4683. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කලම්බදායකො ථෙරො ඉමා ගාථායො අභාසිත්ථාති.
කලම්බකත්ථෙරස්ස අපදානං ඡට්ඨං.
437. අම්බාටකදායකත්ථෙරාපදානං
4684. විපිනෙ බුද්ධං දිස්වාන සයම්භුං අපරාජිතං, අම්බාටකං ගහෙත්වාන සයම්භුස්ස අදාසහං.
4685. එකතිංසෙ ඉතො කප්පෙ යං ඵලං අදදිං තදා, දුග්ගතිං නාභිජානාමි ඵලදානස්සිදං ඵලං.
4686. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
4687. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4688. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා අම්බාටකදායකො ථෙරො ඉමා ගාථායො අභාසිත්ථාති.
අම්බාටකදායකත්ථෙරස්ස අපදානං සත්තමං.
438. හරීතකදායකත්ථෙරාපදානං
4689. හරීතකං ආමලකං අම්බජම්බු විභීතකං, කොලං භල්ලාතකං බිල්ලං සයමෙවාහරාමහං.
4690. දිස්වාන පබ්භාරගතං ඣායිං ඣානරතං මුනිං, ආබාධෙන පපීළෙන්තං{1} අදුතියං මහාමුනිං.
4691. හරීතකං ගහෙත්වාන සයම්භුස්ස අදාසහං, කතමත්තම්හි{2} භෙසජ්ජෙ ව්යාධි පස්සම්හි තාවදෙ.
4692. පහීනදරථො බුද්ධො අනුමොදනියං අකා{3}, භෙසජ්ජදානෙනිමිනා ව්යාධිවූපසමෙන ච.
4693. දෙවභූතො මනුස්සො වා ජාතො වා අඤ්ඤජාතියා, සබ්බත්ථ සුඛිතො හොහි{4} මා ච තෙ ව්යාධි ආගමා.{5}
4694. ඉදං වත්වාන සම්බුද්ධො සයම්භූ අපරාජිතො, නභං අබ්භුග්ගමි ධීරො හංසරාජාව අම්බරෙ.
4695. යතො හරීටකමදං{6} සයම්භුස්ස මහෙසිනො, ඉමං ජාතිමුපාදාය ව්යාධි මෙ නුපපජ්ජථ.
4696. අයං පච්ඡිමකො මය්හං චරිමො වත්තතෙ භවො. තිස්සො විජ්ජා සච්ඡිකතා කතං බුද්ධස්ස සාසනං.
4697. චතුනවුතෙ ඉතො කප්පෙ භෙසජ්ජමදදිං තදා, දුග්ගතිං නාභිජානාමි භෙසජ්ජස්ස ඉදං ඵලං.
4698. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
4699. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4700. පටිසම්භිදා චතස්සො ච විමොක්ඛා’පි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා හරීතකදායකො ථෙරො ඉමා ගාථායො අභාසිත්ථාති.
හරීතකදායකත්ථෙරස්ස අපදානං අට්ඨමං.
439. අම්බපිණ්ඩියත්ථෙරාපදානං
4701. හත්ථිරාජා තදා ආසිං ඊසාදන්තො උරූළ්හවා, විචරන්තො බ්රහාරඤ්ඤෙ අද්දසං ලොකනායකං.
4702. අම්බපිණ්ඩිං{1} ගහෙත්වාන අදාසිං සත්ථුනො අහං, පටිගණ්හි මහාවීරො සිද්ධත්ථො ලොකනායකො.
4703. මම නිජ්ඣායමානස්ස පරිභුඤ්ජි තදා ජිනො, තත්ථ චිත්තං පසාදෙත්වා තුසිතං උපපජ්ජහං.
4704. තතො අහං චවිත්වාන චක්කවත්තී අහොසහං, එතෙනෙව උපායෙන අනුභොත්වාන සම්පදා.
4705. පධානපහිතත්තොහං උපසන්තො නිරූපධි, සබ්බාසවෙ පරිඤ්ඤාය විහරාමි අනාසවො.
4706. චතුනවුතෙ ඉතො කප්පෙ යං ඵලං අදදිං තදා, දුග්ගතිං නාභිජානාමි ඵලදානස්සිදං ඵලං.
4707. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
4708. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4709. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා අම්බපිණ්ඩියො ථෙරො ඉමා ගාථායො අභාසිත්ථාති.
අම්බපිණ්ඩියත්ථෙරස්ස අපදානං නවමං.
440. ජම්බුඵලියත්ථෙරාපදානං{*}
4710. පදුමුත්තරබුද්ධස්ස ලොකජෙට්ඨස්ස තාදිනො, පිණ්ඩාය විචරන්තස්ස ධාරෙතො{1} උත්තමං යසං.
4711. අග්ගඵලං ගහෙත්වාන විප්පසන්නෙන චෙතසා, දක්ඛිණෙය්යස්ස වීරස්ස අදාසිං සත්ථුනො අහං.
4712. තෙන කම්මෙන දිපදින්ද{2} ලොකජෙට්ඨ නරාසභ, පත්තොම්හි අචලං ඨානං හිත්වා ජයපරාජයං.
4713. සතසහස්සෙ ඉතො කප්පෙ යං දානමදදිං තදා, දුග්ගතිං නාභිජානාමි අග්ගදාදනස්සීදං ඵලං.
4714. කිලෙසා ඣාපිතා මය්හං භවා සබ්බෙ සමූහතා, නාගො ච බන්ධනං ඡෙත්වා විහරාමි අනාසවො.
4715. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4716. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ජම්බුඵලියො ථෙරො ඉමා ගාථායො අභාසිත්ථාති.
ජම්බුඵලියත්ථෙරස්ස අපදානං දසමං.
උද්දානං:
ථෙරො එකවිහාරී ච සඞ්ඛිකො{3} පාටිහීරකො, ථවිකො උච්ඡුඛණ්ඩි ච කලම්බම්බාටකප්පදා{4}, හරීතකම්බපිණ්ඩී ච ජම්බුදො{5} දසමො සති. ඡළාසීති ච ගාථායො ගණිතායො විභාවීහි.
එකවිහාරිවග්ගො චතුත්තාළිසමො.
45. විභීටකවග්ගො
441. විභීටකමිඤ්ජියත්ථෙරාපදානං
4717. කකුසන්ධො මහාවීරො සබ්බධම්මානපාරගූ, ගණම්හා වූපකට්ඨො සො අගමාසි වනන්තරං.
4718. බීජමිඤ්ජං ගහෙත්වාන ලතාය ආවුණිං අහං, භගවා තම්හි සමයෙ ඣායතෙ පබ්බතන්තරෙ.
4719. දිස්වානහං දෙවදෙවං විප්පසන්නෙන චෙතසා, දක්ඛිණෙය්යස්ස වීරස්ස බීජමිඤ්ජමදාසහං
4720. ඉමස්මිඤ්ඤෙව කප්පස්මිං{1} යං ඵලං අදදිං{2} තදා, දුග්ගතිං නාභිජානාමි බීජමිඤ්ජස්සිදං ඵලං.
4721. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
4722. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4723. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා විභීටකමිඤ්ජියො{3} ථෙරො ඉමා ගාථායො අභාසිත්ථාති.
විභීටකමිඤ්ජියත්ථෙරස්ස අපදානං පඨමං.
442 කොලදායකත්ථෙරාපදානං
4724. අජිනෙන නිවත්ථොහං වාකචීරධරො තදා, ඛාරිභාරං හරිත්වාන{4} කොලමාහරිමස්සමං.{5}
4725. තම්හි කාලෙ සිඛී බුද්ධො එකො අදුතියො අහු, මමස්සමමුපාගඤ්ඡි{6} ජානන්තො සබ්බකාලිකං.
4726. සකං චිත්තං පසාදෙත්වා වන්දිත්වාන ච සුබ්බතං, උභො හත්ථෙහි පග්ගය්හ කොලං බුද්ධස්සදාසහං.
4727. එකතිංසෙ ඉතො කප්පෙ යං ඵලං අදදිං තදා, දුග්ගතිං නාභිජානාමි කොලදානස්සිදං ඵලං.
4728. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
4729. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං
4730. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කොලදායකො ථෙරො ඉමා ගාථායො අභාසිත්ථාති.
කොලදායකත්ථෙරස්ස අපදානං දුතියං.
443. බිල්ලඵලියත්ථෙරාපදානං{*}
4731. චන්දභාගානදීතීරෙ අස්සමො සුකතො මම, බිල්ලරුක්ඛෙහි{1} ආකිණ්ණො නානාදුමනිසෙවිතො.
4732. සුගන්ධං බෙලුවං දිස්වා බුද්ධසෙට්ඨමනුස්සරිං, ඛාරිභාරං පූරයිත්වා තුට්ඨො සංවිග්ගමානසො.
4733. කකුසන්ධං උපාගම්ම බිල්ලපක්කමදාසහං, පුඤ්ඤක්ඛෙත්තස්ස වීරස්ස විප්පසන්නෙන චෙතසා.
4734. ඉමස්මිං යෙව කප්පස්මිං යං ඵලං අදදිං{2} තදා, දුග්ගතිං නාභිජානාමි ඵලදානස්සිදං ඵලං.
4735. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
4736. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං
4737. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා බිල්ලඵලියත්ථෙරො ථෙරො ඉමා ගාථායො අභාසිත්ථාති.
බිල්ලඵලියත්ථෙරස්ස අපදානං තතියං.
444. භල්ලාතකදායකත්ථෙරාපදානං{*}
4738. සුවණ්ණවණ්ණං සම්බුද්ධං බත්තිංසවරලක්ඛණං, පවනග්ගෙන{1} ගච්ඡන්තං සාලරාජංව ඵුල්ලිතං.
4739. තිණත්ථරං පඤ්ඤපෙත්වා බුද්ධසෙට්ඨමයාචහං, අනුකම්පතු මං බුද්ධො භික්ඛමිච්ඡාමි දාතවෙ.
4740. අනුකම්පකො කාරුණිකො අත්ථදස්සී මහායසො, මම සඞ්කප්පමඤ්ඤාය ඔරුහී මම අස්සමෙ.
4741. ඔරුහිත්වාන{2} සම්බුද්ධො නිසීදි පණ්ණසන්ථරෙ, භල්ලාතකං ගහෙත්වාන බුද්ධසෙට්ඨස්සදාසහං.
4742. මම නිජ්ඣායමානස්ස පරිභුඤ්ජි තදා ජිනො, තත්ථ චිත්තං පසාදෙත්වා අභිවන්දිං තදා ජිනං.
4743. අට්ඨාරසෙ කප්පසතෙ යං ඵලං අදදිං තදා, දුග්ගතිං නාභිජානාමි ඵලදානස්සිදං ඵලං.
4744. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
4745. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං
4746. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
භල්ලාතකදායකත්ථෙරස්ස අපදානං චතුත්ථං.
ඉත්ථං සුදං ආයස්මා භල්ලාතකදායකො ථෙරො ඉමා ගාථායො අභාසිත්ථාති.
445. උත්තලිපුප්ඵියත්ථෙරාපදානං
4747. නිග්රොධෙ හරිතොහාසෙ සංවිරූළ්හම්හි පාදපෙ, උත්තලිමාලං{3} පග්ගය්හ බොධියා අභිරොපයිං.
4748. ඉමස්මිං යෙව කප්පම්හි යං පුප්ඵමභිරොපයිං, දුග්ගතිං නාභිජානාමි බොධිපූජායිදං ඵලං.
4749. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
4750. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං
4751. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.