4608. චුල්ලාසීතිසහස්සානි හත්ථිනො සමලඞ්කතා, තිධාපභින්නමාතඞ්ගා කුඤ්ජරා සට්ඨිහායනා -
4609. හෙමජාලාහි සඤ්ඡන්නා උපට්ඨානං කරොන්ති මෙ, බලකායෙ ගජෙ චෙව ඌනතා මෙ නෙ විජ්ජති.
4610. සොණ්ණකිඞ්කණිපුප්ඵානං විපාකං අනුභොමහං, අට්ඨපඤ්ඤාසක්ඛත්තුඤ්ච දෙවරජ්ජමකාරයිං.
4611. එකසත්තතික්ඛත්තුඤ්ච චක්කවත්තී අහොසහං, පථව්යාරජ්ජං එකසතං මහියා කාරයිං අහං.
4612. සොදානි පත්තො අමතං{3} අසඞ්ඛතං සුදුද්දසං,{4} සංයොජනපරික්ඛීණො නත්ථිදානි පුනබ්භවො.
4613. අට්ඨාරසෙ කප්පසතෙ යං පුප්ඵමභිරොපයිං, දුග්ගතිං නාභිජානාමි බුද්ධපූජායිදං ඵලං.
4614. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
4615. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4616. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සොවණ්ණකිඞ්කණියො ථෙරො ඉමා ගාථායො අභාසිත්ථාති.
සොවණ්ණකිඞ්කණියත්ථෙරස්ස අපදානං නවමං.
430. සොණ්ණකොන්තරිකත්ථෙරාපදානං
4617. මනොභාවනීයං බුද්ධං අත්තදන්තං සමාහිතං, ඉරීයමානං බ්රහ්මපථෙ චිත්තවූපසමෙ රතං.
4618. නිත්තිණ්ණඔඝං සම්බුද්ධං ඣායිං ඣානරතං මුනිං, උපවිට්ඨං සමාපන්නං ඉන්දීවරදලප්පභං.
4619. අලාබුනොදකං ගය්හ බුද්ධසෙට්ඨමුපාගමිං, බුද්ධස්ස පාදෙ ධොවිත්වා අලාබුකමදාසහං.
4620. ආණාපෙසි ච සම්බුද්ධො පදුමුත්තරනායකො, ඉමිනා දකමාහත්වා{1} පාදමූලෙ ඨපෙහි මෙ,
4621. සාධූති’හං පටිස්සුත්වා සත්ථුගාරවතාය ච, දකං අලාබුනා’හිත්වා{2} බුද්ධසෙට්ඨමුපානයිං.
4622. අනුමොදි මහාවීරො චිත්තං නිබ්බාපයං මම, ඉමිනා ලාබුදානෙන සඞ්කප්පො තෙ සමිජ්ඣතු.
4623. පණ්ණරසසු කප්පෙසු දෙවලොකෙ රමිං අහං, තිංසතික්ඛත්තුං රාජා ච චක්කවත්තී අහොසහං.
4624. දිවා වා යදි වා රත්තිං චඞ්කමන්තස්ස තිට්ඨතො, සොවණ්ණකොන්තරං ගය්හ තිට්ඨතෙ{3} පුරතො මම.
4625. බුද්ධස්ස ලාබුං දත්වාන{4} ලභාමි සොණ්ණකොන්තරං, අප්පකම්පි කතං කාරං විපුලං හොති තාදිසු.
4626. සතසහස්සෙ ඉතො කප්පෙ යං ලාබුමදදිං තදා, දුග්ගතිං නාභිජානාමි අලාබුස්ස ඉදං ඵලං.
4627. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
4628. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4629. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සොණ්ණකොන්තරිකො ථෙරො ඉමා ගාථායො අභාසිත්ථාති.
සොණ්ණකොන්තරිකත්ථෙරස්ස අපදානං දසමං.
උද්දානං:
සකිංසම්මජ්ජකො ථෙරො එකදුස්සී එකාසනී, කදම්බකොරණ්ඩකදා{1} ඝතං සවණිකො{2} පි ච. සුචින්තිතො කිඞ්කණිකො සොණ්ණකොන්තරිකො පි ච, එකං ගාථාසතඤ්චෙව{3} එකසත්තතිමෙව ච.
සකිංසම්මජ්ජකවග්ගො තෙවත්තාළිසමො.
44. එකවිහාරිවග්ගො
431. එකවිහාරියත්ථෙරාපදානං
4630. ඉමම්හි භද්දකෙ කප්පෙ බ්රහ්මබන්ධු මහායසො, කස්සපො නාම ගොත්තෙන උප්පජ්ජි වදතං වරො.
4631. නිප්පපඤ්චො නිරාලම්බො ආකාසසමමානසො, සුඤ්ඤතාබහුලො තාදී අනිමිත්තරතො වසී.
4632. අසඞ්ගචිත්තො නික්ලෙසො{4} අසංසට්ඨො කුලෙ ගණෙ, මහාකාරුණිකො වීරො විනයොපායකොවිදො.
4633. උය්යුත්තො පරකිච්චෙසු විනයන්තො සදෙවකෙ, නිබ්බානගමනං මග්ගං ගති{5}පඞ්කවිසොසනං.
4634. අමතං පරමස්සාදං{6} ජරාමච්චුනිවාරණං, මහාපරිසමජ්ඣෙ සො නිසින්නො ලොකතාරණො{7}.
4635. කරවීකරුතො{8} නාථො බ්රහ්මඝොසො තථාගතො, උද්ධරන්තො මහාදුග්ගා විපන්නද්ධෙ{9} අනායකෙ,
4636. දෙසෙන්තො විරජං ධම්මං දිට්ඨො මෙ ලොකනායකො, තස්ස ධම්මං සුණිත්වාන පබ්බජිං අනගාරියං.
4637. පබ්බජිත්වා තදා චාහං{10} චින්තෙන්තො ජිනසාසනං, එකකොව වනෙ රම්මෙ වසිං සංසග්ගපීළිතො.
4638. සකායවුපකස්සො{11} මෙ හෙතුභුතො මහාභවි{12}, මනසො වූපකස්සස්ස{13} සංසග්ගභයදස්සිනො.
4639. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
4640. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4641. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා එකවිහාරියො ථෙරො ඉමා ගාථායො අභාසිත්ථාති.
එකවිහාරියත්ථෙරස්ස අපදානං පඨමං.
432. එකසංඛියත්ථෙරාපදානං
4642. විපස්සිනො භගවතො මහාබොධිමහො අහු, මහාජනා සමාගම්ම පූජෙන්ති බොධිමුත්තමං.
4643. න හි තං ඔරකං මඤ්ඤෙ බුද්ධසෙට්ඨො භවිස්සති, යස්සායමෙදිසො{1} බොධි පූජනීයො{2} ච සත්ථුනො.
4644. තතො සඞ්ඛං ගහෙත්වාන බොධිරුක්ඛං උපට්ඨහිං,{3} ධමෙන්තො සබ්බදිවසං අවන්දිං බොධිමුත්තමං.
4645. ආසන්නකෙ කතං කම්මං දෙවලොකං අපාපයී, කළෙබරං මෙ පතිතං දෙවලොකෙ රමාමහං.
4646. සට්ඨිතුරියසහස්සානි තුට්ඨහට්ඨා පමොදිතා, සදා මය්හං උපට්ඨන්ති බුද්ධපූජායිදං ඵලං.
4647. එකසත්තතිමෙ කප්පෙ රාජා ආසිං සුදස්සනො, චාතුරන්තො විජිතාවී ජම්බුසණ්ඩස්ස ඉස්සරො.
4648. තතො අඞ්ගසතා තූරා{4} පරිවාරෙන්ති මං සදා, අනුභොමි සකං කම්මං උපට්ඨානස්සිදං ඵලං.
4649. යං යං යොනුපපජ්ජාමි දෙවත්තං අථ මානුසං, මාතුකුච්ඡිගතස්සාපි වජ්ජරෙ භෙරියො සදා.
4650. උපට්ඨහිත්වා{5} සම්බුද්ධං අනුභොත්වාන{6} සම්පදා, සිවං සුඛෙමං අමතං පත්තොම්හි අචලං පදං.
4651. එකනවුතෙ ඉතො කප්පෙ යං කම්මමකරිං තදා, දුග්ගතිං නාභිජානාමි බුද්ධපූජායිදං ඵලං.
4652. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
4653. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4654. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා එකසඞ්ඛියො ථෙරො ඉමා ගාථායො අභාසිත්ථාති.
එකසඞ්ඛියත්ථෙරස්ස අපදානං දුතියං.
433 පාටිහීරසඤ්ඤකත්ථෙරාපදානං
4655. පදුමුත්තරො නාම ජිනො ආහුතීනං පටිග්ගහො, වසීසතසහස්සෙහි නගරං පාවිසී තදා.
4656. නගරං පවිසන්තස්ස උපසන්තස්ස තාදිනො, රතනානි පජ්ජොතිංසු{1} නිග්ඝොසො ආසි තාවදෙ.
4657. බුද්ධස්ස අනුභාවෙන භෙරී වජ්ජුමඝට්ටිතා, සයං වීණා පවජ්ජන්ති බුද්ධස්ස විසතො{2} පුරං.
4658. බුද්ධසෙට්ඨං න පස්සාමි{3} පදුමුත්තරං මහාමුනිං, පාටිහීරං ච පස්සිත්වා තත්ථ චිත්තං පසාදයිං.
4659. අහො බුද්ධො අහො ධම්මො අහො නො සත්ථූසම්පදා. අචෙතනාපි තුරියා සයමෙව පවජ්ජරෙ.
4660. සතසහස්සෙ ඉතො කප්පෙ යං සඤ්ඤමලභිං තදා, දුග්ගතිං නාභිජානාමි බුද්ධසඤ්ඤායිදං ඵලං.
4661. කිලෙසා ඣාපිතා මය්හං භවා සබ්බෙ සමූහතා, නාගොම බන්ධනං ඡෙත්වා විහාරාමි අනාසවො.
4662. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4663. පටිසම්භිදා චතස්සො ච විමොක්ඛොපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පාටිහීරසඤ්ඤකො ථෙරො ඉමා ගාථායො අභාසිත්ථාති.
පාටිහීරසඤ්ඤකත්ථෙරස්ස අපදානං තතියං.
434. ඤාණත්ථවිකත්ථෙරාපදානං
4664. කණිකාරංව ජලිතං දීපරුක්ඛංව ජොතිතං, කඤ්චනංව විරොචන්තං අද්දසං දිපදුත්තමං.
4665. කමණ්ඩලුං ඨපෙත්වාන වාකචීරං ච කුණ්ඩිකං, එකංසං අජිනං කත්වා බුද්ධසෙට්ඨං ථවිං අහං.
4666. තමන්ධකාරං විධමං මොහජාලසමාකුලං, ඤාණාලොකං දස්සයිත්වා{1} නිත්තිණ්ණොසි මහාමුනි.
4667. සමුද්ධරසිමං ලොකං සබ්බාවන්තමනුත්තර{2}, ඤාණෙ තෙ උපමා නත්ථි යාවතා ජගතො ගති.{3}
4668. තෙන ඤාණෙන සබ්බඤ්ඤූ ඉති බුද්ධො පවුච්චති, වන්දාමි තං මහාවීර සබ්බඤ්ඤුතමනාවරං.
4669. සතසහස්සෙ ඉතො{4} කප්පෙ බුද්ධසෙට්ඨං ථවිං අහං, දුග්ගතිං නාභිජානාමි ඤාණත්ථවායිදං{5} ඵලං.
4670. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
4671. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4672. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ඤාණත්ථවිකො ථෙරො ඉමා ගාථායො අභාසිත්ථාති.
ඤාණත්ථවිකත්ථෙරස්ස අපදානං චතුත්ථං.
435. උච්ඡුඛණ්ඩිකත්ථෙරාපදානං
4673. නගරෙ බන්ධුමතියා ද්වාරපාලො අහොසහං, අද්දසං විරජං බුද්ධං සබ්බධම්මාන පාරගුං.
4674. උච්ඡුඛණ්ඩකමාදාය බුද්ධසෙට්ඨස්සදාසහං, පසන්නචිත්තො සුමනො විපස්සිස්ස මහෙසිනො.
4675. එකනවුතෙ ඉතො කප්පෙ යං උච්ඡුමදදිං තදා, දුග්ගතිං නාභාජානාමි උච්ඡුඛණ්ඩස්සිදං ඵලං.
4676. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
4677. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4678. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා උච්ඡුකණ්ඩිකො ථෙරො ඉමා ගාථායො අභාසිත්ථාති.
උච්ඡුඛණ්ඩිකත්ථෙරස්ස අපදානං පඤ්චමං.
436 කලම්බදායකත්ථෙරාපදානං
4679. රොමසො නාම සම්බුද්ධො වසතී පබ්බතන්තරෙ, කලම්බං තස්ස පාදාසිං පසන්නො සෙහි පාණිහි
4680. චතුනවුතෙ ඉතො කප්පෙ යං දානමදදිං තදා, දුග්ගතිං නාභිජානාමි කලම්බස්ස ඉදං ඵලං.
4681. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
4682. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.