5280. නගරෙ හංසවතියා පරෙසං භතකො අහං, උපඩ්ඪදුස්සං දත්වාන සිරසා අභිවාදයිං.
5281. තෙන කම්මෙන සුකතෙන චෙතනාපණීධිහි ච, ජහිත්වා මානුසං දෙහං තාවතිංසමගච්ඡහං.
5282. තෙත්තිංසක්ඛත්තුං දෙවින්දො දෙවරජ්ජමකාරයි, සත්තසත්තතික්ඛත්තුඤ්ච චක්කවත්ති අහොසහං.
5283. පදෙසරජ්ජං විපුලං ගණනාතො අසඞ්ඛියං, උපඩ්ඪදුස්සදානෙන මොදාමි අකුතොභයො.
5284. ඉච්ඡමානො චහං අජ්ජ සකානනං සපබ්බතං, ඛොමදුස්සෙහි ඡාදෙය්යං අඩ්ඪදුස්සස්සිදං ඵලං.
5285. සතසහස්සෙ ඉතො කප්පෙ යං දානමදදිං තදා, දුග්ගතිං නාභිජානාමි අඩ්ඪදුස්සස්සිදං ඵලං.
5286. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5287. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5288. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා උපඩ්ඪදුස්සදායකො ථෙරො ඉමා ගාථායො අභාසිත්ථාති.
උපඩ්ඪදුස්සදායකත්ථෙරස්ස අපදානං පඤ්චමං.
496. ඝතමණ්ඩදායකත්ථෙරාපදානං
5289. සුචින්තිතං භගවන්තං ලොකජෙට්ඨං නරාසභං, උපවිට්ඨං මහාරඤ්ඤං{1} වාතාබාධෙන පීළිතං. දිස්වා චිත්තං පසාදෙත්වා ඝතමණ්ඩං උපානයිං.{2}
5290. කතත්තා ආචිතත්තා ච{3} ගඞ්ගා භාගීරථී{4} අයං, මහාසමුද්දා චත්තාරො ඝතං සම්පජ්ජරෙ මම.
5291. අයං ච පඨවී ඝොරා අප්පමාණා අසංඛියා, මම සඞ්කප්පමඤ්ඤාය භවතෙ මධුසක්ඛරා.{5}
5292. චාතුද්දිපා ඉමෙ රුක්ඛා පාදපා ධරණීරුහා, මම සඞ්කප්පමඤ්ඤාය කප්පරුක්ඛා භවන්ති තෙ.
5293. පඤ්ඤාසක්ඛත්තුං දෙවින්දො දෙවරජ්ජමකාරයිං, එකපඤ්ඤාසක්ඛත්තුඤ්ච චක්කවත්තී අහොසහං. පදෙසරජ්ජං විපුලං ගණනාතො අසංඛියං.
5294. ඡන්නවුතෙ ඉතො{6} කප්පෙ යං දානමදදිං තදා, දුග්ගතිං නාභිජානාමි ඝතමණ්ඩස්සිදං ඵලං.
5295. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
5296. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5297. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ඝතමණ්ඩදායකො ථෙරො ඉමා ගාථායො අභාසිත්ථාති.
ඝතමණ්ඩදායකත්ථෙරස්ස අපදානං ඡට්ඨං.
497. උදකදායකත්ථෙරාපදානං
5298. පදුමුත්තරබුද්ධස්ස භික්ඛුසඞ්ඝෙ අනුත්තරෙ, පසන්නචිත්තො සුමනො පානීයඝටමපූජයිං{1}.
5299. පබ්බතග්ගෙ දුමග්ගෙ වා ආකාසෙ වාථ භූමියං, යදා පනීයමිච්ඡාමි ඛිප්පං නිබ්බත්තතෙ මම.
5300. සතසහස්සෙ ඉතො කප්පෙ යං දානමදදිං තදා, දුග්ගතිං නාභිජානාමි දාකදානස්සිදං{2} ඵලං.
5301. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
5302. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5303. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා උදකදායකො ථෙරො ඉමා ගාථායො අභාසිත්ථාති.
උදකදායකත්ථෙරස්ස අපදානං සත්තමං.
498. පුලිනථූපියත්ථෙරාපදානං
5304. හිමවන්තස්ස අවිදූරෙ යමකො නාම පබ්බතො, අස්සමො සුකතො මය්හං පණ්ණසාලා සුමාපිතා.
5305. නාරදො නාම නාමෙන ජටිලො උග්ගතාපනො, චතුද්දසසහස්සානි සිස්සා පරිචරන්ති මං.
5306. පටිසල්ලීනකො සන්තො එවං චින්තෙසහං තදා: සබ්බො ජනො මං පූජෙති නාහං පූජෙමි කිඤ්චනං.
5307. න මෙ ඔවාදකො අත්ථි වත්තා කොචි න විජ්ජති, අනාචරියුපජ්ඣායො වනෙ වාසං උපෙමහං.
5308. උපාසමානො යමහං ගරුචිත්තං උපට්ඨහෙ, සො මෙ ආචරියො නත්ථි වනවාසො නිරත්ථකො.
5309. ආයාගම්මෙ ගවෙසිස්සං ගරුං භාවනියං තථා, සාවස්සයො වසිස්සාමි න කොචි ගරහිස්සති.
5310. උත්තානකූලා නදිකා සුපතිත්ථා මනොරමා, සුසුද්ධපුලිනාකිණ්ණා අවිදූරෙ මමස්සමං.
5311. නදිං අමරිකං නාම උපගන්ත්වානහං තදා, සංවඩ්ඪයිත්වා පුලිනං අකං පුලිනචෙතියං.
5312. යෙ තෙ අහෙසුං සම්බුද්ධා භවන්තකරණා මුනී, තෙසං එතාදිසො ථූපො තන්තිමිත්තං කරොමහං.
5313. කරිත්වා පුලිනං{1} ථූපං සොවණ්ණං මාපයිං අහං, සොණ්ණකිඞ්කණිපුප්ඵානං{2} සහස්සෙ තීණි පූජයිං.
5314. සායං පාතං නමස්සාමි වෙදජාතො කතඤ්ජලී, සම්මුඛා විය සම්බුද්ධා වන්දිං පුලිනචෙතියං.
5315. යදා කිලෙසා ජායන්ති විතක්කා ගෙහනිස්සිතා, සරාමි සුගතං{3} ථූපං පච්චවෙක්ඛාමි තාවදෙ.
5316. උපනිස්සාය විහරං සත්ථවාහං විනායකං, කිලෙසෙ සංවසෙය්යාසි න යුත්තං තව මාරිස.
5317. සහ ආවජ්ජිතෙ ථූපෙ ගාරවං හොති මෙ තදා, කුවිතක්කෙ විනොදෙමි{4} නාගො තුත්තට්ටිතො යථා.
5318. එවං විහරමානං මං මච්චුරාජාභිමද්දථ, තත්ථ කාලකතො{5} සන්තො බ්රහ්මලොකං අගච්ඡහං.{6}
5319. යාවතායුං වසිත්වාන තිදසෙ උපපජ්ජහං, අසීතික්ඛත්තුං දෙවින්දො දෙවරජ්ජමකාරයිං.
5320. සතානං තීණික්ඛත්තුඤ්ච චක්කවත්තී අහොසහං, පදෙසරජ්ජං විපුලං ගණනාතො අසංඛියං.
5321. තෙසං කිඞ්කණිපුප්ඵානං{1} විපාකං අනුභොමහං, ධාතීසතසහස්සානි පරිවාරෙන්ති මං භවෙ.
5322. ථූපස්ස පරිචිණ්ණත්තා රජොජල්ලං න ලිම්පති, ගත්තෙ සෙදා න මුච්චන්ති සප්පභාසො{2} භවාමහං.
5323. අහො මෙ සුකතො ථූපො සුදිට්ඨාමරිකා නදී, ථූපං කත්වාන පුලිනං{3} පත්තොම්හි අචලං පදං.
5324. කුසලං කත්තුකාමෙන ජන්තුනා සරගාහිනා, නත්ථි ඛෙත්තං අඛෙත්තං වා පටිපත්තීව සාධකා{4}.
5325. යථාපි බලවා පොසො අණ්ණවං තරිතුස්සහෙ, පරිත්තං කට්ඨමාදාය පක්කඛන්දෙය්ය මහාසරං:
5326. ඉමාහං කට්ඨං නිස්සාය තරිස්සාමි මහොදධිං, උස්සාහෙන ච විරියෙන තරෙය්ය උදධිං නරො.
5327. තථෙව මෙ කතං කම්මං පරිත්තං ථොකකඤ්ච යං, තං කම්මං උපනිස්සාය සංසාරං සමතික්කමිං.
5328. පච්ඡිමෙ භවෙ සම්පත්තෙ සුක්කමූලෙන චොදිතො, සාවත්ථියං පුරෙ ජාතො මහාසාලෙ සුඅඩ්ඪකෙ.
5329. සද්ධා මාතාපිතා මය්හං බුද්ධස්ස සරණං ගතා, උභො දිට්ඨපදා එතෙ අනුවත්තන්ති සාසනං.
5330. බොධිපපටිකං ගය්හ සොණ්ණථූපං අකාරයුං, සායංපාතං නමස්සන්ති සක්යපුත්තස්ස සම්බුඛා.
5331. උපොසථම්හි දිවසෙ සොණ්ණථූපං විනීහරුං, බුද්ධස්ස වණ්ණං කිත්තෙන්තා තියාමං වීතිනාමයුං.
5332. සහ දිස්වානහං ථූපං සරිං පුලිනචෙතියං, එකාසනෙ නිසීදිත්වා අරහත්තමපාපුණිං.
(ද්වාවීසතිමං භාණවාරං.)
5333. ගවෙසමානො තං වීරං ධම්මසෙනාපතිද්දසං, අගාරා නික්ඛමිත්වාන පබ්බජිං තස්ස සන්තිකෙ.
5334. ජාතියා සත්තවස්සෙන අරහත්තමපාපුණිං, උපසම්පාදයී බුද්ධො ගුණමඤ්ඤාය චක්ඛුමා
5336. දාරකෙනෙව සන්තෙන කිරියං නිට්ඨිතං මයා, කතං මෙ කරණීයජ්ජ සක්යපුත්තස්ස සාසනෙ.
5337. සබ්බවෙරභයාතීතො සබ්බසඞ්ගාතිගො ඉසි, සාවකො තෙ මහාවීර සොණ්ණපුප්ඵස්සසිදං ඵලං.
5338. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5339. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5340. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පිලිනථූපියො ථෙරො ඉමා ගාථායො අභාසිත්ථාති.
පුලිනථූපියත්ථෙරස්ස අපදානං අට්ඨමං.
499. නළකුටිදායකත්ථෙරාපදානං
5341. හිමවන්තස්ස අවිදූරෙ හාරිතො නාම පබ්බතො, සයම්භූ නාරදො නාම රුක්ඛමූලෙ වසී තදා.
5342. නළාගාරා කරිත්වාන තිණෙන ඡාදයිං අහං, චඞ්කමං සොධයිත්වාන සයම්භූස්ස අදාසහං.
5343. තෙන කම්මෙන සුකතෙන චෙතනාපණිධීහි ච, ජහිත්වා මානුසං දෙහං තාවතිංසමගච්ඡහං.
5344. තත්ථ මෙ සුකතං ව්යම්භං නළකුටිකාය නිම්මිතං, සට්ඨියොජනමුබ්බෙධං තිංසයොජනවිත්ථතං.
5345. චතුද්දසසු කප්පෙසු දෙවලොකෙ රමිං අහං, එකසත්තතික්ඛත්තුඤ්ච දෙවරජ්ජමකාරයිං.
5346. චතුත්තිංසක්ඛත්තුඤ්ච චක්කවත්තී අහොසහං, පදෙසරජ්ජං විපුලං ගණනාතො අසංඛියං.
5347. ධම්මපාසාදමාරුය්හ සබ්බාකාරවරූපමං, යදිච්ඡකාහං විහරෙ සක්යපුත්තස්ස සාසනෙ.
5348. එකතිංසෙ ඉතො කප්පෙ යං කම්මමකරිං තදා, දුග්ගතිං නාභිජානාමි නළකුටියා ඉදං ඵලං.
5349. කිලෙසා ඣාපිතා මය්හං භවා සබ්බෙ සමූහතා, නාගො ව බන්ධනං ඡෙත්වා විහරාමි අනාසවො.
5350. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5351. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා නළකුටිදායකො ථෙරො ඉමා ගාථායො අභාසිත්ථාති.
නළකුටිදායකත්ථෙරස්ස අපදානං නවමං.
500. පියාලඵලදායකත්ථෙරාපදානං
5352. මිගලුද්දො පුරෙ ආසි විපිනෙ විචරං තදා, අද්දසං විරජං බුද්ධං සබ්බධම්මානපාරගුං.
5353. පියාලඵලමාදාය බුද්ධසෙට්ඨස්සදාසහං, පුඤ්ඤක්ඛෙත්තස්ස වීරස්ස පසන්නො සෙහි පාණිහි.
5354. එකතිංසෙ ඉතො කප්පෙ යං ඵලං අදදිං තදා, දුග්ගතිං නාභිජානාමි ඵලදානස්සිදං ඵලං.
5355. කිලෙසා ඣාපිතා මය්හං භාවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5356. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5357. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පියාලඵලදායකො ථෙරො ඉමා ගාථායො අභාසිත්ථාති.
පියාලඵලදායකත්ථෙරස්ස අපදානං දසමං.
තිකිඞ්කණිපුප්ඵියවග්ගො පඤ්ඤාසමො.
උද්දානං:
කිඞ්කණි පංසුකූලඤ්ච කොරණ්ඩමථ කිංසුකං උපඩ්ඪදුස්සී ඝතදො උදකං ථූපකාරකො නළාගාරී ච නවමො පියාලඵලදායකො. සතං එකං ච ගාථානං නවකඤ්ච තදුත්තරිං.
අථ වග්ගුද්දානං:
මෙත්තෙය්යවග්ගො භද්දාලි සකිංසම්මජ්ජකො පි ච එකවිහාරී වීභීටකී ජගතී සාලපුප්ඵියො නළාගාරං පංසුකූලං කිඞ්කණිපුප්ඵියො තථා. අසීති ද්වෙ ච ගාථායො චතුද්දසසතානි ච.