740. නිමන්තයිත්වා සුගතං සසඞ්ඝං ලොකනායකං මහාදානං දදිත්වාන තං ඨානං අභිපත්ථයිං.
741. තතො මං සුගතො ආහ ඝනනින්නාදසුස්සරො “මමූපට්ඨානනිරතෙ සසඞ්ඝං පරිවෙසිකෙ.
742. සද්ධම්මසවණෙ යුත්තෙ ගුණවඩ්ඪිතමානසෙ භද්දෙ භවස්සු මුදිතා ලච්ඡසෙ පණිධීඵලං.
743. සතසහස්සෙ ඉතො කප්පෙ ඔක්කාකකුලසම්භවො ගොතමො නාම ගොත්තෙන සත්ථා ලොකෙ භවිස්සති.
744. තස්ස ධම්මෙසු දායාදා ඔරසා ධම්මනිම්මිතා ධම්මදින්නාති නාමෙන හෙස්සසි සත්ථුසාවිකා”.
745. තං සුත්වා මුදිතා හුත්වා යාවජීවං මහාමුනිං මෙත්තචිත්තා පරිචරිං පච්චයෙහි විනායකං.
746. තෙන කම්මෙන සුකතෙන චෙතනාපණිධීහි ච ජහිත්වා මානුසං දෙහං තාවතිංසං අගච්ඡහං.
747. ඉමස්මිං භද්දකෙ කප්පෙ බ්රහ්මබන්ධු මහායසො කස්සපො නාම ගොත්තෙන උප්පජ්ජි වදතං වරො.
748. උපට්ඨාකො මහෙසිස්ස තදා ආසි නරිස්සරො කාසිරාජා කිකී නාම බාරාණසිපුරුත්තමෙ.
749. ඡට්ඨා තස්සාසහං ධීතා සුධම්මා ඉති විස්සුතා ධම්මං සුත්වා ජිනග්ගස්ස පබ්බජ්ජං සමරොචයිං.
750. නානුජානාසි{1} මං තාතො අගාරෙ’නාලයා{2} මයං වීසං වස්සසහස්සානි විචරිම්හ අතන්දිතා.
භාණවාරං තතියං.
751. කොමාරිබ්රහ්මචරියං රාජකඤ්ඤා සුඛෙධිතා බුද්ධුපට්ඨාන නිරතා මුදිතා සත්ත ධීතරො.
752. සමණී සමණගුත්තා ච භික්ඛුනී භික්ඛුදාසිකා ධම්මා චෙව සුධම්මා ච සත්තමී සඞ්ඝදාසිකා.
753. ඛෙමා උප්පලවණ්ණා ච පටාචාරා ච කුණ්ඩලා ගොතමී ච අහං චෙව විසාඛා හොති සත්තමී.
754. තෙහි කම්මෙහි සුකතෙහි චෙතනාපණිධීහි ච ජහිත්වා මානුසං දෙහං තාවතිංසං අගච්ඡහං.
755. පච්ඡිමෙ ච භවෙදානි ගිරිබ්බජපුරුත්තමෙ, ජාතා සෙට්ඨිකුලෙ ඵීතෙ සබ්බකාමසමිද්ධකෙ.{3}
756. යදා රූපගුණොපෙතා පඨමෙ යොබ්බනෙ ඨිතා තදා පරකුලං ගන්ත්වා වසිං සුඛසමප්පිතා.
757. උපෙත්වා ලොකසරණං සුණිත්වා ධම්මදෙසනං අනාගාමිඵලං පත්තො සාමිකො මෙ සුඛුද්ධිමා.
758. තදා තං අනුජානෙත්වා පබ්බජිං අනගාරියං න චිරෙනෙව කාලෙන අරහත්තමපාපුණිං.
759. තදා උපාසකො සො මං උපගන්ත්වා අපුච්ඡථ ගම්භීරෙ නිපුණෙ පඤ්ඤෙ තෙ සබ්බෙ ව්යාකරිං අහං
760. ජිනො තස්මිං ගුණෙ තුට්ඨො එතදග්ගෙ ඨපෙසි මං භික්ඛුනිං ධම්මකථිකං නාඤ්ඤං පස්සාමි එදිසං.
761. ධම්මදින්නා යථා ධීරා එවං ධාරෙථ භික්ඛවො එවාහං පණ්ඩිතා ජාතා නායකෙනානුකම්පිතා.
762. පරිචිණ්ණො මයා සත්ථා කතං බුද්ධස්ස සාසනං. ඔහිතො ගරුකො භාරො භවනෙත්ති සමූහතා.
763. යස්සත්ථාය පබ්බජිතා අගාරස්මානගාරියං සො මෙ අත්ථො අනුප්පත්තො සබ්බසංයොජනක්ඛයො.
764. ඉද්ධීසු ච වසී හොමි දිබ්බාය සොතධාතුයා පරචිත්තානි ජානාමි සත්ථු සාසනකාරිකා.
765. පුබ්බෙනිවාසං ජානාමි දිබ්බචක්ඛු විසොධිතං ඛෙපෙත්වා ආසවෙ සබ්බෙ විසුද්ධාම්හි සුනිම්මලා.
766-768. කිලෙසා ඣාපිතා මය්හං -පෙ- කතං බුද්ධස්ස සාසනං.
ඉත්ථං සුදං ධම්මදින්නා භික්ඛුනී ඉමා ගාථායො අභාසිත්ථාති.
ධම්මදින්නාථෙරියාපදානං තතියං.
3. 4 සකුලාපදානං.
769. පදුමුත්තරො නාම ජිනො සබ්බධම්මානපාරගූ ඉතො සතසහස්සම්හි කප්පෙ උප්පජ්ජි නායකො.
770. හිතාය සබ්බසත්තානං සුඛාය වදතං වරො අත්ථාය පුරිසාජඤ්ඤො පටිපන්නො සදෙවකෙ.
771. යසග්ගප්පත්තො සිරිමා වණ්ණකිත්තිභතො{1} ජිනො පූජිතො සබ්බලොකස්ස දිසා සබ්බාසු විස්සුතො.
772. උත්තිණ්ණවිචිකිච්ඡො සො වීතිවත්තකථංකථො සම්පුණ්ණමනසඞ්කප්පො පත්තො සම්බොධිමුත්තමං.
773. අනුප්පන්නස්ස මග්ගස්ස උප්පාදෙතා නරුත්තමො. අනක්ඛාතඤ්ච අක්ඛාසි අසඤ්ජාතඤ්ච සඤ්ජනී.
774. මග්ගඤ්ඤූ ච මග්ගවිදූ මග්ගක්ඛායී නරාසභො මග්ගස්ස කුසලො සත්ථා සාරථීනං වරුත්තමො.
775. මහාකාරුණිකො සත්ථා{2} ධම්මං දෙසෙසි නායකො නිමුග්ගෙ කාමපඞ්කම්හි සමුද්ධරති පාණිනො.
776. තදා’හං හංසවතියං ජාතා ඛත්තියනන්දනා සුරූපා සධනා චාසිං දයිතා ච සිරීමතී.
777. ආනන්දස්ස මහාරඤ්ඤො ධීතා පරමසොභනා වෙමාතු{1}භගිනී චාපි පදුමුත්තරනාමිනො.
778. රාජකඤ්ඤාහි සහිතා සබ්බාභරණභූසිතා උපගම්ම{2} මහාවීරං අස්සොසිං ධම්මදෙසනං.
779. තදා හි සො ලොකගරු භික්ඛුනිං දිබ්බචක්ඛුකං කිත්තයං පරිසාමජ්ඣෙ{3} අග්ගට්ඨානෙ ඨපෙසි තං.
780. සුණිත්වා තමහං හට්ඨා දානං දත්වාන සත්ථුනො පූජෙත්වාන{4} ච සම්බුද්ධං දිබ්බචක්ඛුං අපත්ථයිං.
781. තතො{5} අවොච මං සත්ථා “නන්දෙ ලච්ඡසි පත්ථිතං පදීපධම්මදානානං ඵලමෙතං සුනිච්ඡිතං.
782. සතසහස්සෙ ඉතො කප්පෙ ඔක්කාකකුලසම්භවො ගොතමො නාම ගොත්තෙන සත්ථා ලොකෙ භවිස්සති.
783. තස්ස ධම්මෙසු දායාදා ඔරසා ධම්මනිම්මිතා සකුලා නාම{6} නාමෙන හෙස්සසි සත්ථුසාවිකා.”
784. තෙන කම්මෙන සුකතෙන චෙතනාපණිධීහි ච ජහිත්වා මානුසං දෙහං තාවතිංසං අගච්ඡ’හං.
785. ඉමම්හි භද්දකෙ කප්පෙ බ්රහ්මබන්ධු මහායසො කස්සපො නාම ගොත්තෙන උප්පජ්ජි වදතං වරො.
786. පරිබ්බාජකිනී ආසිං තදා’හං එකචාරිනි භික්ඛාය විචරිත්වාන අලභිං තෙලමත්තකං.
787. තෙන දීපං පදීපෙත්වා උපට්ඨිං සබ්බසංවරිං චෙතියං දිපදග්ගස්ස{7} විප්පසන්නෙන චෙතසා.
788. තෙන කම්මෙන සුකතෙන චෙතනාපණිධීහි ච ජහිත්වා මානුසං දෙහං තාවතිංසං අගච්ඡ’හං.
789. යත්ථ යත්ථූපපජ්ජාමි තස්ස කම්මස්ස වාහසා පජ්ජලන්ති{1} මහාදිපා තත්ථ තත්ථ ගතාය මෙ.
790. තිරොකුඩ්ඩං තිරොසෙලං සමතිග්ගය්හ පබ්බතං පස්සාම’හං{2} යදිච්චාමි දීපදානස්සිදං ඵලං
791. විසුද්ධනයනා හොමි යසසා ච ජලාම’හං සද්ධාපඤ්ඤාවතී චෙව දීපදානස්සිදං ඵලං.
792. පච්ඡිමෙ ච භවෙදානි ජාතා විප්පකුලෙ අහං පහූතධනධඤ්ඤම්හි මුදිතෙ රාජපූජිතෙ.
793. අහුං{3} සබ්බඞ්ගසම්පන්නා සබ්බාභරණභූසිතා පුරප්පවෙසෙ සුගතං වාතපානෙ ඨිතා අහං.
794. දිස්වා ජලන්තං යසසා දෙවමානුස{4}සක්කතං අනුබ්යඤ්ජන{5}සම්පන්නං ලක්ඛණෙහි විභූසිතං.
795. උදග්ගචිත්තා සුමනා පබ්බජ්ජං සමරොචයිං න චිරෙනෙව කාලෙන අරහත්තමපාපුණිං.
796. ඉද්ධීසු ච වසී හොමි දිබ්බාය සොතධාතුයා පරචිත්තානි ජානාමි සත්ථුසාසනකාරිකා.
797. පුබ්බෙනිවාසං ජානාමි දිබ්බචක්ඛු විසොධිතං ඛෙපෙත්වා ආසවෙ සබ්බෙ විසුද්ධාසිං සුනිම්මලා.
798. පරිචිණ්ණො මයා සත්ථා කතං බුද්ධස්ස සාසනං ඔහිතො ගරුකොභාරො භවනෙත්ති සමූහතා.
799. යස්සත්ථාය පබ්බජිතා අගාරස්මානගාරියං සො මෙ අත්ථො අනුප්පත්තො තිබ්බසංයොජනක්ඛයො.
800. තතො මහාකාරුණිකො එතදග්ගෙ ඨපෙසි මං “දිබ්බචක්ඛුකීනං අග්ගා සකුලා”ති නරුත්තමො.
801-803. කිලෙසා ඣාපිතා මය්හං -පෙ- කතං බුද්ධස්ස සාසනං.
ඉත්ථං සුදං සකුලා භික්ඛුනී ඉමා ගාථායො අභාසිත්ථාති.
සකුලාථෙරියාපදානං චතුත්ථං.
3. 5 නන්දාජනපදකල්යාණී අපදානං.
804. පදුමුත්තරො නාම ජිනො සබ්බධම්මානපාරගූ ඉතො සතසහස්සම්හි කප්පෙ උප්පජ්ජි නායකො.
805. ඔවාදකො විඤ්ඤාපකො කාරකො සබ්බජාණිනං දෙසනාකුසලො බුද්ධො තාරෙසි ජනතං බහුං.
806. අනුකම්පකො කාරුණිකො හිතෙසී සබ්බපාණිනං සම්පත්තෙ තිත්ථියෙ සබ්බෙ පඤ්චසීලෙ පතිට්ඨහි.
807. එවං නිරාකුලං ආසි සුඤ්ඤකං තිත්ථියෙහි ච විචිත්තං අරහන්තෙහි වසීභූතෙහි තාදිහි.
808. රතනානට්ඨපඤ්ඤාසං උග්ගතො සො මහාමුනි කඤ්චනග්ඝියසඞ්කාසො බත්තිංසවරලක්ඛණො.
809. වස්සසතසහස්සානි ආයු විජ්ජති තාවදෙ තාවතා තිට්ඨමානො සො තාරෙසි ජනතං බහුං.
810. තදා’හං හංසවතියං ජාතා සෙට්ඨිකුලෙ අහුං නානාරතනපජ්ජොතෙ මහාසුඛසමප්පිතෙ.
811. උපෙත්වා තං මහාවීරං අස්සොසිං ධම්මදෙසනං අමතං පරමස්සාදං පරමත්ථනිවෙදකං.
812. තදා නිමන්තයිත්වාන සසඞ්ඝං ලොකනායකං{1} දත්වා තස්ස මහාදානං පසන්නා සෙහි පාණිහි.
813. ඣායිනීනං භික්ඛුනීනං අග්ගට්ඨානං අපත්ථයිං. නිපච්ච සිරසා වීරං සසඞ්ඝං ලොකනායකං.
814. තදා අදන්තදමකො තිලොකසරණො පභූ ව්යාකාසි නරසද්දුලො{2} ලච්ඡසෙ තං සුපත්ථිතං.
815. සතසහස්සෙ ඉතො කප්පෙ ඔක්කාකකුලසම්භවො ගොතමො නාම ගොත්තෙන සත්ථා ලොකෙ භවිස්සති.
816. තස්ස ධම්මෙසු දායාදා ඔරසා ධම්මනිම්මිතා නන්දාති නාම නාමෙන හෙස්සසි සත්ථුසාවිකා.
817. තං සුත්වා මුදිතා හුත්වා යාවජීවං තදා ජිනං මෙත්තචිත්තා පරිචරිං පච්චයෙහි විනායකං.
818. තෙන කම්මෙන සුකතෙන චෙතනාපණිධීහි ච ජහිත්වා මානුසං දෙහං තාවතිංසමගච්ඡහං.
819. තතො චුතා යාමමගං තතො’හං තුසිතං අගං{1} තතො ච නිම්මාණරතිං වසවත්තීපුරං තතො.{2}
820. යත්ථ යත්ථූපපජ්ජාමි තස්ස කම්මස්ස වාහසා තත්ථ තත්ථෙව රාජානං මහෙසිත්තමකාරයිං.
821. තතො චුතා මනුස්සත්තෙ රාජානං චක්කවත්තිනං මණ්ඩලීනඤ්ච රාජානං මහෙසිත්තමකාරයිං.
822. සම්පත්තිං අනුභොත්වාන දෙවෙසු මනුජෙසු ච සබ්බත්ථ සුඛිතා හුත්වා නෙකකප්පෙසු සංසරිං.
823. පච්ඡිමෙ භවෙ සම්පත්තෙ පුරම්හි{3} කපිලව්හයෙ රඤ්ඤො සුද්ධොදනස්සාහං ධීතා ආසිං අනින්දිතා.
824. සිරිංව{4} රූපිනිං දිස්වා නන්දිතං ආසි තං කුලං තෙන නන්දාති මෙ නාමං සුන්දරොපපදං{5} අහූ.
825. යුවතීනඤ්ච සබ්බාසං කල්යාණීති ච විස්සුතා තස්මිම්පි නගරෙ රම්මෙ ඨපෙත්වා ච{6} යසොධරා.
826. ජෙට්ඨො භාතා තිලොකග්ගො පච්ඡිමො{7} අරහා තථා එකාකිනී ගහට්ඨාහං මාතරා පරිචොදිතා:
827. “සාකියම්හි කුලෙ ජාතා පුත්තෙ බුද්ධානුජා තුවං නන්දෙනපි විනා භූතා අගාරෙ කින්නු වච්ඡසි?
828. ජරාවසානං යොබ්බඤ්ඤං රූපං අසුවිසම්මතං රොගන්තම්පි ච ආරොග්යං ජීවිතං මරණන්තිකං
829. ඉදම්පි තෙ සුභං රූපං සසිකන්තං මනොහරං භූසනානමලඞ්කාරං සිරිසඞ්ඝාතසන්නීභං.
830. පිණ්ඩිතං{1} ලොකසාරංව නයනානං රසායනං පුඤ්ඤානං කිත්තිජනනං ඔක්කාකකුල{2} නන්දනං.
831. න චිරෙනෙව කාලෙන ජරා සමතිභොස්සති{3} විහාය ගෙහං තාරුඤ්ඤෙ{4} චර ධම්මමනින්දිතෙ.
832. සුත්වා’හං මාතුවචනං පබ්බජිං අනගාරියං දෙහෙන නතු චිත්තෙන රූපයොබ්බනලාලිතා.{5}
833. මහතා ච පයත්තෙන ඣානජ්ඣෙනපරං මමං{6} කාතුං ච වදතෙ මාතා න චාහං තත්ථ උස්සුකා.
834. තතො මහාකාරුණිකො දිස්වා මං කාමලාලසං{7} නිබ්බින්දනත්ථං රූපස්මිං මම චක්ඛූපථෙ ජිනො.
835. සකෙන අනුභාවෙන{8} ඉත්ථිං මාපෙසි සොභනිං දස්සනීයං සුරුචිරං මමතොපි සුරූපිනිං.
836. තමහං විම්හිතා දිස්වා අතිවිම්හිතදෙහිනිං චින්තයිං ‘සඵලං මෙති නෙත්තලාභඤ්ච මානුසං’.