ඉත්ථං සුදං ආයස්මා උත්තලිපුප්ඵියො ථෙරො ඉමා ගාථායො අභාසිත්ථාති.
උත්තලිපුප්ඵියත්ථෙරස්ස අපදානං පඤ්චමං.
446. අම්බාටකියත්ථෙරාපදානං
4752. සුපුප්ඵිතං සාලවනං ඔගය්හ වෙස්සභූ මුනි, නිසීදි ගිරිදුග්ගෙසු අභිජාතොව කෙසරී.
4753. පසන්නචිත්තො සුමනො අම්බාටකමපූජයිං, පුඤ්ඤක්ඛෙත්තං මහාවීරං{1} පසන්නො සෙහි පාණිහි.
4754. එකතිංසෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි බුද්ධපූජායිදං ඵලං.
4755. කිලෙසා ඣාපිතා මය්හං භවා සබ්බෙ සමූහතා, සබ්බාසවා පරික්ඛීණා විහරාමි අනාසවො.
4756. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං
4757. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා අම්බාටකියො ථෙරො ඉමා ගාථායො අභාසිත්ථාති.
අම්බාටකියකත්ථෙරස්ස අපදානං ඡට්ඨං.
447. සීහාසනිකත්ථෙරාපදානං
4758. පදුමුත්තරස්ස භගවතො සබ්බභූතහිතෙසිනො, පසන්නචිත්තො සුමනො සීහාසනමදාසහං.
4759. දෙවලොකෙ මනුස්සෙ වා යත්ථ යත්ථ වසාමහං, ලභාමි විපුලං ව්යම්හං සීහාසනස්සිදං ඵලං.
4760. සොණ්ණමයා රූපිමයා ලොහිතඞ්කමයා{1} බහූ, මණිමයා ච පල්ලඞ්කා නිබ්බත්තන්ති මමං සදා.
4761. බොධියා ආසනං කත්වා ජලජුත්තමනාමිනො, උච්චෙ කුලෙ පජායාමි අහො ධම්මසුධම්මතා.
4762. සතසහස්සෙ ඉතො කප්පෙ සීහාසනමකාසහං, දුග්ගතිං නාභිජානාමි සීහාසනස්සිදං ඵලං.
4763. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
4764. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4765. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සීහාසනිකො ථෙරො ඉමා ගාථායො අභාසිත්ථාති.
සීහාසනිකත්ථෙරස්ස අපදානං සත්තමං.
448. පාදපීඨියත්ථෙරාපදානං
4766. සුමෙධො නාම සම්බුද්ධො අග්ගො කාරුණිකො මුනි, තාරයිත්වා බහූ සත්තෙ නිබ්බුතො සො මහායසො.
4767. සීහාසනස්ස සාමන්තා සුමෙධස්ස මහෙසිනො, පසන්නචිත්තො සුමනො පාදපීඨමකාරයිං.
4768. කත්වාන කුසලං කම්මං සුඛපාකං සුඛුද්රයං, පුඤ්ඤකම්මෙන සංයුත්තො තාවතිංසමගච්ඡහං.
4769. තත්ථ මෙ වසමානස්ස පුඤ්ඤකම්මසමඞ්ගිනො, පදානි උද්ධරන්තස්ස සොණ්ණපීඨා භවන්ති මෙ.
4770. ලාභා තෙසං සුලද්ධං වො යෙ ලභන්ති උපස්සුතිං, නිබ්බුතෙ කාරං කත්වාන ලභන්ති විපුලං සුඛං.
4771. මයාපි සුකතං කම්මං වාණිජ්ජං සුප්පයොජිතං, පාදපීඨං කරිත්වාන සොණ්ණපීඨං ලභාමහං.
4772. යං යං දිසං පක්කමාමි කෙනචි පච්චයෙනහං,{1} සොණ්ණපීඨෙ අක්කමාමි පුඤ්ඤකම්මස්සිදං ඵලං.
4773. තිංසකප්පසහස්සම්හි යං කම්මමකරිං තදා, දුග්ගතිං නාභිජානාමි පාදපීඨස්සිදං ඵලං.
4774. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
4775. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4776. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පාදපීඨියො ථෙරො ඉමා ගාථායො අභාසිත්ථාති.
පාදපීඨීයත්ථෙරස්ස අපදානං අට්ඨමං.
449. වෙදිකාරකත්ථෙරාපදානං
4777. පදුමුත්තරබුද්ධස්ස{2} බොධියා පාදපුත්තමෙ, වෙදිකං සුකතං කත්වා සකං චිත්තං පසාදයිං.
4778. අතොළාරානි{3} භණ්ඩානි කතානි අකතානි ච, අන්තළික්ඛා පවස්සන්ති වෙදිකාය ඉදං ඵලං.
4779. උභතො ව්යුළ්හසඞ්ගාමෙ පක්ඛන්දන්තො භයානකෙ, භයභෙරවං න පස්සාමි වෙදිකාය ඉදං ඵලං.
4780. මම සඞ්කප්පමඤ්ඤාය ව්යම්භං නිබ්බත්තතෙ සුභං, සයනානි මහග්ඝානි වෙදිකාය ඉදං ඵලං.
4781. සතසහස්සෙ ඉතො කප්පෙ යං වෙදිකමකාරයිං, දුග්ගතිං නාභිජානාමි වෙදිකාය ඉදං ඵලං.
4782. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
4783. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං
4784. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා වෙදිකාරකො ථෙරො ඉමා ගාථායො අභාසිත්ථාති.
වෙදිකාරකත්ථෙරස්ස අපදානං නවමං.
450. බොධිඝරියත්ථෙරාපදානං{*}
4785. සිද්ධත්ථස්ස භගවතො දිපදින්දස්ස තාදිනො, පසන්නචිත්තො සුමනො බොධිඝරමකාරයිං.
4786. තුසිතං උපපන්නොම්හි වසාමි රතනෙ ඝරෙ, න මෙ සීතං වා උණ්හං වා වාතො ගත්තෙ න සමඵුසෙ.
4787. පඤ්චසට්ඨිම්හිතො කප්පෙ චක්කවත්තී අහොසහං, කායිකං නාම නගරං විස්සකම්මෙන{1} මාපිතං.
4788. දසයොජනආයාමං අට්ඨයොජනවිත්ථතං, න තම්හි නගරෙ අත්ථි කට්ඨං වල්ලී ච මත්තිකා.
4789. තිරියං යොජනං ආසි අඩ්ඪයොජනචිත්ථතො,{2} මඞ්ගලො නාම පාසාදො විස්සකම්මෙන මාපිතො.
4790. චුල්ලාසීතිසහස්සානි ථම්හා සොණ්ණමයා අහුං, මණිමයා ච නිය්යුහා ඡදනං රූපියං අහු.
4791. සබ්බසොණ්ණමයං ඝරං විස්සකම්මෙන මාපිතං, අජ්ඣාවුත්ථං මයා එතං ඝරදානස්සිදං ඵලං.
4792. තෙ සබ්බෙ අනුභොත්වාන දෙවමානුසකෙ භවෙ, අජ්ජ පත්තොම්හි නිබ්බානං සන්තිපදමනුත්තරං.
4793. චතුනවුතෙ ඉතො කප්පෙ{3} බොධිඝරමකාරයිං, දුග්ගතිං නාභිජානාමි ඝරදානස්සිදං ඵලං.
4794. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
4795. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4796. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා බොධිඝරියො ථෙරො ඉමා ගාථායො අභාසිත්ථාති.
බොධිඝරියත්ථෙරස්ස අපදානං දසමං.
විභීටකවග්ගො පඤ්චචත්තාළීසමො.
උද්දානං:
විටභීකී කොලඵලී බිල්ල භල්ලාතකප්පදා{1} උත්තලම්බාටකී{2} චෙව ආසනී පාදපීඨකො, වෙදිකො බොධිඝරිකො ගාථායො ගණිතා චිහ, එකූනාසීතිකා සබ්බා අස්මිං වග්ගෙ සකිත්තිතා.
46. ජගතිදායකවග්ගො
451. ජගතිදායකත්ථෙරාපදානං
4797. ධම්මදස්සිස්ස මුනිනො බොධියා පාදපුත්තමෙ, පසන්නචිත්තො සුමනො ජගතිං කාරයිං අහං.
4798. දරිතො පබ්බතාතො වා{3} රුක්ඛතො පතිතො අහං, චුතො පතිට්ඨං වින්දාමි ජගතියා ඉදං ඵලං.
4799. න මෙ චොරා පසහන්ති{4} නාතිමඤ්ඤෙති ඛත්තියො,{5} සබ්බාමිත්තෙ’තික්කමාමි ජගතියා ඉදං ඵලං.
4800. යං යං යොනුපපජ්ජාමි දෙවත්තං අථ මානුසං, සබ්බත්ථ පූජිතො හොමි ජගතියා ඉදං ඵලං.
4801. අට්ඨාරසෙ කප්පසතෙ ජගතිං කාරයිං අහං, දුග්ගතිං නාභිජානාමි ජගතිදානස්සිදං ඵලං.
4802. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
4803. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4804. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ජගතිදායකො ථෙරො ඉමා ගාථායො අභාසිත්ථාති.
ජගතිදායකත්ථෙරස්ස අපදානං පඨමං.
452. මොරහත්ථියත්ථෙරාපදානං
4805. මොරහත්ථං ගහෙත්වාන උපෙසිං ලොකනායකං, පසන්නචිත්තො සුමනො මොරහත්ථමදාසහං.
4806. ඉමිනා මොරහත්ථෙන චෙතනා පණිධීහි ච, නිබ්බායිංසු තයො අග්ගී ලභාමි විපුලං සුඛං.
4807. අහො බුද්ධා{1} අහො ධම්මා{2} අහො නො සත්ථුසම්පදා, දත්වානහං මොරහත්ථං ලභාමි විපුලං සුඛං.
4808. තියග්ගී{3} නිබ්බුතා මය්හං භවා සබ්බෙ සමූහතා, සබ්බාසවා පරික්ඛීණා නත්ථි’දානි පුනබ්භවො.
4809. එකතිංසෙ ඉතො කප්පෙ යං දානමදදිං තදා, දුග්ගතිං නාභිජානාමි මොරහත්ථස්සිදං ඵලං.
4810. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
4811. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4812. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා මොරහත්ථියො ථෙරො ඉමා ගාථායො අභාසිත්ථාති.
මොරහත්ථියත්ථෙරස්ස අපදානං දුතියං.
453. සීහාසනවීජකත්ථෙරාපදානං
4813. තිස්සස්සාහං භගවතො බොධිරුක්ඛමවන්දිසං, පග්ගය්හං වීජනිං තත්ථ සීහාසනමවීජයිං.
4814. ද්වෙනවුතෙ ඉතො කප්පෙ සීහාසනමවීජහං, දුග්ගතිං නාභිජානාමි වීජනාය ඉදං ඵලං.
4815. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
4816. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං
4817. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සීහාසනවීජකො ථෙරො ඉමා ගාථායො අභාසිත්ථාති.
සීහාසනවීජකත්ථෙරස්ස අපදානං තතියං.
454. තිඋක්කාධාරකත්ථෙරාපදානං
4818. පදුමුත්තරබුද්ධස්ස බොධියා පාදපුත්තමෙ, පසන්නචිත්තො සුමනො තයො උක්කා අධාරයිං.
4819. සතසහස්සෙ ඉතො කප්පෙ සොහං උක්කමධාරයිං, දුග්ගතිං නාභිජානාමි උක්කාදානස්සිදං ඵලං.
4820. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.