6288. වනාලයං භාවනීයං කස්සපං ධූතවාදකං{4}, දිස්වා සුත්වා ජිනුප්පාදං උපෙසිං නරසාරථිං.
6289. සො මෙ ධම්මමදෙසෙසි සබ්බත්ථං සම්පකාසයං, තතොහං පබ්බජිත්වාන වනමෙව පුනාගමිං{5}.
6290. තත්ථාප්පමත්තො{6} විහරං ඡළභිඤ්ඤා අඵස්සයිං{7}, අහො සුලද්ධලාභොම්හි සුමිත්තෙනානුකම්පිතො.
6291. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
6292. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
6293. පටිසම්භිදා චතස්සො ච විමොක්ඛා පි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා වනවච්ඡො ථෙරො ඉමා ගාථායො අභාසිත්ථාති.
වනවච්ඡත්ථෙරස්ස අපදානං නවමං.
550. චූළසුගන්ධත්ථෙරාපදානං
6294. ඉමම්හි භද්දකෙ කප්පෙ බ්රහ්මබන්ධු මහායසො, කස්සපො නාම නාමෙන{1} උප්පජ්ජි වදතං වරො.
6295. අනුව්යඤ්ජනසම්පන්නො බත්තිංසවරලක්ඛණො{2}, බ්යාමප්පභාපරිවුතො රංසිජාලසමොත්ථතො{3}.
6296. අස්සාසෙතා යථා චන්දො සුරියොව පභඞ්කරො, නිබ්බාපෙතා යථා මෙඝො සාගරොව ගුණාකරො.
6297. ධරණීරිව සීලෙන හිමවාව සමාධිනා, ආකාසො විය පඤ්ඤාය අසඞ්ගො අනිලො යථා.
6298. තදාහං බාරාණසියං උපපන්නො මහාකුලෙ, පහූතධනධඤ්ඤස්මිං නානාරතනසඤ්චයෙ.
6299. මහතා පරිවාරෙන නිසින්නං ලොකනායකං, උපෙච්ච ධම්මමස්සොසිං අමතංව මනොහරං.
6300. බත්තිංසලක්ඛණධරො{4} සනක්ඛත්තොව චන්දිමා, අනුව්යඤ්ජනසම්පන්නො සාලරාජාව ඵුල්ලිතො.
6301. රංසිජාලපරික්ඛිත්තො දිත්තොව කනකාචලො, බ්යාමප්පභාපරිවුතො සරස්මීව දිවාකරො.
6302. සොණ්ණානනො ජිනවරො සමණීව{5} සිලුච්චයො, කරුණාපුණ්ණහදයො ගුණෙන විය සාගරො.
6303. ලොකවිස්සුතකිත්තී ච සිනෙරූව නගුත්තමො, යසසා විත්ථතො වීරො ආකාසසදිසො මුනි.
6304. අසඞ්ගචිත්තො සබ්බත්ථ අනිලො විය නායකො, පතිට්ඨා සබ්බභූතානං මහීව මුනි සත්තමො.
6305. අනුපලිත්තො ලොකෙන තොයෙන පදුමං යථා, කුවාදගච්ඡදහනො අග්ගික්ඛන්ධොව සොභති{6}.
6306. අගදො විය සබ්බත්ථ කිලෙසවිසනාසකො, ගන්ධමාදනසෙලොව ගුණගන්ධවිභුසිතො.
6307. ගුණානං ආකරො වීරො රතනානංව සාගරො, සින්ධූව වනරාජීනං කිලෙසමලහාරකො.
6308. විජයීව මහායොධො මාරසෙනප්පමද්දතො{1}, චක්කවත්තීව සො රාජා බොජ්ඣඞ්ගරතනිස්සරො.
6309. මහාභිසක්කසඞ්කාසො දොසව්යාධිතිකිච්ඡකො, සල්ලකත්තො යථා සෙට්ඨො{2} දිට්ඨිගණ්ඩවිඵාලකො.
6310. සො තදා ලොකපජ්ජොතො සනරාමරසක්කතො, පරිසාසු නරාදිච්චො ධම්මං දෙසයතෙ ජිනො.
6311. දානං දත්වා මහාභොගො සීලෙන සුගතූපගො, භාවනාය ච නිබ්බාති ඉච්චෙවමනුසාසථ.
6312. දෙසනං තං මහස්සාදං ආදිමජ්ඣන්තසොභනං, සුණන්ති පරිසා සබ්බා අමතංව මහාරසං.
6313. සුත්වා සුමධුරං ධම්මං පසන්නො ජිනසාසනෙ, සුගතං සරණං ගන්ත්වා යාවජීවං නමස්සහං.
6314. මුනිනො ගන්ධකුටියා ඔපුඤ්ඡෙසිං{3} තදා මහිං, චතුජ්ජාතෙන ගන්ධෙන මාසෙ අට්ඨදිනෙස්වහං.
6315. පණිධාය සුගන්ධත්තං සරීරස්ස දුගන්ධිනො{4}, තදා ජිනො වියාකාසි සුගන්ධතනුලාභිතං.
6316. යො යං ගන්ධකුටිභූමිං ගන්ධෙනොපුඤ්ඡතෙ’සකිං, තෙන කම්මවිපාකෙන උපපන්නො තහිං තහිං.
6317. සුගන්ධදෙහො සබ්බත්ථ භවිස්සති අයං නරො, ගුණගන්ධයුතො{5} හුත්වා නිබ්බායිස්සතනාසවො.
6318. තෙන කම්මෙන සුකතෙන චෙතනාපණිධීහි ච, ජහිත්වා මානුසං දෙහං තාවතිංසමගච්ඡහං.
6319. පච්ඡිමෙ ච භවෙ දානි ජාතො විප්පකුලෙ අහං, ගබ්භෙ මෙ වසතො මාතා දෙහෙනාසි සුගන්ධිකා{6}.
6320. යදා ච මාතුකුච්ඡිම්හා නික්ඛමාමි තදා පුරී{7}, සාවත්ථි සබ්බගන්ධෙහි වාසිතා විය වායථ.
6321. පුප්ඵවස්සං ච සුරභි දිබ්බගන්ධමනොරමං, ධූපානි ච මහග්ඝානි උපවායිංසු තාවදෙ.
6322. දෙවා ච සබ්බගන්ධෙහි ධුපපුප්ඵෙහි තං ඝරං, වාසයිංසු සුගන්ධෙන යස්මිං ජාතො අහං ඝරෙ.
6323. යදා ච තරුණො භද්දො පඨමෙ යොබ්බනෙ ඨිතො, තදා සෙලං{1} සපරිසං විනෙත්වා නරසාරථි-
6324. තෙහි සබ්බෙහි සහිතො{2} සාවත්ථිපුරමාගතො, තදා බුද්ධානුභාවං තං දිස්වා පබ්බජිතො අහං.
6325. සීලං සමාධිං පඤ්ඤඤ්ච{3} විමුත්තිඤ්ච අනුත්තරං, භාවෙත්වා චතුරො ධම්මෙ පාපුණිං ආසවක්ඛයං.
6326. යදා පබ්බජිතො චාහං යදා ච අරහා අහුං, නිබ්බායිස්සං යදා චාහං ගන්ධවස්සො තදා අහු.
6327. සරීරගන්ධො ච සදා’තිසෙති මෙ මහාරහං චන්දනවම්පකුප්පලං, තථෙව ගන්ධෙ ඉතරෙ ච සබ්බසො පසය්හ වායාමි ගතො තහිං{4} තහිං.
6328. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
6329. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
6330. පටිසම්භිදා චතස්සො ච විමොක්ඛා පි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනන්ති.
ඉත්ථං සුදං ආයස්මා චූළසුගන්ධො ථෙරො ඉමා ගාථායො අභාසිත්ථාති.
චූළසුගන්ධත්ථෙරස්ස අපදානං දසමං.
භද්දියවග්ගො පඤ්චපඤ්ඤාසමො.
උද්දානං:
භද්දියො රෙවතො ථෙරො මහාලාභි ච සීවලී වඞ්ගීසො නන්දකො චෙව කාළුදායි තථාභයො ලොමසො වනවච්ඡො ච සුගන්ධො දසමො කතො{5}. තීණි ගාථාසතා තත්ථ සොළස{6} ච තදුත්තරිං.
අථ වග්ගුද්දානං:
කණිකාරව්හයො වග්ගො ඵලදො තිණදායකො, කච්චානො භද්දියො වග්ගො ගාථායො ගණිතා චිමා. නවගාථා සතානීහ චතුරාසීති එව ච. සපඤ්ඤාසා පඤ්චසතා{7} අපදානා පකාසිතා. සහ උද්දානගාථාහි ඡසහස්සනි හොන්තිමා, ද්වෙ සතානි ච ගාථානං අට්ඨාරස තදුත්තරිං.
56. යසවග්ගො
551. යසත්ථෙරාපදානං
6331. මහාසමුද්දං ඔගය්හ{1} භවනං මෙ සුනිම්මිතං, සුනිම්මිතා පොක්ඛරණී චක්කවාකූපකූජිතා.
6332. මන්දාලකෙහි{2} සඤ්ඡන්නා පදුමුප්පලකෙහි ච, නදී ච සන්දතෙ තත්ථ සුපතිත්ථා මනොරමා.
6333. මච්ඡකච්ඡපසඤ්ඡන්නා නානාදිජසමාකුලා{3}, මයූරකොඤ්චාභිරුදා කොකිලාදිභි{4} වග්ගුහි.
6334. පාරෙවතා රවිහංසා චක්කවාකා නදීචරා, දින්දිභා{5} සාළිකා චෙත්ථ පම්පකා ජීවංජීවකා.
6335. හංසා කොඤ්චාභිනදිතා කොසියා පිඞ්ගලා බහූ, සත්තරතනසම්පන්නා මණිමුත්තිකවාලිකා{6}.
6336. සබ්බෙ සොණ්ණමයා රුක්ඛා නානාගන්ධසමෙරිතා, උජ්ජොතෙන්ති දිවාරත්තිං භවනං සබ්බකාලිකං.
6337. සට්ඨිතුරියසහස්සානි සායං පාතො පවජ්ජරෙ, සොළසිත්ථිසහස්සානි පරිවාරෙන්ති මං සදා.
6338. අභිනික්ඛම්ම භවනා සුමෙධං ලොකනායකං, පසන්නචිත්තො සුමනො වන්දයිං තං මහායසං.
6339. සම්බුද්ධං අභිවාදෙත්වා සසඞ්ඝං තං නිමන්තයිං, අධිවාසෙසි සො ධීරො සුමෙධො ලොකනායකො.
6340. මම ධම්මකථං කත්වා උය්යොජෙසි මහාමුනි, සම්බුද්ධං අභිවාදෙත්වා භවනං මෙ උපාගමිං.
6341. ආමන්තයිං පරිජනං සබ්බෙ සන්නිපතුං තදා, පුබ්බන්හසමයං බුද්ධො භවනං ආගමිස්සති.
6342. ලාභා අම්හං සුලද්ධා නො යෙ වසාම තවන්තිකෙ, මයම්පි බුද්ධසෙට්ඨස්ස පූජයිස්සාම සත්ථුනො.
6343. අන්නං පානං පට්ඨපෙත්වා කාලං ආරොචයිං අහං, වසීසතසහස්සෙහි උපෙසි ලොකනායකො.
6344. පඤ්චඞ්ගිකෙහි තුරියෙහි පච්චුග්ගමමකාසහං, සබ්බසොණ්ණමයෙ පීඨෙ නිසීදි පුරිසුත්තමො.
6345. උපරිච්ඡදනං ආසි සබ්බසොණ්ණමයං තදා, වීජනියො පවායන්ති භික්ඛුසඞ්ඝං අනුත්තරං.
6346. පහූතෙනන්නපානෙන{1} භික්ඛුසඞ්ඝං අතප්පයිං, පච්චෙකදුස්සයුගලෙ භික්ඛුසඞ්ඝස්සදාහං.
6347. යං වදන්ති සුමෙධොති{2} ආහුතීනං පටිග්ගහො, භික්ඛු සඞ්ඝෙ නිසීදිත්වා ඉමා ගාථා අභාසථ:
6348. “යො මෙ අන්නෙන පානෙන සබ්බෙ ඉමෙ ච තප්පයි, තමහං කිත්තයිස්සාමි සුණාථ මම භාසතො:
6349. අට්ඨාරසෙ කප්පසතෙ දෙවලොකෙ රමිස්සති, සහස්සක්ඛත්තුං රාජායං චක්කවත්තී භවිස්සති.
6350. උපගච්ඡති යං යොනිං දෙවත්තං අථමානුසං, සබ්බසොණ්ණමයං තස්ස ඡදනං ධාරයිස්සති.
6351. තිංසකප්පසහස්සම්හි ඔක්කාකකුලසම්භවො, ගොතමො නාම නාමෙන{3} සත්ථා ලොකෙ භවිස්සති.
6352. තස්ස ධම්මෙසු දායාදො ඔරසො ධම්මනිම්මිතො, සබ්බාසවෙ පරිඤ්ඤාය නිබ්බායිස්සතනාසවො.
6353. භික්ඛු සඞ්ඝෙ නිසීදිත්වා සීහනාදං නදිස්සති, චිතකෙ ඡත්තං ධාරෙන්ති හෙට්ඨා ඡත්තම්හි ඩය්හථ.”
6354. සාමඤ්ඤං මෙ අනුප්පත්තං කිලෙසා ඣාපිතා මයා, මණ්ඩපෙ රුක්ඛමූලෙ වා සන්තාසො මෙ න විජ්ජති.
6355. තිංස කප්පසහස්සම්හි යං දානමදදිං තදා, දුග්ගතිං නාභාජානාමි සබ්බදානස්සිදං ඵලං.
6356. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
6357. ස්වාගතං වත මෙ ආසි බුද්ධසෙට්ඨස්ස{4} සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
6358. පටිසම්භිදා චතස්සො ච විමොක්ඛා පි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා යසො ථෙරො ඉමා ගාථායො අභාසිත්ථාති.
යසත්ථෙරස්සාපදානං පඨමං.
552. නදීකස්සපත්ථෙරාපදානං
6359. පදුමුත්තරස්ස භගවතො ලොකජෙට්ඨස්ස තාදිනො පිණ්ඩචාරං චරන්තස්ස වාරතො උත්තමං යසං, අග්ගඵලං ගහෙත්වාන අදාසිං සත්ථුනො අහං.
6360. තෙන කම්මෙන දෙවින්දො ලොකජෙට්ඨො නරාසභො, සම්පත්තොම්හි අචලං ඨානං හිත්වා ජයපරාජයං.
6361. සතසහස්සිතො කප්පෙ යං ඵලං අදදිං තදා, දුග්ගතිං නාභිජානාමි අග්ගදානස්සිදං ඵලං.
6362. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
6363. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
6364. පටිසම්භිදා චතස්සො ච විමොක්ඛා පි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා නදීකස්සපො ථෙරො ඉමා ගාථායො අභාසිත්ථාති.
නදීකස්සපත්ථෙරාපදානං දුතියං.
553. ගයාකස්සපත්ථෙරාපදානං
6365. අජිනචම්මවත්ථොහං{1} ඛාරිභාරධරො තදා, ඛාරිකං හාරයිත්වාන කොලං අහාසිමස්සමං.
6366. භගවා තස්මිං{2} සමයෙ එකො අදුතියො ජිනො, මමස්සමං උපාගඤ්ජි{3} ජොතෙන්තො සබ්බකාලිකං.
6367. සකං චිත්තං පසාදෙත්වා අභිවාදෙත්වාන සුබ්බතං, උභොහත්ථෙහි පග්ගය්හ කොලං බුද්ධස්ස’දාස’හං.
6368. එකතිංසෙ ඉතො කප්පෙ යං ඵලං අදදිං තදා, දුග්ගතිං නාභිජානාමි කොලදානස්සිදං ඵලං.
6369. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.