1030. දීපඞ්කරො මහාවීරො වියාකාසි විනායකො සුමෙධං ච සුමිත්තං ච සමානසුඛදුක්ඛතං.
1031. සදෙවකං ච පස්සන්තා චිවරන්තා සදෙවකං තෙසං පකිත්තනෙ අම්හෙ උපගම්ම සමාගමං{1}.
1032. අම්හං සබ්බපති හොහි{2} අනාගතසමාගමෙ සබ්බාව තුය්හං භරියා මනාපා පියවාදිකා.
1033. දානසීලමයං සබ්බං භාවනා ච සුභාවිතා{3} දීඝරත්තං ච නො{4} සබ්බං පරිච්චත්තං මහාමුනෙ.
1034. ගන්ධං විලෙපනං මාලං දීපං ච රතනාමයං යං කිඤ්චි පත්ථිතං සබ්බං පරිච්චත්තං මහාමුනෙ.
1035. අඤ්ඤං චා’පි කතං කම්මං පරිභොගං ච මානුසං දීඝරත්තං හි නො සබ්බං පරිච්චත්තං මහාමුනෙ.
1036. අනෙකජාතිසංසාරං බහුං පුඤ්ඤං හි නො කතං ඉස්සරමනුභොත්වාන සංසරිත්වා භවාභවෙ.
1037. පච්ඡිමභවෙ සම්පත්තෙ සක්යපුත්තනිවෙසනෙ නානාකුලූපපන්නායො අච්ඡරාකාමවණණිනී.
1038. ලාභග්ගෙන යසං පත්තා පූජිතා සබ්බසක්කතා ලාභියො අන්නපානානං සදා සම්මානිතා මයං.
1039. අගාරං පජහිත්වාන පබ්බජිත්වානගාරියං අඩ්ඪමාසෙ අසම්පත්තෙ සබ්බා පත්තාම්හ නිබ්බුතිං.
1040. ලාභියො අන්නපානානං වත්ථසෙනාසනානි ච උපෙන්ති පච්චයා සබ්බෙ සදා සක්කතපූජිතා.
1041. කිලෙසා ඣාපිතාම්හාකං භවා සබ්බෙ සමූහතා, නාගීව බන්ධනං ඡෙත්වා විහරාම අනාසවා.
1042. ස්වාගතං වත නො ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
1043. පටිසම්භිදා චතස්සො ච -පෙ- කතං බුද්ධස්ස සාසනං.
ඉත්ථං සුදං යසොධරාපමුඛානි දසභික්ඛුනීසහස්සානි භගවතො සම්මුඛා ඉමා ගාථායො අභාසිත්ථාති.
දසභික්ඛුනීසහස්සාපදානං නවමං.
3. 10 අට්ඨාරසභික්ඛුනීසහස්සාපදානං.
1044. අට්ඨාරසසහස්සානි භික්ඛුනී සක්යසම්හවා යසොධරාපමුඛානි සම්බුද්ධං උපසඞ්කමුං.
1045. අට්ඨාරසසහස්සානි සබ්බා හොන්ති මහිද්ධිකා වන්දන්තී මුනිනො පාදෙ ආරොචෙන්ති යථාබලං.
1046. ජාති ඛීණා ජරා ව්යාධි මරණං ච මහාමුනි අනාසවං පදං සන්තං අමතං යාම නායක.
1047. ඛලිතං චෙ පුරෙ අත්ථි සබ්බාසම්පි මහාමුනි අපරාධමජානන්තී{1} ඛම අම්හං විනායක.
1048. “ඉද්ධිං චාපි නිදස්සෙථ මම සාසනකාරිකා පරිසානං ච සබ්බාසං කඞ්ඛං ඡින්දථ යාවතා.”
1049. යසොධරී මහාවීර මනාපා පියදස්සනා සබ්බා තුය්හං මහාවීර අගාරස්මිං පජාපතී.
1050. ථිනං සතසහස්සානං නවුතීනං ඡළුත්තරි අගාරෙ තෙ මයං වීර පාමොක්ඛා සබ්බඉස්සරා.
1051. රූපාචාරගුණූපෙතා යොබ්බනට්ඨා පියංවදා සබ්බායො අපචායන්ති දෙවතා විය මානුසා.
1052. අට්ඨාරසසහස්සානි සබ්බා සාකියසම්හවා යසොධරා{2} සහස්සානි පාමොක්ඛා ඉස්සරා තදා.
1053. කාමධාතුමතික්කන්තා සණ්ඨිතා රූපධාතුයා රූපෙන සදිසා නත්ථි සහස්සානං මහාමුනි.
1054. සම්බුද්ධං අභිවාදෙත්වා ඉද්ධිං දස්සෙසු සත්ථුනො නෙකා{3} නානාවිධාකාරා මහාඉද්ධිපි දස්සයුං.
1055. චක්කවාළසමං කායං සීසං උත්තරතො කුරු උභො පක්ඛා දුවෙ දීපා ජම්බුදීපං සරීරතො.
1056. දක්ඛිණං ච සරං පිඤ්ජං නානාසාඛා තු පත්තකා චන්දසූරවිසාලක්ඛා{4} මෙරුපබ්බතතො සිඛා.
1057. චක්කවාළගිරිතුණ්ඩා ජම්බුරුක්ඛං සමූලකං වීජමානා උපගන්ත්වා වන්දන්ති ලොකනායකං.
1058. හත්ථිවණ්ණං තථෙවස්සං පබ්බතං ජලධිං තථා චන්ද ච සුරියං මෙරුං සක්කවණ්ණං ච දස්සයුං.
1059. යසොධරා මයං වීර පාදෙ වන්දාම චක්ඛුම තව වීර පභාවනෙ නිප්ඵන්තා නරනායක.
1060. බුද්ධීසු ච වසී හොම දිබ්බාය සොතධාතුයා චෙතොපරියඤාණස්ස වසී හොම මහාමුනෙ.
1061. පුබ්බෙ නිවාසං ජානාම දිබ්බචක්ඛු විසොධිතං සබ්බාසවා පරික්ඛීණා නත්ථි’දානි පුනබ්භවො.
1062. අත්ථධම්මනිරුත්තීසු පටිභානෙ තථෙව ච ඤාණං අම්හං මහාවීර උප්පන්නං තව සන්තිකෙ.
1063. පුබ්බානං ලොකනාථානං සඞ්ගමං නො නිදස්සිතං අධිකාරා බහූ අම්හං තුම්හත්ථාය මහාමුනෙ.
1064. යං අම්හං පුරිමං කම්මං කුසලං සරසෙ මුනෙ තුම්හත්ථාය මහාවීර පුඤ්ඤානුපචිතානි නො.
1065. අභබ්බට්ඨානෙ වජ්ජෙත්වා වාරයිමහ අනාචරං තුය්හත්ථාය මහාවීර චත්තානි ජීවිතානි නො.
1066. නෙකකොටිසහස්සානං භරියත්ථාය’දාසි නො න තත්ථ විමනා හොම තුය්හත්ථාය මහාමුනෙ.
1067. නෙකකොටිසහස්සානං උපකාරාය’දාසි නො න තත්ථ විමනා හොම තුය්හත්ථාය මහාමුනෙ.
1068. නෙකකොටිසහස්සානං භොජනත්ථාය’දාසි නො න තත්ථ විමනා හොම තුය්හත්ථාය මහාමුනෙ.
1069. නෙකකොටිසහස්සානි ජීවිතානි චජිම්හ නො ‘භයමොක්ඛං කරිස්සාම’ ජීවිතානි චජිම්හ සෙ.
1070. අඞ්ගගතෙ අලඞ්කාරෙ වත්ථෙ නානාවිධෙ බහූ ඉත්ථිභණ්ඩෙ න ගූහාම තුය්හත්ථාය මහාමුනෙ.
1071. ධනධඤ්ඤපරිච්චාගං ගාමානි නිගමානි ච ඛෙත්තා පුත්තා ච ධීතා ච පරිච්චත්තා{1} මහාමුනෙ.
1072. හත්ථි අස්සා ගවා චාපි{2} දාසියො පරිචාරිකා තුය්හත්ථාය මහාවීර පරිච්චත්තා අසඞ්ඛියා{3}.
1073. යං අම්හෙ පටිමන්තෙසි දානං දස්සාම යාචකෙ විමනං නො න පස්සාම දදතො දානමුත්තමං.
1074. නානාවිධං බහුං දුක්ඛං සංසාරෙ ච බහුබ්බිධෙ තුය්හත්ථාය මහාවීර අනුභුත්තං අසඞ්ඛියං.
1075. සුඛප්පත්තා න මොදාම{4} න ච දුක්ඛෙසු දුම්මනා සබ්බත්ථ තුලිතා හොම තුය්හත්ථාය මහාමුනෙ.
1076. අනුමග්ගෙන සම්බුද්ධො යං ධම්මං අභිනීහරි අනුභුත්වා සුඛං දුක්ඛං පත්තො බොධිං මහාමුනි.
1077. බ්රහ්මදෙවං ච සම්බුද්ධං ගොතමං ලොකනායකං අඤ්ඤෙසං ලොකනාථානං සඞ්ගමා තෙහි නො බහූ.
1078. අධිකාරා බහූ අම්හං{5} තුය්හත්ථා මහාමුනෙ ගවෙසතො බුද්ධධම්මෙ මයං තෙ පරිචාරිකා.
1079. කප්පෙ ච සහතහස්සෙ චතුරො ච අසඞ්ඛියෙ දීපඞ්කරො මහාවීරො උප්පජ්ජි ලොකනායකො.
1080. පච්චන්තදෙසවිසයෙ නිමන්තෙත්වා තථාගතං තස්ස ආගමනං මග්ගං සොධෙන්ති තුට්ඨමානසා.
1081. තෙන කාලෙන සො ආසි සුමෙධො නාම බ්රාහ්මණො මග්ගං ච පටියාදෙසි ආයතං{6} සබ්බදස්සිනො.
1082. තෙන කාලෙන ආසිම්හ සබ්බා බ්රාහ්මණසම්හවා ථලූදජානි පුප්ඵානි ආහරිම්හ සමාගමං.
1083. තස්මිං සො සමයෙ බුද්ධො දීපඞ්කරො මහායසො වියාකාසි මහාවීරො ඉසීමුග්ගතමානසං.
1084. චලතී රවති පඨවී සඞ්කම්පති සදෙවකං තස්ස කම්මං පකිත්තෙන්තෙ ඉසිනුග්ගතමානසො.{1}
1085. දෙවකඤ්ඤා මනුස්සා ච මයං චා’පි සදෙවකා නානාපූජනියං භණ්ඩං පූජයිත්වාන පත්ථයුං.
1086. තෙසං බුද්ධො වියාකාසි ජොතිදීපසනාමකො “අජ්ජ යෙ පත්ථිතා අත්ථි තෙ භවිස්සන්ති සම්මුඛා.”
1087. අපරිමෙය්යෙ ඉතො කප්පෙ යං නො බුද්ධො වියාකරි තං වාචමනුමොදන්තී එවඞ්කාරී අහුම්හ නො.
1088. තස්ස කම්මස්ස සුකතස්ස තත්ථ චිත්තං පසාදිය{2} දෙවමානුසකං යොනි අනුභොත්වා අසඞ්ඛියං.
1089. සුඛදුක්ඛෙ’නුභොත්වාන දෙවෙසු මානුසෙසු ච පච්ඡිමභවෙ සම්පත්තෙ ජාතා’ම්හ සාකියෙ කුලෙ.
1090. රූපවතී භොගවතී යසසීලවතී තතො සබ්බඞ්ගසම්පදා හොම කුලෙසු අතිසක්කතා.
1091. ලාභං සිලොකං සක්කාරං ලොකධම්මසමාගමං චිත්තං ච දුක්ඛිතං නත්ථි වසාම අකුතොභයා.
1092. වුත්තං හෙතං භගවතා රඤ්ඤො අන්තෙපුරෙ තදා ඛත්තියානං පුරෙ වීරො උපකාරං ච නිද්දිසි.
1093. උපකාරා ච යා නාරී යා ච නාරී සුඛෙ දුඛෙ අත්ථක්ඛායී ච යා නාරී යා ච නාරී’නුකම්පිකා.
1094. ධම්මං චරෙ සුචරිතං න නං දුච්චරිතං චරෙ ධම්මචාරී සුඛං සෙති අස්මිං ලොකෙ පරම්හි ච.
1095. අගාරං විජහිත්වාන පබ්බජිම්හ’නගාරියං අඩ්ඪමාසෙ අසම්පත්තෙ චතුසච්චං ඵුසිම්හ නො.
1096. චීවරං පිණ්ඩපාතං ච පච්චයං සයනාසනං උපනෙන්ති බහුං අම්හෙ සාගරස්සෙව ඌමියො.
1097. කිලෙසා ඣාපිතා අම්හං භවා සබ්බෙ සමූහතා, නාගීව බන්ධනං ඡෙත්වා විහරාම අනාසවා.
1098. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
1099. පටිසම්භිදා චතස්සො ච -පෙ- කතං බුද්ධස්ස සාසනං.
1100. එවං බහුවිධං දුක්ඛං සම්පත්තී ච බහුබ්බිධා විසුද්ධභාවං සම්පන්නා ලභාම සබ්බසම්පදා.
1101. යා දදන්ති සකත්තානං පුඤ්ඤත්ථාය මහෙසිනො සහායසම්පදා හොන්ති නිබ්බානපදමසඞ්ඛතං.
1102. පරික්ඛීණං අතීතං ච පච්චුප්පන්නං අනාගතං සබ්බං කම්මම්පි නො ඛීණං පාදෙ වන්දාම චක්ඛුම.
1103. නිබ්බානාය වජන්තීනං කිං වො වක්ඛාම උත්තරිං සන්තසඞ්ඛතදොසං හි පප්පොථ අමතං පදං.
ඉත්ථං සුදං යසොධරාපමුඛානි අට්ඨාරසභික්ඛුනීසහස්සානි භගවතො සම්මුඛා ඉමා ගාථායො අභාසිත්ථාති.
යසොධරාපමුඛඅට්ඨාරසභික්ඛුනිසහස්සාපදානං දසමං.
කූණ්ඩලකෙසීවග්ගො තතියො.
තත්ථුද්දානං:
කුණ්ඩලා ගොතමී චෙව ධම්මදින්නා ච සකුලා චරනන්දා ච සොණා ච කාපිලානී යසොධරා, දසසහස්සභික්ඛුනී අට්ඨාරසසහස්සකා ගාථාසතානි චත්තාරි ඡ ච සත්තති මෙව ච.
4. ඛත්තියාවග්ගො
4. 1 යසවතීපමුඛභික්ඛුනීනං අපදානං
1104. භවා සබ්බෙ පරික්ඛීණා භවසන්ධි විමොචිතා සබ්බාසවා ච නො නත්ථි ආරොචෙම මහාමුනෙ.
1105. පුරිමං කුසලං කම්මං යං කිඤ්චි සාධූ පත්ථිතං පරිභොගමයං දින්නං තුය්හත්ථාය මහාමුනෙ.
1106. බුද්ධපච්චෙකබුද්ධානං බුද්ධානං සාවකාන ච පරිභොගමයං දින්නං තුය්හත්ථාය මහාමුනෙ.
1107. උච්චනීචමයං කම්මං භික්ඛූනං සාධු පත්ථිතං උච්චාකුලපරිකම්මං කතමෙතං මහාමුනෙ.
1108. තෙනෙව සුක්කමූලෙන චොදිතා කම්මසම්පදා මානුසිකමතික්කන්තා ජායිංසු ඛත්තියෙ කුලෙ.
1109. උප්පත්තෙ ච කතෙ කම්මෙ ජාතියා චා’පි එකතො පච්ඡිමෙ එකතො ජාතා ඛත්තියා කුලසම්හවා.
1110. රූපවතී භොගවතී ලාභසක්කාරපූජිතා අන්තෙපුරෙ මහාවීර දෙවානං විය නන්දනෙ.
1111. නිබ්බින්දිත්වා අගාරම්හා පබ්බජිම්හ’නගාරියං කතිපාහං උපාදාය සබ්බා පත්තා’ම්හ නිබ්බුතිං.
1112. චීවරං පිණ්ඩපාතං ච පච්චයං සයනාසනං උපනෙන්ති බහූ අම්හෙ සදා සක්කතපූජිතා.
1113. කිලෙසා ඣාපිතා අම්හං භවා සබ්බෙ සමූහතා, නාගීව බන්ධනං ඡෙත්වා විහරාම අනාසවා.
1114-1115. ස්වාගතං වත නො ආසි -පෙ- පටිසම්භිදා චතස්සො ච -පෙ- කතං බුද්ධස්ස සාසනං.
ඉත්ථං සුදං යසවතීපමුඛානි අට්ඨාරසඛත්තියකඤ්ඤා භික්ඛුනීසහස්සානි භගවතො සම්මුඛා ඉමා ගාථායො අභාසිත්ථාති.
යසවතීපමුඛඅට්ඨාරසභික්ඛුනීසහස්සාපදානං පඨමං.
4. 2 බ්රාහ්මණකඤ්ඤාභික්ඛුනීනං අපදානං
1116. චුල්ලාසීතිසහස්සානි බ්රහ්මඤ්ඤකුලසම්හවා සුඛුමාලහත්ථපාදා පුරෙ තුය්හං මහාමුනෙ.
1117. වෙස්සසුද්දකුලෙ ජාතා දෙවා නාගා ච කින්නරා චාතුද්දීපා බහූ කඤ්ඤා පුරෙ තුය්හං මහාමුනෙ.