5742. දෙවමානුසරජ්ජානි සතසො අනුසාසිය, බාරාණසීසමාසන්නෙ ජාතො කෙනියජාතියං.
5743. සහස්සපරිවාරෙන{1} සපජාපතිකො අහං, පඤ්ච පච්චෙකබුද්ධානං සතානි සමුපට්ඨහිං.
5744. තෙමාසං භොජයිත්වාන පච්ඡා’දම්හ තිචීවරං, තතො චුතා මයං සබ්බෙ අහුම්හ තිදසූපගා.
5745. පුනො සබ්බෙ මනුස්සත්තං ආගමිම්හ{2} තතො චුතා, කුක්කුටම්හි පුරෙ ජාතා හිමවන්තස්ස පස්සතො.
5746. කප්පිනො නාමහං ආසිං රාජපුත්තො මහායසො, සෙසාමච්චකුලෙ ජාතා මමෙව පරිවාරයුං.
5747. මහාරජ්ජසුඛං පත්තො සබ්බකාමසමිද්ධිමා, වාණිජෙහි සමක්ඛාතං බුද්ධප්පාදමහං සුණිං.
5748. “බුද්ධො ලොකෙ සමුප්පන්නො අසමො එකපුග්ගලො, සො පකාසෙති සද්ධම්මං අමතං සුඛමුත්තමං.
5749. සුයුත්තා තස්ස සිස්සා ච සුමුත්තා ච අනාසවා,” සුත්වා තෙසං සුවචනං සක්කරිත්වාන වාණිජෙ.
5750. පහාය රජ්ජං සාමච්චො නික්ඛමිං බුද්ධමාමකො, නදිං දිස්වා මහාචන්දා පූරිතං සමතිත්තිකං.
5751. අප්පතිට්ඨං අනාලම්බං දුත්තරං සීඝවාහිනිං, ගුණං සරිත්වා බුද්ධස්ස සොත්ථිනා සමතික්කමිං.
5752. භවසොතං සචෙ බුද්ධො තිණ්ණො ලොකන්තගූ විදූ, එතෙන සච්චවජ්ජෙන ගමනං මෙ සමිජ්ඣතු.
5753. යදි සන්තිගමො මග්ගො මොක්ඛො චච්චන්තිකං{1} සුඛං, එතෙන සච්චවජ්ජෙන ගමනං මෙ සමිජ්ඣතු.
5754. සඞ්ඝො චෙ තිණ්ණකන්තාරො පුඤ්ඤක්ඛෙත්තො අනුත්තරො, එතෙන සච්චවජ්ජෙන ගමනං මෙ සමිජ්ඣතු.
5755. සහ කතෙ සච්චවරෙ මග්ගා අපගතං ජලං, තතො සුඛෙන උත්තිණ්ණො නදීතීරෙ මනොරමෙ.
5756. නිසින්නං අද්දසං බුද්ධං උදෙන්තංව පභඞ්කරං, ජලන්තං හෙමසෙලංව දීපරුක්ඛංව ජොතිතං.
5757. සසී ව{2} තාරාසහිතං සාවකෙහි පුරක්ඛතං, වාසවං විය වස්සන්තං දෙසනාජලදං තදා{3}
5758. වන්දිත්වාන සහාමච්චො එකමන්තං උපාවිසිං{4} තතො නො ආසයං{5} ඤත්වා බුද්ධො ධම්මමදෙසයී.
5759. සුත්වාන ධම්මං විමලං අවොචුම්හ මයං ජිනං, පබ්බාජෙහි මහාවීර නිබ්බින්නම්හ{6} මයං භවෙ.
5760. ස්වාක්ඛාතො{7} භික්ඛවෙ ධම්මො දුක්ඛන්තකරණාය වො, චරථ බ්රහ්මචරියං ඉච්චාහ මුනි සත්තමො.
5761. සහ වාචාය සබ්බෙපි භික්ඛුංවසධරා මයං, අහුම්හ උපසම්පන්නා සොතාපන්නා ච සාසනෙ.
5762. තතො ජෙතවනං ගන්ත්වා අනුසාසි විනායකො, අනුසිට්ඨො ජිනෙනාහං අරහත්තමපාපුණිං.
5763. තතො භික්ඛුසහස්සං{8} තං අනාසාසිං අහං තදා, මමානුසාසනකරා තෙපි ආසුං අනාසවා.
5764. ජිනො තස්මිං ගුණෙ තුට්ඨො එතදග්ගෙ ඨපෙසි මං, භික්ඛු ඔවාදකානග්ගො කප්පිනොති මහාජනෙ.
5765. සතසහස්සෙ කතං කම්මං ඵලං දස්සෙසි මෙ ඉධ, සුමුත්තො සරවෙගොව කිලෙසෙ ඣාපයී{9} මම.
5766. කිලෙසා ඣාපිතා මය්හං භවා සබ්බෙ සමූහතා, නාගො ව බන්ධනං ඡෙත්වා විහරාමි අනාසවො.
5767. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්සං සාසනං.
5768. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා මහාකප්පිනො ථෙරො ඉමං ගාථායො අභාසිත්ථාති
මහාකප්පිනත්ථෙරස්ස අපදානං තතියං.
534. දබ්බත්ථෙරාපදානං
5769. පදුමුත්තරො නාම ජිනො සබ්බලොකවිදූ මුනි, ඉතො සතසහස්සම්හි කප්පෙ උප්පජ්ජි චක්ඛුමා.
5770. ඔවාදකො විඤ්ඤාපකො තාරකො සබ්බපාණිනං, දෙසනාකුසලො බුද්ධො තාරෙසි ජනතං බහුං.
5771. අනුකම්පකො කාරුණිකො හිතෙසී සබ්බපාණිනං, සම්පත්තෙ තිත්ථියෙ සබ්බෙ පඤ්චසීලෙ පතිට්ඨපි{1}
5772. එවං නිරාකුලං ආසි සුඤ්ඤතං{2} තිත්ථියෙහි ච, විචිත්තං අරහන්තෙහි වසීභූතෙහි තාදිහි.
5773. රතනානට්ඨපඤ්ඤාස{3} උග්ගතො සො මහාමුනි, කඤ්චනග්ඝියසඞ්කාසො බත්තිංසවරලක්ඛණො.
5774. වස්සසතසහස්සානි ආයු විජ්ජති තාවදෙ, තාවතා තිට්ඨමානො සො තාරෙසි ජනතං බහුං.
5775. තදාහං හංසවතියා සෙට්ඨිපුත්තො මහායසො, උපෙත්වා ලොකපජ්ජොතං අස්සොසිං ධම්මදෙසනං.
5776. සෙනාසනානි භික්ඛූනං පඤ්ඤාපෙන්තං සසාවකං, කිත්තයන්තස්ස වචනං සුණිත්වා මුදිතො අහං.
5777. අධිකාරං සසඞ්ඝස්ස කත්වා තස්ස මහෙසිනො, නිපච්ච සිරසා පාදෙ තං ඨානමභිපත්ථයිං.
5778. තදා භාසි{1} මහාවීරො මම කම්මං පකිත්තයං, යො සසඞ්ඝමභොජෙසි සත්තාහං ලොකනායකං.
5779. සොයං කමලපත්තක්ඛො සීහංසො කනකත්තවො, මම පාදමූලෙ නිපතී{2} පත්ථයං ඨානමුත්තමං.
5780. සහසහස්සෙ ඉතො කප්පෙ ඔක්කාකකුලසම්භවො, ගොතමො නාම නාමෙන{3} සත්ථා ලොකෙ භවිස්සති.
5781. සාවකො තස්ස බුද්ධස්ස දබ්බො නාමෙන විස්සුතො, සෙනාසනපඤ්ඤාපකො අග්ගො හෙස්සති’යං{4} තදා.
5782. තෙන කම්මෙන සුකතෙන චෙතනාපණිධීහි ච, ජහිත්වා මානුසං දෙහං තාවතිංසමගච්ඡහං.
5783. සතානං තීණික්ඛත්තුඤ්ච දෙවරජ්ජමකාරයිං, සතානං පඤ්චක්ඛත්තුඤ්ච චක්කවත්තී අහොසහං.
5784. පදෙසරජ්ජං විපුලං ගණනාතො අසංඛියං, සබ්බත්ථ සුඛිතො ආසිං තස්ස කම්මස්ස වාහසා.
5785. එකනවුතෙ ඉතො කප්පෙ විපස්සී නාම නායකො, උප්පජ්ජි චාරුනයනො{5} සබ්බධම්මවිපස්සකො.
5786. දුට්ඨචිත්තො උපවදිං සාවකං තස්ස තාදිනො, සබ්බාසවපරික්ඛීණං සුද්ධොති ච විජානිය.
5787. තස්සෙව නරවීරස්ස සාවකානං මහෙසිනං, සලාකං පග්ගහෙත්වාන{6} ඛීරොදනමදාසහං.
5788. ඉමම්හි භද්දකෙ කප්පෙ බ්රහ්මබන්ධු මහායසො, කස්සපො නාම නාමෙන උප්පජ්ජි වදතං වරො.
5789. සාසනං ජොතයිත්වා සො අභිභුය්ය කුතිත්ථියෙ, වෙනෙය්යෙ{7} විනයිත්වාන නිබ්බුතො සො සසාවකො.
5790. සසිස්සෙ නිබ්බුතෙ නාථෙ අත්ථමෙන්තම්හි{8} සාසනෙ, දෙවා කන්දිංසු සංවිග්ගා මුත්තකෙසා රුදම්මුඛා.
5791. “නිබ්බායිස්සතී ධම්මක්ඛො න පස්සිස්සාම සුබ්බතෙ, න සුණිස්සාම සද්ධම්මං අහො නො අප්පපුඤ්ඤතා.”
5792. තදායං පඨවී{1} සබ්බා අචලා සාචලා’චලී{2}, සාගරො ච සසොකොව විනදී කරුණං ගිරං.
5793. චතුද්දිසා දුන්දුභියො නාදයිංසු අමානුසා, සමන්තතො අසනියො ඵලිංසු{3} ච භයාවහා.
5794. උක්කා පතිංසු නභසා ධූමකෙතු ච’දිස්සථ,{4} සබ්බත්ථලජසත්තා ච{5} රවිංසු කරුණං මිගා.
5795. උප්පාතෙ{6} දාරුණෙ දිස්වා සාසනත්ථඞ්ගමසුවකෙ, සංවිග්ගා භික්ඛවො සත්ත චින්තයිම්හ මයං තදා.
5796. සාසනෙන විනාම්හාකං ජීවිතෙන අලං මයං, පවිසිත්වා මහාරඤ්ඤං යුඤ්ජාම ජිනසාසනෙ{7}.
5797. අද්දසුම්භ{8} තදාරඤ්ඤෙ උබ්බිද්ධං සෙලමුත්තමං, නිස්සෙණියා තමාරුය්හ නිස්සෙණිං පාතයිම්හසෙ.
5798. තදා ඔවදි නො ථෙරො බුද්ධුප්පාදො සුදුල්ලභො, සද්ධා ච දුල්ලභා{9} ලද්ධා ථොකං සෙසඤ්ච{10} සාසනං.
5799. නිපතන්ති ඛණාතීතා අනන්තෙ දුක්ඛසාගරෙ, තස්මා පයොගො කත්තබ්බො යාව ඨාති මුනෙ මතං.{11}
5800. අරහා ආසි සො ථෙරො අනාගාමී තදානුගො, සුසීලා ඉතරෙ යුත්තා දෙවලොකං අගම්හසෙ.
5801. නිබ්බුතො තිණ්ණසංසාරො සුද්ධාවාසෙ ච එකකො, අහං ච පුක්කුසාතී ච{12} සභියො බාහියො තථා.
5802. කුමාරකස්සපො චෙව තත්ථ තත්ථුපගා මයං, සංසාරබන්ධනා මුත්තා ගොතමෙනානුකම්පිතා.
5803. මල්ලෙසු කුසිනාරායං ජාතො ගබ්භෙව මෙ සතො, මතා මාතා චිතාරූළ්හා තතො නිප්පතිතො අහං.
5804. පතිතො දබ්බපුඤ්ජම්හි තතො දබ්බොති විස්සුතො, බ්රහ්මචාරීබලෙනාහං විමුත්තො සත්තවස්සිකො.
5805. ඛීරොදනඵලෙනාහං පඤ්චහඞ්ගෙහුපාගතො, ඛීණාසවොපවාදෙන පාපෙහි බහුචොතිතො.
5806. උභො පුඤ්ඤං ච පාපඤ්ච වීතිවත්තොම්හි’ දානහං.{1} පත්වාන පරමං සන්තිං විහරාමි අනාසවො.
5807. සෙනාසනං පඤ්ඤාපයිං භාසයිත්වාන සුබ්බතෙ, ජිනො තස්මිං ගුණෙ තුට්ඨො එතදග්ගො ඵපෙසි මං.
5808. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5809. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්සං සාසනං.
5810. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා දබ්බො මල්ලපුත්තො ථෙරො ඉමං ගාථායො අභාසිත්ථාති
දබ්බමල්ලපුත්තත්ථෙරස්ස අපදානං චතුත්ථං.
535. කුමාරකස්සපත්ථෙරාපදානං
5811. ඉතො සතසහස්සම්හි කප්පෙ උප්පජ්ජි නායකො, සබ්බලොකහිතො වීරො පදුමුත්තරනාමකො.
5812. තදාහං බ්රාහ්මණො හුත්වා විස්සුතො වෙදපාරගූ, දිවාවිහාරං විවරං අද්දසං ලොකනායකං.
5813. චතුසච්චං පකාසෙන්තං බොධයන්තං සදෙවකං, විචිත්තකථිකානග්ගං වණ්ණයන්තං මහාජනෙ.
5814. තදා මුදිතචිත්තොහං නිමන්තෙත්වා තථාගතං, නානාරත්තෙහි වත්ථෙහි අලඞ්කත්වාන මණ්ඩපං.
5815. නානාරතනපජ්ජොතං සසඞ්ඝං භොජයිං තහිං, භොජයිත්වාන සත්තාහං නානග්ගරසභොජනං.
5816. නානාවණ්ණෙහි{2} පුප්ඵෙහි පූජයිත්වා සසාවකං, නිපජ්ජ පාදමූලම්හි තං ඨානං පත්ථයිං අහං.
5817. තදා මුනිවරො ආහ කරුණෙකරසාසයො,{1} පස්සථෙතං දිජවරං පදුමානනලොචනං.
5818. පීතිපාමොජ්ජබහුලං සමුග්ගතතනූරුහං, හාසාහිතවිසාලක්ඛං{2} මම සාසනලාලසං.
5819. මම පාදමූලෙ පතිතං{3} එකාවත්ත සුමානසං, එස පත්ථෙති තං ඨානං විචිත්තකථිකත්තනං{4}.
5820. සතසහස්සෙ ඉතො කප්පෙ ඔක්කාකකුලසම්භවො, ගොතමො නාම ගොත්තෙන සත්ථා ලොකෙ භවිස්සති.
5821. තස්ස ධම්මෙසු දායාදො ඔරසො ධම්මනිම්මිතො, කුමාරකස්සපො නාම හෙස්සති සත්ථුසාවකො.
5822. විචිත්තපුප්ඵදුස්සානං රතනානං ච වාහසා, විචිත්තකථිකානං සො අග්ගතං පාපුණිස්සති.
5823. තෙන කම්මෙන සුකතෙන චෙතනාපණිධීහි ච, ජහිත්වා මානුසං දෙහං තාවතිංසමගච්ඡහං.
5824. පරිබ්භමං භවාකාසෙ{5} රඞ්ගමජ්ඣෙ නටො යථා,{6} සාඛාමිගත්රජො හුත්වා මිගියා කුච්ඡිමොක්කමිං.
5825. තදා මයි කුච්ඡිගතෙ වජ්ඣවාරො උපට්ඨිතො, සාඛෙන වත්තා මෙ මාතා නිග්රොධං සරණං ගතා.
5826. තෙන සා මිගරාජෙන මරණං පරිමොචිතා, පරිච්චජිත්වා සං පාණං{7} මමෙවං ඔවදී තදා.
5827. නිග්රොධමෙව සෙවෙය්ය න සාඛමුපසංවසෙ, නිග්රොධස්මිං මතං සෙය්යො යං චෙ සාඛම්හි{8} ජීවිතං.
5828. තෙනානුසිට්ඨො{9} මිගයූථපෙන අහං ච මාතා ච තථෙතරෙ ච, ආගම්ම රම්මං තුසිතාධිවාසං ගතා පවාසං සඝරං යථෙව.
5829. පුනො කස්සපවීරස්ස අත්ථමෙන්තම්හි සාසනෙ, ආරුය්හ සෙලසිඛරං යුඤ්ජිත්වා ජිනසාසනං.
5830. ඉදානහං{1} රාජගහෙ ජාතො සෙට්ඨිකුලෙ අහු,{2} ආපන්නසත්තා{3} මෙ මාතා පබ්බජි අනගාරියං.
5831. සගබ්භං තං විදිත්වාන දෙවදත්තමුපානයුං, සො අවොච විනාසෙථ පාපිකං භික්ඛුනිං ඉමං.
5832. ඉදානිපි මුනින්දෙන ජිනෙන අනුකම්පිතා, සුඛිනී අජනී මය්හං මාතා භික්ඛුනුපස්සයෙ.
5833. තං විදිත්වා මහීපාලො කොසලො මං අපොසයි, කුමාරපරිහාරෙන නාමෙනාහඤ්ච කස්සපො.
5834. මහාකස්සපමාගම්ම අහං කුමාරකස්සපො, වම්මිකසදිසං කායං සුත්වා බුද්ධෙන දෙසිතං.
5835. තතො චිත්තං විමුච්චි මෙ අනුපාදාය සබ්බසො, පායාසිං දමයිත්වාහං එතදග්ගං අපාපුණිං.