5202. සංවුතො පාතිමොක්ඛස්මිං ඉන්ද්රියෙසු ච පඤ්චසු, සුද්ධාජීවො සතො වීරො ජිනසාසනකාරකො.
5203. එවං විහරමානොහං පාපමිත්තෙන කෙනචි, නියොජිතො අනාචාරෙ සුමග්ගා පරධංසිතො.
5204. විතක්කවසිකො හුත්වා සාසනාතො{3} අපක්කමිං, පච්ඡා තෙන කුමිත්තෙන පයුත්තො මාතුඝාතනං.
5205. අකරිං ආනන්තරියං ඝාතයිං දුට්ඨමානසො, තතො චුතො මහාවීචිං උපපන්නො සුදාරුණං.
5206. විනිපාතගතො සන්තො සඤ්චරිං දුක්ඛිතො චිරං, න පුනො අද්දසං වීරං සුමෙධං නරපුඞ්ගවං.
5207. අස්මිං කප්පෙ සමුද්දම්හි මච්ඡො ආසිං තිමිඞ්ගලො, දිස්වාහං සාගරෙ නාවං ගොචරත්ථමුපාගමිං.
5208. දිස්වා මං වාණිජා භීතා බුද්ධසෙට්ඨමනුස්සරුං. ගොතමොති මහාඝොසං සුත්වා තෙහි උදීරිතං,
5209. පුබ්බසඤ්ඤං සරිත්වාන තතො කාලකතො{1} අහං, සාවත්ථියං කුලෙ ඉද්ධෙ ජාතො බ්රාහ්මණජාතියං.
5210. ආසිං ධම්මරුචි නාම සබ්බපාපජිගූච්ඡකො, දිස්වාහං ලොකපජ්ජොතං ජාතියා සත්තවස්සිකො.
5211. මහාජෙතවනං ගන්ත්වා පබ්බජිං අනගාරියං, උපෙමි බුද්ධං තික්ඛත්තුං රත්තියා දිවසස්ස ච.
5212. තදා දිස්වා මුනී ආහ චිරං ධම්මරුචීති මං, තතොහං අවචං බුද්ධං පුබ්බකම්මපභාවිතං:
5213. “සුචිරං සතපුඤ්ඤලක්ඛණං පතිපුබ්බෙන විසුද්ධපච්චයං අහමජ්ජ සුපෙක්ඛනං වත තව පස්සාමි නිරූපවිග්ගහං{2}
5214. සුචිරං විහතත්තමො තයා සුචිරක්ඛෙන නදී විසොසිතා සුචිරං අමලං විසොධිතං නයනං ඤාණමයං මහාමුනෙ.
5215. චිරකාලං සමඞ්ගිතො{3} තයා න විනට්ඨො{4} පුනරන්තරං චිරං, පුනරජ්ජ සමාගතො තයා න හි නස්සන්ති කතානි ගොතම.”
5216. කිලෙසා ඣාපිතා මය්හං භවා සබ්බෙ සමූහතා, නාගො ව බන්ධනං ඡෙත්වා විහරාමි අනාසවො.
5217. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5218. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ධම්මරුචිත්ථෙරො ඉමා ගාථායො අභාසිත්ථාති.
ධම්මරුචිත්ථෙරස්ස අපදානං නවමං.
490. සාලමණ්ඩපියත්ථෙරාපදානං
5219. අජ්ඣොගහෙත්වා සාලවනං සුකතො අස්සමො මම, සාලපුප්ඵෙහි සඤ්ඡන්නො වසාමි විපිනෙ තදා.
5220. පියදස්සී ච භගවා සයම්භූ අග්ගපුග්ගලො, විවෙකකාමො සම්බුද්ධො සාලවනමුපාගමී.
5221. අස්සමා අභිනික්ඛම්ම පවනං අගමාසහං, මූලඵලං ගවෙසන්තො ආහිණ්ඩාමි වනෙ තදා.
5222. තත්ථද්දසාසිං සම්බුද්ධං පියදස්සිං මහායසං, සුනිසින්නං සමාපන්නං විරොචන්තං මහාවනෙ.
5223. චතුදණ්ඩෙ ඨපෙත්වාන බුද්ධස්ස උපරී අහං, මණ්ඩපං සුකතං කත්වා සාලපුප්ඵෙහි ඡාදයිං.
5224. සත්තාහං ධාරයිත්වාන මණ්ඩපං සාලඡාදිතං, තත්ථ චිත්තං පසාදෙත්වා බුද්ධසෙට්ඨං අවන්දහං.{1}
5225. භගවා තම්හි සමයෙ වුට්ඨහිත්වා සමාධිතො, යුගමත්තං පෙක්ඛමානො නිසීදි පුරිසුත්තමො.
5226. සාවකො වරුණො නාම පියදස්සිස්ස සත්ථුනො, වසීසතසහස්සෙහි උපගච්ඡි විනායකං.
5227. පිදස්සී ච භගවා ලොකජෙට්ඨො නරාසභො, භික්ඛුසඞ්ඝෙ නිසීදිත්වා සිතං පාතුකරී ජිනො.
5228. අනුරුද්ධො උපට්ඨාකො පියදස්සිස්ස සත්ථුනො, එකංසං චීවරං කත්වා අපුච්ඡිත්ථ මහාමුනිං:
5229. කො නු ඛො භගවා හෙතු සිතකම්මස්ස සත්ථුනො, කාරණෙ විජ්ජමානම්හි සත්ථා පාතුකරෙ සිතං.
5230. “සත්තාහං පුප්ඵඡදනං{2} යො මෙ ධාරෙසි මාණවො, තස්ස කම්මං සරිත්වාන සීතං පාතුකරිං අහං.
5231. ඔකාසාහං{3} න පස්සාමි යත්ථ{4} පුඤ්ඤං විපච්චති, දෙවලොකෙ මනුස්සෙ වා ඔකාසො ච{5} න සම්මති.
5232. දෙවලොකෙ වසන්තස්ස පුඤ්ඤකම්මසමඞ්ගිනො, යාවතා පරිසා තස්ස සාලච්ඡන්නා භවිස්සති.
5233. තත්ථ දිබ්බෙහි නච්චෙහි ගීතෙහි වාදිතෙහි ච, රමිස්සති සදා සන්තො පුඤ්ඤකම්මසමාහිතො.
5234. යාවතා පරිසා තස්ස ගන්ධගන්ධී භවිස්සති, සාලස්ස පුප්ඵවස්සො ච පවස්සිස්සති තාවදෙ.
5235. තතො චුතොයං මනුජො මානුසං ආගමිස්සති, ඉධාපි සාලච්ඡදනං සබ්බකාලං ධරීයති.
5236. ඉධ නච්චඤ්ච ගීතඤ්ච සම්මතාලසමාහිතං, පරිවාරෙස්සන්තිමං නිච්චං බුද්ධපූජායිදං ඵලං.
5237. උග්ගච්ඡන්තෙ ච සුරියෙ සාලවස්සං පවස්සති, පුඤ්ඤකම්මෙන සංයුත්තං වස්සතෙ සබ්බකාලිකං.
5238. අට්ඨාරසෙ කප්පසතෙ ඔක්කාකකුලසම්භවො, ගොතමො නාම නාමෙන{1} සත්ථා ලොකෙ භවිස්සති.
5239. තස්ස ධම්මෙසු දායාදො ඔරසො ධම්මනිම්මිතො, සබ්බාසවෙ පරිඤ්ඤාය නිබ්බායිස්සතනාසවො.
5240. ධම්මං අභිසමෙන්තස්ස සාලච්ඡදනං භවිස්සති, චිතකෙ ඣායමානස්ස ඡදනං තත්ථ හෙස්සති.”
5241. විපාකං කිත්තයිත්වාන පියදස්සීමහාමුනි, පරිසාය ධම්මං දෙසෙසි තප්පෙන්තො ධම්මවුට්ඨියා.
5242. තිංසකප්පානි දෙවෙසු දෙවරජ්ජමකාරයිං, සට්ඨි ච සත්තක්ඛත්තුඤ්ච චක්කවත්තී අහොසහං.
5243. දෙවලොකා ඉධාගන්ත්වා ලභාමි විපුලං සුඛං, ඉධාපිසාලච්ඡදනං හෙස්සති සබ්බකාලිකං.
5244. මහාමුනිං තොසයිත්වා ගොතමං සක්යපුඞ්ගවං, පත්තොම්හි අචලං ඨානං හිත්වා ජයපරාජයං.
5245. අට්ඨාරසෙ කප්පසතෙ යං බුද්ධමභිපූජයිං, දුග්ගතිං නාභිජානාමි බුද්ධපූජායිදං ඵලං.
5246. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5247. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5248. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සාලමණ්ඩපියො ථෙරො ඉමා ගාථායො අභාසිත්ථාති.
සාලමණ්ඩපියත්ථෙරස්ස අපදානං දසමං.
උද්දානං:
පංසුකූල බුද්ධසඤ්ඤි භිසදො ඤාණකිත්තකො චන්දනී ධාතුපූජී ච පුලිනුප්පාදකො පිච තරණො ධම්මරුචිකො සාලමණ්ඩපියො තථා ගාථාසතානි ද්වෙ හොන්ති{1} ඌනවීසති එව ච.
පංසුකුලවග්ගො එකුනපඤ්ඤාසමො.
50. තිකිඞ්කණිපුප්ඵියවග්ගො
491. තිකිඞ්කණිපුප්ඵියත්ථෙරාපදානං
5249. කණිකාරංව ජොතන්තං නිසින්නං පබ්බතන්තරෙ, අද්දසං විරජං බුද්ධං විපස්සිං ලොකනායකං.
5250. තීණි කිඞ්කණිපුප්ඵානි පග්ගය්හ අභිරොපයිං, සම්බුද්ධමභිපූජෙත්වා ගච්ඡාමි දක්ඛිණාමුඛො.
5251. තෙන කම්මෙන සුකතෙන චෙතනාපණිධීහි ච, ජහිත්වා මානුසං දෙහං තාවතිංසමගච්ඡහං.
5252. එකනවුතෙ ඉතො කප්පෙ යං බුද්ධමභිපූජයිං, දුග්ගතිං නාභිජානාමි බුද්ධපූජායිදං ඵලං.
5253. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5254. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5255. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා තිකිඞ්කණිපුප්ඵියො ථෙරො ඉමා ගාථායො අභාසිත්ථාති.
තිකිඞ්කණිපුප්ඵියත්ථෙරස්ස අපදානං පඨමං.
492. පංසුකූලපූජකත්ථෙරාපදානං
5256. හිමවන්තස්ස අවිදූරෙ උදඞ්ගණො නාම පබ්බතො, තත්ථද්දසං පංසුකූලං දුමග්ගම්හි විලම්බිතං.
5257. තීණි කිඞ්කණිපුප්ඵානි ඔචිනිත්වානහං තදා, හට්ඨො හට්ඨෙන චිත්තෙන පංසුකූලං අපූජයිං.
5258. තෙන කම්මෙන සුකතෙන චෙතනාපණිධීහි ච, ජහිත්වා මානුසං දෙහං තාවතිංසමගච්ඡහං.
5259. එකනවුතෙ ඉතො කප්පෙ යං කම්මමකරිං තදා, දුග්ගතිං නාභිජානාමි පූජෙත්වා අරහද්ධජං.
5260. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5261. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5262. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පංසුකූලපූජකො ථෙරො ඉමා ගාථායො අභාසිත්ථාති.
පංසුකූලපූජකත්ථෙරස්ස අපදානං දුතියං.
493. කොරණ්ඩපුප්ඵියත්ථෙරාපදානං
5263. වනකම්මිකො පුරෙ ආසිං පිතුපිතාමහෙනහං{1}, පසුමාරෙන ජීවාමි කුසලං මෙ න විජ්ජති.
5264. මම ආසයසාමන්තා තිස්සො ලොකග්ගනායකො, තීණි පදානි{2} දස්සෙසි අනුකම්පාය චක්ඛුමා.
5265. අක්කන්තෙ ච පදෙ දිස්වා තිස්සනාමස්ස සත්ථුනො, හට්ඨො හට්ඨෙන චිත්තෙන පාදෙ චිත්තං පසාදයිං.
5266. කොරණ්ඩං පුප්ඵිතං දිස්වා පාදපං ධරණීරුහං, සකොසකං ගහෙත්වාන පදසෙට්ඨමපූජයිං{3}.
5267. තෙන කම්මෙන සුකතෙන චෙතනාපණිධීහි ච, ජහිත්වා මානුසං දෙහං තාවතිංසමගච්ඡහං.
5268. යං යං යොනුපපජ්ජාමි දෙවත්තං අථ මානුසං, කොරණ්ඩකච්ඡවී{4} හොමි පස්සභාසො{5} භවාමහං.
5269. ද්වෙනවුතෙ ඉතො කප්පෙ යං කම්මමකරිං තදා, දුග්ගතිං නාභිජානාමි පදපූජායිදං ඵලං.
5270. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5271. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5272. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කොරණ්ඩපුප්ඵියො ථෙරො ඉමා ගාථායො අභාසිත්ථාති.
කොරණ්ඩපුප්ඵියත්ථෙරස්ස අපදානං තතියං.
494. කිංසුකපුප්ඵියත්ථෙරාපදානං
5273. කිංසුකං පුප්ඵිතං දිස්වා පග්ගහෙත්වාන අඤ්ජලිං, බුද්ධසෙට්ඨං සරිත්වාන ආකාසෙ අභිපූජයිං.
5274. තෙන කම්මෙන සුකතෙන චෙතනා පණිධීහි ච, ජහිත්වා මානුසං දෙහං තාවතිසමගච්ඡහං.
5275. එකතිංසෙ ඉතො කප්පෙ යං කම්මමකරිං තදා, දුග්ගතිං නාභිජානාමි බුද්ධපූජායිදං ඵලං.
5276. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5277. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5278. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කිංසුකපුප්ඵියො ථෙරො ඉමා ගාථායො අභාසිත්ථාති.
කිංසුකපුප්ඵියත්ථෙරස්ස අපදානං චතුත්ථං.
495. උපඩ්ඪදුස්සදායකත්ථෙරාපදානං
5279. පදුමුත්තරස්ස භගවතො සුජාතො නාම සාවකො, පංසුකූලං ගවෙසන්තො සංකාරෙ චරතී{1} තදා,