සීවකත්ථෙරස්සාපදානං නවමං.
තස්සුද්දානං
යසො නදීකස්සපො ච ගයාකිම්බිලවජ්ජිනො, ද්වෙ උත්තරා භද්දජි ච සීවකො චාපි උත්තමො.
යසවග්ගො ඡපඤ්ඤාසතිමො.
ථෙරාපදානං සමත්තං.
(රට්ඨපාල - උපවාන ත්ථෙරානං අපදානානි “මඡසං” පොත්ථකෙ යසවග්ගන්තොගධානි දිස්සන්තෙ, තථාපි අපදානපාළි පඨමභාගෙ දුතිය තතියවග්ගෙසු තෙසං ආගතත්තා ඉධ න දස්සිතානීති දට්ඨබ්බං.)
සුත්තන්තපිටකෙ ඛුද්දකනිකායෙ
අපදානපාළි
තතියො භාගො
ථෙරීඅපදාන පාළි
නමො තස්ස භගවතො අරහතො සම්මා සම්බුද්ධස්ස
1. සුමෙධාවග්ගො
1. 1 සුමෙධාපදානං.
1. භගවති කොණාගමනෙ සඞ්ඝාරාමම්හි නවනිවෙසම්හි{1} සඛියො තිස්සො ජනියො විහාරදානං අදාසිම්හ.
2. දසක්ඛත්තුං සතක්ඛත්තුං දසසතක්ඛත්තුං සතානං ච සතක්ඛත්තුං{2} දෙවෙසු උපපජ්ජිම්හ කො වාදො මානුසකෙ භවෙ.
3. දෙවෙ මහිද්ධිකා අහුම්හ මානුසකම්හි කො වාදො සත්තරතනස්ස මහෙසී{3} ඉත්ථිරතනං අහං ආසිං.{4}
4. ඉධ{5} සඤ්චිතකුසලා සුසමිද්ධකුලප්පජා ධනඤ්ජානී ච ඛෙමා ච අහම්පි ච තයො ජනා.
5. ආරාමං සුකතං කත්වා සබ්බාවයවමණ්ඩිතං බුද්ධප්පමුඛසඞ්ඝස්ස නිය්යාදෙත්වා පමොදිතා.{6}
6. යත්ථ යත්ථූපපජ්ජාමි තස්ස කම්මස්ස වාහසා දෙවෙසු අග්ගතං පත්තා මනුස්සෙසු තථෙව ච.
7. ඉමස්මිංයෙව කප්පම්හි බ්රහ්මබන්ධු මහායසො කස්සපො නාම ගොත්තෙන උප්පජ්ජි වදතං වරො.
8. උපට්ඨාකො මහෙසිස්ස තදා ආසි නරිස්සරො කාසිරාජා කිකී නාම බාරාණසිපුරුත්තමෙ.
9. තස්සාසුං සත්ත ධීතරො රාජඤ්ඤා සුඛෙධිතා{1} බුද්ධුපට්ඨානනිරතා{2} බ්රහ්මචරියං චරිංසු තා.
10. තාසං සහායිකා හුත්වා සීලෙසු සුසමාහිතා දත්වා දානානි සක්කච්චං අගාරෙව වතං{3} චරිං.
11. තෙන කම්මෙන සුකතෙන චෙතනාපණිධීහි ච ජහිත්වා මානුසං දෙහං තාවතිංසූපගා අහං.
12. තතො චුතා යාමමගං{4} තතො’හං තුසිතං ගතා තතො ච නිම්මාණරතිං වසවත්තිපුරං තතො.
13. යත්ථ යත්ථූපපජ්ජාමි පුඤ්ඤකමමසමොහිතා{5} තත්ථ තත්ථෙව රාජූනං මහෙසිත්තමකාරයිං.
14. තතො චුතා මනුස්සත්තෙ රාජූනං චක්කවත්තිනං. මණ්ඩලීනඤ්ච රාජූනං මහෙසිත්තමකාරයිං.
15. සම්පත්තිමනුභොත්වාන දෙවෙසු මානුසෙසු ච සබ්බත්ථ සුඛිතා හුත්වා නෙකජාතිසු සංසරිං.
16. සො හෙතු ච සො පභවො තං මූලං සා ච සාසනෙ ඛන්ති{6} තං පඨමං{7} සමොධානං තං ධම්මරතාය නිබ්බානං.
17. කිලෙසා ඣාපිතා මය්හං භවා සබ්බෙ සමූහතා, නාගීව බන්ධනං ඡෙත්වා විහරාමි අනාසවා.
18. ස්වාගතං වත මෙ ආසි බුද්ධසෙට්ඨස්ස{8} සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
19. පටිසම්භිදා චතස්සො ච{9} විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං සුමෙධා භික්ඛුනී ඉමා ගාථායො අභාසිත්ථාති.
සුමෙධාථෙරියාපදානං පඨමං
1. 2 මෙඛලාදායිකාපදානං
20. සිද්ධත්ථස්ස භගවතො ථූපං කාරාපිකා{1} අහුං, මෙඛලිකා මයා දින්නා නවකම්මාය සත්ථුනො.
21. නිට්ඨිතෙ ච මහාථූපෙ මෙඛලං පුන’දාසහං, ලොකනාථස්ස මුනිනො පසන්නා සෙහි පාණිහි.
22. චතුනවුතෙ ඉතො{2} කප්පෙ යං මෙඛලමදං තදා, දුග්ගතිං නාභාජානාමි ථූපකාරස්සිදං ඵලං.
23. කිලෙසා ඣාපිතා මය්හං -පෙ- විහරාමි අනාසවා.
24. ස්වාගතං වත මෙ ආසි -පෙ- කතං බුද්ධස්ස සාසනං.
25. පටිසම්භිදා චතස්සො ච -පෙ- කතං බුද්ධස්ස සාසනං.
ඉත්ථං සුදං මෙඛලාදායිකා භික්ඛුනී ඉමා ගාථායො අභාසිත්ථාති.
මෙඛලාදායිකාථෙරීඅපදානං දුතියං.
1. 3 මණ්ඩපදායිකාපදානං
26. කොණාගමනස්ස මුනිනො මණ්ඩපො කාරිතො මයා ධුවං ච චීවරමදං{3} බුද්ධස්ස ලොකබන්ධුනො.
27. යං යං ජනපදං යාමි නිගමෙ රාජධානියො සබ්බත්ථ පූජිතා හොමි පුඤ්ඤකම්මස්සිදං ඵලං.
28. කිලෙසා ඣාපිතා මය්හං -පෙ- විහරාමි අනාසවා.
29. ස්වාගතං වත මෙ ආසි -පෙ- කතං බුද්ධස්ස සාසනං.
30. පටිසම්භිදා චතස්සො ච -පෙ- කතං බුද්ධස්ස සාසනං.
ඉත්ථං සුදං මණ්ඩපදායිකා භික්ඛුනී ඉමා ගාථායො අභාසිත්ථාති.
මණ්ඩපදායිකාථෙරීඅපදානං තතියං.
1. 4 සඞ්කමනත්ථාපදානං
31. විපස්සිස්ස{1} භගවතො ලොකජෙට්ඨස්ස තාදිනො, රථියං පටිපන්නස්ස කාරයන්තස්ස පාණිනො.
32. ඝරතො නික්ඛමිත්වාන අවක්කුජ්ජා නිප්පජ්ජ’හං අනුකම්පකො ලොකනාථො සීසන්තෙ{2} අක්කමී මම{3}
33. අක්කමිත්වාන සිරසි{4} අගමා ලොකනායකො තෙන චිත්තප්පසාදෙන තුසිතං උපපජ්ජහං{5}
34. කිලෙසා ඣාපිතා මය්හං -පෙ- විහරාමි අනාසවා.
35. ස්වාගතං වත මෙ ආසි -පෙ- කතං බුද්ධස්ස සාසනං.
36. පටිසම්භිදා චතස්සො ච -පෙ- කතං බුද්ධස්ස සාසනං.
ඉත්ථං සුදං සඞ්කමනත්ථා භික්ඛුනී ඉමා ගාථායො අභාසිත්ථාති.
සඞ්කමනත්ථාථෙරියාපදානං චතුත්ථං.
1. 5 නළමාලිකාපදානං
37. චන්දභාගානදීතීරෙ අහොසිං කින්නරී තදා, අද්දසං විරජං බුද්ධං සයම්භුං අපරාජිතං.
38. පසන්නචිත්තා සුමනා වෙදජාතා කතඤ්ජලී, නළමාලං ගහෙත්වාන සයම්භුං අභිපූජයිං.
39. තෙන කම්මෙන සුකතෙන චෙතනාපණිධීහි ච, ජහිත්වා කින්නරීදෙහං අගච්ඡිං තිදසං ගතිං.{6}
40. ඡත්තිංසදෙවරාජූනං මහෙසිත්තමකාරයිං, දසන්නං චක්කවත්තීනං මහෙසිත්තමකාරයිං, සංවෙජෙත්වාන මෙ චිත්තං{7} පබ්බජිං අනගාරියං.
41. චතුනවුතෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි පුප්ඵපූජායිදං ඵලං.
42. කිලෙසා ඣාපිතා මය්හං භවා සබ්බෙ සමූහතා, සබ්බාසවා පරික්ඛීණා නත්ථිදානි පුනබ්භවො.{*}
43. කිලෙසා ඣාපිතා මය්හං -පෙ- භවා සබ්බෙ සමූහතා,
44. ස්වාගතං වත මෙ ආසි -පෙ- කතං බුද්ධස්ස සාසනං.
45. පටිසම්භිදා චතස්සො ච -පෙ- කතං බුද්ධස්ස සාසනං.
ඉත්ථං නළමාළිකා භික්ඛුනී{1} ඉමා ගාථායො අභාසිත්ථාති.
නළමාලිකාථෙරියාපදානං පඤ්චමං.
1. 6 එකපිණ්ඩපාතදායිකාපදානං.
46. නගරෙ බන්ධුමතියා බන්ධුමා නාම ඛත්තියො තස්ස{2} රඤ්ඤො අහුං භරියා එකජ්ඣං චාරයාමහං{3}
47. රහොගතා නිසීදිත්වා එවං චින්තෙස’හං තදා, “ආදාය ගමනීයං හි කුසලං නත්ථි මෙ කතං.
48. මහාභිතාපං කටුකං ඝොරරූපං සුදාරුණං, නිරයං නූන ගච්ඡාමි එත්ථ මෙ නත්ථි සංසයො.”
49. රාජානං උපසඞ්කම්ම ඉදං වචනමබ්රවිං, “එකං මෙ සමණං දෙහි භොජයිස්සාමි ඛත්තිය.”
50. අදාසි මෙ මහාරාජා සමණං භාවිතින්ද්රියං, තස්ස පත්තං ගහෙත්වාන පරමන්නෙන පූරයිං.{4}
51. පූරයිත්වා පරමන්නං ගන්ධාලෙපමකාසහං, සහස්සග්ඝනකෙනෙව{5} වත්ථයුගෙන{6} ඡාදයිං.
52. ආරම්මණං මම{1} එතං සරාමි යාවජීවිතං, තත්ථ චිත්තං පසාදෙත්වා තාවතිංසං අගච්ඡහං.
53. තිංසානං දෙවරාජූනං මහෙසිත්තමකාරයිං, මනසා පත්ථිතං මය්හං නිබ්බත්තති යථිච්ඡිතං{2}
54. වීසානං චක්කවත්තීනං මහෙසිත්තමකාරයිං, ඔචිතත්තාව{3} හුත්වාන සංසරාමි භවෙස්වහං.
55. සබ්බබන්ධනමුත්තාහං අපෙතා මෙ උපාදිකා, සබ්බාසවා පරික්ඛීණා{4} නත්ථිදානි පුනබ්භවො.
56. එකනවුතෙ ඉතො කප්පෙ - යං දානමදදිං තදා, දුග්ගතිං නාභිජානාමි පිණ්ඩපාතස්සිදං ඵලං.
57-59 කිලෙසා ඣාපිතා -පෙ- කතං බුද්ධස්ස සාසනං.
ඉත්ථං සුදං එකපිණ්ඩපාතදායිකා භික්ඛුනී ඉමා ගාථායො අභාසිත්ථාති.
එකපිණ්ඩපාතදායිකාථෙරියාපදානං ඡට්ඨං.
1. 7 කටච්ඡුභික්ඛාදායිකාපදානං.
60. පිණ්ඩචාරං චරන්තස්ස තිස්ස නාමස්ස සත්ථුනො, කටච්ඡුභික්ඛං පග්ගය්හ බුද්ධසෙට්ඨස්ස’දාස’හං.
61. පටිග්ගහෙත්වා සම්බුද්ධො තිස්සො ලොකග්ගනායකො, වීථියා සණ්ඨිතො සත්ථා අකා මෙ අනුමොදනං.
62. “කටච්ඡුභික්ඛං දත්වාන තාවතිංසං ගමිස්සසි, ඡත්තිංසදෙවරාජූනං මහෙසිත්තං කරිස්සසි.
63. පඤ්ඤාස{5} චක්කවත්තීනං මහෙසිත්තං කරිස්සසි, මනසා පත්ථිතං සබ්බං පටිලච්ඡසි සබ්බදා.
64. සම්පත්තිං අනුභොත්වාන පබ්බජිස්සසි’කිඤ්චනා,{6} සබ්බාසවෙ පරිඤ්ඤාය නිබ්බායිස්සසි’නාසවා.”{7}
65. ඉදං වත්වාන සම්බුද්ධො තිස්සො ලොකග්ගනායකො, නභං අබ්භුග්ගමී ධීරො{1} හංසරාජාව අම්බරෙ.
66. සුදින්නං මෙ දානවරං සුයිට්ඨා යාගසම්පදා, කටච්ඡුභික්ඛං දත්වාන පත්තාහං අචලං පදං.
67. ද්වෙ නවුතෙ ඉතො කප්පෙ යං දානමදදිං තදා, දුග්ගතිං නාභිජානාමි භික්ඛාදානස්සිදං ඵලං.
68-70. කිලෙසා ඣාපිතා මය්හං -පෙ- කතං බුද්ධස්ස සාසනං.
ඉත්ථං සුදං කටච්ඡුභික්ඛාදායිකා භික්ඛුනී ඉමා ගාථායො අභාසිත්ථාති.
කටච්ඡුභික්ඛාදායිකා ථෙරියාපදානං සත්තං.
1. 8 සත්තුප්පලමාලිකාපදානං.