5436. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා අජෙලිඵදායකො ථෙරො ඉමා ගාථායො අභාසිත්ථාති.
අජෙලිඵලදායකත්ථෙරස්ස අපදානං සත්තමං.
508. අමොදඵලියෙත්ථෙරාපදානං
5437. සුවණ්ණවණ්ණං සම්බුද්ධං ආහුතීනං පටිග්ගහං, රථියං පටිපජ්ජන්තං අමොදමදදිං ඵලං.
5438. එකනවුතෙ ඉතො කප්පෙ යං ඵලං අදදිං තදා, දුග්ගතිං නාභිජානාමි ඵලදානස්සිදං ඵලං.
5439. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5440. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5441. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා අමොදඵලියො ථෙරො ඉමා ගාථායො අභාසිත්ථාති.
අමොදඵලියත්ථෙරස්ස අපදානං අට්ඨමං.
509. තාලඵලදායකත්ථෙරාපදානං
5442. සතරංසී නාම භගවා සයම්භූ අපරාජිතො, විවෙකා වුට්ඨහිත්වාන ගොචරායාභිනික්ඛමි.
5443. ඵලහත්ථො අහං දිස්වා උපගච්ඡිං නරාසභං, පසන්නචිත්තො සුමනො තාලඵලමදාසහං.
5444. චතුනවුතෙ ඉතො කප්පෙ යං ඵලං අදදිං තදා, දුග්ගතිං නාභිජානාමි ඵලදානස්සිදං ඵලං.
5445. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5446. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5447. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා තාලඵලදායකො ථෙරො ඉමා ගාථායො අභාසිත්ථාති.
තාලඵලදායකත්ථෙරස්ස අපදානං නවමං.
510. නාළිකෙරදායකත්ථෙරාපදානං
5448. නගරෙ බන්ධුමතියා ආරාමිකො අහං තදා, අද්දසං විරජං බුද්ධං ගච්ඡන්තං අනිලඤ්ජසෙ.
5449. නාළිකෙරඵලං යඝ බුද්ධසෙට්ඨස්සදාසහං, ආකාසෙ ඨිතකො සන්තො පතිගණ්හී මහායසො.
5450. විත්තිසඤ්ජනනං මය්හං දිට්ඨධම්මසුඛාවහං, ඵලං බුද්ධස්ස දත්වාන විප්පසන්නෙන චෙතසා.
5451. අධිගච්ඡිං තදා පීතිං විපුලං ච සුඛුත්තමං, උප්පජ්ජතෙ ච රතනං නිබ්බත්තස්ස තහිං තහිං.
5452. එකනවුතෙ ඉතො කප්පෙ යං ඵලං අදදිං තදා, දුග්ගතිං නාභිජානාමි ඵලදානස්සිදං ඵලං.
5453. දිබ්බචක්ඛු විසුද්ධං මෙ සමාධිකුසලො අහං, අභිඤ්ඤාපාරමිප්පත්තො ඵලදානස්සිදං ඵලං.
5454. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5455. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5456. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා නාළිකෙරදායකො ථෙරො ඉමා ගාථායො අභාසිත්ථාති.
නාළිකෙරදායකත්ථෙරස්ස අපදානං දසමං.
උද්දානං:
කණිකාරෙකපත්තො ච කාසුමාරී තථාවටං, වාරඤ්ච මාතුලුඞ්ගඤ්ච අජෙලාමොදමෙව ච. තාලං තථා නාළිකෙරං ගාථායො ගණිතා විහ, එකං ගාථාසතං හොති ඌනාධිකවිවජ්ජිතං.
කණිකාරවග්ගො එකපඤ්ඤාසමො.
52. ඵලදායකවග්ගො
511. කුරඤ්ජියඵලදායකත්ථෙරාපදානං
5457. මිගලුද්දො පුරෙ ආසිං විපිනෙ විචරං අහං, අද්දසං විරජං බුද්ධං සබ්බධම්මානපාරගුං.
5458. කුරඤ්ජියඵලං ගය්හ බුද්ධසෙට්ඨස්ස’දාසහං, පුඤ්ඤක්ඛෙත්තස්ස වීරස්ස පසන්නො සෙහි පාණිහි.
5459. එකතිංසෙ ඉතො කප්පෙ යං ඵලං අදදිං තදා, දුග්ගතිං නාභිජානාමි ඵලදානස්සිදං ඵලං.
5460. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5461. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5462. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කුරඤ්ජියඵලදායකො ථෙරො ඉමා ගාථායො අභාසිත්ථාති.
කුරඤ්ජියඵලදායකත්ථෙරස්ස අපදානං පඨමං.
512. කපිත්ථඵලදායකත්ථෙරාපදානං
5463. සුවණ්ණවණ්ණං සම්බුද්ධං ආහුතීනං පටිග්ගහං, රථියා පටිපජ්ජන්තං කපිත්ථං අදදිං ඵලං.
5464. එකනවුතෙ ඉතො කප්පෙ යං ඵලං අදදිං තදා, දුග්ගතිං නාභිජානාමි ඵලදානස්සිදං ඵලං.
5465. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5466. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5467. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කපිත්ථඵලදායකො ථෙරො ඉමා ගාථායො අභාසිත්ථාති.
කපිත්ථඵලදායකත්ථෙරස්ස අපදානං දුතියං.
513. කොසුම්භඵලදායකත්ථෙරාපදානං
5468. කකුධං විලසන්තංව දෙවදෙවං නරාසභං, රථියං පටිපජ්ජන්තං කොසුම්භං අදදිං ඵලං.
5469. එකනවුතෙ ඉතො කප්පෙ යං ඵලං අදදිං තදා, දුග්ගතිං නාභිජානාමි ඵලදානස්සිදං ඵලං.
5470. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5471. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5472. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කොසුම්භඵලදායකො{1} ථෙරො ඉමා ගාථායො අභාසිත්ථාති.
කොසුම්භඵලදායකත්ථෙරස්ස{2} අපදානං තතියං.
514. කෙතකපුප්ඵියත්ථෙරාපදානං
5473. විනතානදියා තීරෙ විහාසි පුරිසුත්තමො, අද්දසං විරජං බුද්ධං එකග්ගං සුසමාහිතං.
5474. මධුගන්ධස්ස පුප්ඵෙන කෙතකස්ස අහං තදා, පසන්නචිත්තො සුමනො බුද්ධසෙට්ඨං අපූජයිං.
5475. එකනවුතෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
5476. කිලෙසා ඣාපිතා මය්හං භවා සබ්බෙ සමූහතා, නාගො ව බන්ධනං ඡෙත්වා විහරාමි අනාසවො.
5477. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5478. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කෙතකපුප්ඵියො ථෙරො ඉමා ගාථායො අභාසිත්ථාති.
කෙතකපුප්ඵියත්ථෙරස්ස අපදානං චතුත්ථං.
515. නාගපුප්ඵියත්ථෙරාපදානං
5479. සුවණ්ණවණ්ණං සම්බුද්ධං ආහුතීනං පටිග්ගහං, රථියං පටිපජ්ජන්තං නාගපුප්ඵං අපූජයිං.
5480. එකනවුතෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
5481. කිලෙසා ඣාපිතා මය්හං භවා සබ්බෙ සමූහතා, නාගො ව බන්ධනං ඡෙත්වා විහරාමී අනාසවො.
5482. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5483. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා නාගපුප්ඵියො ථෙරො ඉමා ගාථායො අභාසිත්ථාති.
නාගපුප්ඵියත්ථෙරස්ස අපදානං පඤ්චමං.
516. අජ්ජුනපුප්ඵියත්ථෙරාපදානං
5484. චන්දභාගානදීතීරෙ අහොසිං කින්නරො තදා, අද්දසං විරජං බුද්ධං සයම්භූං අපරාජිතං.
5485. පසන්නචිත්තො සුමනො වෙදජාතො කතඤ්ජලී, ගහෙත්වා අජ්ජුනං පුප්ඵං සයම්භුං අභිපූජයිං.
5486. තෙන කම්මෙන සුකතෙන චෙතනා පණිධීහි ච, ජහිත්වා කින්නරං දෙහං තාවතිංසමගච්ඡහං.
5487. ඡත්තිංසක්ඛත්තුං දෙවින්දො දෙවරජ්ජමකාරයිං, දසක්ඛත්තුං චක්කවත්තී මහාරජ්ජමකාරයිං.
5488. පදෙසරජ්ජං විපුලං ගණනාතො අසංඛියං, සුඛෙත්තෙ වපිතං බීජං සයම්භුස්මිං අහො{1} මම.
5489. කුසලං විජ්ජතෙ මය්හං පබ්බජිං අනගාරියං, පූජාරහො අහං අජ්ජ සක්යපුත්තස්ස සාසනෙ.
5490. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5491. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5492. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා අජ්ජුනපුප්ඵියො ථෙරො ඉමා ගාථායො අභාසිත්ථාති.
අජ්ජුනපුප්ඵියත්ථෙරස්ස අපදානං ඡට්ඨං.
517. කුටජපුප්ඵියත්ථෙරාපදානං
5493. හිමවන්තස්ස අවිදූරෙ චාවලො{1} නාමපබ්බතො, බුද්ධො සුදස්සනො නාම වසතෙ පබ්බතන්තරෙ.
5494. පුප්ඵං හෙමවතං ගය්හ වෙහාසං අගමාසහං, තත්ථද්දසාසිං සම්බුද්ධං ඔඝතිණ්ණමනාසවං.
5495. පුප්ඵං කුටජමාදාය සිරෙ කත්වාන අඤ්ජලිං,{2} බුද්ධස්ස අභිරොපෙසිං සයම්භුස්ස මහෙසිනො.
5496. එකංතිස්සෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
5497. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5498. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5499. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කුටජපුප්ඵියො ථෙරො ඉමා ගාථායො අභාසිත්ථාති.
කුටජපුප්ඵියත්ථෙරස්ස අපදානං සත්තමං.