4958. මය්හම්පි සුකතං කම්මං යොහං අද්දක්ඛි{2} නායකං, විනිපාතා පමුත්තොම්හි පත්තොම්හි අචලං පදං.
4959. යං යං යොනුපපජ්ජාමි දෙවත්තං අථ මානුසං, සමන්තා සත්තරතනා{3} ආලොකො හොති මෙ සදා.
4960. තායෙව මණිපූජාය අනුභොත්වාන සම්පදා, ඤාණාලොකො මයා දිට්ඨො පත්තොම්හි අචලං පදං.
4961. සතසහස්සෙ ඉතො කප්පෙ යං මණිං අභිපූජයිං, දුග්ගතිං නාභිජානාමි මණිපූජයිදං ඵලං.
4962. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
4963. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4964. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා මණිපූජකො ථෙරො ඉමා ගාථායො අභාසිත්ථාති.
මණිපූජකත්ථෙරස්ස අපදානං දුතියං.
473. උක්කාසතිකත්ථෙරාපදානං
4965. කොසිකො නාම භගවා චිත්තකූටෙ වසී තදා, ඣායී ඣානරතො බුද්ධො විවෙකාභිරතො මුනි.
4966. අජ්ඣොගහෙත්වා{4} හිමවන්තං නාරීගණපුරක්ඛතො, අද්දසං කොසිකං බුද්ධං පුණ්ණමාසෙව චන්දිමං.
4967. උක්කාසතෙ ගහෙත්වාන පරිවාරෙසහං තදා, සත්තරත්තින්දිවං ඨත්වා{1} අට්ඨමෙන අගච්ඡහං.
4968. වුට්ඨිතං කොසිකං බුද්ධං සයම්භුං අපරාජිතං, පසන්නචිත්තො වන්දිත්වා එකං භික්ඛං අදාසහං.
4969. තෙන කම්මෙන දිපදින්ද ලොකජෙට්ඨ නරාසභ, උප්පජ්ජිං තුසිතෙ කායෙ එකභික්ඛායිදං ඵලං.
4970. දිවසඤ්චෙව රත්තිඤ්ච ආලොකො හොති මෙ සදා, සමන්තා යොජනසතං ඔභාසෙන ඵරාමහං.
4971. පඤ්චපඤ්ඤාසකප්පම්හි චක්කවත්තී අහොසහං, චාතුරන්තො විජිතාවී ජම්බුසණ්ඩස්ස{2} ඉස්සරො,
4972. තදා මෙ නගරං ආසි ඉද්ධං ඵීතං සුනිම්මිතං, තිංසයොජනමායාමං විත්ථාරෙන ච වීසති.
4973. සොභනං නාම නගරං විස්සකම්මෙන මාපිතං, දසසද්දාවිචිත්තන්තං සම්මතාළසමාහිත.
4974. න තස්මිං{3} නගරෙ අත්ථි වල්ලි කට්ඨං ච මත්තිකා, සබ්බසොණ්ණමයං යෙව ජොතතෙ නිච්චකාලිකං.
4975. චතුපාකාරපරික්ඛිත්තං තයො ආසුං මණිමයා, වෙමජ්ඣෙ තාලපන්තී ච විස්සකම්මෙන මාපිතා,
4976. දසසහස්සා පොක්ඛරඤ්ඤො පදුමුප්පලඡාදිතා, පුණ්ඩරීකෙහි{4} සඤ්ඡන්නා නානාගන්ධසමෙරිතා.
4977. චතුනවුතෙ ඉතො කප්පෙ යං උක්කං ධාරයිං අහං, දුග්ගතිං නාභිජානාමි උක්කාධාරස්සිදං ඵලං.
4978. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
4979. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4980. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා උක්කාසතිකො ථෙරො ඉමා ගාථායො අභාසිත්ථාති.
උක්කාසතිකත්ථෙරස්ස අපදානං තතියං.
474. සුමනවීජනියත්ථෙරාපදානං
4981. විපස්සිනො භගවතො බොධියා පාදපුත්තමෙ, සුමනාවවීජනිං{1} ගය්හ අවීජිං බොධිමුත්තමං.
4982. එකනවුතෙ ඉතො කප්පෙ අවීජිං බොධිමුත්තමං, දුග්ගතිං නාභිජානාමි වීජතාය ඉදං ඵලං.
4983. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
4984. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4985. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සුමනවීජනියො ථෙරො ඉමා ගාථායො අභාසිත්ථාති.
සුමනවීජනියත්ථෙරස්ස අපදානං චතුත්ථං.
475. කුම්මාසදායකත්ථෙරාපදානං
4986. එසනාය චරන්තස්ස විපස්සිස්ස මහෙසිනො, රිත්තකං පත්තං දිස්වාන කුම්මාසං පූරයිං අහං.
4987. එකනවුතෙ ඉතො කප්පෙ යං භික්ඛමදදිං තදා, දුග්ගතිං නාභිජානාමි කුම්මාසස්ස ඉදං ඵලං.
4988. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
4989. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4990. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කුම්මාසදායකො ථෙරො ඉමා ගාථායො අභාසිත්ථාති.
කුම්මාසදායකත්ථෙරස්ස අපදානං පඤ්චමං.
476. කුසට්ඨදායකකත්ථෙරාපදානං
4991. කස්සපස්ස භගවතො බ්රාහ්මණස්ස වුසීමතො, පසන්නචිත්තො සුමනො කුසට්ඨකමදාසහං.
4992. ඉමස්මිං යෙව කප්පස්මිං කුසට්ඨකමදාසහං, දුග්ගතිං නාභිජානාමි කුසට්ඨකස්සිදං ඵලං.
4993. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
4994. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4995. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කුසට්ඨදායකො ථෙරො ඉමා ගාථායො අභාසිත්ථාති.
කුසට්ඨදායකත්ථෙරස්ස අපදානං ඡට්ඨං.
477. ගිරිපුන්නාගියත්ථෙරාපදානං
4996. සොභිතො නාම සම්බුද්ධො චිත්තකූටෙ වසී තදා, ගහෙත්වා ගිරිපුන්නාගං සයම්භුම්හිපූජයිං.
4997. චතුනවුතෙ ඉතො කප්පෙ යං බුද්ධම්හිපූජයිං, දුග්ගතිං නාභිජානාමි බුද්ධපූජායිදං ඵලං.
4998. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
4999. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5000. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ගිරිපුන්නාගියො ථෙරො ඉමා ගාථායො අභාසිත්ථාති.
ගිරිපුන්නාගියත්ථෙරස්ස අපදානං සත්තමං.
478. වල්ලිකාරඵලදායකත්ථෙරාපදානං
5001. සුමනො නාම සම්බුද්ධො තක්කරායං වසී තදා, වල්ලිකාරඵලං ගය්හ සයම්භුස්ස අදාසහං.
5002. එකතිංසෙ ඉතො කප්පෙ යං ඵලං අදදිං තදා, දුග්ගතිං නාභිජානාමි ඵලදානස්සිදං ඵලං.
5003. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
5004. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5005. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා වල්ලිකාරඵලදායකො ථෙරො ඉමා ගාථායො අභාසිත්ථාති.
වල්ලිකාරඵලදායකත්ථෙරස්ස අපදානං අට්ඨමං.
479. පානධිදායකත්ථෙරාපදානං
5006. අනොමදස්සී භගවා ලොකජෙට්ඨො නරාසභො, දිවාවිහාරා නික්ඛම්ම පථමාරුහි චක්ඛුමා.
5007. පානධිං සුකතං ගය්හ අද්ධානං පටිපජ්ජහං, තත්ථද්දසාසිං සම්බුද්ධං පත්තිකං චාරුදස්සනං.
5008. සකං චිත්තං පසාදෙත්වා නීහරිත්වාන පානධිං, පාදමූලෙ ඨපෙත්වාන ඉදං වචනමබ්රවිං.
5009. අභිරූහ මහාවීර සුගතින්ද විනායක, ඉතො ඵලං ලභිස්සාමි යො මෙ අත්ථො සමිජ්ඣතු.
5010. අනොමදස්සී භගවා ලොකජෙට්ඨො නරාසභො, පානධිං අභිරූහිත්වා ඉදං වචනමබ්රවී:
5011. “යො පානධිං මෙ අදදා පසන්නො සෙහි පාණිහි, තමහං කිත්තයිස්සාමි, සුණොථ මම භාසතො.”
5012. බුද්ධස්ස ගිරමඤ්ඤාය සබ්බෙ දෙවා සමාගතා, උදග්ගචිත්තා සුමනා වෙදජාතා කතඤ්ජලී.
5013. “පානධීනං පදානෙන සුඛිතොයං භවිස්සති, පඤ්චපඤ්ඤාසක්ඛත්තුඤ්ච දෙවරජ්ජං කරිස්සති.
5014. සහස්සක්ඛත්තුං රාජා ච චක්කවත්තී භවිස්සති, පදෙසරජ්ජං විපුලං ගණනාතො අසඞ්ඛියං.
5015. අපරිමෙය්යෙ ඉතො කප්පෙ ඔක්කාකකුලසම්භවො, ගොතමො නාම නාමෙන සත්ථා ලොකෙ භවිස්සති.
5016. තස්ස ධම්මෙසු දායාදො ඔරසො ධම්මනිම්මිතො, සබ්බාසවෙ පරිඤ්ඤාය නිබ්බායිස්සතනාසවො.
5017. දෙවලොකෙ මනුස්සෙ වා නිබ්බත්තිස්සති පුඤ්ඤවා, දෙවයානපටිභාගං යානං පටිලභිස්සති”.
5018. පාසාදා සිවිකා මය්හං{1} හත්ථිනො සමලඞ්කතා, රථා චාජඤ්ඤසංයුත්තා සදා පාතුභවන්ති මෙ.
5019. අගාරා නික්ඛමන්තොපි රථෙන නික්ඛමිං අහං, කෙසෙසු ඡිජ්ජමානෙසු අරහත්තමපාපුණිං.
5020. ලාභා මය්හං සුලද්ධං මෙ වාණිජ්ජං සුප්පයොජිතං, දත්වාන පානධිං එකං පත්තොම්හි අචලං පදං.
5021. අපරිමෙය්යෙ ඉතො කප්පෙ යං පානධිමදාසහං, දුග්ගතිං නාභිජානාමි පානධිස්ස ඉදං ඵලං.
5022. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
5023. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5024. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පානධිදායකො ථෙරො ඉමා ගාථායො අභාසිත්ථාති.
පානධිදායකත්ථෙරස්ස අපදානං නවමං.
480. පුලිනචඞ්කමියත්ථෙරාපදානං
5025. මිගලුද්දො පුරෙ ආසි අරඤ්ඤෙ කානනෙ අහං, වාතමිගං ගවෙසන්තො චඞ්කමං අද්දසං අහං.
5026. උච්ඡඞ්ගා පුලිනං ගය්හ චඞ්කමං ඔකිරිං අහං, පසන්නචිත්තො සුමනො සුගතස්ස සිරීමතො.
5027. එකතිංසෙ ඉතො කප්පෙ පුලිනං ඔකිරිං අහං, දුග්ගතිං නාභිජානාමි පුලිනස්ස ඉදං ඵලං.
5028. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
5029. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
5030. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පුලිනචඞ්කමියො ථෙරො ඉමා ගාථායො අභාසිත්ථාති.
පුලිනචඞ්කමියත්ථෙරස්ස අපදානං දසමං.
උද්දානං: