547. බුද්ධස්ස වචනං සුත්වා එවං පත්ථෙසහං තදා{12} “අහම්පි තාදිසා හොමි ඉද්ධියා සුවිසාරදා.”
548. පමෙදිතා’හං සුමනා පත්තඋත්තමමානසා{13} අනාගතම්හි අද්ධානෙ ඊදිසා හොමි නායක.
549. මණිමයම්හි පල්ලඞ්කෙ මණ්ඩපස්මිං පභඞ්කරෙ අන්නපානෙන තප්පෙත්වා සසඞ්ඝං ලොකනායකං.
550. නාගානං පවරං පුප්ඵං අරුණං නාම උප්පලං ‘වණ්ණං මෙ ඊදිසං හොතු’ පූජෙසිං ලොකනායකං.
551. තෙන කම්මෙන සුකතෙන චෙතනාපණිධීහි ච ජහිත්වා මානුසං දෙහං තාවතිංසං අගච්ඡ’හං.
552. තතො චුතා’හං මනුජෙ උපපන්නා සයම්භුනො උප්පලෙහි පටිච්ඡන්නං පිණ්ඩපාතමදාහං.
553. එකනවුතෙ ඉතො කප්පෙ විපස්සී නාම නායකො උප්පජ්ජි චාරු නයනො සබ්බධම්මෙසු චක්ඛුමා.
554. සෙට්ඨි ධීතා තදා හුත්වා බාරාණසිපුරුත්තමෙ නිමන්තෙත්වාන සම්බුද්ධං සසඞ්ඝං ලොකනායකං.
555. මහාදානං දදිත්වාන උප්පලෙහි විනායකං පූජයිත්වා චෙතසාව{1} වණ්ණසොභං අපත්ථයිං.
556. ඉමස්මිං භද්දකෙ කප්පෙ බ්රහ්මබන්ධු මහායසො කස්සපො නාම ගොත්තෙන{2} උප්පජ්ජි වදතං වරො.
557. උපට්ඨාකො මහෙසිස්ස තදා ආසි නරිස්සරො කාසිරාජා කිකී නාම බාරාණසිපුරුත්තමෙ.
558. තස්සා’සිං දුතියා ධීතා සමණගුත්තසමව්හයා ධම්මං සුත්වා ජිනග්ගස්ස පබ්බජ්ජං සමරොචයිං.
559. අනුජානි න නො තාතො අගාරෙව තදා මයං වීසං වස්සසහස්සානි විචරිම්හ අතන්දිතා.
560. කොමාරිබ්රහ්මචරියං රාජකඤ්ඤා සුඛෙධිතා බුද්ධුපට්ඨානනිරතා මුදිතා සත්තධීතරො.
561. සමණී සමණගුත්තා ච භික්ඛුනී භික්ඛුදාසිකා{3} ධම්මා චෙව සුධම්මා ච සත්තමී සඞ්ඝදාසිකා.{3}
562. අහං ඛෙමා ච සප්පඤ්ඤා පටාචාරා ච කුණ්ඩලා කිසාගොතමී ධම්මදින්නා විසාඛා හොති තස්සමී.
563. තෙහි කම්මෙහි සුකතෙහි චෙතනාපණිධීහි ච ජහිත්වා මානුසං දෙහං තාවතිංසං අගච්ඡහං.
564. තතො චුතා මනුසෙස්සු උපපන්නා මහාකුලෙ පීතමට්ඨං{1} වරං දුස්සං අදං අරහතො අහං.
565. තතො චුතා’රිට්ඨපුරෙ ජාතා විප්පකුලෙ අහං ධීතා තිරිටවච්ඡස්ස{2} උම්මාදන්තී{3} මනොහරා.
566. තතො චුතා ජනපදෙ කුලෙ අඤ්ඤතරෙ අහං පසුතා නාතිඵිතම්හී සාලිං ගොපෙමහං තදා.
567. දිස්වා පච්චෙකසම්බුද්ධං පඤ්චලාජාසතාන’හං දත්වා පදුමඡන්නානි පඤ්චපුත්තසතානිපි.
568. පත්ථෙසිං තෙපි පත්ථෙසුං මධුං දත්වා සයම්භුනො තතො චුතා අරඤ්ඤෙ’හං අජායිං පදුමොදරෙ.
569. කාසිරඤ්ඤො මහෙසී’හං හුත්වා සක්කතපූජිතා අජනිං රාජපුත්තානං අනූනං සතපඤ්චකං.
570. යදා තෙ යොබ්බනප්පත්තා කීළන්තා ජලකීළිතං. දිස්වා ඔපත්තපදුමං ආසුං පච්චෙකනායකා.
571. සාහං තෙහි විනාභූතා සුතවරෙහි සොකිනී චුතා ඉසිගිලිපස්සෙ ගාමකම්හී අජායිසං.
572. යදා වුද්ධා සුතමතී සුතානං භත්තුනොපි ච යාගුමාදාය ගච්ඡන්තී අට්ඨපච්චෙකනායකෙ.
573. භික්ඛාය ගාමං ගච්ඡන්තෙ දිස්වා පුත්තෙ අනුස්සරිං ඛීරධාරා විනිග්ගච්ඡි තදා මෙ පුත්තපෙමසා.
574. තතො තෙසං අදං යාගුං පසන්නා සෙහි පාණිහි තතො චුතා’හං තිදසෙ නන්දනං උපපජ්ජහං.
575. අනුභොත්වා සුඛං දුක්ඛං සංසරිත්වා භවාභවෙ තවත්ථාය මහාවීර පරිච්චත්තඤ්ච ජීවිතං.
576. එවං බහුවිධං දුක්ඛං සම්පත්ති ච බහුබ්බිධා පච්ඡිමෙ භවෙ සම්පත්තෙ ජාතා සාවත්ථියං පුරෙ.
577. මහාධනෙ සෙට්ඨිකුලෙ සුඛිතෙ සජ්ජිතෙ තථා නානාරතනපජ්ජොතෙ සබ්බකාමසමිද්ධිනී.
578. සක්කතා පූජිතා ආසිං මානිතා’පචිතා තථා රූපසොභග්ගසම්පන්නා කුලෙසු අභිසම්මතා.
579. අතීව පත්ථිතා චා’සිං රූපභොග සිරීහි ච පත්ථිතා සෙට්ඨිපුත්තෙහි අනෙකෙහි සතෙහි ච.
580. අගාරං පජහිත්වාන පබ්බජිං අනගාරියං අඩ්ඪමාසෙ අසම්පත්තෙ අරහත්තමපාපුණිං.
581. ඉද්ධියා අභිනිම්මිත්වා චතුරස්සරථං අහං බුද්ධස්ස පදෙ වන්දිස්ස ලොකනාථස්ස සිරීමතො.
582. සුපුප්ඵිතග්ගං උපගම්ම භික්ඛුනී එකා තුවං තිට්ඨසි සාලමූලෙ න ච’ත්ථි තෙ දුතියා වණ්ණධාතු බලෙ න ත්වං භායසි ධුත්තකානං.
583. සතං සහස්සානපි ධුත්තකානං ඉධාගතා තාදිසකා භවෙය්යුං ලොමං න ඉඤ්ජාමි න සන්තසාමි න මාර භායාමි තමෙකිකාපි.
584. ඵසා අන්තරධායාමි කුච්ඡිං වා පවිසාමි තෙ පඛුමන්තරිකායම්පි තිට්ඨන්තිං මං න දක්ඛසි.
585. චිත්තස්මිං වසීභූතම්හි ඉද්ධිපාදා සුභාවිතා සබ්බබන්ධනමුත්තාම්හි න තං භායාමි ආවුසො.
586. සත්තිසූලූපමා කාමා ඛන්ධා’සං අධිකුට්ටනා යං ත්වං කාමරතිං බ්රූසි අරතී’දානි සා මම.
587. සබ්බත්ථ විහතා නන්දි තමොඛන්ධො පදාලිතො එවං ජානාහි පාපිම නිහතො ත්වමසි අන්තක.
588. ජිනො තම්හි ගුණෙ තුට්ඨො එතදග්ගෙ ඨපෙසි මං ‘අග්ගා ඉද්ධිමතීන’න්ති පරිසාසු විනායකො.
589. පරිචිණ්ණො මයා සත්ථා කතං බුද්ධස්ස සාසනං ඔහිතො ගරුකො භාරො භවනෙත්ති සමූහතා.
590. යස්සත්ථාය පබ්බජිතා අගාරස්මා’නගාරියං සො මෙ අත්ථො අනුප්පත්තො සබ්බසංයොජනක්ඛයො
591. චීවරං පිණ්ඩපාතං ච පච්චයං සයනාසනං ඛණෙන උපනාමෙන්ති සහස්සානි සමන්තතො.
592-594. කිලෙසා ඣාපිතා -පෙ- කතං බුද්ධස්ස සාසනං.
ඉත්ථං සුදං උප්පලවණ්ණා භික්ඛුනී ඉමා ගාථායො අභාසිත්ථාති.
උප්පලවණ්ණා ථෙරියාපදානං නවමං.
2. 10 පටාචාරාපදානං
595. පදුමුත්තරො නාම ජිනො සබ්බධම්මානපාරගූ, ඉතො සතසහස්සම්හි කප්පෙ උප්පජ්ජි නායකො.
596. තදාහං හංසවතියං ජාතා සෙට්ඨිකුලෙ අහුං නානාරතනපජ්ජොතෙ මහාසුඛසමප්පිතා.
597. උපෙත්වා තං මහාවීරං අස්සොසිං ධම්මදෙසනං තතො ජාතප්පසාදා’හං උපෙසිං සරණං ජිනං.
598. තතො විනයධාරීනං අග්ගං වණ්ණෙසි නායකො භික්ඛුනිං ලජ්ජිනිං තාදිං කප්පාකප්පවිසාරදං.
599. තදා මුදිතචිත්තා’හං තං ඨානමභිකඞ්ඛිනී නිමන්තෙත්වා දසබලං සසඞ්ඝං ලොකනායකං
600. භොජයිත්වාන සත්තාහං දදිත්වා ච තිචීවරං{1} නිපච්ච සිරසා පාදෙ ඉදං වචනමබ්රවිං:
601. “යා තයා වණ්ණිතා වීර ඉතො අට්ඨමකෙ’හනි{1} තාදිසා’හං භවිස්සාමි යදි සිජ්ඣති නායක.”
602. තදා අවොච මං සත්ථා “භද්දෙ මා භායි අස්සස අනාගතම්හි අද්ධානෙ ලච්ඡසෙ තං මනොරථං.
603. සතසහස්සෙ ඉතො කප්පෙ ඔකකාකකුලසම්හවො ගොතමො නාම ගොත්තෙන{2} සත්ථා ලොකෙ භවිස්සති.
604. තස්ස ධම්මෙසු දායාදා ඔරසා ධම්මනිම්මිතා පටාචාරාති නාමෙන හෙස්සසි සත්ථුසාවිකා.”
605. තදා’හං මුදිතා හුත්වා යාවජීවං තතො{3} ජිනං. මෙත්තචිත්තා පරිචරිං සසඞ්ඝං ලොකනායකං.
606. තෙන කම්මෙන සුකතෙන චෙතනාපණිධීහි ච ජහිත්වා මානුසං දෙහං තාවතිසං අගච්ඡහං.
607. ඉමස්මිං භද්දකෙ කප්පෙ බ්රහ්මබන්ධු මහායසො කස්සපො නාම ගොත්තෙන{4} උප්පජ්ජි වදතං වරො.
608. උපට්ඨාකො මහෙසිස්ස තදා ආසි නරිස්සරො කාසිරාජා කිකී නාම බාරාණසිපුරුත්තමෙ.
609. තස්සා’සිං තතියා ධීතා භික්ඛුනී ඉති විස්සුතා ධම්මං සුත්වා ජිනග්ගස්ස පබ්බජ්ජං සමරොචයිං.
610. අනුජානි න නො තාතො අගාරෙව තදා මයං වීසං වස්සසහස්සානි විචරිම්හ අතන්දිතා
611. කොමාරිබ්රහ්මචරියං රාජකඤ්ඤා සුඛෙධිතා බුද්ධුපට්ඨාන නිරතා මුදිතා සත්ත ධීතරො.
612. සමණී සමණගුත්තා ච භික්ඛුනී භික්ඛුදාසිකා ධම්මා චෙව සුධම්මා ච සත්තමී සඞ්ඝදාසිකා.
613. අහං උප්පලවණ්ණා ච ඛෙමා භද්දා ච භික්ඛුනී කිසාගොතමී ධම්මදින්නා විසාඛා හොති සත්තමී.
614. තෙහි කම්මෙහි සුකතෙහි චෙතනාපණිධීහි ච ජහිත්වා මානුසං දෙහං තාවතිංසං අගච්ඡහං.
615. පච්ඡිමෙ ච භවෙදානි ජාතා සෙට්ඨිකුලෙ අහං සාවත්ථියං පුරවරෙ ඉද්ධෙ ඵීතෙ මහද්ධනෙ.
616. යදා ච යොබ්බනූපෙතා විතක්කවසගා අහං නරං ජානපදං{1} දිස්වා තෙන සද්ධිං අගච්ඡ’හං.
617. එකපුත්තප්පසූතා’හං දුතියො කුච්ඡියං මම තදා’හං මාතාපිතරො දක්ඛාමීති{2} සුනිච්ඡිතා.
618. න රොචෙසි පති{3} මය්හං තදා තම්හි පවාසිතෙ එකිකා නිග්ගතා ගෙහා ගන්තුං සාවත්ථිමුත්තමං.
619. තතො මෙ සාමි ආගන්ත්වා සම්භාවෙසි පථෙ මමං තදා මෙ කම්මජා වාත උප්පන්නා අතිදාරුණා.
620. උට්ඨිතො ච මහාමෙඝො පසූතිසමයෙ මම දබ්බත්ථාය තදා ගන්ත්වා සාමි සප්පෙන මාරිතො.
621. තදා විජාතදුක්ඛෙන අනාථා කපණා අහං කුන්නදිං පූරිතං දිස්වා ගච්ඡන්තී සකුලාලයං.
622. බාලං ආදාය අතරිං පරකූලෙ ච එකකං සායෙත්වා බාලකං පුත්තං ඉතරං තාරණාය’හං.
623. නිවත්තා උක්කුසො’හාසි තරුණං විලපන්තකං ඉතරඤ්ච වහී සොතො සාහං සොකසමප්පිතා.
624. සාවත්ථිනගරං ගන්ත්වා අස්සොසිං සජනෙ මතෙ තදා අවොචං සොකට්ටා මහාසොකසමප්පිතා.
625. “උභො පුත්තා කාලකතා පන්ථෙ මය්හං පති මතො මාතා පිතා ච භාතා ච එකචිතකස්මිං ඩය්හරෙ.”
626. තදා කිසා ච පණ්ඩූ ච අනාථා දීනමානසා ඉතො තතො භමන්තීහං{4} අද්දසං නරසාරථිං.
627. තතො අවොච මං සත්ථා “පුත්තෙ මා සොචි අස්සස අත්තානං ත්වං{1} ගවෙසස්සු කිං නිරත්ථං විහඤ්ඤසි.
628. න සන්ති පුත්තා තාණාය න පිතා නපි බන්ධවා අන්තකෙනාධිපන්නස්ස නත්ථි ඤාතිසු තාණතා.”
629. තං සුත්වා මුනිනො වාක්යං පඨමං ඵලමජ්ඣගං පබ්බජිත්වාන න චිරං අරහත්තමපාපුණිං.
630. ඉද්ධීසු ච වසී හොමි දිබ්බාය සොතධාතුයා පරචිත්තානි ජානාමි සත්ථුසාසනකාරිකා.
631. පුබ්බෙනිවාසං ජානාමි දිබ්බචක්ඛු විසොධිතං ඛෙපෙත්වා ආසවෙ සබ්බෙ විසුද්ධාම්හි සුනිම්මලා.
632. තතො’හං විනයං සබ්බං සන්තිකෙ සබ්බදස්සිනො උග්ගණ්හිං සබ්බවිත්ථාරං ව්යාහරිං ච යථාතථං.
633. ජිනො තස්මිං ගුණෙ තුට්ඨො එතදග්ගෙ ඨපෙසි මං “අග්ගා විනයධාරීනං පටාචාරාව එකිකා.”
634. පරිචිණ්ණො මයා සත්ථා කතං බුද්ධස්ස සාසනං ඔහිතො ගරුකො භාරො භවනෙත්ති සමූහතා.
635. යස්සත්ථාය පබ්බජිතා අගාරස්මා’නගාරියං සො මෙ අත්ථො අනුප්පත්තො සබ්බසංයොජනක්ඛයො.
636-638. කිලෙසා ඣාපිතා මය්හං -පෙ- කතං බුද්ධස්ස සාසනං.
ඉත්ථං සුදං පටාචාරා භික්ඛුනී ඉමා ගාථායො අභාසිත්ථාති.
පටාචාරාථෙරියාපදානං දසමං.
3. කූණ්ඩලකෙසීවග්ගො
3. 1 කුණ්ඩලකෙසාපදානං.
639. පදුමුත්තරො නාම ජිනො සබ්බධම්මානපාරගූ ඉතො සතසහස්සම්හි කප්පෙ උප්පජ්ජි නායකො.
640. තදාහං හංසවතියං ජාතා සෙට්ඨිකුලෙ අහුං. නානාරතනපජ්ජොතෙ මහාසුඛසමප්පිතෙ.
641. උපෙත්වා තං මහාවීරං අස්සොසිං ධම්මදෙසනං තතො ජාතප්පසාදා’හං උපෙසිං සරණං ජිනං.
642. තදා මහාකාරුණිකො පදුමුත්තරනාමකො ඛිප්පභිඤ්ඤානමග්ගත්තෙ ඨපෙසි භික්ඛුනිං සුභං.
643. තං සුත්වා මුදිතා හුත්වා දානං දත්වා මහෙසිනො නිපජ්ජ සිරසා පාදෙ තං ඨානං අභිපත්ථයිං.