252. ඔක්කාකවංසස්ස යසො උස්සිතො මාරමද්දනො, නනු සම්පති කාලො මෙ නිබ්බානත්ථාය පුත්තිකා.
253. චිරප්පභූති යං මය්හං පත්ථිතං අජ්ජ සිජ්ඣතෙ, ආනන්දභෙරිකාලො’යං කිං වො අස්සූහි පුත්තිකා.
254. සචෙ මයි දයා අත්ථි යදි චත්ථි කතඤ්ඤුතා, සද්ධම්මට්ඨිතියා සබ්බා කරොථ විරියං දළ්හං.
255. ථිනං අදාසි පබ්බජ්ජං සම්බුද්ධො යාචිතො මයා, තස්මා යථා’හං නන්දිස්සං තථා තමනුතිට්ඨථ.
256. තා එවමනුසාසිත්වා භික්ඛුනීහි පුරක්ඛතා, උපෙච්ච බුද්ධං වන්දිත්වා ඉදං වචනමබ්රවි:
257. “අහං සුගත මාතා තෙ{1} ත්වං ච වීර පිතා මම, සද්ධම්මසුඛදො{2} නාථ තයා ජාතම්හි{3} ගොතම.
258. සංවඩ්ඪිතො’යං{4} සුගත රූපකායො මයා තව, අනින්දියො{5} ධම්මකායො{6} මම සංවඩ්ඪිතො{4} තයා.
259. මුහුත්ත{7}තණ්හාසමනං ඛීරං ත්වං පායිතො මයා, තයා’හං සන්තමච්චන්තං ධම්මඛීරං හි{8} පායිතා.
260. වද්ධනරක්ඛනෙ{9} මය්හං අනණො{10} ත්වං මහාමුනෙ, පුත්තකාමා ථියො යා තා{11} ලභන්තු{12} තාදිසං සුතං.
261. මන්ධාතාදිනරින්දානං යා මාතා සා භවණ්ණවෙ, නිමුග්ගා’හං තයා පුත්ත තාරිතා භවසාගරා.
262. රඤ්ඤො මාතා මහෙසීති සුලභං නාමමිත්ථිනං, බුද්දමාතාති යං නාමං එතං පරමදුල්ලභං.
263. තඤ්ච ලද්ධං මයා වීර පණිධානං මමං තයා, අණුකං වා මහන්තං වා තං සබ්බං පූරිතං මයා.
264. පරිනිබ්බාතුමිච්ඡාමි විහායෙමං කලෙබරං,{1} අනුජානාහි මෙ වීර දුක්ඛන්තකර නායක.
265. චක්කඞ්කුසධජාකිණ්ණෙ පදෙ කමලකොමලෙ, පසාරෙහි පණාමං තෙ කරිස්සං පුත්තපෙමසා.{2}
266. සුවණ්ණරාසිසංකාසං සරීරං කුරු පාකටං, කත්වා දෙහං සුදිට්ඨං තෙ සන්තිං ගච්ඡාමි නායක.”
267. ද්වත්තිංසලක්ඛණූපෙතං සුප්පභාලඞ්කතං තනුං. සඤ්ඣාඝනාව බාලක්කං මාතුච්ඡං දස්සයී ජිනො.
268. ඵුල්ලාරවින්දසඞ්කාසෙ තරුණාදිච්චසප්පභෙ, චක්කඞ්කිතෙ පාදතලෙ තතො සා සිරසා පති.
269. “පණමාමි නරාදිච්චං ආදිච්චකුලකෙතුකං, පච්ඡිමෙ මරණෙ{3} මය්හං න තං ඉක්ඛාමහං පුනො.
270. ඉත්ථියො නාම ලොකග්ග සබ්බදොසකරා මතා, යදි කො චත්ථි දොසො මෙ ඛමස්සු කරුණාකර.
271. ඉත්ථිකානඤ්ච පබ්බජ්ජං යමහං{4} යාචිං පුනප්පුනං, තත්ථ චෙ අත්ථි දොසො මෙ තං ඛමස්සු නරාසභ.”
272. මයා භික්ඛුනියො වීර තවානුඤ්ඤාය සාසිතා, තත්ර චෙ අත්ථි දුනතීතං තං ඛමස්සු ඛමාධිප.{5}
273. “අක්ඛන්තෙ නාම ඛන්තබ්බං කිං භවෙ ගුණභූසනෙ, කිමුත්තරං තෙ වක්ඛාමි නිබ්බානාය වජන්තියා.
274. සුද්ධෙ අනූනෙ මම භික්ඛුසඞ්ඝෙ ලොකා ඉතො නිස්සරිතුං කමන්තෙ,{6} පභාතකාලෙ ව්යසනං ගහානං{7} දිස්වාන නිය්යාති ච චන්දලෙඛා.
275. තදෙතරා භික්ඛුනියො ජිනග්ගං තාරාව චන්දානුගතා සුමෙරුං, පදක්ඛිණං කත්වා නිපච්ච{8} පාදෙ ඨිතා මුඛන්තං සමුදික්ඛමානා.
276. “න තිත්තපුබ්බං{1} තව දස්සනෙන චක්ඛුං න සොතං තව භාසිතෙන, චිත්තං මමං කෙවලමෙකමෙව පප්පුය්ය තං ධම්මරසෙන තිත්තිං,
277. නදතො පරිසායං තෙ වාදිදප්පාපහාරිනො,{2} යෙ තෙ දක්ඛන්ති වදනං ධඤ්ඤා තෙ නරපුඞ්ගව.
278. දීඝඞ්ගුලී තම්බනඛෙ සුභෙ ආයතපණ්හිකෙ යෙ පාදෙ පණමිස්සන්ති{3} තෙපි ධඤ්ඤා ගුණන්ධර.
279. මධුරානි පහට්ඨානි දොසග්ඝානි හිතානි ච, යෙ තෙ වාක්යානි සොස්සන්ති{4} තෙපි ධඤ්ඤා නරුත්තම.
280. ධඤ්ඤා’හං තෙ මහාවීර පාදපූජනතප්පරා, තිණ්ණසංසාරකන්තාරා සුවාක්යෙන සිරීමතො.”{5}
281. තතො සා අනුසාසෙත්වා භික්ඛුසඞ්ඝම්පි සුබ්බතා, රාහුලානන්දනන්දෙ ච වන්දිත්වා ඉදමබ්රවි:
282. “ආසීවිසාලයසමෙ රොගාවාසෙ කලෙබරෙ, නිබ්බින්නා දුක්ඛසංඝාතෙ{6} ජරාමරණගොචරෙ
283. නානාකලිමලාකිණ්ණෙ{7} පරායත්තෙ නිරීහකෙ, තෙන නිබ්බාතුමිච්ඡාමි අනුමඤ්ඤථ පුත්තකා.”
284. නන්දො රාහුලභද්දො ච වීතසොකා නිරාසවා, ඨිතාචලට්ඨිතිථිරා{8} ධම්මතං අනුචින්තයුං.
285. ධීරත්ථු සඞ්ඛතං ලොලං අසාරං කදලූපමං, මායාමරීවිසදිසං ඉත්තරං අනවට්ඨිතං.
286. යත්ථ නාම ජිනස්සා’යං මාතුච්ඡා බුද්ධපොසිකා, ගොතමී නිධනං යාති අනිච්චං සබ්බසඞ්ඛතං.”
287. ආනන්දො ච තදා සෙඛො සොකට්ටො ජිනවච්ඡලො, තත්ථස්සූනි ධරන්තො සො කරුණං පරිදෙවති.
288. “හා සන්තිං{1} ගොතමී යාති නූන බුද්ධොපි නිබ්බුතිං, ගච්ඡති න චිරෙනෙව අග්ගිරිව නිරින්ධනො.”
289. එවං විලපමානං තං ආනන්දං ආහ ගොතමී: ”සුතිසාගර ගම්භීර බුද්ධුපට්ඨානතප්පර.
290. න යුත්තං සොචිතුං පුත්ත හාසකාලෙ උපට්ඨිතෙ, තව{2} මෙ සරණං පුත්ත නිබ්බානං සමුපාගතං.{3}
291. තයා තාත සමජ්ඣිට්ඨො පබ්බජ්ජං අනුජානි නො, මා පුත්ත විමනො හොහි සඵලො තෙ පරිස්සමො.
292. යං න දිට්ඨං පුරාණෙහි තිත්ථිකාචරියෙහි පි, තං පදං සුකුමාරීහී සත්තවස්සාහි වෙදිතං.
293. බුද්ධසාසනපාලෙතා පච්ඡිමං දස්සනං තව, තත්ථ ගච්ඡාමහං පුත්ත ගතො යත්ථ න දිස්සතෙ.”
294. කදාචි ධම්මං දෙසෙන්තො ඛිපි ලොකග්ගනායකො, තදාහං ආසිංසවචං{4} අවොචං අනුකම්පිකා:
295. “චිරං ජිව මහාවීර කප්පං තිට්ඨ මහාමුනෙ, සබ්බලොකස්ස අත්ථාය භවස්සු අජරාමරො.”
296. තං තථාවාදිනිං බුද්ධො මමං සො එතදබ්රවි: ”න හෙවං වන්දියා බුද්ධා යථා වන්දසි ගොතමී.”
297. “කථං චරහි සබ්බඤ්ඤූ වන්දිතබ්බා තථාගතා, කථං අවන්දියා බුද්ධා තං මෙ අක්ඛාහි පුච්ඡිතො.”
298. “ආරද්ධවිරියෙ පහිතත්තෙ නිච්චං දළ්හපරක්කමෙ, සමග්ගෙ සාවකෙ පස්සෙ{5} ඵසා බුද්ධානවන්දනා.{6}”
299. තතො උපස්සයං ගන්ත්වා එකිකාහං විචින්තයිං, සමග්ගං පරිසං නාථො රොචෙති{1} තිභවන්තගො.
300. හන්දාහං පරිනිබ්බිස්සං මා විපත්තිං තමද්දසං.”{2} එවාහං චින්තයිත්වාන දිස්වාන ඉසිසත්තමං.
301. පරිනිබ්බානකාලං මෙ{3} ආරොචෙසිං විනායකං, තතො සො සමනුඤ්ඤාසි “කාලං ජානාහි ගොතමී.”
302. කිලෙසා ඣාපිතා මය්හං භවා සබ්බෙ සමූහතා, නාගීව බන්ධනං ඡෙත්වා විහරාමි අනාසවා.
303. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
304. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
305. ථිනං ධම්මාභිසමයෙ යෙ බාලා විමතිං ගතා, තෙසං දිට්ඨිපහානත්ථං ඉද්ධිං දස්සෙහි ගොතමී.
306. තදා නිපච්ච සම්බුද්ධං උප්පතිත්වාන අම්බරං, ඉද්ධී අනෙකා දස්සෙසි බුද්ධානුඤ්ඤාය ගොතමී,
307. එකිකා බහුධා ආසි බහුකා චෙකිකා තථා, ආවීභාවං තිරොභාවං තිරොකුඩ්ඩං තිරොනගං.
308. අසජ්ජමානා අගමා භූමියම්පි නිමුජ්ජථ, අභිජ්ජමානෙ උදකෙ අගඤ්ඡි මහියා යථා.
309. සකුණීව යථාකාසෙ පල්ලඞ්කෙන ගමී තදා, වසං වත්තෙසි කායෙන යාව බ්රහ්මනිවෙසනං.
310. සිනෙරුං දණ්ඩං කත්වාන ඡත්තං කත්වා මහාමහිං, සමූලං පරිවත්තෙත්වා ධාරෙන්තී{4} චඞ්කමී නභෙ.
311. ඡස්සූරොදයකාලෙව ලොකඤ්චාකාසි ධූමිකං, යුගන්තෙ විය ලොකං සා ජාලාමාලාකුලං අකා.
312. මුචලින්දං මහාසෙලං මෙරු මන්දාර දද්දරෙ,{1} සාසපෙරිව සබ්බානි එකෙනග්ගහි මුට්ඨිනා.
313. අඞ්ගුලග්ගෙන ඡාදෙසි භාකරං සනිසාකරං, චන්දසූරසහස්සානි ආවෙලමිව ධාරයි.
314. චතුසාගරතොයානි ධාරයී එකපාණිනා, යුගන්තජලදාකාරං මහාවස්සං පවස්සයී{2}
315. චක්කවත්තිං සපරිසං මාපයී සා නභත්ථලෙ. ගරුළං ද්විරදං සීහං විනදන්තං ච දස්සයී.
316. එකිකා අභිනිම්මිත්වාප්පමෙය්යං භික්ඛුනීගණං, පුන අන්තරධාපෙත්වා එකිකා මුනිමබ්රවි:
317. “මාතුච්ඡා තෙ මහාවීර තවසාසනකාරිකා අනුප්පත්තා සකං අත්ථා පදෙ වන්දති{3} චක්ඛුම.”
318. දස්සෙත්වා විවිධා ඉද්ධී ඔරොහිත්වා නභත්ථලා, වන්දිත්වා ලොකපජ්ජොතං එකමන්තං නිසීදි සා.
319. “සා වීසංවස්සසතිකා{4} ජාතියාහං මහාමුනෙ, අලමෙත්තාවතා වීර නිබ්බායිස්සාමි නායක.”
320. තදා’තිවිම්හිතා සබ්බා පරිසා සා කතඤ්ජලී, අවොච’ය්යෙ කථං ආසි අතුලිද්ධිපරක්කමා.
321. පදුමුත්තරො නාම ජිනො සබ්බධම්මෙසු චක්ඛුමා, ඉතො සතසහස්සම්හි කප්පෙ උප්පජ්ජි නායකො.
322. තදාහං හංසවතියං ජාතාමච්චකුලෙ අහුං, සබ්බූපකාරසම්පන්නෙ ඉද්ධෙ ඵීතෙ මහද්ධනෙ.
323. කදාචි පිතුනා සද්ධිං දාසීගණපුරක්ඛතා, මහතා පරිවාරෙන තං උපෙච්ච නරාසභං.
324. වාසවං විය වස්සෙන්තං{1} ධම්මමෙඝං අනාසවං, සරදාදිච්චසදිසං රංසිමාලාකුලං ජිනං.{2}
325. දිස්වා චිත්තං පසාදෙත්වා සුත්වා චස්ස සුභාසිතං, මාතුච්ඡං භික්ඛුනිං අග්ගෙ ඨපෙන්තං නරනායකං.
326. සුත්වා දත්වා මහාදානං සත්තාහං තස්ස තාදිනො, සසඞ්ඝස්ස නරග්ගස්ස පච්චයානි බහූනි ච.
327. නිපජ්ජ පාදමූලම්හි තං ඨානං අභිපත්ථයිං, තතො මහාපරිසතිං අවොච ඉසිසත්තමො:
328. “යා සසඞ්ඝං අභොජෙසි සත්තාහං ලොකනායකං, තමහං කිත්තයිස්සාමි සුණාථ මම භාසතො.
329. සතසහස්සෙ ඉතො{3} කප්පෙ ඔක්කාකකුලසම්භවො, ගොතමො නාම ගොත්තෙන{4} සත්ථා ලොකෙ භවිස්සති.
330. තස්ස ධම්මෙසු දායාදා ඔරසා ධම්මනිම්මිතා, ගොතමී නාම නාමෙන හෙස්සති සත්ථුසාවිකා.
331. තස්ස බුද්ධස්ස මාතුච්ඡා ජීවිතාපාදිකා{5} අයං, රත්තඤ්ඤූනඤ්ච අග්ගන්තං භික්ඛුනීනං ලභිස්සති.”
332. තං සුත්වාන{6} පමුදිතා{7} යාවජීවං තදා ජිනං, පච්චයෙහි උපට්ඨිත්වා තතො කාලකතා අහං.
333. තාවතිංසෙසු දෙවෙසු සබ්බකාමසමිද්ධිසු, නිබ්බත්තා දසහඞ්ගෙහි අඤ්ඤෙ අභිභවිං අහං.
334. රූපසද්දෙහි ගන්ධෙහි රසෙහි ඵුසනෙහි ච, ආයුනාපි ච වණ්ණෙන සුඛෙන යසසාපි ච.
335. තථෙවාධිපතෙය්යෙන අධිගය්හ විරොච’හං, අහොසිං අමරින්දස්ස මහෙසී දයිතා තහිං.
336. සංසාරෙ සංසරන්තීහං කම්මවායුසමෙරිතා, කාසිස්ස රඤ්ඤො විසයෙ අජායිං දාසගාමකෙ.
337. පඤ්චදාසසතා’නූනා නිවසන්ති තහිං තදා, සබ්බෙසං තත්ථ යො ජෙට්ඨො තස්සා ජායා අහොස’හං.
338. සයම්භුනො පඤ්චසතා ගාමං පිණ්ඩාය පාවිසුං, තෙ දිස්වාන අහං තුට්ඨා සහ සබ්බෙහි ඤාතිභි.{1}
339. කත්වා පඤ්චසතකුටී{2} චතුමාසෙ උපට්ඨිය,{3} තිචීවරානි දත්වාන පසන්නාම්හ{4} සසාමිකා.
340. තතො චුතා සපතිකා{5} තාවතිංසගතා මයං, පච්ඡිමෙ ච භවෙ’දානි ජාතා දෙවදහෙ පුරෙ.
341. පිතා අඤ්ජනසක්කො මෙ මාතා මම සුලක්ඛණා, තතො කපිලවත්ථුස්මිං සුද්ධොදනඝරං ගතා.
342. සෙසා{6} සක්යකුලෙ ජාතා සක්යානං ඝරමාගමුං, අහං විසිට්ඨා සබ්බාසං ජිනස්සා’පාදිකා අහුං.
343. මම පුතෙතා’භිනික්ඛම්ම{7} බුද්ධො ආසි විනායකො, පච්චාහං පබ්බජිත්වාන සතෙහි සහ පඤ්චහි.
344. සාකියානීහි ධීරාහි සහ සන්තිසුඛං ඵුසිං, යෙ තදා පුබ්බජාතියං අම්හාකං අහු සාමිනො.
345. සහ පුඤ්ඤස්ස කත්තාරො මහාසමයකාරකා, ඵුසිංසු අරහත්තං තෙ සුගතෙනානුකම්පිතා.
346. තදෙතරා භික්ඛුනියො ආරුහිංසු නභත්ථලං, සඞ්ගතා{8} විය තාරායො විරොචිංසු මහිද්ධිකා.
347. ඉද්ධී අනෙකා දස්සෙසුං පිළන්ධවිකතී{9} යථා, කම්මාරො කනකස්සෙව කම්මඤ්ඤස්ස සුසික්ඛිතො.{10}
348. දස්සෙත්වා පාටිහීරානි විචිත්තානි{11} බහූනි ච, තොසෙත්වා වාදිපවරං මුනිං සපරිසං තදා.
349. ඔරොහිත්වාන ගගනා වන්දිත්වා ඉසිසත්තමං, අනුඤ්ඤාතා නරග්ගෙන යථාඨානෙ නිසීදිසුං.
350. “අහො’නුකම්පිකා අම්හං සබ්බාසං වීර ගොතමි, වාසිතා තව පුඤ්ඤෙහි පත්තා නො ආසවක්ඛයං.
351. කිලෙසා ඣාපිතා අම්හං භවා සබ්බෙ සමූහතා, නාගීව බන්ධනං ඡෙත්වා විහරාම අනාසවා.