935. සතානි පඤ්ච’නූනානි යාවජීවං උපට්ඨහි රාජුය්යානෙ නිවාසෙත්වා නිබ්බුතානි ච පූජයි.
936. චෙතියානි ච කාරෙත්වා පබ්බජිත්වා උභො මයං භාවෙත්වා අප්පමඤ්ඤායො බ්රහ්මලොකං අගම්හසෙ.
937. තතො චුතො මහාතිත්ථෙ සුජාතො පිප්ඵලායනො මාතා සුමනදෙවීති කොසියගොත්තො දිජො පිතා.
938. අහං මද්දජනපදෙ සාගලායං පුරුත්තමෙ කපිලස්ස දිජස්සා’සිං ධීතා මාතා සුචීමති.
939. ඝනකඤ්චනබිම්බෙන නිම්මිණිත්වාන මං පිතා අදා කස්සපධීරස්ස කාමාසාවජ්ජිතස්ස{1} මං.
940. කදාචි සො කාරුණිකො ගන්ත්වා කම්මන්තපෙක්ඛනං{2} කාකාදිකෙහි ඛජ්ජන්තෙ පාණෙ දිස්වාන සංවිජි.
941. ඝරෙ චා’හං තිලෙ ජාතෙ දිස්වානාතපතාපනෙ කිමී කාකෙහි ඛජ්ජන්තෙ සංවෙගමලභිං තදා.
942. තදා සො පබ්බජී ධීරො අහං තමනූපබ්බජිං පඤ්ච වස්සානි නිවසිං පරිබ්බාජවතෙ{3} අහං.
943. යදා පබ්බජිතා ආසි ගොතමී ජිනපොසිකා තදා’හං තමුපාගන්ත්වා බුද්ධෙන අනුසාසිතා.
944. න චිරෙනෙව කාලෙන අරහත්තමපාපුණිං අහො කල්යාණමිත්තත්තං කස්සපස්ස සිරීමතො.
945. සුතො බුද්ධස්ස දායාදො කස්සපො සුසමාහිතො පුබ්බෙනිවාසං යො වෙදී සග්ගාපායඤ්ච පස්සති.
946. අථො ජාතික්ඛයං පත්තො අභිඤ්ඤාවොසිතො මුනි එතාහි තීහි විජ්ජාහි තෙවිජ්ජො හොති බ්රාහ්මණො.
947. තථෙව භද්දා කාපිලානී තෙවිජ්ජා මච්චුහායිනී ධාරෙති අන්තිමං දෙහං ජෙත්වා මාරං සවාහිනිං.
948. දිස්වා ආදීනවං ලොකෙ උභො පබ්බජිතා මයං ත්යම්හා ඛීණාසවා දන්තා සීතිභූතාම්හ නිබ්බුතා.
949-951. කිලෙසා ඣාපිතා මය්හං -පෙ- කතං බුද්ධස්ස සාසනං.
ඉත්ථං සුදං භද්දාකාපිලානී භික්ඛුනී ඉමා ගාථායො අභාසිත්ථාති.
භද්දාකාපිලානි ථෙරියාපදානං සත්තමං.
3. 8 යසොධරාපදානං
952. එකස්මිං සමයෙ රම්මෙ ඉද්ධෙ රාජගහෙ පුරෙ පබ්භාරම්හි වරෙකස්මිං වසන්තෙ නරනායකෙ.
953. වසන්තියා තම්හි නගරෙ රම්මෙ භික්ඛුනුපස්සයෙ යසොධරා භික්ඛුනියා එවං ආසි විතක්කිතං;
954. “නන්දො රාහුලභද්දො ච සාවකග්ගා තථෙව ච සුද්ධොදනො මහාරාජා ගොතමී ච පජාපතී.
955. අභිඤ්ඤාතා ච මහාථෙරා ථෙරියො ච මහිද්ධිකා සන්තිං ගතාව ආසුං තෙ දීපච්වීව නිරාසවා.
956. ලොකනාථෙ ධරන්තෙව අහම්පි ච සිවං පදං ගමිස්සාමී”ති චින්තෙත්වා පස්සන්තී ආයුමත්තනො.
957. පස්සිත්වා ආයුසඞ්ඛාරං තදහෙව ඛයං ගතං පත්තචීවරමාදාය නික්ඛමිත්වා සකස්සමා.
958. පුරක්ඛතා භික්ඛුනීහි සතෙහි සහස්සෙහි සා{1} මහිද්ධිකා මහාපඤ්ඤා සම්බුද්ධං උපසඞ්කමි.
959. සම්බුද්ධං අභිවාදෙත්වා සත්ථුනො චක්කලක්ඛිනො නිසින්නා එකමන්තම්හි ඉදං වචනමබ්රවී:
960. “අට්ඨසත්තතිවස්සා’හං{2} පච්ඡිමො වත්තතෙ වයො{3} පබ්භාරං හි{4} අනුප්පත්තා ආරොචෙමි මහාමුනෙ.
961. පරිපක්කො වයො මය්හං පරිත්තං මම ජීවිතං පහාය වො ගමිස්සාමි කතං මෙ සරණමත්තනො.
962. වයං හි{5} පච්ඡිමෙ කාලෙ මරණං උපරුන්ධති{6} අජ්ජ රත්තිං මහාවීර පාපුණිස්සාමි නිබ්බුතිං.
963. නත්ථි ජාති ජරා ව්යාධි මරණඤ්ච යහිං මුනෙ{1} තත්ථ ගච්ඡාම’හං වීර ගතො යත්ථ න දිස්සති.{2}
964. යාවතා පරිසා එත්ථ{3} සමුපාසන්ති සත්ථුනො අපරාධං පජානන්ති{4} ඛමන්තං සම්මුඛා මුනෙ.
965. සංසරිත්වා ච සංසාරෙ ඛලිතං චෙ මමං තයි ආරොචෙමි මහාවීර අපරාධං ඛමස්සු මෙ.
966. සුත්වාන තස්සා වචනං මුනින්දො ඉදමබ්රවි කිමුත්තරං තෙ වක්ඛාමි නිබ්බානාය වජන්තියා.
967. ඉද්ධිං චාපි නිදස්සෙහි මම සාසනකාරිකෙ පරිසානඤ්ච සබ්බාසං කඞ්ඛං ඡින්දස්සු සාසනෙ.
968. සුත්වා තං මුනිනො වාචං භික්ඛුනී සා යසොධරා වන්දිත්වා මුනිරාජං තං ඉදං වචනමබ්රවි:
969. “යසොධරා අහං වීර අගාරෙ තෙ පජාපති සාකියම්හි කුලෙ ජාතා ඉත්ථියඞ්ගෙ පතිට්ඨිතා.
970. ථිනං සතහසස්සානං නවුතීනං ඡළුත්තරි{5} අගාරෙ තෙ අහං වීර පාමොක්ඛා සබ්බඉස්සරා.
971. රූපාචාරගුණූපෙතා යොබ්බනට්ඨා පියංවදා සබ්බා මං අපචායන්ති දෙවතා විය මානුසා.
972. කඤ්ඤාසහස්සප්පමුඛා සක්යපුත්තනිවෙසනෙ සමානසුඛදුක්ඛා තා දෙවතා විය නන්දනෙ.
973. කාමධාතුමතික්කන්තා{6} සණ්ඨිතා රූපධාතුයා රූපෙන සදිසා නත්ථි ඨපෙත්වා ලොකනායකං.”
974. එවමාදීනි වත්වාන උප්පතිත්වාන අම්බරං ඉද්ධි අනෙකා දස්සෙසි බුද්ධානුඤ්ඤා යසොධරා.{*}
975. චක්කවාළසමං කායං සීසං උත්තරතො කුරු උභො පක්ඛා දුවෙ දීපා ජම්බුදීපො{1} සරීරතො.
976. දක්ඛිණඤ්ච සරං පිඤ්ජං නානාසාඛා තු පත්තකා චන්දො ච සුරියො අක්ඛි{2} මෙරුපබ්බතතො සිඛා.{3}
977. චක්කවාළගිරි{4} තුණ්ඩං{5} ජම්බුරුක්ඛං සමූලකං වීජමානා උපාගන්ත්වා වන්දතෙ ලොකනායකං.
978. හත්ථිවණ්ණං තථෙව’ස්සං පබ්බතං ජලධිං තථා වන්දිමං සුරියං මෙරුං{6} සක්කවණ්ණඤ්ච දස්සයි.
979. “යසොධරා අහං වීර පාදෙ වන්දාමි චක්ඛුම” සහස්සං ලොකධාතූනං ඵුල්ලපද්මෙන{7} ඡාදයි.
980. බ්රහ්මවණ්ණඤ්ච මාපෙත්වා ධම්මං දෙසෙසි සුඤ්ඤතං “යසොධරා අහං වීර පාදෙ වන්දාමි චක්ඛුම.
981. ඉද්ධිසු ච වසී හොමි දිබ්බාය සොතධාතුයා චෙතොපරියඤාණස්ස වසී හොමි මහාමුනි.
982. පුබ්බෙනිවාසං ජානාමි දිබ්බචක්ඛු විසොධිතං. සබ්බාසවා පරික්ඛීණා නත්ථිදානි පුනබ්භවො.
983. අත්ථධම්මනිරුත්තීසු පටිභානෙ තථෙව ච ඤාණං මය්හං මහාවීර උප්පන්නං තව සන්තිකෙ.
984. බුද්ධානං ලොකනාථානං සඞ්ගමං තෙ{8} සුදස්සිතං{9} අධිකාරං බහුං මය්හං තුය්හත්ථාය මහාමුනෙ.
985. යං මය්හං පුරිමං කම්මං කුසලං සරසෙ මුනෙ තුය්හත්ථාය මහාවීර පුඤ්ඤං උපචිතං මයා.
986. අභබ්බට්ඨානෙ වජ්ජෙත්වා වාරයිත්වා අනාචරං තුය්හත්ථාය මහාවීර සඤ්චත්තං ජීවිතං මයා.
987. නෙකකොටිසහස්සානං භරියත්ථාය’දාසි මං න තත්ථ විමනා හොමි තුය්හත්ථාය මහාමුනි
988. නෙකකොටිසහස්සානං{1} උපකාරාය’දාසි මං න තත්ථ විමනා හොමි තුය්හත්ථාය මහාමුනි.
989. නෙකකොටිසහස්සානං භොජනත්ථාය’දාසි මං න තත්ථ විමනා හොමි තුය්හත්ථාය මහාමුනි.
990. නෙකකොටිසහස්සානි ජීවිතානි පරිච්චජිං භයමොක්ඛං කරිස්සං ති චජාමි{2} මම ජීවිතං.
991. අඞ්ගගතෙ අලඞ්කාරෙ වත්ථෙ නානාවිධෙ බහූ ඉත්ථිමණ්ඩෙ න ගූහාමි තුය්හත්ථාය මහාමුනි.
992. ධනධඤ්ඤපරිච්චාගං ගාමානි නිගමානි ච ඛෙත්තා{3} පුත්තා ච ධීතා ච පරිච්චත්තා මහාමුනෙ.
993. හත්ථි අස්සා ගවා චාපි දාසියො පරිචාරිකා තුය්හත්ථාය මහාවීර පරිච්චත්තා අසඞ්ඛියා.
994. යං මය්හං පටිමන්තෙසි{4} දානං දස්සාමි යාචකෙ විමනං මෙ න පස්සාමි දදතො දානමුත්තමං.
995. නානාවිධං බහුං දුක්ඛං සංසාරෙ ච බහුබ්බිධෙ තුය්හත්ථාය මහාවීර අනුභුත්තං අසඞ්ඛියං.
996. සුඛප්පත්තා න මොදාමි න ච දුක්ඛෙසු දුම්මනා සබ්බත්ථ තුලිතා හොමි තුය්හත්ථාය මහාමුනෙ.
997. අනුමග්ගෙන සම්බුද්ධො යං ධම්මං අභිනීහරි අනුභුත්වා සුඛං දුක්ඛං පත්තො බොධිං මහාමුනි.
998. බ්රහ්මදෙවඤ්ච සම්බුද්ධං ගොතමං ලොකනායකං. අඤ්ඤෙසං ලොකනාථානං සඞ්ගමා තෙ බහූ මයා.
999. අධිකාරං බහුං මය්හං තුය්හත්ථාය මහාමුනෙ ගවෙසතො බුද්ධධම්මෙ අහං තෙ පරිචාරිකා.
1000. කප්පෙ සතසහස්සෙ ච චතුරො ච අසඞ්ඛියෙ දීපඞ්කරො මහාවීරො උප්පජ්ජි ලොකනායකො.
1001. පච්චන්තදෙසවිසයෙ නිමන්තෙත්වා තථාගතං තස්ස ආගමනං මග්ගං සොධෙන්ති තුට්ඨමානසා.
1002. තෙන කාලෙන සො ආසි සුමෙධො නාම බ්රාහ්මණො. මග්ගඤ්ච පටියාදෙසි ආයතො{1} සබ්බදස්සිනො.
1003. තෙන කාලෙන’හං ආසිං කඤ්ඤා බ්රාහ්මණසම්හවා සුමිත්තා නාම නාමෙන උපගඤ්ඡිං සමාගමං.
1004. අට්ඨ උප්පලහත්ථානි පූජනත්ථාය සත්ථුනො ආදාය ජනසම්මෙජ්ඣ{2} අද්දසං ඉසිමුග්ගතං.
1005. චීරානුපරි ආසීනං{3} අතිකන්තං මනොහරං දිස්වා තදා අමඤ්ඤිස්සං “සඵලං ජීවිතං මම.”
1006. පරක්කමං තං සඵලං අද්දසං ඉසිනො තදා පුබ්බකම්මෙන සම්බුද්ධෙ චිත්තඤ්චාපි පසීදි මෙ.
1007. භිය්යො චිත්තං පසාදෙසිං ඉසෙ උග්ගතමානසෙ{4} දෙය්යං අඤ්ඤං න පස්සාමි දෙමි පුප්ඵානි තෙ ඉසෙ.
1008. පඤ්ච හත්ථා තව හොන්තු තයො හොන්තු මමං ඉසෙ තෙන සිද්ධි{5} සමා හොතු{6} බොධත්ථාය තවං ඉසෙ.
භාණවාරං චතුත්ථං.
1009. ඉසි ගහෙත්වා පුප්ඵානි ආගච්ඡන්තං මහායසං පූජෙසි ජනසම්මජ්ඣෙ{7} බොධත්ථාය මහාඉසිං.{8}
1010. පස්සිත්වා ජනසම්මජ්ඣෙ දීපඞ්කරො මහාමුනි වියාකාසි මහාවීරො ඉසිං උග්ගතමානසං.{*}
1011. සමචිත්තා සමකම්මා සමකාරී භවිස්සති පියා හෙස්සති කම්මෙන තුය්හත්ථාය මහාඉසෙ.{1}
1012. සුදස්සනා සුප්පියා{2} ච මනාපා පියවාදිනී තස්ස ධම්මෙසු දායාදා පියා හෙස්සති{3} ඉත්ථිකා,
1013. යථාපි භණ්ඩසාමුග්ගං අනුරක්ඛන්ති{4} සාමිනො එවං කුසලධම්මානං අනුරක්ඛිස්සතෙ අයං.
1014. තස්ස තෙ{5} අනුකම්පන්තී පූරයිස්සති පාරමී සීහොව පඤ්ජරං භෙත්වා{6} පාපුණිස්සති බොධියං.
1015. අපරිමෙය්යෙ ඉතො කප්පෙ යං මං බුද්ධො වියාකරි තං වාචං අනුමොදන්තී එවංකාරී භවිං අහං.
1016. තස්ස කම්මස්ස සුකතස්ස තත්ථ චිත්තං පසාදයිං දෙවමානුසකං යොනිං උපපජ්ජ{7} අසඞ්ඛියං.
1017. අනුභොත්වා සුඛං දුක්ඛං දෙවෙසු මානුසෙසු ච පච්ඡිමෙ භවෙ සම්පත්තෙ අජායිං සාකියෙ කුලෙ.
1018. රූපවතී භොගවතී යසසීලවතී තථා සබ්බඞ්ගසම්පදා හොමි කුසලෙසු අතිසක්කතා.
1019. ලාභං සිලොකං සක්කාරං ලොකධම්මසමාගමං චිත්තඤ්ච දුක්ඛිතං නත්ථි වසාමි අකුතොභයා.
1020. නිබ්බින්දිත්වාන සංසාරෙ පබ්බජිං අනගාරියං සහස්සපරිවාරෙන පබ්බජිත්වා අකිඤ්චනා.
1021. අගාරං විජහිත්වාන පබ්බජිං අනගාරියං අද්ධමාසෙ අසම්පත්තෙ චතුසච්චං අපාපුණිං.
1022. චීවරං පිණ්ඩපාතං ච පච්චයං සයනාසනං උපනෙන්ති බහූ නෙකෙ සාගරස්සෙව ඌමියො.
1023. කිලෙසා ඣාපිතා මය්හං භවා සබ්බෙ සමූහතා, නාගීව බන්ධනං ඡෙත්වා විහරාමි අනාසවා.
1024. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
1025. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
1026. එවං බහුවිධං දුක්ඛං සම්පත්ති ච බහුබ්බිධා විසුද්ධභාවං සම්පත්තා ලභාමි සබ්බසම්පදා.
1027. සා දදාති සකත්තානං පුඤ්ඤත්ථාය මහෙසිනො සහායසම්පදා හොන්ති නිබ්බානපදමසඞ්ඛතං.
1028. පරික්ඛීණං අතීතං ච පච්චුප්පන්නං අනාගතං සබ්බං කම්මං මමං ඛීණං පාදෙ වන්දාමි චක්ඛුම.
ඉත්ථං සුදං යසොධරා භික්ඛුනී ඉමා ගාථායො අභාසිත්ථාති.
යසොධරාථෙරියාපදානං අට්ඨමං.
3. 9 දසභික්ඛුනීසහස්සාපදානං
1029. කප්පෙ ච සතසහස්සෙ චතුරො ච අසඞ්ඛියෙ දීපඞ්කරො නාම ජිනො උප්පජ්ජි ලොකනායකො.