5572. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සුපටදායකො ථෙරො ඉමා ගාථායො අභාසිත්ථාති.
සුපටදායත්ථෙරස්ස අපදානං පඤ්චමං.
526. දණ්ඩදායකත්ථෙරාපදානං
5573. කානනං වනමොගය්හ වෙළුං ඡෙත්වානහං තදා, ආලම්බනං කරිත්වාන සඞ්ඝස්ස අදදිං අහං.
5574. තෙන චිත්තප්පසාදෙන සුබ්බතෙ අභිවාදිය, ආලම්බදණ්ඩං දත්වාන පක්කාමිං උත්තරාමුඛො.
5575. චතුනවුතෙ ඉතො කප්පෙ යං දණ්ඩමදදිං තදා, දුග්ගතිං නාභිජානාමි දණ්ඩදානස්සිදං ඵලං.
5576. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5577. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5578. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා දණ්ඩදායකො ථෙරො ඉමා ගාථායො අභාසිත්ථාති.
දණ්ඩදායකත්ථෙරස්ස අපදානං ඡට්ඨං.
527. ගිරිනෙලපූජකත්ථෙරාපදානං
5579. මිගලුද්දො පුරෙ ආසිං විපිනෙ විචරං අහං, අද්දසං විරජං බුද්ධං සබ්බධම්මානපාරගුං.
5580. තස්මිං මහාකාරුණිකෙ සබ්බසත්තහිතෙ රතෙ, පසන්නචිත්තො සුමනො නෙලපුප්ඵමපූජයිං.
5581. එකතිංසෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
5582. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5583. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5584. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ගිරිනෙල පූජකො ථෙරො ඉමා ගාථායො අභාසිත්ථාති.
ගිරිනෙලපූජකත්ථෙරස්ස අපදානං සත්තමං.
528. බොධිසම්මජ්ජකත්ථෙරාපදානං
5585. අහං පුරෙ බොධිපත්තං උජ්ඣිතං චෙතියඞ්ගණෙ, තං ගහෙත්වාන ඡඩ්ඩෙසිං අලභිං වීසති ගුණෙ.
5586. තස්ස කම්මස්ස තෙජෙන සංසරන්තො භවාභවෙ, දුවෙ භවෙ සංසරාමි දෙවත්තෙ චාපි මානුසෙ.
5587. දෙවලොකා චවිත්වාන ආගන්ත්වා මානුසං භවං, දුවෙ කුලෙ පජායාමි ඛත්තියෙ චාපි මානුසෙ.
5588. අඞ්ගපච්චඞ්ගසම්පන්නො ආරොහපරිණාහවා, අභිරූපො සුචි හොමි සම්පුණ්ණඞ්ගො අනූනකො.
5589. දෙවලොකෙ මනුස්සෙ වා ජාතො වා යත්ථ කත්ථචි, භවෙ සුවණ්ණවණ්ණොව උත්තත්තකනකූපමො.
5590. මුදුකා මද්දවා සනිද්ධා{1} සුඛුමා සුකුමාරිකා, ඡවි මෙ සබ්බදා හොති බොධිපත්තෙ සුඡඩ්ඩිතෙ.
5591. යතො කුතොචි ගතිසු සරීරෙ සමුදාගතෙ, න ලිම්පති රජොජල්ලං විපාකො පත්තඡඩ්ඩනෙ.{2}
5592. උණ්හෙ වාතාතපෙ තස්ස අග්ගිතාපෙන වා පුන{3}, ගත්තෙ සෙදා න මුච්චන්ති විපාකො පත්තඡඩ්ඩනෙ.
5593. කුට්ඨං ගණ්ඩො කිලාසො ච තිලකා පිළකා තථා, න හොන්ති කායෙ දද්දු ච විපාකො පත්තඡඩ්ඩනෙ.
5594. අපරම්පි ගුණං තස්ස නිබ්බත්තති භවාභවෙ, රොගා න හොන්ති කායස්මිං විපාකො පත්තඡඩ්ඩනෙ.
5595. අපරම්පි ගුණං තස්ස නිබ්බත්තති භවාභවෙ, න හොති චිත්තජා පීළා විපාකො පත්තඡඩ්ඩනෙ.
5596. අපරම්පි ගුණං තස්ස නිබ්බත්තති භවාභවෙ, අමිත්තා න භවන්තස්ස විපාකො පත්තඡඩ්ඩනෙ.
5597. අපරම්පි ගුණං තස්ස නිබ්බත්තති භවාභවෙ, අනූනභොගො භවති විපාකො පත්තඡඩ්ඩනෙ.
5598. අපරම්පි ගුණං තස්ස නිබ්බත්තති භවාභවෙ, අග්ගිරාජුහි චොරෙහි න හොති උදකෙ භයං.
5599. අපරම්පි ගුණං තස්ස නිබ්බත්තති භවාභවෙ, දාසිදාසා අනුචරා හොන්ති චිත්තානුවත්තකා.
5600. යම්හි ආයුප්පමාණම්හි ජායතෙ මානුසෙ භවෙ, තතො න හායතෙ ආයු තිට්ඨතෙ යාවතායුකං.
5601. අබ්භන්තරා බාහිරා ච{1} නෙගමා ච සරට්ඨකා, අනුයුත්තා{2} හොන්ති සබ්බෙ වුද්ධිකාමා සුඛිච්ඡකා.
5602. භොගවා යසවා හොමි සිරිමා ඤාතිපක්ඛවා, අපෙතභයසන්තාසො භවෙ’හං සබ්බතො භවෙ.
5603. දෙවා මනුස්සා අසුරා ගන්ධබ්බා යක්ඛරක්ඛසා, සබ්බෙ තෙ පරිරක්ඛන්ති භවෙ සංසරතො සදා.
5604. දෙවලොකෙ මනුස්සෙ ච අනුභොත්වා උභො යසෙ, අවසානෙ ච නිබ්බානං සිවං පත්තො අනුත්තරං.
5605. සම්බුද්ධමුද්දිසිත්වාන බොධිං වා තස්ස සත්ථුනො, යො පුඤ්ඤං පසවෙ පොසො තස්ස කිං නාම දුල්ලභං.
5606. මග්ගෙ ඵලෙ ආගමෙ ච ඣානාභිඤ්ඤාගුණෙසු ච, අඤ්ඤෙසං අධිකො හුත්වා නිබ්බායාමි අනාසවො.
5607. පුරෙ’හං බොධියා පත්තං ඡඩ්ඩෙත්වා හට්ඨමානසො, ඉමෙහි වීසතඞ්ගෙහි සමඞ්ගි හොමි සබ්බදා.
5608. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5609. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5610. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා බොධිසම්මජ්ජකො ථෙරො ඉමා ගාථායො අභාසිත්ථාති.
බොධිසම්මජ්ජකත්ථෙරස්ස අපදානං අට්ඨමං.
529. ආමණ්ඩඵලදායකත්ථෙරාපදානං
5611. පදුමුත්තරො නාම ජිනො සබ්බධම්මානපාරගූ, වුට්ඨහිත්වා සමාධිම්හා චඞ්කමි ලොකනායකො.
5612. ඛාරිභාරං ගහෙත්වාන ආහරන්තො ඵලං තදා, අද්දසං විරජං බුද්ධං චඞ්කමන්තං මහාමුනිං.
5613. පසන්නචිත්තො සුමනො සිරෙ කත්වාන අඤ්ජලිං, සම්බුද්ධං අභිවාදෙත්වා ආමණ්ඩමදදිං ඵලං.
5614. සතසහස්සෙ ඉතො කප්පෙ යං ඵලං අදදිං තදා, දුග්ගතිං නාභිජානාමි ආමණ්ඩස්ස ඉදං ඵලං.
5615. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5616. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5617. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ආමණ්ඩඵලදායකො ථෙරො ඉමා ගාථායො අභාසිත්ථාති.
ආමණ්ඩඵලදායකත්ථෙරස්ස අපදානං නවමං.
530. සුගන්ධත්ථෙරාපදානං
5617. ඉමම්හි භද්දකෙ කප්පෙ බ්රහ්මබන්ධු මහායසො, කස්සපො නාම ගොත්තෙන{1} උප්පජ්ජි වදතංවරො.
5618. අනුව්යඤ්ජනසම්පන්නො{2} බත්තිංසවරලක්ඛණො, බ්යාමප්පභාපරිවුතො රංසුජාලසමොසටො{3}.
5619. අස්සාසෙතා යථා චන්දො සුරියොව පභඞ්කරො, නිබ්බාපෙතා යථා මෙඝො සාගරො’ව ගුණාකරො.
5620. ධරණීරිව සීලෙන හිමවා’ව සමාධිනා, ආකාසො විය පඤ්ඤාය අසඞ්ගො අනිලො යථා.
5621. ස කදාචි මහාවීරො පරිසාසු විසාරදො, සච්චානි සම්පකාසෙසි උද්ධරන්තො මහාජනං.
5622. තදාහි බාරාණසියං සෙට්ඨිපුත්තො මහායසො, ආසහං ධනධඤ්ඤස්ස පහුතස්ස පභූ තදා{4}.
5623. ජඞ්ඝාවිහාරං විචරං මිගදායමුපෙච්චහං, අද්දසං විරජං බුද්ධං දෙසෙන්තං අමතං පදං.
5624. විස්සට්ඨකන්තවචනං{5} කරවීකසමස්සරං, හංසරුදාභිනිග්ඝොසං{6} විඤ්ඤාපෙන්තං මහාජනං.
5625. දිස්වා දෙවාතිදෙවං තං සුත්වා ච{7} මධුරං ගිරං, පහායානප්පකෙ{8} භොගෙ පබ්බජිං අනගාරියං.
5626. එවං පබ්බජිතො චාහං න චිරෙන බහුස්සුතො, අහොසිං ධම්මකථිකො විචිත්තපටිභාණවා.
5627. මහාපරිසමජ්ඣෙහං හට්ඨචිත්තො පුනප්පුනං, වණ්ණයිං හෙමවණ්ණස්ස වණ්ණං වණ්ණවිසාරදො.
5628. එස ඛීණාසවො බුද්ධො අනීඝො ඡින්නසංසයො, සබ්බකම්මක්ඛයං පත්තො විමුත්තොපධිසංඛයෙ.
5629. එස සො භගවා බුද්ධො එස සීහො අනුත්තරෙ, සදෙවකස්ස ලොකස්ස බ්රහ්මචක්කප්පවත්තකො.
5630. දන්තො දමෙතා සන්තො ච සමෙතා නිබ්බුතො ඉසි, නිබ්බාපෙතා ච අස්සත්ථො අස්සාසෙතා මහාජනං.
5631. වීරො සූරො ච ධීරො ච{1} පඤ්ඤො කාරුණිකො වසී, විජිතාවී ච ස ජිනො අප්පගබ්භො අනාලයො.
5632. අනෙජො අචලො ධීමා අමොහො අසමො මුනි, ධොරය්හො උසභො නාගො සීහො සක්කො ගරූසුපි.
5633. විරාගො විමලො බ්රහ්මා වාදසූරො රණඤ්ජහො, අඛිලො ච විසල්ලො ච අසමො සංයුතො{2} සුචි.
5634. බ්රාහ්මණො සමණො නාථො භිසක්කො සල්ලකත්තකො, යොධො බුද්ධො සුතො සුතො{3} අචලො මුදිතොදිතො.{4}
5635. ධාතා ධතා ච හන්තා ච{5} කත්තා නෙතා පකාසිතා, සම්පහංසිතා භෙත්තා ච ඡෙත්තා සොතා පසංසිතා.
5636. අඛිලො ච විසල්ලො ච අනීඝො අකථඞ්කථී, අනෙජො විරජො ඛන්තා{6} ගන්තා{7} වත්තා පකාසිතා{8}
5637. තාරෙතා අත්ථකාරෙතා කාරෙතා සම්පදාලිතා{9}, පාපෙතා සහිතා කන්තා හන්තා ආතා පී තාපසො{10}.
5638. සමචිත්තො{1} සමසමො අසහායො දයාසයො,{2} අච්ඡෙරසත්තො{3} අකුහො කතාවී ඉසිසත්තමො.
5639. නිත්තිණ්ණකඞ්ඛො නිම්මානො අප්පමෙය්යො අනූපමො, සබ්බවාක්යපථාතීතො සච්චඤෙය්යන්තගූ{4} ජිනො.
5640. සත්තසාරවරෙ{5} තස්මිං පසාදො අමතාවහො, තස්මා බුද්ධෙ ච ධම්මෙ ච සංඝෙ සද්ධා මහිද්ධිකා.{6}
5641. ගුණෙහි එවමාදීහි තිලොකසරණුත්තමං, වණ්ණෙන්තො පරිසාමජ්ඣෙ අකං{7} ධම්මකථං අහං.
5642. තතො චුතොහං{8} තුසිතෙ අනුභොත්වා මහාසුඛං, තතො චුතො මනුස්සෙසු ජාතො හොමි සුගන්ධිකො.
5643. නිස්සාසො මුඛගන්ධො ච දෙහගන්ධො තථෙව මෙ, සෙදගන්ධො ච සතතං සබ්බගන්ධෙ’තිසෙති’මෙ.{9}
5644. මුඛගන්ධො සදා මය්හං පදුමුප්පලචම්පකෙ{10}, ආදිසන්තො{11} සදා වාති සරීරො ච තථෙව මෙ,
5645. ගුණත්ථවස්ස සබ්බං තං ඵලං තු{12} පරමම්භූතං, එකග්ගමනසා සබ්බෙ වණ්ණයිස්සං{13} සුණාථ මෙ.
5646. ගුණං බුද්ධස්ස වත්වාන හිතාය ජනසන්ධිසු{14}, සුඛිතො{15} හොමි සබ්බත්ථ සරද්වධනිසමායුතො{16}
5647. යසස්සී සුඛිතො කන්තො ජුතිමා පියදස්සනො, වත්තා අපරිභූතො ච නිද්දොසො පඤ්ඤවා තථා.
5648. ඛීණෙ ආයුසි{17} නිබ්බානං සුලභං බුද්ධභත්තිනො, තෙසං හෙතුං පවක්ඛාමි තං සුණාථ යථාතථං.
5649. සන්තං යසං භගවතො විධිනා අභිවාදයං, යත්ථ තත්ථුපපන්නොපි යසස්සී තෙන හොමහං.
5650. දුක්ඛස්සන්තකරං බුද්ධං ධම්මං සන්තමසඞ්ඛතං, වණ්ණයං සුඛදො ආසිං සත්තානං සුඛිතො තතො.
5651. ගුණං වදන්තො බුද්ධස්ස බුද්ධපීතිසමායුතො, සකන්තිං පරකන්තිඤ්ච ජනයිං තෙන කන්තිමා.
5652. ජනොඝෙ{1} තිත්ථකාකිණ්ණෙ{2} අභිභුය්ය කුතිත්ථියෙ, ගුණං වදන්තො ජොතෙසිං නායකං ජුතිමා තතො.
5653. පියකාරී ජනස්සාපි සම්බුද්ධස්ස ගුණං වදං, සරදොව සසඞ්කොහං තෙනාසිං{3} පියදස්සනො.
5654. යථාසත්තිවසෙනාහං සබ්බවාචාහි සන්ථවිං, සුගතං තෙන වාගීසො විචිත්තපටිභාණවා.
5655. යෙ බාලා විමතිප්පත්තා පරිභොන්ති මහාමුනි, නිග්ගහිං තෙ සධම්මෙන පරිභූතො න තෙනහං{4}.