මෙත්තෙය්යවග්ගදසකං.
පඤ්චමං සතකං සමත්තං.
51. කණිකාරවග්ගො
501. තිකණිකාරපුප්ඵියත්ථෙරාපදානං
5358. සුමෙධො නාම සම්බුද්ධො බත්තිංසවරලක්ඛණො, විවෙකකාමො භගවා හිමවන්තමුපාගමි.{1}
5359. අජ්ඣොගහෙත්වා හිවවන්තං අග්ගො කාරුණිකො මුනි, පල්ලඞ්කං ආභුජිත්වාන නිසීදි පුරිසුත්තමො.
5360. විජ්ජාධරෙ තදා ආසිං අන්තලික්ඛචරො අහං, තිසූලං සුකතං ගය්හ ගච්ඡාමි අම්බරෙ තදා.
5361. පබ්බතග්ගෙ යථා අග්ගි පුණ්ණමාසීව{2} චන්දිමා, වනෙ ඔභාසතෙ බුද්ධො සාලරාජාව ඵුල්ලිතො.
5362. වනග්ගා නික්ඛමිත්වාන බුද්ධරංසී විධාවරෙ,{3} නළග්ගිවණ්ණසඞ්කාසා දිස්වා චිත්තං පසාදයිං.
5363. විචිනං අද්දසං පුප්ඵං කණිකාරං දෙවගන්ධිකං, තීණි පුප්ඵානි ආදාය බුද්ධසෙට්ඨං අපූජයිං.
5364. බුද්ධස්ස ආනුභාවෙන තීණි පුප්ඵානි මෙ තදා, උද්ධ වණ්ටා අධොපත්තා ඡායං කුබ්බන්ති සත්ථුනො.
5365. තෙන කම්මෙන සුකතෙන චෙතනාපණිධීහි ච, ජහිත්වා මානුසං දෙහං තාවතිංසමගච්ඡහං.
5366. තත්ථ මෙ සුකතං ව්යහ්මං කණිකාරීති ඤායති, සට්ඨියොජනමුබ්බෙධං තිංසයොජනවිත්ථතං.
5367. සහස්සකණ්ඩං සතභෙණ්ඩු ධජාලු හරිතාමයං, සතසහස්සනිය්යුහා ව්යම්හෙ පාතුභවිංසු මෙ.
5368. සොණ්ණමයා මණිමයා ලොහිතඞ්කමයාපි ච, ඵලිකාපි ච පල්ලඞ්කා යෙනිච්ඡකා යදිච්ඡකා{1}.
5369. මහාරහඤ්ච සයනං තුලිකාවිකතීයුතං, උද්දලොමික{2} එකන්තං බිම්බොහනසමායුතං.
5370. භවනා නික්ඛමිත්වාන චරන්තො දෙවචාරිකං, යදා ඉච්ඡාමි ගමනං දෙවසඞ්ඝපුරක්ඛතො.
5371. පුප්ඵස්ස හෙට්ඨා තිට්ඨාමි උපරිච්ඡදනං මම, සමන්තා යොජනසතං කණිකාරෙහි ඡාදිතං.
5372. සට්ඨිතුරියසහස්සානි සායං පාතං උපට්ඨහුං, පරිවාරෙන්ති මං නිච්චං රත්තින්දිවමතන්දිතා.
5373. තත්ථ නච්චෙහි ගීතෙහි තාලෙහි වාදිතෙහි ච, රමාමි ඛිඩිඩාරතියා මොදාමි කාමකාමහං{3}.
5374. තත්ථ භුත්වා පිවිත්වා ච මොදාමි තිදසෙ තදා, නාරීගණෙහි සහිතො මොදාමි ව්යම්හමුත්තමෙ.
5375. සතානං පඤ්චක්ඛත්තුඤ්ච දෙවරජ්ජමකාරයිං, සතානං තීණික්ඛත්තුඤ්ච චක්කවත්තී අහොසහං, පදෙසරජ්ජං විපුලං ගණනාතො අසංඛියං.
5376. භවාභවෙ සංසරන්තො මහාභොගං ලභාමහං, භොගෙ මෙ ඌනතා නත්ථි බුද්ධපූජායිදං ඵලං.
5377. දුවෙ භවෙ සංසරාමි දෙවත්තෙ අථ මානුසෙ, අඤ්ඤං ගතිං න ජානාමි බුද්ධපූජායිදං ඵලං.
5378. දුවෙ කුලෙ පජායාමි ඛත්තියෙ චාපි බ්රාහ්මණෙ, නීචෙ කුලෙ න ජානාමි බුද්ධපූජායිදං ඵලං.
5379. හත්ථියානං අස්සයානං සිවිකං සන්දමානිකං, ලභාමි සබ්බමෙවෙතං බුද්ධපූජායිදං ඵලං.
5380. දාසිගණං දාසගණං නාරියො සමලඞ්කතා, ලභාමි සබ්බමෙවෙතං බුද්ධපූජායිදං ඵලං.
5381. කොසෙය්යකම්බලීයානි ඛොමකප්පාසිකානි ච, ලභාමි සබ්බමෙවතං බුද්ධපූජායිදං ඵලං.
5382. නවවත්ථං නවඵලං නවග්ගරසභොජනං, ලභාමි සබ්බමෙවතං බුද්ධපූජායිදං ඵලං.
5383. ඉමං ඛාද ඉමං භුඤ්ජ ඉමම්හි සයනෙ සය ලභාමි සබ්බමෙවතං බුද්ධපූජායිදං ඵලං.
5384. සබ්බත්ථ පූජිතො හොමි යසො අබ්භුග්ගතො මම, මහාපක්ඛො සදා හොමි අභෙජ්ජපරිසො සදා, ඤාතීනං උත්තමො හොමි බුද්ධපූජායිදං ඵලං.
5385. සීතං උණ්හං න ජානාමි පරිළාහො න විජ්ජති, අථො චෙතසිකං දුක්ඛං හදයෙ මෙ න විජ්ජති.
5386. සුවණ්ණවණ්ණො හුත්වාන සංසරාමි භවාභවෙ, වෙවණ්ණියං න ජානාමි බුද්ධපූජායිදං ඵලං.
5387. දෙවලොකා චවිත්වාන සුක්කමූලෙන චොදිතො, සාවත්ථියං පුරෙ ජාතො මහාසාලෙ සුඅඩ්ඪකෙ,
5388. පඤ්චකාමගුණෙ හිත්වා පබ්බජිං අනගාරියං, ජාතියා සත්තවස්සොහං අරහත්තමපාපුණිං.
5389. උපසම්පාදයි බුද්ධො ගුණමඤ්ඤාය චක්ඛුමා, තරුණො පූජනීයොහං බුද්ධපූජායිදං ඵලං.
5390. දිබ්බචක්ඛු විසුද්ධං මෙ සමාධිකුසලො අහං, අභිඤ්ඤාපාරමිප්පත්තො බුද්ධපූජායිදං ඵලං.
5391. පටිසම්භිදා අනුප්පත්තො ඉද්ධිපාදෙසු කොවිදො, ධම්මෙසු පාරමිප්පත්තො බුද්ධපූජායිදං ඵලං.
5392. තිංසකප්පසහස්සම්හි යං බුද්ධමභිපූජයිං, දුග්ගතිං නාභිජානාමි බුද්ධපූජායිදං ඵලං.
5393. කිලෙසා ඣාපිතා මය්හං භවා සබ්බෙ සමූහතා, නාගො ව බන්ධනං ඡෙත්වා විහරාමි අනාසවො.
5394. ස්වාගතං වත මෙ ආසි බුද්ධසෙට්ඨස්ස සන්තිකෙ,{1} තිස්සො විජ්ජා අනුප්පත්තා කතං බුද්ධස්ස සාසනං.
5395. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා තිකණිකාරපුප්ඵියො ථෙරො ඉමා ගාථායො අභාසිත්ථාති.
තිකණිකාරපුප්ඵියත්ථෙරස්ස අපදානං පඨමං.
502. එකපත්තදායකත්ථෙරාපදානං
5396. නගරෙ හංසවතියා කුම්භකාරො අහොසහං, අද්දසං විරජං බුද්ධං ඔඝතිණ්ණමනාසවං.
5397. සුකතං මත්තිකාපත්තං බුද්ධසෙට්ඨස්ස’දාසහං, පත්තං දත්වා භගවතො උජුභූතස්ස තාදිනො.
5398. භවෙ නිබ්බත්තමානොහං සොණ්ණථාලෙ ලභාමහං, රූපිමයෙ ච සොවණ්ණෙ තටිටිකෙ ච මණීමයෙ.
5399. පාතියො පරිභුඤ්ජාමි පුඤ්ඤකම්මස්සිදං ඵලං, යසානඤ්ච ධනානඤ්ච{1} පත්තභූතො{2} ච හොමහං.
5400. යථාපි භද්දකෙ ඛෙත්තෙ බීජමප්පම්පි රොපිතං, සම්මා ධාරෙ{3} පවෙච්ඡන්තෙ ඵලං තොසෙති කස්සකං.
5401. තථෙවිමං{4} පත්තදානං බුද්ධක්ඛෙත්තම්හි රොපිතං, පීතිධාරෙ පවස්සන්තෙ ඵලං මං තොසයිස්සති.
5402. යාවතා ඛෙත්තා විජ්ජන්ති සඞ්ඝාපි ච ගණාපි ච, බුද්ධක්ඛෙත්තසමො නත්ථි සුඛදො සබ්බපාණිනං.
5403. නමො තෙ පුරිසාජඤ්ඤ නමො තෙ පුරිසුත්තම, එකපත්තං දදිත්වාන පත්තොම්හි අචලං පදං.
5404. එකනවුතෙ ඉතො කප්පෙ යං පත්තමදදිං තදා, දුග්ගතිං නාභිජානාමි පත්තදානස්සිදං ඵලං.
5405. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5406. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5407. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා එකපත්තදායකො ථෙරො ඉමා ගාථායො අභාසිත්ථාති.
එකපත්තදායකත්ථෙරස්ස අපදානං දුතියං.
503. කාසුමාරිඵලදායකත්ථෙරාපදානං{*}
5408. කණිකාරං’ව ජොතන්තං නිසින්නං පබ්බතන්තරෙ, අද්දසං විරජං බුද්ධං ලොකජෙට්ඨං නරාසභං.
5409. පසන්නචිත්තො සුමනො සිරෙ කත්වාන අඤ්ජලිං, කාසුමාරිකමාදාය බුද්ධසෙට්ඨස්ස’දාසහං.
5410. එකතිංසෙ ඉතො කප්පෙ යං ඵලං අදදිං තදා, දුග්ගතිං නාභිජානාමි ඵලදානස්සිදං ඵලං.
5411. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5412. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5413. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කාසුමාරිඵලදායකො ථෙරො ඉමා ගාථායො අභාසිත්ථාති.
කාසුමාරිඵලදායකත්ථෙරස්ස අපදානං තතියං.
504. අවටඵලියත්ථෙරාපදානං
5414. සහස්සරංසී භගවා සයම්භු අපරාජිතො, විවෙකා වුට්ඨහිත්වාන ගොචරායාභිනික්ඛමි.
5415. ඵලහත්ථො අහං දිස්වා උපගච්ඡිං නරාසභං, පසන්නචිත්තො සුමනො අවටං අදදිං ඵලං.
5416. චතුනවුතෙ ඉතො කප්පෙ යං ඵලං අදදිං තදා, දුග්ගතිං නාභිජානාමි ඵලදානස්සිදං ඵලං.
5417. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5418. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5419. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා අවටඵලියො ථෙරො ඉමා ගාථායො අභාසිත්ථාති.
අවටඵලියත්ථෙරස්ස අපදානං චතුත්ථං.
505. වාරඵලියත්ථෙරාපදානං{*}
5420. සුවණ්ණවණ්ණං සම්බුද්ධං ආහුතීනං පටිග්ගහං, රථියං පටිපජ්ජන්තං වාරඵලමදාසහං.{1}
5421. එකනවුතෙ ඉතො කප්පෙ යං ඵලං අදදිං තදා, දුග්ගතිං නාභිජානාමි ඵලදානස්සිදං ඵලං.
5422. කිලෙසා ඣාපිතා මය්හං භවා සබ්බෙ සමූහතා, නාගො ව බන්ධනං ඡෙත්වා විහරාමි අනාසවො.
5423. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5424. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා වාරඵලියො ථෙරො ඉමා ගාථායො අභාසිත්ථාති.
වාරඵලියත්ථෙරස්ස අපදානං පඤ්චමං.
506. මාතූලුඞ්ගඵලදාකත්ථෙරාපදානං
5425. කණිකාරංව ජලිතං පුණ්ණමාසෙව චන්දිමං, ජලන්තං දීපරුක්ඛං ව අද්දසං ලොකනායකං.
5426. මාතුලුඞ්ගඵලං ගය්හ අදාසිං සත්ථුනො අහං, දක්ඛිණෙය්යස්ස ධීරස්ස පසන්නො සෙහි පාණිහි.
5427. එකතිංසෙ ඉතො කප්පෙ යං ඵලං අදදිං තදා, දුග්ගතිං නාභිජානාමි ඵලදානස්සිදං ඵලං.
5428. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5429. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5430. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා මාතුලුඞ්ගඵලදායකො ථෙරො ඉමා ගාථායො අභාසිත්ථාති.
මාතුලුඞ්ගඵලදායකත්ථෙරස්ස අපදානං ඡට්ඨං.
507. අජෙලිඵලදායකත්ථෙරාපදානං
5431. අජ්ජුනො නාම සම්බුද්ධො හිමවන්තෙ වසී තදා, චරණෙන ච සම්පන්නො සමාධිකුසලො මුනි.
5432. කුම්භමත්තං ගහෙත්වාන අජෙලිං ජීවජීවකං, ඡත්තපණ්ණං ගහෙත්වාන අදාසිං සත්ථුනො අහං.
5433. චතුනවුතෙ ඉතො කප්පෙ යං ඵලං අදදිං තදා, දුග්ගතිං නාභිජානාමි ඵලදානස්සිදං ඵලං.
5434. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5435. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.