසහස්සෙ ඉතො කප්පෙ පදුමුත්තරො මහාමුනි පුරං හංසවතී නාම සම්බුද්ධස්ස කුලාසයං.
1136. ද්වාරෙන හංසවතියා ගඞ්ගා සන්දති සබ්බදා උබ්බාළ්හා නදියා භික්ඛූ ගමනං න ලභන්ති තෙ.
1137. දිවසං ද්වෙ තයො චෙව සත්තාහං මාසකං තතො චතුමාසම්පි සම්පුණ්ණං ගමනං න ලභන්ති තෙ.
1138. තදා අහු සත්තසාරො ජටිලො නාම රට්ඨිකො ඔරුද්ධෙ භික්ඛවො දිස්වා සෙතුං ගඞ්ගාය කාරයී.
1139. තදා සතසහස්සෙහි සෙතුං ගඞ්ගාය කාරයී සඞ්ඝස්ස ඔරිමෙ තීරෙ විහාරං ච අකාරයී.
1140. ඉත්ථියො පුරිසා චෙව උච්චනීචකුලානි ච තස්ස සෙචුවිහාරෙ ච{1} සමභාගං අකංසු තෙ.
1141. අම්හෙ අඤ්ඤෙ ච මනුජා විප්පසන්නෙන චෙතසා තස්ස කම්මෙසු දායාදා නගරෙ ජනපදෙසු ච.
1142. ඉත්ථි පුරිසා කුමාරා ච බහූ චෙව කුමාරිකා සෙතුනො ච විහාරස්ස වාලුකා ආකිරිංසු තෙ.
1143. වීථිසම්මජ්ජනං කත්වා කදලී පුණ්ණඝටෙ ධජෙ{2} ධූපං චුණ්ණං ච{3} මාලං ච කාරං කත්වාන සත්ථුනො.
1144. සෙතුවිහාරෙ කාරෙත්වා නිමන්තෙත්වා විනායකං මහාදානං දදිත්වාන සම්බොධිං අභිපත්ථයී.
1145. පදුමුත්තරො මහාවීරො තාරකො සබ්බපාණිනං අනුමොදනියං‘කාසි ජටිලස්ස මහාමුනි.
1146. “සතහසස්සෙ අතික්කන්තෙ කප්පො හෙස්සති භද්දකො භවාභවෙ’නුභොත්වාන පාපුණිස්සති බොධියං.
1147. යෙ කෙචි හත්ථපරිකම්මං කතාවී නරනාරියො අනාගතස්මිං අද්ධානෙ සබ්බා හෙස්සන්ති සම්මුඛා.
1148. තෙන කම්මවිපාකෙන චෙතනාපණිධීහි ච උපපන්නා දෙවභවනං තුය්හං තා පරිචාරිකා.
1149. දිබ්බං සුඛං අසඞ්ඛෙය්යං මානුසං ච අසඞ්ඛ්යයං අනුභොන්තී චිරං කාලං සංසරිම්හ භවාභවෙ.
1150. සතසහස්සෙ ඉතො කප්පෙ සුකතං කම්මසම්පදං සුඛුමාලී මනුස්සෙසු අථො දෙවපුරෙ වරෙ.
1151. රූපභොගයසෙ චෙව අථො කිත්තිං ච සක්කතං ලභාම සතතං සබ්බං සුකතං කම්මසම්පදං.
1152. පච්ඡිමෙ භවෙ සම්පත්තෙ ජාතාම්හ බ්රාහ්මණෙ කුලෙ සුඛුමාලහත්ථපාදා සක්යපුත්තනිවෙසනෙ.
1153. සබ්බකාලම්පි පඨවිං න පස්සාම’නලඞ්කතං චීක්ඛල්ලභූමිමසුචිං න පස්සාම මහාමුනෙ.
1154. අගාරං වසන්තෙ අම්හෙ සක්කාරං සබ්බකාලිකං උපනෙන්ති තදා සබ්බං පුබ්බකම්මබලෙන නො.
1155. අගාරං පජහිත්වාන පබ්බජිත්වා’නගාරියං සංසාරපථනිත්තිණ්ණා වීතරාගා භවාමසෙ.
1156. චීවරං පිණ්ඩපාතං ච පච්චයං සයනාසනං උපනෙන්ති සදා අම්හෙ සහස්සානි තතො තතො.
1157. කිලෙසා ඣාපිතා’ම්හාකං භවා සබ්බෙ සමූහතා, නාගීව බන්ධනං ඡෙත්වා විහරාම අනාසවා.
1158. ස්වාගතං වත නො ආසී බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
1159. පටිසම්භිදා ... කතං බුද්ධස්ස සාසනං.
ඉත්ථං සුදං චතුරාසීතිබ්රාහ්මණකඤ්ඤාභික්ඛුනීසහස්සානි භගවතො සම්මුඛා ඉමා ගාථායො අභාසිත්ථාති.
චතුරාසීතිභික්ඛුනීසහස්සාපදානං දුතියං.
4. 3 උප්පලදායිකාපදානං
1160. නගරෙ අරුණවතියා අරුණො නාම ඛත්තියො තස්ස රඤ්ඤො අහං භරියා එකජ්ඣං චාරයාමහං.
1161. රහොගතා නිසීදිත්වා එවං චින්තෙස’හං තදා ආදාය ගමනීයං හි කුසලං නත්ථි මෙ කතං.
1162. මහාසිතාපං කටුකං ඝොරරූපං සුදාරුණං නිරයං නූන ගච්ඡාමි එත්ථ මෙ නත්ථි සංසයො.
1163. එවාහං චින්තයිත්වාන පහංසෙත්වාන මානසං රාජානං උපගන්ත්වාන ඉදං වචනමබ්රවිං.
1164. “ඉත්ථි නාම මයං දෙව පුරිසානුගතා සදා එකං මෙ සමණං දෙහි භොජයිස්සාමි ඛත්තිය.”
1165. අදාසි මෙ තදා රාජා සමණං භාවිතින්ද්රියං තස්ස පත්තං ගහෙත්වාන පරමන්නෙන පූරයිං.
1166. පූරෙත්වා පරමං අන්නං සහස්සග්ඝනකෙනහං{1} මහාචෙලෙන ඡාදෙත්වා අදාසිං තුට්ඨමානසා.
1167. තෙන කම්මෙන සුකතෙන චෙතනාපණිධීහි ච ජහිත්වා මානුසං දෙහං තාවතිංසං අගච්ඡහං.
1168. සහස්සං දෙවරාජූනං{2} මහෙසිත්තමකාරයිං. සහස්සං චක්කවත්තීනං මහෙසිත්තමකාරයිං.
1169. පදෙසරජ්ජං විපුලං ගණනාතො අසඞ්ඛියං නානාවිධං බහුං අඤ්ඤං තස්ස කම්මඵලං තතො.
1170. උප්පලස්සෙව මෙ වණ්ණො අභිරූපා සුදස්සනා ඉත්ථි සබ්බඞ්ගසම්පන්නා අභිජාතා ජුතින්ධරා.
1171. පච්ඡිමභවෙ සම්පත්තෙ අජායිං සාකියෙ කුලෙ නාරීසහස්සපාමොක්ඛා සුද්ධොදනසුතස්සහං.
1172. නිබ්බින්දිත්වා අගාරෙහං පබ්බජිං අනගාරියං සත්තමිං රත්තිමප්පත්වා චතුසච්චමපාපුණිං.
1173. චීවරං පිණ්ඩපාතං ච පච්චයං සයනාසනං පරිමෙතුං න සක්කොමි පිණ්ඩපාතස්සිදං ඵලං
1174. යං මය්හං පුරිමං කම්මං කුසලං සරසෙ මුනි තුය්හත්ථාය මහාවීර පරිච්චත්තං බහුං මයා.
1175. එකතිංසෙ ඉතො කප්පෙ යං දානමදදිං තදා දුග්ගතිං නාභිජානාමි පිණ්ඩපාතස්සිදං ඵලං.
1176. ද්වෙ ගතියො පජානාමි දෙවත්තං අථ මානුසං අඤ්ඤං ගතිං න ජානාමි පිණ්ඩපාතස්සිදං ඵලං
1177. උච්චෙ කුලෙ පජායාමි මහාසාලෙ මහද්ධනෙ අඤ්ඤෙ කුලෙ න ජානාමි පිණ්ඩපාතස්සිදං ඵලං.
1178. භවාභවෙ සංසරිත්වා සුක්කමූලෙන චොදිතා අමනාපං න පස්සාමි සොමනස්සකතං ඵලං.{1}
1179. ඉද්ධීසු ච වසී හොමි දිබ්බාය සොතධාතුයා චෙතොපරියඤාණස්ස වසී හොමි මහාමුනි.
1180. පුබ්බෙ නිවාසං ජානාමි දිබ්බචක්ඛු විසොධිතං සබ්බාසවා පරික්ඛීණා නත්ථි’දානි පුනබ්භවො.
1181. අත්ථධම්මනිරුත්තීසු පටිභානෙ තථෙව ච ඤාණං මම මහාවීර උප්පන්නං තව සන්තිකෙ.
1182-1184. කිලෙසා ඣාපිතා මය්හං ... කතං බුද්ධස්ස සාසනං.
ඉත්ථං සුදං උප්පලදායිකා භික්ඛුනී භගවතො සම්මුඛා ඉමා ගාථායො අභාසිත්ථාති.
උප්පලදායිකාථෙරියාපදානං තතියං.
4. 4 සිගාලමාතාපදානං
1185. පදුමුත්තරො නාම ජිනො සබ්බධම්මානපාරගූ ඉතො සතසහස්සම්හි කප්පෙ උපපජ්ජි නායකො.
1186. තදාහං හංසවතියං ජාතාමච්චකුලෙ අහුං නානාරතනපජ්ජොතෙ ඉද්ධෙ ඵීතෙ මහද්ධනෙ.
1187. පිතුනා සහ ගන්ත්වාන මහාජනපුරක්ඛතා ධම්මං බුද්ධස්ස සුත්වාන පබ්බජිං අනගාරියං.
1188. පබ්බජිත්වාන කායෙන පාපකම්මං විවජ්ජයිං වචීදුච්චරිතං හිත්වා ආජීවං පරිසොධයිං.
1189. බුද්ධෙ පසන්නා ධම්මෙ ච සඞ්ඝෙ ච තිබ්බගාරවා සද්ධම්මසවනෙ යුත්තා බුද්ධදස්සනලාලසා.
1190. අග්ගං සද්ධාධිමුත්තානං අස්සොසිං භික්ඛුනිං තදා තං ඨානං පත්ථයිත්වාන තිස්සො සික්ඛා අපූරයිං, තතො මං සුගතො ආහ කරුණානුගතාසයො.
1191. “යස්ස සද්ධා තථාගතෙ අචලා සුප්පතිට්ඨිතා සීලං ච යස්ස කල්යාණං අරියකන්තං පසංසිතං.
1192. සඞ්ඝෙ පසාදො යස්සත්ථි උජුභූතං ච දස්සනං අදළිද්දොති තං ආහු අමොඝං තස්ස ජීවිතං.
1193. තස්මා සද්ධං ච සීලං ච පසාදං ධම්මදස්සනං අනුයුඤ්ජෙථ මෙධාවී සරං බුද්ධානසාසනං.”
1194. තං සුත්වා’හං පමුදිතා අපුච්ඡිං පණිධිං මම තදා අනොමො අමිතො ව්යාකරිත්ථ විනායකො.
1195. බුද්ධෙ පසන්නා කල්යාණි ලච්ඡසෙ තං සුපත්ථිතං සතසහස්සෙ ඉතො කප්පෙ ඔක්කාකකුලසම්භවො ගොතමො නාම නාමෙන සත්ථා ලොකෙ භවිස්සති.
1196. තස්ස ධම්මෙසු දායාදා ඔරසා ධම්මනිම්මිතා සිගාලකස්ස මාතා ති හෙස්සති සත්ථු සාවිකා.
1197. තං සුත්වා මුදිතා හුත්වා යාවජීවං තදා ජිනං මෙත්තචිත්තා පරිචරිං පටිපත්තීහි නායකං.
1198. තෙන කම්මෙන සුකතෙන චෙතනාපණිධීහි ච ජහිත්වා මානුසං දෙහං තාවතිංසං අගච්ඡහං.
1199. පච්ඡිමෙ ච භවෙ’දානි ගිරිබ්බජපුරුත්තමෙ. ජාතා සෙට්ඨිකුලෙ ඵීතෙ මහාරතනසඤ්චයෙ.
1200. පුත්තො සිගාලකො නාම මමාසි විපථො රතො දිට්ඨිගහනපක්ඛන්නො{1} දිසාපූජනතප්පරො.
1201. නානාදිසා නමස්සන්තං පිණ්ඩාය නගරං වජං තං දිස්වා ඔවදී බුද්ධො මග්ගෙ ඨත්වා විනායකො.
1202. තස්ස දෙසයතො ධම්මං නිනාදො{2} විම්හයො අහු දෙවකොටිනරනාරීනං ධම්මා’භිසමයො අහු.
1203. තදාහං{3} පරිසං ගන්ත්වා සුත්වා සුගතභාසිතං සොතාපත්තිඵලං පත්තා පබ්බජිං අනගාරියං.
1204. න චිරෙනෙව කාලෙන බුද්ධදස්සනලාලසා අනුස්සතිං තං භාවෙත්වා අරහත්තං අපාපුණිං
1205. දස්සනත්ථාය බුද්ධස්ස සබ්බදාව වජාමහං අතිත්තායෙව පස්සාමි රූපං නයනනන්දනං.
1206. සබ්බපාරමිසම්භූතං ලක්ඛීනිලයනං වරං රූපං සබ්බසුභාකිණ්ණං අතිත්තා විහරාමහං.
1207. ජිනො තස්මිං ගුණෙ තුට්ඨො එතදග්ගෙ ඨපෙසි මං “සිගාලකස්ස යා මාතා අග්ගා සද්ධාධිමුත්තිකා.”
1208. ඉද්ධීසු ච වසී හොමි දිබ්බාය සොතධාතුයා චෙතොපරියඤාණස්ස වසී හොමි මහාමුනි.
1209. පුබ්බෙ නිවාසං ජානාමි දිබ්බචක්ඛු විසොධිතං සබ්බාසවා පරික්ඛීණා නත්ථිදානි පුනබ්භවො.
1210. අත්ථධම්මනිරුත්තීසු පටිභානෙ තථෙව ච ඤාණං මම මහාවීර උප්පන්නං තව සන්තිකෙ.
1211-1213. කිලෙසා ඣාපිතා -පෙ- කතං බුද්ධස්ස සාසනං.
ඉත්ථං සුදං සිගාලමාතා භික්ඛුනී භගවතො සම්මුඛා ඉමා ගාථායො අභාසිත්ථාති.
සිගාලමාතාථෙරීයාපදානං චතුත්ථං.