5836. කිලෙසා ඣාපිතා මය්හං භවා සබ්බෙ සමූහතා, නාගො ව බන්ධනං ඡෙත්වා විහරාමි අනාසවො.
5837. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්සං සාසනං.
5838. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කුමාරකස්සපො ථෙරො ඉමං ගාථායො අභාසිත්ථාති
කුමාරකස්සපත්ථෙරස්ස අපදානං පඤ්චමං.
චතුවීසතිමං භාණවාරං.
536. බාහියත්ථෙරාපදානං
5839. ඉතො සතසහස්සම්හි කප්පෙ උප්පජ්ජි නායකො, මහප්පභො තිලොකග්ගො නාමෙන පදුමුත්තරො.
5840. ඛිප්පාභිඤ්ඤස්ස භික්ඛුනො ගුණං කිත්තයතො මුනෙ, සුත්වා උදග්ගචිත්තොහං කාරං කත්වා මහෙසිනො-
5841. දත්වා සත්තාහිකං දානං සසිස්සස්ස මුනෙ අහං, අභිවාදිය සම්බුද්ධං තං ඨානං පත්ථයිං තදා.
5842. තතො මං ව්යාකරී{1} බුද්ධො එතං පස්සථ බ්රාහ්මණං, පතිතං පාදමූලෙ මෙ පසන්නනයනානනං{2}.
5843. හෙමයඤ්ඤොපවිතඞ්ගං අවදාතනනුත්තවං, පලම්බබිම්බතම්බොට්ඨං සිතතිණ්හසමං ද්විජං{3}
5844. ගුණත්ථාමබහුතරං{4} සමුග්ගතතනූරුහං, ගුණොඝායතනීභූතං පීතිසම්ඵුල්ලිතානනං.
5845. එසො පත්ථයතෙ ඨානං ඛිප්පාභිඤ්ඤස්ස භික්ඛුනො, අනාගතෙ මහාවීරො ගොතමො නාම හෙස්සති.
5846. තස්ස ධම්මෙසු දායාදො ඔරසො ධම්මනිම්මිතො, බාහියො නාම නාමෙන හෙස්සති සත්ථුසාවකො.
5847. තදාතිතුට්ඨො{5} වුට්ඨාය යාවජීවං මහාමුනෙ, කාරං කත්වා චුතො සග්ගං අගං සභවනං යථා.
5848. දෙවභූතො මනුස්සො වා සුඛිතො තස්ස කම්මුනො, වාහසා සංසරිත්වාන සම්පත්තිං අනුභොසහං{6}.
5849. පුනො{7} කස්සප වීරස්ස අත්ථමෙන්තම්හි සාසනෙ, ආරුය්හ සෙලසිඛරං යුඤ්ජිත්වා ජිනසාසනං.
5850. විසුද්ධසීලා සප්පඤ්ඤා ජිනසාසනකාරකා, තතො චුතා පඤ්චජනා දෙවලොකං අගම්හසෙ.
5851. තතොහං බාහියො ජාතො භාරුකච්ඡෙ පුරුත්තමෙ, තතො නාවාය පක්ඛන්තො{8} සාගරං අප්පසිද්ධියං.{9}
5852. තතො නාවා අභිජ්ජිත්ථ ගන්ත්වාන කතිපාහකං, තදා භිංසනකෙ{10} ඝොරෙ පතිතො මකරාකරෙ.
5853. තදාහං වායමිත්වාන සන්තරිත්වා මහොදධිං. සුප්පාර{11}පට්ටනවරං සම්පත්තො මන්දමෙධිකො.{12}
5854. දාරුචීරං නිවාසෙත්වා ගාමං පිණ්ඩාය පාවිසිං, තදාහ සො ජනො තුට්ඨො අරහායමිධාගතො.
5855. ඉමං අන්නෙන පානෙන වත්ථෙන සයනෙන ච, භෙසජ්ජෙන ච සක්කත්වා හෙස්සාම සුඛිතා මයං.
5856. පච්චයානං තදා ලාභී තෙහි සක්කතපූජිතො, අරහා’හන්ති සංකප්පං උප්පාදෙසිං අයොනිසො.
5857. තතො මෙ චිත්තමඤ්ඤාය චොදයි පුබ්බදෙවතා, න ත්වං උපායමග්ගඤ්ඤූ කුතො ත්වං අරහං භවෙ.
5858. චොදිතො තාය සංවිග්ගො තදාහං පරිපුච්ඡිසං, කෙ වා එතෙ කුහිං ලොකෙ අරහන්තො නරුත්තමා.
5859. සාවත්ථියං කොසලමන්දිරෙ ජිනො පහූතපඤ්ඤො වරභූරිමෙධසො සො සක්යපුත්තො අරහා අනාසවො දෙසෙති ධම්මං අරහත්තපත්තියා.
5860. තදස්ස සුත්වා වචනං සුපීණිතො තිධිංව ලද්ධා කපණො’තිවිම්හිතො, උදග්ගචිත්තො අරහත්තමුත්තමං{1} සුදුස්සනං දට්ඨුමනන්තගොචරං.
5861. තදා තතො නික්ඛමිතූන සත්වරං{2} කදා ජිනං පස්සාමි විමාලනනං උපෙච්ච රම්මං විජිතව්හයං වනං දිජෙ අපුච්ඡිං කුහිං ලොකනන්දනො.
5862. තතො අවොචුං නරදෙවවන්දිතො පුරං පවිට්ඨො අසනෙසනාසයො{3} සචෙ හි{4} ඛිප්පං මුනිදස්සනුස්සුකො උපෙච්ච වන්දාහි තමග්ගපුග්ගලං.
5863. තතොහං තුවට්ටං ගන්ත්වා සාවත්ථිපුරමුත්තමං, විචරන්තං තමද්දක්ඛිං පිණ්ඩත්ථමපිහාගිධං{5}.
5864. පත්තපාණිං අලොලක්ඛං භාජයන්තං වියාමතං{6}, සිරීනිලයසඞ්කාසං රවිදිත්තිහරානනං.
5865. තං සමෙච්ච නිපච්චාහං ඉදං වචනමබ්රවිං, කුපථෙ විප්පනට්ඨස්ස සරණං හොහි ගොතම.
5866. පාණසන්තාරණත්ථාය පිණ්ඩාය විචරාමහං, න තෙ ධම්මකථාකාලො ඉච්චාහ මුනිසත්තමො.
5867. තදා පුනප්පුනං බුද්ධං ආයාචිං ධම්මලාලසො, සො මෙ ධම්මමදෙසෙසි ගම්භීරං සුඤ්ඤතං පදං.
5868. තස්ස ධම්මං සුණිත්වාන පාපුණිං ආසවක්ඛයං, පරික්ඛීණායුකො සන්තො අහො සත්ථා’නුකම්පකො.
5869. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5870. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්සං සාසනං.
5871. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
5872. එවං ථෙරො වියාකාසි බාහියො දාරුචීරියො, සඞ්කාරකූටෙ පතිතො භූතාවිට්ඨාය ගාවියා.
5873. අත්තනො පුබ්බචරිතං{1} කිත්තයිත්වා මහාමති, පරිනිබ්බායී සො වීරො{2} සාවත්ථියං පුරුත්තමෙ.
5874. නගරා නික්ඛමන්තො තං දිස්වාන ඉසිසත්තමො, දාරුචීරධරං ධීරං බාහියං බාහිතාගමං.
5875. භූමියං පතිතං දන්තං ඉන්දකෙතුංව{3} පාතිතං, ගතායුසං ගතකෙලසං{4} ජිනසාසනකාරකං.
5876. තතො ආමන්තයී සත්ථා සාවකෙ සාසනෙ රතෙ, “ගණ්හථ නෙත්වා{5} ඣාපෙථ තනුං සබ්රහ්මචාරිනො.
5877. ථූපං කරොථ පූජෙථ නිබ්බුතො සො මහාමති, ඛිප්පාභිඤ්ඤානමෙසග්ගො සාවකො මෙ වචොකරො.
5878. සහස්සම්පි චෙ ගාථා අනත්ථපදසංහිතා, එකං ගාථාපදං සෙය්යො යං සුත්වා උපසම්මති.
5879. යත්ථ ආපො ච පඨවී{6} තෙජො වායො න ගාධති, න තත්ථ සුක්කා ජොතන්ති ආදිච්චො නප්පකාසති, න තත්ථ චන්දිමා භාති තමො තත්ථ න විජ්ජති.
5880. යාදා ච අත්තනා වෙදි මුනි මොනෙන බ්රාහ්මණො, අථ රූපා අරූපා ච සුඛදුක්ඛා විමුච්චති. ඉච්චෙවං අභණී නාථො තිලොකසරණො මුනි.
ඉත්ථං සුදං ආයස්මා බාහියො ථෙරො ඉමා ගාථායො අභාසිත්ථාති.
බාහියත්ථෙරස්ස අපදානං ඡට්ඨං.
537. කොට්ඨිතත්ථෙරාපදානං
5881. පදුමුත්තරො නාම ජිනො සබ්බලොකවිදූ මුනි, ඉතො සතසහස්සම්හි කප්පෙ උප්පජ්ජි චක්ඛුමා.
5882. ඔවාදකො විඤ්ඤාපකො තාරකො සබ්බපාණිනං, දෙසනාකුසලො බුද්ධො තාරෙසි ජනතං බහුං.
5883. අනුකම්පකො කාරුණිකො හිතෙසී සබ්බපාණිනං, සම්පත්තෙ තිත්ථියෙ සබ්බෙ පඤ්චසීලෙ පතිට්ඨපි.{1}
5884. එවං නිරාකුලං ආසි සුඤ්ඤකං තිත්ථියෙහි ච, විචිත්තං අරහන්තෙහි වසීභූතෙහි තාදිහි.
5885. රතනානට්ඨපඤ්ඤාසං උග්ගතො සො මහාමුනි, කඤ්චනග්ඝියසඞ්කාසො බත්තිංසවරලක්ඛණො.
5886. වස්සසතසහස්සානි ආයු විජ්ජති තාවදෙ, තාවතා තිට්ඨමානො සො තාරෙසි ජනතං බහුං.
5887. තදාහං හංසවතියං බ්රාහ්මණො වෙදපාරගු, උපෙත්වා සත්තසාරග්ගං{2} අස්සොසිං ධම්මදෙසනං.
5888. තදා සො සාවකං වීරො පභින්නමතිගොචරං, අත්ථෙ ධම්මෙ ච නෙරුත්තෙ{3} පටිභානෙ ච කොවිදං.
5889. ඨපෙසි එතදග්ගම්හි තං සුත්වා මුදිතො අහං, සසාවකං ජිනවරං සත්තාහං භොජයිං තදා.
5890. දුස්සෙහකච්ඡාදයිත්වාන සසිස්සං බුද්ධිසාගරං, නිපච්ච පාදමූලම්හි තං ඨානං පත්ථයිං අහං.
5891. තතො අවොච ලොකග්ගො පස්සථෙතං දිජුත්තමං, විනතං පාදමූලෙ මෙ කමලොදරසප්පභං.
5892. බුද්ධසෙට්ඨස්ස භික්ඛුස්ස{1} ඨානං පත්ථයතෙ අයං, තාය සද්ධාය චාගෙන ධම්මස්ස සවණෙන{2} ච.
5893. සබ්බත්ථ සුඛිතො හුත්වා සංසරිත්වා භවාභවෙ, අනාගතම්හි අද්ධානෙ ලච්ඡතෙ තං මනොරථං.
5894. සතසහස්සෙ ඉතො කප්පෙ ඔක්කාකකුලසම්භවො, ගොතමො නාම නාමෙන{3} සත්ථා ලොකෙ භවිස්සති.
5895. තස්ස ධම්මෙසු දායාදො ඔරසො ධම්මනිම්මිතො කොට්ඨිතො නාම නාමෙන හෙස්සති සත්ථු සාවකෙ.
5896. තං සුත්වා මුදිතො හුත්වා යාවජීවං තදා ජිනං, මෙත්තචිත්තො පරිචරිං සතො පඤ්ඤාසමාහිතො.
5897. තෙන කම්මවිපාකෙන චෙතනාපණිධීහි ච, ජහිත්වා මානුසං දෙහං තාවතිංසමගච්ඡහං.
5898. සතානං තීණික්ඛත්තුඤ්ච දෙවරජ්ජමකාරයිං, සතානං පඤ්චක්ඛත්තුඤ්ච චක්කවත්තී අහොසහං.
5899. පදෙසරජ්ජං විපුලං ගණනාතො අසංඛියං, සබ්බත්ථ සුඛිතො ආසිං තස්ස කම්මස්ස වාහසා.
5900. දුවෙ භවෙ සංසරාමි දෙවත්තෙ අථ මානුසෙ, අඤ්ඤං ගතිං න ගච්ඡාමි සුචිණ්ණස්ස ඉදං ඵලං.
5901. දුවෙ කුලෙ පජායාමි ඛත්තියෙ අථ බ්රාහ්මණෙ, නීචෙ කුලෙ න ජායාමි සුචිණ්ණස්ස ඉදං ඵලං.
5902. පච්ඡිම්භවෙ{4}සම්පත්තෙ බ්රහ්මබන්ධු අහොසහං, සාවත්ථියං විප්පකුලෙ පච්චාජාතො මහද්ධනෙ.
5903. මාතා චන්දවතී නාම පිතා මෙ අස්සලායනො, යදා මෙ පිතරං බුද්ධො විනයී සබ්බසුද්ධියා.
5904. තදා පසන්නො සුගතෙ පබ්බජිං අනගාරියං, මොග්ගල්ලානො ආචරියො උපජ්ඣො{5} සාරිසම්භවො.
5905. කෙසෙසු ඡිජ්ජමානෙසු දිට්ඨි ඡින්නා සමූලිකා, නිවාසෙන්තො{1} ච කාසාවං අරහත්තමපාපුණිං.
5906. අත්ථධම්මනිරුත්තීසු පටිභානෙ ච මෙ මති, පභින්නා තෙන ලොකග්ගො එතදග්ගෙ ඨපෙසි මං.
5907. අසන්දිද්ධං වීයාකාසිං උපතිස්සෙන පුච්ඡිතො, පටිසම්භිදාසු තෙනාහං අග්ගො සම්බුද්ධසාසනෙ.
5908. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5909. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්සං සාසනං.
5910. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා මහාකොට්ඨිතො ථෙරො ඉමං ගාථායො අභාසිත්ථාති
මහාකොට්ඨිතත්ථෙරස්ස අපදානං සත්තමං.
538. උරුවෙලකස්සපත්ථෙරාපදානං
5911. පදුමුත්තරො නාම ජිනො සබ්බලොකවිදූ මුනි, ඉතො සතසහස්සම්හි කප්පෙ උප්පජ්ජි චක්ඛුමා.
5912. ඔවාදකො විඤ්ඤාපකො තාරකො සබ්බපාණිනං, දෙසනාකුසලො බුද්ධො තාරෙසි ජනතං බහුං.
5913. අනුකම්පකො කාරුණිකො හිතෙසී සබ්බපාණිනං, සම්පත්තෙ තිත්ථියෙ සබ්බෙ පඤ්චසීලෙ පතිට්ඨපි.{2}
5914. එවං නිරාකුලං ආසි සුඤ්ඤකං තිත්ථියෙහි ච, විචිත්තං අරහන්තෙහි වසීභූතෙහි තාදිහි.
5915. රතනානට්ඨපඤ්ඤාසං උග්ගතො සො මහාමුනි, කඤ්චනග්ඝියසඞ්කාසො බත්තිංසවරලක්ඛණො.
5916. වස්සසතසහස්සානි ආයු විජ්ජති තාවදෙ, තාවතා තිට්ඨමානො සො තාරෙසි ජනතං බහුං.
5917. තදාහං හංසවතියං බ්රාහ්මණො සාධුසම්මතො, උපෙච්ච ලොකපජ්ජොතං අස්සොසිං ධම්මදෙසනං.
5918. තදා මහාපරිසතිං මහාපුරිසසාවකං, ඨපෙන්තං එතදග්ගම්හි සුත්වාන මුදිතො අහං.
5919. මහතා පරිවාරෙන නිමන්තෙත්වා මහාජිනං, බ්රාහ්මණානං සහස්සෙන සහ දානමදාසහං.
5920. මහාදානං දදිත්වාන අභිවාදිය නායකං, එකමන්තෙ{1} ඨිතො හට්ඨො ඉදං වචනමබ්රවිං:
5921. තයි සද්ධාය මෙ වීර අධිකාරගුණෙන ච, පරිසා මහතී හොතු නිබ්බත්තස්ස තහිං තහිං.
5922. තදා අවොච පරිසං ගජගජ්ජිතසුස්සරො, කරවීකරුතො සත්ථා එතං පස්සථ බ්රාහ්මණං.
5923. හෙමවණ්ණං මහාබාහුං කමලානනලොවනං, උද්ධග්ගතනුජං{2} හට්ඨං සද්ධාවන්තං{3} ගුණෙ මම.
5924. එස පත්ථයතෙ ඨානං{4} සීහඝොසස්ස භික්ඛුනො, අනාගතම්හි අද්ධානෙ ලච්ඡිතෙ තං මනොරථං.
5925. සතසහස්සෙ ඉතො කප්පෙ ඔක්කාකකුලසම්භවො, ගොතමො නාම ගොත්තෙන සත්ථා ලොකෙ භවිස්සති.