5926. තස්ස ධම්මෙසු දායාදො ඔරසො ධම්මනිම්මිතො, කස්සපො නාම නාමෙන{5} හෙස්සති සත්ථු සාවකො.
5927. ඉතෙ ද්වෙනවුතෙ කප්පෙ අහු සත්ථා අනුත්තරො, අනූපමො අසදිසො ඵුස්සො ලොකග්ගනායකො.
5928. සො ච සබ්බං තමං හන්ත්වා විජටෙත්වා මහාජටං, වස්සතෙ අමතං වුට්ඨිං තප්පයන්තො සදෙවකං.
5929. තදාහි හි බාරාණසියං රාජාපච්චා අහුම්හසෙ, භාතරොම්හ තයො සබ්බෙ සංවිස්සත්ථා ච{6} රාජිනො.
5930. වීරඞ්ගරූපා බලිනො සඞ්ගාමෙ අපරාජිතා, තදා කුපිතපච්චන්තො අම්හෙ ආහ මහීපති.
5931. එථ ගන්ත්වාන පච්චන්තං සොධෙත්වා අටවීබලං, ඛෙමං මෙ විජිතං කත්වා පුනරෙථා ති{1} භාසථ.
5932. තතො මයං අවොචුම්හ යදි දෙය්යාසි නායකං, උපට්ඨානාය අම්හාකං සාධයිස්සාම වො තතො.
5933. තතො මයං ලද්ධවරා භූමිපාලෙන පෙසිතා, නික්ඛිත්තසත්ථං පච්චන්තං කත්වා පුනරුපෙච්ච තං.
5934. යාචිත්වා සත්ථුපට්ඨානං රාජානං ලොකනායකං, මුනිවීරං ලභිත්වාන යාවජීවං යජීම්හ තං.
5935. මහග්ඝානි ච වත්ථානි පණීතානි රසානි ච, සෙනාසනානි රම්මානි භෙසජ්ජානි හිතානි ච.
5936. දත්වා සසංඝස්ස මුනෙ{2} ධම්මෙනුප්පාදිතානි නො, සීලවන්තො කාරුණිකා භාවනායුත්තමානසා.
5937. සදා{3} පරිචරිත්වාන මෙත්තචිත්තෙන නායකං, නිබ්බුතෙ තම්හි ලොකග්ගෙ පූජං කත්වා යථාබලං.
5938. තතො චුතා සන්තුසිතං ගතා තත්ථ මහාසුඛං, අනුභූතා මයං සබ්බෙ බුද්ධපූජායිදං ඵලං.
5939. මායාකාරො යථා රඞ්ගෙ{4} දස්සෙති විකතී බහු,{5} තථා භවෙ භමන්තොහං විදෙහාධිපතී අහුං.
5940. ගුණාචෙලස්ස වාක්යෙන මිච්ඡාදිට්ඨීගතාසයො, නරකම්මග්ගමාරූළ්හො රුජාය{6} මම ධීතුයා.
5941. ඔවාදං නාදියිත්වාන බ්රහ්මුනා නාරදෙනහං, බහුධා සාසිතො{7} සන්තො දිට්ඨං හිත්වාන පාපිකං.
5942. පූරයිත්වා විසෙසෙන දසකම්මපථානහං, හිත්වාන දෙහමගමිං සග්ගං සභවනං යථා.
5943. පච්ඡිමභවෙ සම්පත්තෙ{8} බ්රහ්මබන්ධු අහොසහං, බාරාණසියං ඵිතායං ජාතො විප්පමහාකුලෙ.
5944. මච්චුව්යාධිජරාභීතො ජහිත්වාන මහාධනං,{9} නිබ්බානං පදමෙසන්තො ජටිලෙසු පරිබ්බජිං.
5945. තදා ද්වෙ භාතරො මය්හං පබ්බජිංසු මයා සහ, උරුවෙලායං මාපෙත්වා අස්සමං නිවසිං අහං.
5946. කස්සපො නාම ගොත්තෙන උරුවෙලනිවාසිකො{1}, තතො මෙ ආසි පඤ්ඤත්ති උරුවෙලකස්සපො ඉති.
5947. නාදීසකාසෙ භාතා මෙ නාදීකස්සපඅව්හයො, ආසී සකාසනාමෙන ගයාය ගයාකස්සපො.{2}
5948. ද්වෙ සතානි කනිට්ඨස්ස තීණි මජ්ඣස්ස භාතුනො, මම පඤ්චසතානූනා සිස්සා සබ්බෙ මමානුගා.
5949. තදා උපෙච්ච මං බුද්ධො කත්වා නානාවිධනි මෙ,{3} පාටිහීරානි ලොකග්ගො විනෙසි නරසාරථි.
5950. සහස්සපරිවාරෙන අහොසිං එහිභික්ඛුකො, තෙහෙව සහ සබ්බෙහි අරහත්තමපාපුණිං.
5951. තෙ චෙවඤ්ඤෙ ච බහවො සිස්සා මං පරිවාරයුං, සාසිතුං ව සමත්ථොහං තතො මං ඉසිසත්තමො.
5952. මහාපරිසභාවස්මිං එතදග්ගෙ ඨපෙසි මං, අහො බුද්ධෙ කතං කාරං සඵලං මෙ අජායථ.
5953. කිලෙසා ඣාපිතා මය්හං භවා සබ්බෙ සමූහතා, නාගො ව බන්ධනං ඡෙත්වා විහරාමි අනාසවො.
5954. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්සං සාසනං.
5955. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා උරුවෙලකස්සපො ථෙරො ඉමං ගාථායො අභාසිත්ථාති
උරුවෙලකස්සපත්ථෙරස්ස අපදානං අට්ඨමං.
539. රාධත්ථෙරාපදානං
5956. පදුමුත්තරො නාම ජිනො සබ්බලොකවිදූ මුනි, ඉතො සතසහස්සම්හි කප්පෙ උප්පජ්ජි චක්ඛුමා.
5957. ඔවාදකො විඤ්ඤාපකො තාරකො සබ්බපාණිනං, දෙසනාකුසලො බුද්ධො තාරෙසි ජනතං බහුං.
5958. අනුකම්පකො කාරුණිකො හිතෙසී සබ්බපාණිනං, සම්පත්තෙ තිත්ථියෙ සබ්බෙ පඤ්චසීලෙ පතිට්ඨපි.
5959. එවං නිරාකුලං ආසි සුඤ්ඤකං{1} තිත්ථියෙහි ච, විචිත්තං අරහන්තෙහි වසීභූතෙහි තාදිහි.
5960. රතනානට්ඨපඤ්ඤාසං උග්ගතො සො මහාමුනි, කඤ්චනග්ඝියසඞ්කාසො බත්තිංසවරලක්ඛණො.
5961. වස්සසතසහස්සානි ආයු විජ්ජති තාවදෙ, තාවතා තිට්ඨමානො සො තාරෙසි ජනතං බහුං.
5962. තදාහං හංසවතියං බ්රාහ්මණො මන්තපාරගූ, උපෙච්ච තං නරවරං අස්සොසිං ධම්මදෙසනං.
5963. පඤ්ඤාපෙන්තං මහාවීරං පරිසාසු විසාරදං, පටිභාණෙය්යකං භික්ඛුං එතදග්ගෙ විනායකං.
5964. තදාහං කාරං කත්වාන සසඞ්ඝෙ ලොකනායකෙ, නිපච්ච සිරසා පාදෙ තං ඨානමභිපත්ථයිං.
5965. තතො මං භගවා ආහ සිඞ්ගීනික්ඛසමප්පභො, සරෙන රජනීයෙන කිලෙසමලහාරිනා.
5966. “සුඛී භවස්සු දීඝායු සිජ්ඣතං{2} පණිධී තව, සසඞ්ඝෙ මෙ කතං කාරං අතීව විපුලං තයා.
5967. සතසහස්සෙ ඉතො කප්පෙ ඔක්කාකකුලසම්භවො, ගොතමො නාම නාමෙන සත්ථා ලොකෙ භවිස්සති.
5968. තස්ස ධම්මෙසු දායාදො ඔරසො ධම්මනිම්මිතො, රාධොති නාමධෙය්යෙන හෙස්සති සත්ථුසාවකො.
5969. ස තෙ හෙතුගුණෙ තුට්ඨො සක්යපුත්තො නරාසභො, පටිභාණෙය්යකානග්ගං පඤ්ඤාපෙස්සති නායකො.”
5970. තං සුත්වා මුදිතො හුත්වා යාවජීවං තදා ජිනං, මෙත්තචිත්තො පරිචරිං සතො පඤ්ඤාසමාහිතො.
5971. තෙන කම්මෙන සුකතෙන චෙතනාපණිධීහි ච, ජහිත්වා මානුසං දෙහං තාවතිංසමගච්ඡහං.
5972. සතානං තීණික්ඛත්තුං ච දෙවරජ්ජමකාරයිං, සතානං පඤ්චක්ඛත්තුං ච චක්කවත්තී අහොසහං.
5973. පදෙසරජ්ජං විපුලං ගණනාතො අසංඛියං, සබ්බත්ථ සුඛිතො ආසිං තස්ස කම්මස්ස වාහසා.
5974. පච්ඡිමභවෙ සම්පත්තෙ ගිරිබ්බජ්ජපුරුත්තමෙ, ජාතො විප්පකුලෙ’නිද්ධෙ විකලච්ඡාදනාසනෙ,
5975. කටච්ඡුභික්ඛා පාදාසිං සාරිපුත්තස්ස තාදිනො, යදා ජිණ්ණො ච වුද්ධො ච තදා’රාමමුපාගමිං.
5976. පබ්බාජෙන්ති න මං කෙචි{1} ජිණ්ණං දුබ්බලථාමකං, තෙන දීනො විවණ්ණඞ්ගො සොකී{2} චාසිං තදා අහං.
5977. දිස්වා මහාකාරුණිකො මමාහ සො මහාමුනි{3}, කිමත්ථං පුත්ත සොකට්ටො බ්රූහි තෙ චිත්තජං රුජං.
5978. පබ්බජ්ජං න ලභෙ විර ස්වාක්ඛාතෙ තව සාසනෙ, තෙන සොකෙන දීනොස්මි සරණං හොහි නායක.
5979. තදා භික්ඛු සමානෙත්වා ආපුච්ඡි මුනි සත්තමො, ඉමස්ස අධිකාරං යෙ සරන්ති ව්යාහරන්තු තෙ.
5980. සාරිපුත්තො තදාවොච කාරමස්ස සරාමහං, කටච්ඡුභික්ඛං දාපෙසි පිණ්ඩාය චාරතො මම.
5981. සාධු සාධු කතඤ්ඤූසි සාරිපුත්ත ඉමං තුවං, පබ්බාජෙහි දිජං වුද්ධං හෙස්සතාජානියො අහං.
5982. තතො අලත්ථං පබ්බජ්ජං කම්මවාචෙපසම්පදං, න චිරෙනෙව කාලෙන පාපුණිං ආසවක්ඛයං.
5983. සක්කච්චං මුනිනො වාක්යං සුණොමි මුදිතො යතො, පටිභානෙය්යකානග්ගං තතො මං ඨපයී ජිනො.
5984. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5985. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්සං සාසනං.
5986. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා රාධො ථෙරො ඉමං ගාථායො අභාසිත්ථාති
රාධත්ථෙරස්ස අපදානං නවමං.
540. මොඝරාජත්ථෙරාපදානං{*}
5987. පදුමුත්තරො නාම ජිනො සබ්බලොකවිදූ මුනි, ඉතො සතසහස්සම්හි කප්පෙ උප්පජ්ජි චක්ඛුමා.
5988. ඔවාදකො විඤ්ඤාපකො තාරකො සබ්බපාණිනං, දෙසනාකුසලො බුද්ධො තාරෙසි ජනතං බහුං.
5989. අනුකම්පකො කාරුණිකො හිතෙසී සබ්බපාණිනං, සම්පත්තෙ තිත්ථියෙ සබ්බෙ පඤ්චසීලෙ පතිට්ඨපි.
5990. එවං නිරාකුලං ආසි සුඤ්ඤකං තිත්ථියෙහි ච, විචිත්තං අරහන්තෙහි වසීභූතෙහි තාදිහි.
5991. රතනානට්ඨපඤ්ඤාසං උග්ගතො සො මහාමුනි, කඤ්චනග්ඝිය සඞ්කාසො බත්තිංසවරලක්ඛණො.{1}
5992. වස්සසතසහස්සානි ආයු විජ්ජති තාවදෙ, තාවතා තිට්ඨමානො සො තාරෙසි ජනතං බහුං.
5993. තදාහං හංසවතියං කුලෙ අඤ්ඤතරෙ අහුං, පරකම්මායනෙ යුත්තො නත්ථි මෙ කිඤ්චි සංධනං.
5994. පටික්කමනසාලායං වසන්තො කතභුමියං, අග්ගිමුජ්ජාලයිං නත්ථි දළ්හං කණ්හාසි සා{2} මහි.
5995. තදා පරිසතිං නාථො චතුසච්චප්පකාසකො, සාවකං සම්පකිත්තෙසි ලුක්ඛචිවරධාරකං.
5996. තස්ස තම්හි ගුණෙ තුට්ඨො පණිපච්ච{1} තථාගතං, ලුඛචීවරධාරග්ගං පත්ථයිං ඨානමුත්තමං.
5997. තදා අවොච භගවා සාවකෙ පදුමුත්තරො, පස්සථෙතං පුරිකසං කුචෙලං තනුදෙහකං.
5998. පීතිප්පසන්නවදනං සද්ධාධනසමන්විතං, උද්ධග්ගතනුජං හට්ඨං අචලං සාලපිණ්ඩිකං{2}.
5999. එසො පත්ථෙති තං ඨානං සච්චසෙනස්ස භික්ඛුනො. ලුඛචීවරධාරිස්ස තස්ස වණ්ණගතාසයො.{3}
6000. තං සුත්වා මුදිතො හුත්වා නිපච්ච සිරසා ජිනං, යාවජීවං සුභං කම්මං කරිත්වා ජිනසාසනෙ.
6001. තෙන කම්මෙන සුකතෙන චෙතනාපණිධීහි ච, ජහිත්වා මානුසං දෙහං තාවතිංසූපගො අහං.
6002. පටික්කමනසාලායං භූමිදාහකකම්මුනා, සමසහස්සං නිරයෙ අදය්හං වෙදනට්ටිතො.
6003. තෙන කම්මාවසෙසෙන පඤ්චජාතිසතානභං, මනුස්සො කුලජො හුත්වා ජාතියා ලක්ඛණඞ්කිතො.
6004. පඤ්චජාතිසතානෙව කුට්ඨරොගසමප්පිතො, මහාදුක්ඛං අනුභවිං තස්ස කම්මස්ස වාහසා.
6005. ඉමස්මිං භද්දකෙ කප්පෙ උපරිට්ඨං යසස්සිනං, පිණ්ඩපාතෙන තප්පෙසිං පසන්නමානසො අහං.
6006. තෙන කම්මවිසෙසෙන චෙතනාපණිධීහි ච, ජහිත්වා මානුසං දෙහං තාවතිංසමගච්ඡහං.
6007. මච්ඡිමභවෙ සම්පත්තෙ අජායිං ඛත්තියෙ කුලෙ, පිතුනො අච්චයෙනාහං මහාරජ්ජසමප්පිතො.
6008. කුට්ඨරොගාභිභුතොහං න රතිං න සුඛං ලභෙ, මොඝං රජ්ජසුඛං{4} යස්මා මොඝරාජා තතො අහං.
6009. කායස්ස දොසං දිස්වාන පබ්බජිං අනගාරියං, බාවරිස්ස දිජග්ගස්ස සිස්සත්තං අජ්ඣුපාගමිං.
6010. මහතා පරිවාරෙන උපෙච්ච නරනායකං, අපුච්ඡිං නිපුණං පඤ්හං තං වීරං වාදිසූදනං.
6011. අයං ලොකො පරො ලොකො බ්රහ්මලොකො සදෙවකො, දිට්ඨිං{1} තෙ නාභිජානාති{2} ගොතමස්ස යසස්සිනො.
6012. එවාභික්කන්තදස්සාවිං අත්ථි පඤ්හෙන ආගමං, කථං ලොකං අවෙක්ඛන්තං මච්චුරාජා න පස්සති.
6013. සුඤ්ඤතො ලොකං අවෙක්ඛස්සු මොඝරාජ සදා සතො, අත්තානුදිට්ඨිං ඌහච්ච එවං මච්චුතරො සියා.
6014. එවං ලොකං අවෙක්ඛන්තං මච්චුරාජා න පස්සති, ඉති මං අභණි බුද්ධො සබ්බරොගතිකිච්ඡකො,
6015. සහ ගාථාවසානෙන කෙසමස්සුවිවජ්ජිතො, කාසාවවත්ථවසනො ආසිං භික්ඛු තථාරහා.
6016. සංඝිකෙසු විහාරෙසු න වසිං රොගපිළිතො, මා විහාරො පදුස්සීති වාතරොගෙහි පීළිතො.{3}
6017. සංසාරකූටා ආහිත්වා{4} සුසානා රථාකාහි ච, තතො සංඝාටිකං කත්වා ධාරයිං ලුඛචීවරං.
6018. මහාභිසක්කො තස්මිං මෙ ගුණෙ තුට්ඨො විනායකො, ලුඛචීවරධාරීනං එතදග්ගෙ ඨපෙසි මං.
6019. පුඤ්ඤපාපපරික්ඛීණො සබ්බරොගවිවජ්ජිතො, සිඛීව අනුපාදානො නිබ්බායිස්සමනාසවො.