6370. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
6371. පටිසම්භිදා චතස්සො ච විමොක්ඛා පි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ගයාකස්සපො ථෙරො ඉමා ගාථායො අභාසිත්ථාති.
ගයාකස්සපත්ථෙරස්සාපදානං තතියං.
554. කිම්බිල{1}ත්ථෙරාපදානං
6372. නිබ්බුතෙ කකුසන්ධස්මිං{2} බ්රාහ්මණස්මිං{3} වුසීමති, ගහෙත්වා සලලං මාලං මණ්ඩපං කාරයිං අහං.
6373. තාවතිංසං ගතො සන්තො ලභිම්හ ව්යම්හමුත්තමං, අඤ්ඤෙ දෙවෙ’තිරොචාමි පුඤ්ඤකම්මස්සිදං ඵලං.
6374. දිවා වා යදි වා රත්තිං චඞ්කමන්තො ඨිතො චහං, ඡන්නො සලලපුප්ඵෙහි පුඤ්ඤකම්මස්සිදං ඵලං.
6375. ඉමස්මිං යෙව කප්පම්හි යං බුද්ධම්හිපූජයිං, දුග්ගතිං නාභිජානාමි බුද්ධපූජායිදං ඵලං.
6376. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
6377. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
6378. පටිසම්භිදා චතස්සො ච විමොක්ඛා පි ච අට්ඨි’මෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කිම්බිලො ථෙරො ඉමා ගාථායො අභාසිත්ථාති.
කිම්බිලත්ථෙරාපදානං චතුත්ථං.
555. වජ්ජීපුත්තත්ථෙරාපදානං
6379. සහස්සරංසී භගවා සයම්භූ අපරාජිතො, විවෙකා වුට්ඨහිත්වාන ගොචරායාභිනික්ඛමි.
6380. ඵලහත්ථො අහං දිස්වා උපගඤ්ඡිං{1} නරාසභං, පසන්නචිත්තො සුමනො සවණ්ටං අදදිං ඵලං.
6381. චතුනවුතිතො{2} කප්පෙ යං ඵලං අදදිං තදා, දුග්ගතිං නාභිජානාමි ඵලදානස්සිදං ඵලං.
6382. කිලෙසා ඣාපිතා මය්හං -පෙ- විහරාමි අනාසවො.
6383. ස්වාගතං වත මෙ ආසි -පෙ- කතං බුද්ධස්ස සාසනං.
6384. පටිසම්භිදා චතස්සො ච -පෙ- කතං බුද්ධස්ස සාසනං.
ඉත්ථං සුදං ආයස්මා වජ්ජිපුත්තො ථෙරො ඉමා ගාථායො අභාසිත්ථාති.
වජ්ජිපුත්තත්ථෙරස්සාපදානං පඤ්චමං.
556. උත්තරත්ථෙරාපදානං
6385. සුමෙධො නාම සම්බුද්ධො බත්තිංස{3}වරලක්ඛණො, විවෙකකාමො භගවා හිමවන්ත මුපාගමි.
6386. අජ්ඣොගහෙත්වා හිමවන්තං අග්ගො කාරුණිකො මුනි, පල්ලනඞ්කං ආභුජිත්වාන නිසීදි පුරිසුත්තමො.
6387. විජ්ජාධරො{4} තදා ආසිං අන්තලික්ඛචරො අහං, තිසූලං සුගතං ගය්හ ගච්ඡාමි අම්බරෙ තදා.
6388. පබ්බතග්ගෙ යථා අග්ගි පුණ්ණමායෙව චන්දිමා, වනං ඔභාසතෙ බුද්ධො සාලරාජාව ඵුල්ලිතො.
6389. වනග්ගා නික්ඛමිත්වාන බුද්ධරංසී විධාවරෙ,{5} නළග්ගිවණ්ණසඞ්කාසා{6} දිස්වා චිත්තං පසාදයිං.
6390. විචිනං අද්දසං පුප්ඵං කණිකාරං දෙවගන්ධිකං, තීණි පුප්ඵානි ආදාය බුද්ධසෙට්ඨමපූජයිං.
6391. බුද්ධස්ස ආනුභාවෙන තීණි පුප්ඵානි මෙ තදා, උද්ධවණ්ටා{1} අධොපත්තා ඡායං කුබ්බන්ති සත්ථුනො.
6392. තෙන කම්මෙන සුකතෙන චෙතනාපණිධීහි ච, ජහිත්වා මානුසං දෙහං තාවතිංසමගච්ඡහං.
6393. තත්ථ මෙ සුකතං ව්යම්හං{2} කණිකාරීති{3} ඤායතෙ{4}, සට්ඨියොජනමුබ්බෙධං තිංසයොජනවිත්ථතං.
6394. සහස්සකණ්ඩං සතභෙණ්ඩු ධජාලු හරිතාමයං, සතසස්සනිය්යුහා{5} ව්යම්හෙ පාතුරහංසු{6} මෙ.
6395. සොවණ්ණමයා මණිමයා ලොහිතඞ්කමයා’පි ච, ඵලිකා’පි ච පල්ලඞ්කා යෙනිච්ඡකා යදිච්ඡකා.
6396. මහාරහඤ්ච සයනං තූලිකාවිකතීයුතං, උද්ධලොමිඤ්ච එකන්තං බිම්බොහනසමායුතං.
6397. භවනා නික්ඛමිත්වාන චරන්තො දෙවචාරිකං, යදා ඉච්ඡාමි{7} ගමනං දෙවසඞ්ඝපුරක්ඛතො.
6398. පුප්ඵස්ස හෙට්ඨා තිට්ඨාමි උපරිච්ඡදනං මම, සමන්තා යොජනසතං කණිකාරෙහි ඡාදිතං.
6399. සට්ඨිතුරියසහස්සානි සායං පාතං උපට්ඨහුං, පරිවාරෙන්ති මං නිච්චං රත්තින්දිවමතන්දිතා.
6400. තත්ථ නච්චෙහි ගීතෙහි තාළෙහි{8} වාදිතෙහි ච, රමාමි ඛිඩ්ඩාරතියා මොදාමි කාමකාමහං.
6401. තත්ථ භුත්වා පිවිත්වා ච මොදාමි තිදසෙ පුරෙ, නාරිගණෙහි සහිතො මොදාමි ව්යම්හමුත්තමෙ.
6402. සතානං පඤ්චක්ඛත්තුඤ්ච දෙවරජ්ජමකාරයිං, සතානං තීණික්ඛත්තුඤ්ච චක්කවත්තී අහොස’හං, පදෙසරජ්ජං විපුලං ගණනාතො අසඞ්ඛියං.
6403. භවෙ භවෙ සංසරන්තො මහාභොගං ලභාමහං, භොගෙ මෙ ඌනතා නත්ථි බුද්ධපූජායිදං ඵලං.
6404. දුවෙ භවෙ සංසරාමි{1} දෙවත්තෙ අථ මානුසෙ, අඤ්ඤං ගතිං න ජානාමි බුද්ධපූජායිදං ඵලං.
6405. දුවෙ කුලෙ පජායාමි ඛත්තියෙ චාපි බ්රාහ්මණෙ, නීචෙ කුලෙ න ජානාමි බුද්ධපූජායිදං ඵලං.
6406. හත්ථියානං අස්සයානං සිවිකං සන්දමානිකං, ලභාමි සබ්බමෙවෙතං බුද්ධපූජායිදං ඵලං.
6407. දාසිගණං දාසගණං නාරියො සමලඞ්කතා, ලභාමි සබ්බමෙවෙතං බුද්ධපූජායිදං ඵලං.
6408. කොසෙය්ය කම්බලියානි ඛොමකප්පාසිකානි ච, ලභාමි සබ්බමෙවෙතං බුද්ධපූජායිදං ඵලං.
6409. නවවත්ථං නවඵලං නවග්ගරසභොජනං, ලභාමි සබ්බමෙවෙතං බුද්ධපූජායිදං ඵලං.
6410. ඉමං ඛාද ඉමං භුඤ්ජ ඉමස්මිං{2} සයනෙ සය, ලභාමි සබ්බමෙවෙතං බුද්ධපූජායිදං ඵලං.
6411. සබ්බත්ථ පූජිතො හොමි යසො අච්චුග්ගතො මම, මහාපක්ඛො සදා හොමි අභෙජ්ජපරිසො සදා.
6412. සීතං උණ්හං න ජානාමි පරිලාහො න විජ්ජති, අථො චෙතසිකං දුක්ඛං හදයෙ මෙ න විජ්ජති.
6413. සුවණ්ණවණ්ණො හුත්වාන සංසරාමි භවාභවෙ, වෙවණ්ණියං න ජානාමි බුද්ධපූජායිදං ඵලං.
6414. දෙවලොකා චවිත්වාන සුක්කමූලෙන චොදිතො, සාවත්ථියං පුරෙ ජාතො මහාසාලෙසු අඩ්ඪකෙ.
6415. පඤ්චකාමගුණෙ හිත්වා පබ්බජිං අනගාරියං, ජාතියා සත්තවස්සො’හං අරහත්තමපාපුණිං.
6416. උපසම්පාදයී{1} බුද්ධො ගුණමඤ්ඤාය චක්ඛුමා, තරුණො පූජනීයො’හං බුද්ධපූජායිදං ඵලං.
6417. දිබ්බචක්ඛු විසුද්ධං මෙ සමාධිකුසලො අහං, අභිඤ්ඤාපාරමිප්පත්තො බුද්ධපූජායිදං ඵලං.
6418. පටිසම්භිදා අනුප්පත්තො ඉද්ධිපාදෙසු කොවිදො, ධම්මෙසු පාරමිප්පත්තො බුද්ධපූජායිදං ඵලං.
6419. තිංසකප්පසහස්සම්හි යං බුද්ධම්හිපූජයිං, දුග්ගතිං නාභිජානාමි බුද්ධපූජායිදං ඵලං.
6420. කිලෙසා ඣාපිතා මය්හං -පෙ- විහරාමි අනාසවො.
6421. ස්වාගතං වත මෙ ආසි -පෙ- කතං බුද්ධස්ස සාසනං.
6422. පටිසම්භිදා චතස්සො ච -පෙ- කතං බුද්ධස්ස සාසනං.
ඉත්ථං සුදං ආයස්මා උත්තරො ථෙරො ඉමා ගාථායො අභාසිත්ථාති.
උත්තරථෙරස්සාපදානං ඡට්ඨං.
557. අපරඋත්තරත්ථෙරාපදානං
6423. නිබ්බුතෙ ලොකනාථම්හි සිද්ධත්ථෙ ලොකනායකෙ, මම ඤාතී සමානෙත්වා ධාතුපූජං අකාස’හං.
6424. චතුනවුතිතො කප්පෙ යං ධාතුම්හිපූජයිං, දුග්ගතිං නාභිජානාමි ධාතුපූජායිදං ඵලං.
6425. කිලෙසා ඣාපිතා මය්හං -පෙ- විහරාමි අනාසවො.
6426. ස්වාගතං වත මෙ ආසි -පෙ- කතං බුද්ධස්ස සාසනං.
6427. පටිසම්භිදා චතස්සො ච -පෙ- කතං බුද්ධස්ස සාසනං.
ඉත්ථං සුදං ආයස්මා අපර උත්තරත්ථෙරො ඉමා ගාථායො අභාසිත්ථාති.
අපරස්ස උත්තරත්ථෙරස්සාපදානං සත්තමං.
558. භද්දජීත්ථෙරාපදානං
6428. ඔගය්හ යං පොක්ඛරණිං නානාකුඤ්ජරසෙවිතං, උද්ධරාමි භිසං තත්ථ ඝාසහෙතු අහං තදා.
6429. භගවා තම්හිං{1} සමයෙ පදුමුත්තරසව්හයො, රත්තම්බරධරො බුද්ධො ගච්ඡතෙ අනිලඤ්ජසෙ.
6430. ධුනන්තො පංසුකූලානි සද්දං අස්සො’හං තදා, උද්ධං නිජ්ඣායමානො’හං අද්දසං ලොකනායකං.
6431. නත්ථෙව ඨිතකො සන්තො ආයාචිං ලොකනායකං, “මධුංභිසෙහි සහිතං ඛීරං සප්පිං මුලාලිකං, පතිගණ්හාතු{2} මෙ බුද්ධො අනුකම්පාය චක්ඛුමා.”
6432. තතො කාරුණිකො සත්ථා ඔරොහිත්වා මහායසො, පතිගණ්හී{3} මම භික්ඛං අනුකම්පාය චක්ඛුමා, පටිග්ගහෙත්වා සම්බුද්ධො අකා මෙ අනුමොදනං.
6433. “සුඛී හොතු මහාපුඤ්ඤ ගති තුය්හං සමිජ්ඣතු, ඉමිනා භිසදානෙන ලභස්සු විපුලං සුඛං”.
6434. ඉදං වත්වාන සම්බුද්ධො ජලජුත්තමනාමකො, භික්ඛමාදාය සම්බුද්ධො ආකාසෙනා‘ගමා ජිනො.
6435. තතො භිසං ගහෙත්වාන ආගඤ්ජිං{4} මම අස්සමං, භිසං රුක්ඛෙ ලග්ගෙත්වාන මම දානං අනුස්සරිං.
6436. මහාවාතො උට්ඨහිත්වා සඤ්චාලෙසි වනං තදා, ආකාසො අභිනාදිත්ථ අසනී ච ඵලී තදා.
6437. තතො මෙ අසනීපාතො මත්ථකෙ නිපතී තදා, සොහං නිසින්නකො සන්තො තත්ථ කාලකතො{5} අහං.
6438. පුඤ්ඤකම්මෙන සඤ්ඤුත්තො තුසිතං උපපජ්ජ’හං, කලෙවරං මෙ පතිතං දෙවලොකෙ රමා’මහං.
6439. ඡළාසීති{6} සහස්සානි නාරියො සමලඞ්කතා, සායං පාතං උපට්ඨහන්ති භිසදානස්සිදං ඵලං.
6440. මනුස්සයොනිමාගන්ත්වා සුඛිතො හොම’හං තදා, භොගෙ{1} මෙ උනතා නත්ථි භිසදානස්සිදං ඵලං.
6441. අනුකම්පිතකො තෙන දෙවදෙවෙන තාදිනා, සබ්බාසවාපරික්ඛීණා{2} නත්ථිදානි පුනබ්භවො.
6442. සතසහස්සීතො කප්පෙ යං භිසං අදදිං තදා, දුග්ගතිං නාභිජානාමි භිසදානදස්සිං ඵලං.
6443. කිලෙසා ඣාපිතා මය්හං -පෙ- විහරාමි අනාසවො.
6444. ස්වාගතං වත මෙ ආසි -පෙ- කතං බුද්ධස්ස සාසනං.
6445. පටිසම්භිදා චතස්සො ච -පෙ- කතං බුද්ධස්ස සාසනං.
ඉත්ථං සුදං ආයස්මා භද්දජිත්ථෙරො ඉමා ගාථායො අභාසිත්ථාති.
භද්දජිත්ථෙරස්සාපදානං අට්ඨමං.
559. සීවකත්ථෙරාපදානං
6446. එසනාය චරන්තස්ස විපස්සිස්ස මහෙසිනො, රිත්තකං පත්තං දිස්වාන කුම්මාසං පූරයිං අහං.
6447. එකනවුතිතො කප්පෙ යං භික්ඛමදදිං තදා, දුග්ගතිං නාභිජානාමි කුම්මාසස්ස ඉදං ඵලං.
6448. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
6449. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
6450. පටිසම්භිදා චතස්සො ච විමොක්ඛා පි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සීවකත්ථෙරො ඉමා ගාථායො අභාසිත්ථාති.