518. ඝොසසඤ්ඤකත්ථෙරාපදානං
5500. මිගලුද්දො පුරෙ ආසිං අරඤ්ඤෙ කානනෙ අහං, අද්දසං විරජං බුද්ධං දෙවසංඝපුරක්ඛතං.
5501. චතුසච්චං පකාසෙන්තං දෙසෙන්තං අමතං පදං, අස්සොසිං මධුරං ධම්මං සිඛිනො ලොකබන්ධුනො.
5502. ඝොසෙ චිත්තං පසාදෙසිං අසමප්පටිපුග්ගලෙ, තත්ථ චිත්තං පසාදෙත්වා අතරිං{3} දුත්තරං භවං.
5503. එකතිංසෙ ඉතො කප්පෙ යං සඤ්ඤමලභිං තදා, දුග්ගතිං නාභිජානාමි ඝොසඤ්ඤායිදං ඵලං.
5504. කිලෙසා ඣාපිතා මය්හං භවා සබ්බෙ සමූහතා, නාගො ව බන්ධනං ඡෙත්වා විහරාමි අනාසවො.
5505. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5504. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ඝොසසඤ්ඤකො ථෙරො ඉමා ගාථායො අභාසිත්ථාති.
ඝොසසඤ්ඤකත්ථෙරස්ස අපදානං අට්ඨමං.
519. සබ්බඵලදායකත්ථෙරාපදානං
5505. වරුණො නාම නාමෙන බ්රාහ්මණො මන්තපාරගූ, ඡඩ්ඩෙත්වා දස පුත්තානි වනමජ්ඣොගහිං තදා.
5506. අස්සමං සුකතං කත්වා සුවිභත්තං මනොරමං, පණ්ණසාලං කරිත්වාන වසාමි විපිනෙ අහං.
5507. පදුමුත්තරො ලොකවිදූ ආහුතීනං පටිග්ගහො, මමුද්ධරිතුකාමො සො ආගච්ඡි මම අස්සමං.
5508. යාවතා වනසණ්ඩස්මිං{1} ඔභාසො විපුලො අහු, බුද්ධස්ස ආනුභාවෙන පජ්ජලි විපිනං තදා.
5509. දිස්වාන පාටිහීරං තං{2} බුද්ධසෙට්ඨස්ස තාදිනො, පත්තපුටං ගහෙත්වාන ඵලෙන පූරයිං අහං.
5510. උපගන්ත්වාන සම්බුද්ධං සහඛාරිමදාසහං, අනුකම්පාය මෙ බුද්ධො ඉදං{3} වචනමබ්රවී:
5511. “ඛාරිභාරං ගහෙත්වාන පච්ඡතො එහි මෙ තුවං, පරිභුත්තෙ ච සඞ්ඝම්හි පුඤ්ඤං තව භවිස්සති.”
5512. පුටකං තං ගහෙත්වාන භික්ඛුසංඝස්සදාසහං, තත්ථ චිත්තං පසාදෙත්වා තුසිතං උපපජ්ජහං.
5513. තත්ථ දිබ්බෙහි නච්චෙහි ගීතෙහි වාදිතෙහි ච, පුඤ්ඤකම්මෙන සංයුත්තං අනුභොමි සදා සුඛං.
5514. යං යං යොනුපපජ්ජාමි දෙවත්තං අථ මානුසං, භොගෙ මෙ ඌනතා නත්ථි ඵලදානස්සිදං ඵලං.
5515. යාවතා චතුරො දීපා සසමුද්දා සපබ්බතා, ඵලං බුද්ධස්ස දත්වාන ඉස්සරං කාරයාමහං.
5516. යාවතා මෙ පක්ඛිගණා ආකාසෙ උප්පතන්ති ච, තෙපි මං වසමන්වෙන්ති ඵලදානස්සිදං ඵලං.
5517. යාවතා වනසණ්ඩස්මිං යක්ඛා භූතා ච රක්ඛසා, කුම්භණ්ඩා ගරුළා චාපි පාරිචරියං උපෙන්ති මෙ.
5518. කුම්මා සොණා මධුකරා ඩංසා ච මකසා උභො, තෙපි මං වසමන්වෙන්ති ඵලදානස්සිදං ඵලං.
5519. සුපණ්ණා නාම සකුණා පක්ඛිජාතා මහබ්බලා, තෙපි මං සරණං යන්ති ඵලදානස්සිදං ඵලං.
5520. යෙපි දීඝායුකා නාගා ඉද්ධිමන්තො මහායසා, තෙපි මෙ වසමන්වෙන්ති ඵලදානස්සිදං ඵලං.
5521. සීහා ව්යග්ඝා ච දීපි ච අච්ඡකොකතරච්ඡකා, තෙපි මෙ වසමන්වෙන්ති ඵලදානස්සිදං ඵලං.
5522. ඔසධි තිණවාසී ච යෙ ච ආකාසවාසිනො, සබ්බෙ මං සරණං යන්ති ඵලදානස්සිදං ඵලං.
5523. සුදුද්දසං සුනිපුණං ගම්භීරං සුප්පකාසිතං, ඵස්සයිත්වා විහරාමි ඵලදානස්සීදං ඵලං.
5524. විමොක්ඛෙ අට්ඨ ඵස්සිත්වා විහරාමි අනාසවො, ආතාපී නිපකො චාහං ඵලදානස්සිදං ඵලං.
5525. යෙ ඵලට්ඨා බුද්ධපුත්තා ඛීණදොසා මහායසා, අහමඤ්ඤතරො තෙසං ඵලදානස්සිදං ඵලං.
5526. අභිඤ්ඤාපාරමිං ගන්ත්වා සුක්කමූලෙන චොදිතො, සබ්බාසවෙ පරිඤ්ඤාය විහරාමි අනාසවො.
5527. තෙවිජ්ජා ඉද්ධිපත්තා ච බුද්ධපුත්තා මහායසා, දිබ්බසොතං සමාපන්නා තෙසමඤ්ඤතරො අහං.
5528. සතසහස්සෙ ඉතො කප්පෙ යං ඵලං අදදිං තදා, දුග්ගතිං නාභිජානාමි ඵලදානස්සිදං ඵලං.
5529. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5530. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5531. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සබ්බඵලදායකො ථෙරො ඉමා ගාථායො අභාසිත්ථාති.
සබ්බඵලදායකත්ථෙරස්ස අපදානං නවමං.
520. පදුමධාරකත්ථෙරාපදානං{*}
5532. හිමවන්තස්ස අවිදූරෙ රොමසො නාම පබ්බතො, බුද්ධොපි සම්භවො නාම අබ්භොකාසෙ වසී තදා.
5533. භවනා නික්ඛමිත්වාන පදුමං ධාරයිං අහං, එකාහං ධාරයිත්වාන භවනං පුනරාගමිං.
5534. එකතිංසෙ ඉතො කප්පෙ යං බුද්ධමභිපූජයිං, දුග්ගතිං නාභිජානාමි බුද්ධපූජායිදං ඵලං.
5535. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5536. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5537. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පදුමධාරකො ථෙරො ඉමා ගාථායො අභාසිත්ථාති.
පදුමධාරකත්ථෙරස්ස අපදානං දසමං.
ඵලදායකවග්ගො ද්විපඤ්ඤාසමො.
උද්දානං:
කුරඤ්ජියං කපිත්ථඤ්ච කොසුම්භමථ කෙතකං,{1} නාගපුප්ඵජ්ජුනං චෙව කුටජී ඝොසසඤ්ඤකො, ථෙරො ච සබ්බඵලදො තථා පදුමධාරකො{2}, අසීති චෙත්ථ ගාථායො තිස්සො ගාථා තදුත්තරි.
53. තිණදායකවග්ගො
521. තිණමුට්ඨිදායකත්ථෙරාපදානං
5538. හිමවන්තස්ස අවිදූරෙ ලම්බකො නාම පබ්බතො, තත්ථොපතිස්සො{1} සම්බුද්ධො අබ්භොකාසම්හි චඞ්කමි.
5539. මිගලුද්දො පුරෙ ආසිං අරඤ්ඤෙ කානනෙ අහං, දිස්වාන තං දෙවදෙවං තිණමුට්ඨිං අදාසහං.
5540. නිසීදනත්ථං බුද්ධස්ස දත්වා චිත්තං පසාදයිං, සම්බුද්ධමභිවාදෙත්වා පක්කාමිං උත්තරාමුඛො.
5541. අචිරං ගතමත්තං මං{2} මිගරාජා අහෙඨයි,{3} සීහෙන පාතිතො{4} සන්තො තත්ථ කාලකතො{5} අහං.
5542. ආසන්නෙ මෙ කතං කම්මං බුද්ධසෙට්ඨ අනාසවෙ, සුමුත්තො සරවෙගොව දෙවලොකං අගච්ඡහං.
5543. යූපො තත්ථ සුභො ආසි පුඤ්ඤකම්මාභිනිම්මිතො, සහස්සකණ්ඩො සතභෙණ්ඩු ධජාලු හරිතාමයො.
5544. පභා නිද්ධාවතෙ තස්ස සතරංසීව උග්ගතො, ආකිණ්ණො දෙවකඤ්ඤාහි ආමොදිං කාමකාමහං.{6}
5545. දෙවලොකා චවිත්වාන සුක්කමූලෙන චොදිතො, ආගන්ත්වාන මනුස්සත්තං පත්තොම්හි ආසවක්ඛයං.
5546. චතුනවුතෙ ඉතො කප්පෙ නිසීදනමදාසහං, දුග්ගතිං නාභිජානාමි තිණමුට්ඨිම්හිදං ඵලං.{7}
5547. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5548. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5549. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා තිණමුට්ඨිදායකො ථෙරො ඉමා ගාථායො අභාසිත්ථාති.
තිණමුට්ඨිදායකත්ථෙරස්ස අපදානං පඨමං.
522. මඤ්චදායකත්ථෙරාපදානං
5550. විපස්සිනො භගවතො ලොකජෙට්ඨස්ස තාදිනො, එකමඤ්චං{1} මයා දින්නං පසන්නෙන සපාණිනා.
5551. හත්ථියානං අස්සයානං දිබ්බයානං සමජ්ඣගං, තෙන මඤ්චකදානෙන පත්තොම්හි ආසවක්ඛයං.
5552. එකනවුතෙ ඉතො කප්පෙ යං මඤ්චකමදාසහං, දුග්ගතිං නාභිජානාමි මඤ්චදානස්සිදං ඵලං.
5553. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5554. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5555. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා මඤ්චදායකො{2} ථෙරො ඉමා ගාථායො අභාසිත්ථාති.
මඤ්චදායකත්ථෙරස්ස අපදානං දුතියං.
523. සරණගමනියත්ථෙරාපදානං{*}
5556. ආරුහිම්හ තදා නාවං භික්ඛු චාජීවකො ච’හං, නාවාය භිජ්ජමානාය භික්ඛු මෙ සරණං අදා.
5557. එකතිංසෙ ඉතො කප්පෙ යං සො මෙ සරණං අදා, දුග්ගතිං නාභිජානාමි සරණගමනෙ ඵලං.
5558. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5559. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5560. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සරණගමනියො ථෙරො ඉමා ගාථායො අභාසිත්ථාති.
සරණගමනියත්ථෙරස්ස අපදානං තතියං.
524. අබභඤ්ජනදායකත්ථෙරාපදානං
5561. නගරෙ බන්ධුමතියා රාජුය්යානෙ වසාමහං, චම්මවාසී තදා ආසිං කමණ්ඩලුධරො අහං.
5562. අද්දසං විමලං බුද්ධං සයම්භුං අපරාජිතං, පධානපහිතත්තං තං{1} ඣායිං ඣානරතං වසිං{2}
5563. සබ්බකාමසමිද්ධං ච ඔඝතිණ්ණමනාසවං, දිස්වා පසන්නො සුමනො අබ්භඤ්ජනමදාසහං.
5564. එකනවුතෙ ඉතො කප්පෙ යං දානමදදිං තදා, දුග්ගතිං නාභිජානාමි අබ්භඤ්ජනස්සිදං ඵලං.
5565. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
5566. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5567. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා අබ්භඤ්ජනදායකො ථෙරො ඉමා ගාථායො අභාසිත්ථාති.
අබ්භඤ්ජනදායකත්ථෙරස්ස අපදානං චතුත්ථං.
525. සුපටදායකත්ථෙරාපදානං
5568. දිවාවිහාරා නික්ඛන්තො විපස්සී ලොකනායකො, ලහුං සුපටකං{3} කත්වා කප්පං සග්ගම්හි මොදහං.
5569. එකනවුතෙ ඉතො කප්පෙ සුපටකං අදාසහං, දුග්ගතිං නාභිජානාමි සුපටස්ස ඉදං ඵලං.
5570. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5571. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.