සලලපුප්ඵිකා ථෙරියාපදානං දුතියං.
2. 3 මොදකදායිකාපදානං.
159. නගරෙ බන්ධුමතියා කුම්හදාසි අහොස’හං, මම භාගං ගහෙත්වාන ගච්ඡිං උදකහාරිකා.{5}
160. පන්ථම්හි සමණං දිස්වා සන්තචිත්තං සමාහිතං, පසන්නචිත්තා සුමනා මොදකෙ තීණි’දාස’හං.
161. තෙන කම්මෙන සුකතෙන චෙතනාපණිධීහි ච, එකනවුති{6} කප්පානි විනිපාතං න ගච්ඡ’හං.
162. සම්පත්තිං{1} තං කරිත්වාන සබ්බං අනුභවාමහං,{2} මොදකෙ තීණි දත්වාන පත්තා’හං අචලං පදං.
163-165. කිලෙසා ඣාපිතා මය්හං -පෙ- කතං බුද්ධස්ස සාසනං.
ඉත්ථං සුදං මොදකදායිකා භික්ඛුනී ඉමා ගාථායො අභාසිත්ථාති.
මොදකදායිකා ථෙරියාපදානං තතියං.
2. 4 එකාසනදායිකාපදානං.
166. නගරෙ හංසවතියා අහොසිං බාලිකා{3} තදා, මාතා ච මෙ පිතා චෙව කම්මන්තං අගමංසු තෙ.
167. මජ්ඣන්තිකම්හි සුරියෙ අද්දසං සමණං අහං, වීථියං{4} අනුගච්ඡන්තං ආසනං පඤ්ඤපෙස’හං.
168. ගොණකචිත්තකාදීහි{5} පඤ්ඤපෙත්වා’හමාසනං,{6} පසන්නචිත්තා සුමනා ඉදං වචනමබ්රවිං.
169. “සන්තත්තා කුථිතා භූමි සූරො මජ්ඣන්තිකෙ ඨිතො, මාලුතා ච න වායන්ති කාලො චෙත්ථ උපට්ඨිතො.{7}
170. “පඤ්ඤත්තමාසනමිදං තවත්ථාය මහාමුනි, අනුකම්පමුපාදාය නිසීද මම ආසනෙ.”
171. නිසීදි තත්ථ සමණො සුදන්තො සුද්ධමානසො, තස්ස පත්තං ගහෙත්වාන යථාරන්ධමදාසහං.
172. තෙන කම්මෙන සුකතෙන චෙතනාපණිධීහි ච, ජහිත්වා මානුසං දෙහං තාවතිංසමගච්ඡහං.
173. තත්ථ මෙ සුකතං ව්යම්හං ආසනෙන සුනිම්මිතං, සට්ඨියොජනමුබ්බෙධං තිංසයොජනවිත්ථතං.
174. සොණ්ණමයා මණිමයා අථොපි ඵලිකාමයා, ලොහිතඞ්කමයා චෙව පල්ලඞ්කා විවිධා මම.
175. තූලිකාවිකතිකාහි කට්ඨිස්සචිත්තකාහි ච, උද්දඑකන්තලොමීහි{1} පල්ලඞ්කා මෙ සුසන්ථතා.{2}
176. යදා ඉච්ඡාමි ගමනං හාසඛිඩ්ඩා සමප්පිතං,{3} සහ පල්ලඞ්කසෙට්ඨෙන ගච්ඡාමි මම පත්ථිතං.
177. අසීතිදෙවරාජූනං මහෙසිත්තමකාරයිං, සත්තතිචක්කවත්තීනං මහෙසිත්තමකාරයිං.
178. භවාභවෙ සංසරන්ති මහාභොගං ලභාමහං, භොගෙ මෙ ඌනතා නත්ථි එකාසනඵලං ඉදං.{4}
179. දුවෙ භවෙ සංසරාමි දෙවත්තෙ අථ මානුසෙ, අඤ්ඤෙ භවෙ න ජානාමි එකාසනඵලං ඉදං.
180. දුවෙ කුලෙ පජායාමි ඛත්තියෙ චාපි බ්රාහ්මණෙ, උච්චාකුලීනා{5} සබ්බත්ථ එකාසනඵලං ඉදං.
181. දොමනස්සං න ජානාමි චිත්තසන්තාපනං මම, වෙවණ්ණියං න ජානාමි එකාසනඵලං ඉදං.
182. ධාතියො මං උපට්ඨන්ති ඛුජ්ජා ඛෙළාසිකා{6} බහූ, අඞ්කෙන අඞ්කං ගච්ඡාමි එකාසනඵලං ඉදං.
183. අඤ්ඤා නහාපෙන්ති භොජෙන්ති අඤ්ඤා රමෙන්ති මං සදා, අඤ්ඤා ගන්ධං විලිම්පෙන්ති{7} එකාසනඵලං ඉදං.
184. මණ්ඩපෙ රුක්ඛමූලෙ වා සුඤ්ඤාගාරෙ වසන්තියා, මම සඞ්කප්පමඤ්ඤාය පල්ලඞ්කො උපතිට්ඨති.
185. අයං පච්ඡිමකො මය්හං චරිමො වත්තතෙ භවො, අජ්ජාපි රජ්ජං ඡඩ්ඩෙත්වා පබ්බජිං අනගාරියං.
186. සතසහස්සෙ ඉතො කප්පෙ යං දානමදදිං තදා, දුග්ගතිං නාභිජානාමි එකාසනඵලං ඉදලං.
187-189. කිලෙසා ඣාපිතා මය්හං -පෙ- කතං බුද්ධස්ස සාසනං.
ඉත්ථං සුදං එකාසනදායිකා භික්ඛුනී ඉමා ගාථායො අභාසිත්ථාති.
එකාසනදායිකා ථෙරියාපදානං චතුත්ථං.
2. 5 පඤ්චදීපදායිකාපදානං.
190. නගරෙ හංසවතියා චාරිකා{1} ආස’හං තදා, ආරාමෙන ච ආරාමං{2} චරාමි කුසලථිකා.
191. කාලපක්ඛම්හි දිවසෙ අද්දසං බොධිමුත්තමං, තත්ථ චිත්තං පසාදෙත්වා බොධිමූලෙ නිසීදහං.
192. ගරුචිත්තං උපට්ඨපෙත්වා සිරෙ කත්වාන අඤ්ජලිං, සොමනස්සං පවෙදෙත්වා එවං චින්තෙසිං තාවදෙ:
193. “යදි බුද්ධො අමිතයසො අසමප්පටිපුග්ගලො, දස්සෙතු පාටිහීරං මෙ බොධි ඔභාසතු අයං.”
194. සහ ආවජ්ජනා මය්හං බොධි පජ්ජලි තාවදෙ, සබ්බසොණ්ණමයා අසි දිසා සබ්බා රොචයි.{3}
195. සත්තරත්තින්දිවං තත්ථ බොධිමූලෙ නිසීදහං, සත්තමෙ දිවසෙ පත්තෙ දීපපූජං අකාසහං.
196. ආසනං පරිවාරෙත්වා පඤ්චදීපානි පජ්ජලුං,{4} යාව උදෙති සුරියො දීපා මෙ පජ්ජලුං තදා.
197. තෙන කම්මෙන සුකතෙන චෙතනාපණිධීහි ච, ජහිත්වා මානුසං දෙහං තාවතිංසමගච්ඡහං.
198. තත්ථ මෙ සුකතං ව්යම්හං පඤ්චදීපීති{5} වුච්චති, සට්ඨියොජනමුබ්බෙධං තිංසයොජන විත්ථතං.
199. අසඞ්ඛියානි දීපානි පරිවාරෙ{6} ජලන්ති මෙ, යාවතා දෙවභවනං දීපාලොකෙන ජොතති.
200. පරම්මුඛා{7} නිසීදිත්වා යදි ඉච්ඡාමි පස්සිතුං, උද්ධං අධො ච තිරියං සබ්බං පස්සාමි චක්ඛුනා.
201. යාවතා අභිකඞ්ඛාමි දට්ඨුං සුගතදුග්ගතෙ{8} තත්ථ ආවරණං නත්ථි රුක්ඛෙසු පබ්බතෙසු වා.
202. අසීති දෙවරාජූනං මහෙසිත්තමකාරයිං, සතානං චක්කවත්තීනං මහෙසිත්තමකාරයිං.
203. යං යං යෙනුපපජ්ජාමි දෙවත්තං අථ මානුසෙ, දීපසතසහස්සානි පරිවාරෙ{1} ජලන්ති මෙ.{2}
204. දෙවලොකා චවිත්වාන උප්පජ්ජිං මාතුකුච්ඡියං, මාතුකුච්ඡිගතං සන්තී{3} අක්ඛි මෙ න නිමීලති.
205. දීපසතසහස්සානි පුඤ්ඤකම්මසමඞ්ගිතා, ජලන්ති සූතිකාගෙහෙ පඤ්චදීපානිදං ඵලං.
206. පච්ඡිමෙ භවෙ සම්පත්තෙ මානසං විනිවට්ටයිං,{4} අජරාමරං සීතිභූතං{5} නිබ්බානං ඵස්සයිං අහං.
207. ජාතියා සත්තවස්සාහං අරහත්තමපාපුණිං, උපසම්පාදයී බුද්ධො ගුණමඤ්ඤාය ගොතමො.
208. මණ්ඩපෙ රුක්ඛමූලෙ වා සුඤ්ඤාගාරෙ වසන්තියා, සදා පජ්ජලතෙ දීපං පඤ්චදීපානිදං ඵලං
209. දිබ්බචක්ඛු විසුද්ධං මෙ සමාධිකුසලා අහං, අභිඤ්ඤාපාරමිප්පත්තා පඤ්චදීපානිදං ඵලං.
210. සබ්බවොසිතවොසානා කතකිච්චා අනාසවා, පඤ්චදීපා මහාවීර පාදෙ වන්දති චක්ඛුම.
211. සතසහස්සෙ ඉතො{6} කප්පෙ යං දීපමදදිං තදා,{7} දුග්ගතිං නාභිජානාමි පඤ්චදීපානිදං ඵලං.
212-214. කිලෙසා ඣාපිතා මය්හං -පෙ- කතං බුද්ධස්ස සාසනං.
ඉත්ථං සුදං පඤ්චදීපයිකා භික්ඛුනී ඉමා ගාථායො අභාසිත්ථාති.
පඤ්චදීපදායිකා ථෙරියාපදානං පඤ්චමං.
2. 6 සාලමාලිකාපදානං
215. චන්දභාගානදීතීරෙ අහොසිං කින්නරී තදා, අද්දසං විරජං බුද්ධං සයම්භුං අපරාජිතං.
216. පසන්නචිත්තා සුමනා වෙදජාතා කතඤ්ජලී, සාලමාලං ගහෙත්වාන සයම්භුං අභිපූජයිං.
217. තෙන කම්මෙන සුකතෙන චෙතනාපණිධීහි ච, ජහිත්වා කින්නරීදෙහං{1} තාවතිංසමගච්ඡහං.
218. ඡත්තිංස දෙවරාජූනං මහෙසිත්තමකාරයිං, මනසා පත්ථිතං මය්හං නිබ්බත්තති යථිච්ඡිතං.
219. දසන්නං චක්කවත්තීනං මහෙසිත්තමකාරයිං, ඔචිතත්තාව{2} හුත්වාන සංසරාමි භවෙස්වහං.
220. කුසලං විජ්ජතෙ මය්හං පබ්බජිං අනගාරියං, පූජාරහා අහං අජ්ජ{3} සක්යපුත්තස්ස සාසනෙ.
221. විසුද්ධමනසා අජ්ජ අපෙතමනපාපිකා, සබ්බාසවාපරික්ඛීණා නත්ථිදානි පුනබ්භවො.
222. චතුනවුතෙ ඉතො කප්පෙ යං බුද්ධමභිපූජයිං, දුග්ගතිං නාභිජානාමි සාලමාලායිදං ඵලං.
223-225. කිලෙසා ඣාපිතා මය්හං -පෙ- කතං බුද්ධස්ස සාසනං.
ඉත්ථං සුදං සාලමාලිකා භික්ඛුනී ඉමා ගාථායො අභාසිත්ථාති.
සාලමාලිකා ථෙරියාපදානං ඡට්ඨං.
2. 7 මහාපජාපතිගොතමීඅපදානං.
226. එකදා ලොකපජ්ජොතො වෙසාලියං මහාවනෙ, කූටාගාරෙ සුසාලායං වසතෙ නරසාරථි.
227. තදා ජිනස්ස මාතුච්ඡා මහාගොතමි භික්ඛුනී, තහිං කතෙ{1} පුරෙ රම්මෙ වසී භික්ඛුනුපස්සයෙ.
228. භික්ඛුනීහි විමුත්තාහි සතෙහි සහ පඤ්චහි, රහොගතාය තස්සෙවං චිත්තස්සාසි{2} විතක්කිතං.
229. “බුද්ධස්ස පරිනිබ්බාණං සාවකග්ගයුගස්ස වා රාහුලානන්දනන්දානං නාහං ලච්ඡාමි පස්සිතුං{*}
230. පටිගච්චායුසඞ්ඛාරෙ{3} ඔස්සජිත්වාන{4} නිබ්බුතිං, ගච්ඡෙය්යං ලොකනාථෙන අනුඤ්ඤාතා මහෙසිනා.”
231. තථා පඤ්චසතානම්පි භික්ඛුනීනං විතක්කිතං, ආසි ඛෙමාදිකානම්පි එතදෙව විතක්කිතං.
232. භූමිචාලො තදා ආසි නාදිතා දෙවදුන්දුභි, උපස්සයාධිවත්ථායො දෙවතා සොකපීළිතා. විපලන්තා සකරුණං{5} තථෙස්සූනි පවත්තයුං,
233. මිත්තා{6} භික්ඛුනියො තා හි උපගන්ත්වාන ගොතමිං, නිපච්ච සිරසා පාදෙ ඉදං වචනමබ්රවිං:
234. “තත්ථ තොයලවාසිත්තා මයමය්යෙ රහොගතා සාචලා චලිතා භූමි නදිතා දෙවදුන්දුභි, පරිදෙවා ච සූයන්ති කිමත්ථං නූන ගොතමී.”
235. තදා අවොච සා සබ්බං යථාපරිවිතක්කිතං, තායොපි සබ්බා ආහංසු යථාපරිවිතක්කිතං.
236. “යදි තෙ රුචිතං අය්යෙ නිබ්බානං පරමං සිවං, නිබ්බායිස්සාම සබ්බාපි බුද්ධානුඤ්ඤාය සුබ්බතෙ.
237. මයං සහාව නික්ඛන්තා ඝරාපි ව භවාපි ච සහයෙව ගමිස්සාම නිබ්බාණපුරමුත්තමං”
238. නිබ්බානාය වජන්තීනං කිං වක්ඛාමීති” සා වදං සහ සබ්බාහි නිග්ගච්ඡි භික්ඛුනීනිලයා තදා.
239. උපස්සයෙ යාධිවත්ථා දෙවතා තා ඛමන්තු මෙ, භික්ඛුනීනිලයස්සෙදං පච්ඡිමං දස්සනං මම.
240. න ජරා මච්චු වා යත්ථ අප්පියෙහි සමාගමො, පියෙහි විප්පයොගො’ත්ථි{1} තං වජිස්සං{2} අසඞ්ඛතං.
241. අවීතරාගා තං සුත්වා වචනං සුගතොරසා, සොකට්ටා පරිදෙවිංසු “අහො නො අප්පපුඤ්ඤතා.
242. භික්ඛුනීනිලයො සුඤ්ඤො භූතො තාහි විනා අයං, පභාතෙ විය තාරායො න දිස්සන්ති ජිනොරසා.
243. නිබ්බානං ගොතමී යාති සතෙහි සහ පඤ්චහි, නදීසතෙහිව සහ ගඞ්ගා පඤ්චහි සාගරං.
244. රථිකාය වජන්තිං තං{3} දිස්වා සද්ධා උපාසිකා, ඝරා නික්ඛම්ම පාදෙසු නිපච්ච ඉදමබ්රවිං:
245. “පසීදස්සු මහාභොගෙ අනාථායො විහාය නො, තයා න යුත්තං{4} නිබ්බාතුං” ඉච්චට්ටං{5} විලපිංසු තා.
246. තාසං සොකපහාණත්ථං අවොච මධුරං ගිරං, “රුදිතෙන අලං පුත්තා හාසකාලො’යමජ්ජ වො.
247. පරිඤ්ඤාතං මයා දුක්ඛං දුකඛහෙතු විවජ්ජිතො, නිරොධො මෙ සච්ඡිකතො මග්ගො චාපි සුභාවිතො.
(භාණවාරං පඨමං)
248. පරිචිණ්ණො මයා සත්ථා කතං බුද්ධස්ස සාසනං, ඔහිතො ගරුකො භාරො භවනෙත්ති සමූහතා.
249. යස්සත්ථාය පබ්බජිතා අගාරස්මානගාරියං, සො මෙ අත්ථො අනුප්පත්තො සබ්බසඤ්ඤොජනක්ඛයො.
250. බුද්ධො තස්ස ච සද්ධම්මො අනූනො යාව තිට්ඨති, නිබ්බාතුං තාව කාලො මෙ මා මං සොචථ පුත්තිකා.
251. කොණ්ඩඤ්ඤානන්දිනන්දාදී තිට්ඨන්ති රාහුලො ජිනො, සුඛිතො සහිතො සඞ්ඝො හතදප්පා ච තිත්ථියා.