5656. බුද්ධවණ්ණෙන{5} සත්තානං කිලෙසෙ අපනෙසහං, නික්කිලෙසමනො හොමි තස්ස කම්මස්ස වාහසා.
5657. සොතූනං බුද්ධිමජනිං{6} බුද්ධානුස්සතිදෙසකො, තෙනාහමාසිං{7} සප්පඤ්ඤො නිපුණත්ථවිපස්සකො.
5658. සබ්බාසවපරික්ඛීණො තිණ්ණසංසාරසාගරො, සිඛීව අනුපාදානො පාපුණිස්සාමි නිබ්බුතිං.
5659. ඉමස්මිං යෙව කප්පස්මිං යමහං සන්ථවිං ජිනං, දුග්ගතිං නාභිජානාමි බුද්ධවණ්ණස්සිදං ඵලං.
5660. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
5661. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5662. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සුගන්ධො ථෙරො ඉමා ගාථායො අභාසිත්ථාති.
සුගන්ධත්ථෙරස්ස අපදානං දසමං.
උද්දානං:
තිණදො මඤ්චදො චෙව සරණබ්භඤ්ජනප්පදො, සුපටො දණ්ඩදායී ච නෙලපූජි තථෙව ච, බොධිසම්මජ්ජකාමෙණ්ඩො{1} සුගන්ධො දසමො දිජො.{2} ගාථාසතං සතෙවීසං ගණිතං චෙත්ථ සබ්බසො.
තිණදායකවග්ගො තෙපඤ්ඤාසමො.
54. කච්චානවග්ගො
531. මහාකච්චානත්ථෙරාපදානං
5663. පදුමුත්තරො නාම ජිනො අනෙජො අජිතඤ්ජයො, සතසහස්සෙ කප්පානං ඉතො උප්පජ්ජි නායකො.
5664. වීරො කමලපත්තක්ඛො සසඞ්කවිමලානනො, කනකාවලසඞ්කාසො{3} රවිදිත්තිසමප්පභො.
5665. සත්තනෙත්තමනොහාරී වරලක්ඛණභුසිතො, සබ්බවාක්යපථාතීතො මනුජාමරසක්කතො.
5666. සම්බුද්ධො බොධයං සත්තෙ වාගීසො මධුරස්සරො, කරුණානිබද්ධ{4} සන්තානො පරිසාසු විසාරදො.
5667. දෙසෙති මධුරං ධම්මං චතුසච්චුපසංහිතං, නිමුග්ගෙ මොහපඞ්කම්හි සමුද්ධරති පාණිනො.
5668. තදා එකචරො හුත්වා තාපසො හිමවාලයො, නභසා මානුසං ලොකං ගච්ඡන්තො ජිනමද්දසං.
5669. උපෙච්ච සන්තිකං තස්ස අස්සොසිං ධම්මදෙසනං, වණ්ණයන්තස්ස වීරස්ස සාවකස්ස මහාගුණං.
5670. සංඛිත්තෙන මයා වුත්තං විත්ථාරෙන පකාසයං, පරිසං මඤ්ච තොසෙති යථා කච්චායනො අයං.
5671. නාහං එවං විධං කඤ්චි{5} අඤ්ඤං පස්සාමි සාවකං, තස්මාතදග්ගෙ{6} එසග්ගො එවං ධාරෙථ භික්ඛවො.
5672. තදාහං විම්හිතො හුත්වා සුත්වා වාක්යං මනොරමා, හිමවන්තං ගමිත්වාන ආහත්වා{7} පුප්ඵසඤ්චයං.
5673. පූජෙත්වා ලොකසරණං තං ඨානං අභිපත්ථයිං, තදා මමාසයං ඤත්වා ව්යාකාසි සරණඤ්ජහො.
5673. “පස්සථෙතං ඉසිවරං නිද්ධන්තකනකත්තචං, උද්ධග්ගලොමං පීණංසං අචලං පඤ්ජලිං ඨිතං.
5674. හාසස්සුපුණ්ණනයනං{1} බුද්ධවණ්ණගතාසයං, ධම්මංව විග්ගහවරං{2} අමතාසිත්තසන්තිභං.
5675. කච්චානස්ස ගුණං සුත්වා තං ඨානං පත්ථයං ඨිතො, අනාගතම්හි අද්ධානෙ ගොතමස්ස මහාමුනෙ.
5676. තස්ස ධම්මෙසු දායාදො ඔරසො ධම්මනිම්මිතො, කච්චානො නාම නාමෙන හෙස්සති සත්ථුසාවකො.
5677. බහුස්සුතො මහාඤාණී අධිප්පායවිදූ මුනෙ, පාපුණිස්සති තං ඨානං යථායං ව්යාකතො මයා.
5678. සතසහස්සෙ ඉතො කප්පෙ යං කම්මමකරිං තදා, දුග්ගතිං නාභිජානාමි බුද්ධපූජායිදං ඵලං.
5679. දුවෙ භවෙ සංසරාමි දෙවත්තෙ අථ මානුසෙ, අඤ්ඤං ගතිං න ගච්ඡාමි බුද්ධපූජායිදං ඵලං.
5680. දුවෙ කුලෙ පජායාමි ඛත්තියෙ අථ බ්රාහ්මණෙ, නීචෙ කුලෙ න ජායාමි බුද්ධපූජායිදං ඵලං.
5681. පච්ඡිමෙ ව{3} භවෙ දානි ජාතො උජ්ජෙනියා පුරෙ,{4} පජ්ජොතස්ස ච චණ්ඩස්ස පුරොහිතදිජාතිනො.{5}
5682. පුත්තො තිරිටවච්ඡස්ස{6} නිපුණො වෙදපාරගූ, මාතා ච චන්දිමා නාම කච්චානොහං වරත්තවො.
5683. වීමංසත්ථං බුද්ධස්ස භූමිපාලෙන පෙසිතො, දිස්වා මොක්ඛපුරද්වාරං නායකං ගුණසඤ්චයං.
5684. සුත්වා ච විමලං වාක්යං ගතිපඞ්කවිසොසනං, පාපුණිං අමතං සන්තං සොසෙහි සහ සත්තහි.{7}
5685. අධිප්පායවිදූ ජාතො සුගතස්ස මහාමුනෙ,{8} ඨපිතො එතදග්ගෙ ච සුසමිද්ධමනොරථො.
5686. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5687. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5688. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා මහාකච්චානො ථෙරො ඉමා ගාථායො අභාසිත්ථාති.
මහාකච්චානත්ථෙරස්ස අපදානං පඨමං.
532. වක්කලිත්ථෙරාපදානං
5689. ඉතො සතසහස්සම්හි කප්පෙ උප්පජ්ජි නායකො, අනොමනාමො අමිතො නාමෙන පදුමුත්තරො.
5690. පදුමාකාරවදනො පදුමාමලසුච්ඡවී, ලොකෙනානුපලිත්තොව තෙයෙන පදුමං යථා.
5691. වීරො පදුමපත්තක්ඛො සන්තො ච පදුමං යථා, පදුමුත්තරගන්ධො ච{1} තස්මා සො පදුමුත්තරො.
5692. ලොකජෙට්ඨො ච නිම්මානො අන්ධානං නයනූපමො, සන්තවෙසො ගුණනිධි කරුණාමතිසාගරො.
5693. ස කදාචි මහාවීරො බ්රහ්මාසුරසුරච්චිතො, සදෙවමනුජාකිණ්ණො{2} ජනමජ්ඣෙ අනුත්තමො.{3}
5694. වදනෙන සුගන්ධෙන මධුරෙන රුතෙන ච, රඤ්ජයං පරිසං සබ්බං සන්ථවී සාවකං සකං.
5695. “සද්ධාධිමුත්තො සුමතී මම දස්සනලාලසො,{4} නත්ථි එතාදිසො අඤ්ඤො යථායං භික්ඛු වක්කලි”.
5696. තදාහං හංසවතියං නගරෙ බ්රාහ්මණත්රජො, හුත්වා සුත්වා ච තං වාක්යං තං ඨානමභිරොචයිං.
5697. සසාවකං තං විමලං නිමන්තෙත්වා තථාගතං, සත්තාහං භොජයිත්වාන දුස්සෙගච්ඡාදයිං තදා.
5698. නිපච්ච සිරසා තස්ස අනන්තගුණසාගරෙ, නිමුග්ගො පීතිසම්පුණ්ණො ඉදං වචනමබ්රවිං:
5699. “යො සො තයා සන්ථවිතො ඉතො සත්තමකෙ’හනි,{1} භික්ඛූ සද්ධාවතං අග්ගො තාදිසො හොමහං මුනෙ.”
5700. එවං වුත්තෙ මහාවීරො අනාවරණදස්සනො, ඉමං වාක්යං උදීරෙසි පරිසායං{2} මහාමුනි:
5701. “පස්සථෙතං මාණවකං පීතමට්ඨනිවාසනං, හෙමයඤ්ඤොපවීතඞ්ගං{3} ජනනෙත්තමනොහරං.
5702. එසො අනාගතද්ධානෙ ගොතමස්ස මහෙසිනො, අග්ගො සද්ධාධිමුත්තානං සාවකොයං භවිස්සති.
5703. දෙවභූතො මනුස්සො වා සබ්බසන්තාපවජ්ජිතො, සබ්බභොගපරිබ්බූළ්හො සුඛිතො සංසරිස්සති.
5704. සතසහස්සෙ ඉතො කප්පෙ ඔක්කාකකුසලසම්භවො, ගොතමො නාම නාමෙන{4} සත්ථා ලොකෙ භවිස්සති.
5705. තස්ස ධම්මෙසු දායාදො ඔරසො ධම්මනිම්මිතො, වක්කලී නාම නාමෙන හෙස්සති සත්ථුසාවකො.
5706. තෙන කම්මවිසෙසෙන චෙතනාපණිධීහි ච, ජහිත්වා මානුසං දෙහං තාවතිංසමගච්ඡහං.
5707. සබ්බත්ථ සුඛිතො හුත්වා සංසරන්තො භවාභවෙ, සාවත්ථියං පුරෙ ජාතො කුලෙ අඤ්ඤතරෙ අහං.
5708. නොනීතසුඛුමාලං මං ජාතපල්ලවකොමලං, මන්දං උත්තානසයනං පිසාචීභයතජ්ජිතා.{5}
5709. පාදමූලෙ මහෙසිස්ස සායෙසුං දීනමානසා, ‘ඉමං දදාම තෙ නාථ සරණං හොහි නායක.’
5710. තදා පටිග්ගහි සො මං භීතානං සරණො මුනි, ජාලිනා සඞ්ඛලඞ්කෙන{6} මුදුකොමලපාණිනා.
5711. තදාප්පභුති තෙනාහං අරක්ඛෙය්යෙන රක්ඛිතො, සබ්බවෙරවිනිම්මුත්තො{7} සුඛෙන පරිවඩ්ඪිතො.
5712. සුගතෙන විනාභූතො උක්කණ්ඨාමි මුහුත්තකං, ජාතියා සත්තවස්සොහං පබ්බජිං අනගාරියං.
5713. සබ්බපාරමිසම්භූතං ලක්ඛීනිලයනං පරං,{1} රූපං සබ්බසුභාකිණ්ණං අතිත්තො පිහයාමහං{2}.
5714. බුද්ධරූපරතං{3} ඤත්වා තදා ඔවදි මං ජිනො, “අලං වක්කලි කිං රූපෙ රමසෙ බාලනන්දිතෙ.
5715. යො හි පස්සති සද්ධම්මං සො මං පස්සති පණ්ඩිතො, අපස්සමානො සද්ධම්මං මං පස්සම්පි න පස්සති.
5716. අනත්තාදීනවො කායො විසරුක්ඛසමූපමො, ආවාසො සබ්බරොගානං පුඤ්ජො දුක්ඛස්ස කෙවලො.
5717. නිබ්බන්දිය තතො රූපෙ ඛන්ධානං උදයබ්බයං, පස්ස සබ්බකිලෙසානං සුඛෙනන්තං ගමිසස්සි.”
5718. එවං තෙනානුසිට්ඨොහං නායකෙන හිතෙසිනා, ගිජ්ඣකූටං සමාරුය්හ ඣායාමි ගිරිකන්දරෙ.
5719. ඨිතො පබ්බතපාදම්හි මමාහ සො මහාමුනි,{4} වක්කලී’ති ජිනො වාචං තං සුත්වා මුදිතො අහං.
5720. පක්ඛන්දිං සෙලපබ්භාරෙ අනෙකසතපොරිසෙ, තදා බුද්ධානුභාවෙන සුඛෙන’ව මහිං ගතො.
5721. පුනොපි{5} ධම්මං දෙසෙසි{6} ඛන්ධානං උදයබ්බයං, තමහං ධම්මමඤ්ඤාය අරහත්තමපාපුණිං.
5722. සුමහාපරිසාමජ්ඣෙ{7} තදා මං මරණන්තගො{8}, අග්ගං සද්ධාධිමුත්තානං පඤ්ඤපෙසි මහාමති.
5723. සතසහස්සෙ ඉතො කප්පෙ යං කම්මමකරිං තදා, දුග්ගතිං නාභිජානාමි බුද්ධජූජායිදං ඵලං.
5724. කිලෙසා ඣාපිතා මය්හං භවා සබ්බෙ සමූහතා, නාගො ව බන්ධනං ඡෙත්වා විහරාමි අනාසවො.
5725. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්සං සාසනං.
5726. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා වක්කලිත්ථෙරො ඉමං ගාථායො අභාසිත්ථාති
වක්කලිත්ථෙරස්ස අපදානං දුතියං
533. මහාකප්පිනත්ථෙරාපදානං
5727. පදුමුත්තරො නාම ජිනො සබ්බධම්මානපාරගූ, උදිතො ජගදාකාසෙ{1} රවීව සරදම්බරෙ.
5728. වචනාභාය බොධෙති වෙනෙය්යපදුමානි සො, කිලෙසපඞ්කං සොසෙති මතිරංසීහි නායකො.
5729. තිත්ථියානං යසො හන්ති ඛජ්ජොතාභා යථා රවි, සච්චත්ථාභං පකාසෙති රතනංව දිවාකරො.
5730. ගුණානං ආයතිභූතො රතනානංව සාගරො, පජ්ජුන්නොරිව භූතානි ධම්මමෙඝෙන වස්සති.
5731. අක්ඛදස්සො තදා ආසිං නගරෙ හංසසව්හයෙ, උපෙච්ච ධම්මමස්සොසිං ජලජුත්තරනාමිනො.
5732. ඔවාදකස්ස භික්ඛූනං සාවකස්ස කතාවිනො, ගුණං පකාසයන්තස්ස තොසයන්තස්ස{2} මෙ මනං.
5733. සුත්වා පතීතො සුමනො නිමන්තෙත්වා තථාගතං, සසිස්සං භොජයිත්වාන තං ඨානම්හිපත්ථයිං.
5734. තදාභාසි මහාභාගො{3} හංසදුන්දුභිසුස්සරො,{4} පස්සථෙතං මහාමත්තං විනිච්ඡයවිසාරදං.
5735. මංපාදමූලෙ පතිතං{5} සමුග්ගතතනූරුහං, ජීමූතවණ්ණං පීණංසං පසන්නනයනානනං.
5736. පරිවාරෙන මහතා රඤ්ජයං තං{6} මහායසං, එසො කතාවිනො ඨානං පත්ථෙති මුදිතාසයො.
5737. ඉමිනා පිණ්ඩපාතෙන{7} චෙතනාපණිධීහි ච,{8} කප්පසතසහස්සානි නූපපජ්ජති දුග්ගතිං.
5738. දෙවෙසු දෙවසොභග්ගං මනුස්සෙසු මහන්තතං, අනුභොත්වාවසෙසෙන{9} නිබ්බානං පාපුණිස්සති.
5739. සතසහස්සෙ ඉතො කප්පෙ ඔක්කාකකුලසම්භවො. ගොතමො නාම ගොත්තෙන සත්ථා ලොකෙ භවිස්සති.
5740. තස්ස ධම්මෙසු දායාදො ඔරසො ධම්මනිම්මිතො, කප්පිනො නාම නාමෙන හෙස්සති සත්ථුසාවකො.
5741. තතොහං සුකතං කාරං කත්වාන ජිනසාසනෙ, ජහිත්වා මානුසං දෙහං තුසිතං අගමාසහං.