71. නගරෙ අරුණවතියා අරුණවා{2} නාම ඛත්තියො, තස්ස රඤ්ඤො අහුං භරියා චාරිකං චාරයාමහං{3}.
72. සත්තමාලා{4} ගහෙත්වාන උප්පලා දෙවගන්ධිකා, නිසජ්ජපාසාදවරෙ එවං චින්තෙසි තාවදෙ.
73. “කිං මෙ ඉමාහි මාලාහි සිරසාරොපිතාහි මෙ, වරං මෙ බුද්ධසෙට්ඨස්ස ඤාණම්හි අභිරොපිතං.”
74. සම්බුද්ධං පතිමානෙන්ති ද්වාරාසන්නෙ නිසීද’හං, ”යදා එහීති{5} සම්බුද්ධො පූජයිස්සං මහාමුනිං.”
75. කකුධො විලසන්තොව මිගරාජාව කෙසරී, භික්ඛුසඞ්ඝෙන සහිතො ආගඤ්ඡි වීථියං ජිනො.
76. බුද්ධස්ස රංසිං දිස්වාන හට්ඨා සංවිග්ගමානසා, ද්වාරං අවාපුරිත්වාන{6} බුද්ධසෙට්ඨං අපූජයිං.
77. සත්තඋප්පලපුප්ඵානි පරිකිණ්ණානි{1} අම්බරෙ, ඡදං{2} කරොන්තා බුද්ධස්ස මත්ථකෙ ධාරයන්ති තෙ.
78. උදග්ගචිත්තා සුමනා වෙදජාතා කතඤ්ජලී, තත්ථ චිත්තං පසාදෙත්වා තාවතිංසං අගඤ්ඡ’හං.{3}
79. මහානෙලස්ස ඡදනං ධාරෙන්ති මම මුද්ධනි, දිබ්බගන්ධං පවායාමි සත්තුප්පලානිදං ඵලං.
80. කදාචි නීයමානාය ඤාතිසඞ්ඝෙන මෙ තදා, යාවතා පරිසා මය්හං මහානෙලං ධරීයති.
81. සත්තති දෙවරාජූනං මහෙසිත්තමකාරයිං, සබ්බත්ථ ඉස්සරා හුත්වා සංසරාමි භවාභවෙ.
82. තෙසට්ඨිචක්කවත්තීනං මහෙසිත්තමකාරයිං, සබ්බෙ මං අනුවත්තන්ති{4} ආදෙය්යවචනා අහුං.
83. උප්පලස්සෙව මෙ වණ්ණො ගන්ධො චෙව පවායති දුබ්බණ්ණියං න ජානාමි{5} බුද්ධපූජායිදං ඵලං.
84. ඉද්ධිපාදෙසු කුසලා බොජ්ඣඞ්ගභාවනාරතා, අභිඤ්ඤාපාරමිප්පත්තා බුද්ධපූජායිදං ඵලං.
85. සතිපට්ඨානකුසලා සමාධිජ්ඣානගොචරා, සම්මප්පධානමනුයුත්තා බුද්ධපූජායිදං ඵලං.
86. විරියං මෙ ධුරධොරය්හං යොගක්ඛෙමාධිවාහනං, සබ්බාසවා පරික්ඛීණා{6} නත්ථිදානි පුනබ්භවො.
87. එකතිංසෙ ඉතො කප්පෙ යං කම්මමකරිං තදා{7} දුග්ගතිං නාභිජානාමි පුප්ඵදානස්සිදං{8} ඵලං.
88-90. කිලෙසා ඣාපිතා මය්හං -පෙ- කතං බුද්ධස්ස සාසනං.
ඉත්ථං සුදං සත්තුප්පලමාලිකා භික්ඛුනී ඉමා ගාථායො අභාසිත්ථාති.
සත්තුප්පලමාලිකාථෙරියාපදානං අට්ඨමං.
1. 9 පඤ්චදීපිකාපදානං.
91. නගරෙ හංසවතියා චාරිකී{1} ආස’හං තදා, ආරාමෙන ච ආරාමං චරාමි කුසලත්ථිකා.
92. කාලපක්ඛම්හි දිවසෙ අද්දසං බොධිමුත්තමං, තත්ථ චිත්තං පසාදෙත්වා බොධිමූලෙ නිසීදහං.
93. ගරුචිත්තං උපට්ඨපෙත්වා සිරෙ කත්වාන අඤ්ජලිං, සොමනස්සං පවෙදෙත්වා එවං චින්තෙසි තාවදෙ.
94. “යදි බුද්ධො අමිතගුණො අසමප්පටිපුග්ගලො, දස්සෙතු පාටිහීරං මෙ බොධි ඔභාසතු අයං.”
95. සහ ආවජ්ජනා{2} මය්හං බොධි පජ්ජලි තාවදෙ, සබ්බසොණ්ණමයො{3} ආසි දිසා සබ්බා විරොචයුං.{4}
96. සත්තරත්තින්දිවං තත්ථ බොධිමූලෙ නිසීද’හං, සත්තමෙ දිවසෙ පත්තෙ දීපපූජං අකාස’හං.
97. ආසනං පරිවාරෙත්වා පඤ්චදීපානි පජ්ජලුං, යාව උදෙති සුරියො දීපා මෙ පජ්ජලුං තදා.
98. තෙන කම්මෙන සුකතෙන චෙතනාපණිධීහි ච, ජහිත්වා මානුසං දෙහං තාවතිංසමගච්ඡහං.
99. තත්ථ මෙ සුකතං ව්යම්හං පඤ්චදීපීති{5} වුච්චති සට්ඨියොජනමුබ්බෙධං{6} තිංසයොජනවිත්ථතං.
100. අසඞ්ඛ්යානි දීපානි පරිවාරෙ ජලන්ති මෙ යාවතා දෙවභවනං දීපාලොකෙන ජොතති.{7}
101. පරම්මුඛා නිසීදිත්වා යදි ඉච්ඡාමි පස්සිතුං, උද්ධං අධො ච තිරියං සබ්බං පස්සාමි චක්ඛුනා.
102. යාවතා අභිකඞ්ඛාමි දට්ඨුං සුගතදුග්ගතෙ, තත්ථ ආවරණං නත්ථි රුක්ඛෙසු පබ්බතෙසු වා.
103. අසීති දෙවරාජූනං මහෙසිත්තමකාරයිං, සතානං චක්කවත්තීනං මහෙසිත්තමකාරයිං.
104. යං යං යොනුපපජ්ජාමි දෙවත්තං අථ මානුසං, දීපසතසහස්සානි පරිවාරෙත්වා ජලන්ති මං{1}
105. දෙවලොකා චවිත්වාන උප්පජ්ජිං මාතුකුච්ඡියං, මාතුකුච්ඡිගතං සන්තිං{2} අක්ඛි මෙ න නිමීලති.
106. දීපසතසහස්සානි පුඤ්ඤකම්මසමඞ්ගිතා, සූතිඝරෙ පජ්ජලන්ති{3} පඤ්චදීපානිදං ඵලං.
107. පච්ඡිමෙ භවෙ{4} සම්පත්තෙ මානසං විනිවට්ටයිං, අජරාමරං{5} සීතිභාවං නිබ්බානං ඵස්සයිං{6} අහං.
108. ජාතියා සත්තවස්සා’හං අරහත්තමපාපුණිං, උපසම්පාදයී බුද්ධො ගුණමඤ්ඤාය ගොතමො.
109. මණ්ඩපෙ රුක්ඛමූලෙ වා පාසාදෙසු ගුහාසු වා, සුඤ්ඤාගාරෙ ච ඣායන්ත්යා{7} පඤ්චදීපා ජලන්ති මෙ.
110. දිබ්බචක්ඛු විසුද්ධං මෙ සමාධිකුසලා අහං, අභිඤ්ඤාපාරමිප්පත්තා පඤ්චදීපානිදං ඵලං.
111. සබ්බවොසිතවොසානා කතකිච්චා අනාසවා, පඤ්චදීපා මහාවීර පාදෙ වන්දති{8} චක්ඛුම.
112. සතසහස්සෙ ඉතො{9} කප්පෙ යං දීපමදදිං තදා, දුග්ගතිං නාභිජානාමි පඤ්චදීපානිදං ඵලං.
113-115. කිලෙසා ඣාපිතා මය්හං -පෙ- කතං බුද්ධස්ස සාසනං.
ඉත්ථං සුදං පඤ්චදීපිකා භික්ඛුනී ඉමා ගාථායො අභාසිත්ථාති.
පඤ්චදීපිකාථෙරියාපදානං නවමං.
1. 10 උදකදායිකාපදානං.
116. නගරෙ බන්ධුමතියා අහොසිං උදහාරිකා, උදහාරෙන ජීවාමි තෙන පොසෙමි දාරකෙ.
117. දෙය්යධම්මො ච මෙ නත්ථි පුඤ්ඤක්ඛෙත්තෙ අනුත්තරෙ, කොට්ඨකං උපසඞ්කම්ම උදකං පට්ඨපෙස’හං.
118. තෙන කම්මෙන සුකතෙන තාවතිංසමගච්ඡ’හං, තත්ථ මෙ සුකතං ව්යම්හං උදහාරෙන නිම්මිතං.
119. අච්ඡරානං සහස්සස්ස{1} අහං හි පවරා තදා, දසට්ඨානෙහි තා සබ්බා අභිභොමි සදා අහං.
120. පඤ්ඤාසං දෙවරාජූනං මහෙසිත්තමකාරයිං, වීසතිචක්කවත්තීනං මහෙසිත්තමකාරයිං.
121. දුවෙ භවෙ සංසරාමි දෙවත්තෙ අථ මානුසෙ, දුග්ගතිං නාභිජානාමි දකදානස්සිදං{2} ඵලං.
122. පබ්බතග්ගෙ දුමග්ගෙ වා අන්තලික්ඛෙ ච භූමියං, යදා උදකමිච්ඡාමි ඛිප්පං පටිලභාමහං.
123. අවුට්ඨිකා දිසා නත්ථි සන්තත්තකුථීතා න ච,{3} මම සඞ්කප්පමඤ්ඤාය මහාමෙඝො පවස්සති.
124. කදාචි නීයමානාය ඤාතිසඞ්ඝෙන මෙ තදා යදා ඉච්ඡාමහං වස්සං මහාමෙඝො පවස්සති{4}
125. උණ්හං වා පරිළාහො වා සරීරෙ මෙ න විජ්ජති, කායෙ ච මෙ රජො නත්ථි දකදානස්සිදං ඵලං.
126. විසුද්ධමනසා අජ්ජ අපෙතමලපාපිකා{5}, සබ්බාසවා පරික්ඛීණා{6} නත්ථිදානි පුනබ්භවො.
127. එකනවුතෙ ඉතො කප්පෙ යං කම්මමකරිං{1} තදා, දුග්ගතිං නාභිජානාමි දාකදානස්සිදං ඵලං.
128-130. කිලෙසා ඣාපිතා මය්හං -පෙ- කතං බුද්ධස්ස සාසනං.
ඉත්ථං සුදං උදකදායිකා භික්ඛුනී ඉමා ගාථායො අභාසිත්ථාති.
උදකදායිකාථෙරියාපදානං දසමං.
තස්සුද්දානං:
සුමෙධා මෙඛලාදායි මණ්ඩපසඞ්කමං දදා, නළමාලී පිණ්ඩදදා කටච්ඡු උප්පලප්පදා.
දීපදා දකදා චෙව ගාථායො ගණිතා ඉහ, එකං ගාථාසතං චෙව තිංසතී ච තදුත්තරිං.
සුමෙධාවග්ගො පඨමො.
2. එකූපොසථික වග්ගො
2. 1 එකුපොසථිකාපදානං.
131. නගරෙ බන්ධුමතියා බන්ධුමා නාම ඛත්තියො, දිවසෙ පුණ්ණමායං{1} සො උපවසි{2} උපොසථං.
132. අහං තෙන සමයෙන කුම්බදාසී අහුං තහිං, දිස්වා සරාජිකං{3} සෙනං එවාහං චින්තයිං තදා.
133. “රාජාපි රජ්ජං ඡඩ්ඩෙත්වා උපවසි{2} උපොසථං, සඵලං නූන තං කම්මං ජනකායො පමොදිතො.”
134. යොනිසො පච්චවෙක්ඛිත්වා දුග්ගච්චඤ්ච{4} දළිද්දතං,{5} මානසං සංපහංසෙත්වා{6} උපවසිං උපොසථං.
135. අහං උපොසථං කත්වා සම්මාසම්බුද්ධසාසනෙ, තෙන කම්මෙන සුකතෙන තාවතිංසං අගච්ඡහං{7}
136. තත්ථ මෙ සුකතං ව්යම්හං උද්ධං{8} යොජනමුග්ගතං, කූටාගාරවරූපෙතං සයනාසනභූසිතං.{9}
137. අච්ඡරා සතසහස්සා උපතිට්ඨන්ති මං සදා, අඤ්ඤෙ දෙවෙ අතික්කම්ම අතිරොචාමි සබ්බදා.
138. චතුසට්ඨිදෙවරාජූනං මහෙසිත්තමකාරයිං, තෙසට්ඨිචක්කවත්තීනං මහෙසිත්තමකාරයිං.
139. සුවණ්ණවණ්ණා හුත්වාන භවෙසු සංසරාමහං, සබ්බත්ථ පවරා හොමි උපොසථස්සිදං ඵලං.
140. හත්ථියානං අස්සයානං රථයානඤ්ච සිවිකං{10} ලභාමි සබ්බමෙතම්පි උපොසථස්සිදං ඵලං.
141. සොවණ්ණමයං රූපිමයං අථොපි ඵලිකාමයං, ලොහිතඞ්කමයඤ්චෙව සබ්බං පටිලභාම’හං.
142. කොසෙය්යකම්බලියානි ඛොමකප්පාසිකානි ච, මහග්ඝානි ච වත්ථානි සබ්බං පටිලභාම’හං.
143. අන්නං පානං ඛාදනීයං වත්ථසෙනාසනානි ච, සබ්බමෙතං පටිලභෙ උපොසථස්සිදං ඵලං.
144. වරගන්ධඤ්ච මාලඤ්ච චුණ්ණකඤ්ච විලෙපනං, සබ්බමෙතං පටිලභෙ උපොසථස්සිදං ඵලං.
145. කූටාගාරඤ්ච පාසාදං මණ්ඩපං හම්මියං ගුහං, සබ්බමෙතං පටිලභෙ උපොසථස්සිදං ඵලං.
146. ජාතියා සත්තවස්සො’හං පබ්බජිං අනගාරියං, අඩ්ඪමාසෙ අසම්පත්තෙ අරහත්තං අපාපුණිං,{1}
147. කිලෙසා ඣාපිතා මය්හං භවා සබ්බෙ සමූහතා, සබ්බාසවා පරික්ඛීණා නත්ථිදානි පුනබ්භවො.
148. එකනවුතෙ ඉතො කප්පෙ යං කම්මමකරිං තදා, දුග්ගතිං නාභිජානාමි උපොසථස්සිදං ඵලං.
149. ස්වාගතං වත මෙ ආසි මම බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
150. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං
ඉත්ථං සුදං එකූපොසථිකා භික්ඛුනී ඉමා ගාථායො අභාසිත්ථාති.
එකූපොසථිකාථෙරියාපදානං පඨමං.
2. 2 සලලපුප්ඵිකාපදානං.
151. චන්දභාගානදීතීරෙ අහොසිං කින්නරී තදා, අද්දසාහං{1} දෙවදෙවං චඞ්කමන්තං නරාසභං.
152. ඔචිනිත්වාන සලලං බුද්ධසෙට්ඨස්ස’දාස’හං, “උපසිඞ්ඝ මහාවීර{2} සලලං දෙවගන්ධිකං.”
153. පටිග්ගහෙත්වා සම්බුද්ධො විපස්සී ලොකනායකො, උපසිඞ්ඝි මහාවීරො පෙක්ඛමානාය මෙ තදා.
154. අඤ්ජලිං පග්ගහෙත්වාන වන්දිත්වා දිපදුත්තමං,{3} සකං චිත්තං පසාදෙත්වා තතො පබ්බතමාරූහිං.
155. එකනවුතෙ ඉතො{4} කප්පෙ යං පුප්ඵමදදිං තදා, දුග්ගතිං නාභිජානාමි බුද්ධපූජායිදං ඵලං.
156. කිලෙසා ඣාපිතා මය්හං -පෙ- විහරාමි අනාසවා.
157. ස්වාගතං වත මෙ ආසි -පෙ- කතං බුද්ධස්ස සාසනං.
158. පටිසම්භිදා චතස්සො ච -පෙ- කතං බුද්ධස්ස සාසනං.
ඉත්ථං සුදං සලලපුප්ඵිකාභික්ඛුනී ඉමා ගාථායො අභාසිත්ථාති.