4524. තෙන කම්මෙන සුකතෙන චෙතනාපණිධීහි ච, ජහිත්වා මානුසං දෙහං තාවතිංසමගච්ඡහං.
4525. චතුනවුතෙ ඉතො කප්පෙ යං කම්මමකරිං තදා, දුග්ගතිං නාභිජානාමි බුද්ධපූජායිදං ඵලං.
4526. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
4527. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4528. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සත්තකදම්බපුප්ඵියො ථෙරො ඉමා ගාථායො අභාසිත්ථාති.
සත්තකදම්බපුප්ඵියත්ථෙරස්ස අපදානං චතුත්ථං.
425. කොරණ්ඩපුප්ඵියත්ථෙරාපදානං
4529. වනකම්මිකො පුරෙ ආසිං පිතුමාතුමතෙනහං,{1} පසුමාරෙන ජීවාමි කුසලං මෙ න විජ්ජති.
4530. මම ආසයසාමන්තා තිස්සො ලොකග්ගනායකො, පදාති තීණි දස්සෙසි අනුකම්පාය චක්ඛුමා.
4531. අක්කන්තෙ ච පදෙ දිස්වා තිස්සනාමස්ස සත්ථුනො, හට්ඨො හට්ඨෙන චිත්තෙන පදෙ චිත්තං පසාදයිං.
4532. කොරණ්ඩං පුප්ඵිතං දිස්වා පාදපං ධරණීරුහං, සකොටකං{2} ගහෙත්වාන පදසෙට්ඨෙ අපූජයිං.{3}
4533. තෙන කම්මෙන සුකතෙන චෙතනාපණිධීහි ච, ජහිත්වා මානුසං දෙහං තාවතිංසමගච්ඡහං.
4534. යං යං යොනුපපජ්ජාමි දෙවත්තං අථ මානුසං, කොරණ්ඩවණ්ණකො යෙව සප්පභාසො භවාමහං.
4535. ද්වෙනවුතෙ ඉතො කප්පෙ යං කම්මමකරිං තදා, දුග්ගතිං නාභිජානාමි පදපූජායිදං ඵලං.
4536. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
4537. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4538. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කොරණ්ඩපුප්ඵියො ථෙරො ඉමා ගාථායො අභාසිත්ථාති.
කොරණ්ඩපුප්ඵියත්ථෙරස්ස අපදානං පඤ්චමං.
426. ඝතමණ්ඩදායකත්ථෙරාපදානං
4539. සුචින්තිතං භගවන්තං ලොකජෙට්ඨං නරාසභං. උපවිට්ඨං මහාරඤ්ඤං වාතාබාධෙන පීළිතං. දිස්වා චිත්තං පසාදෙත්වා ඝතමණ්ඩං උපානයිං.
4540. කතත්තා ආචිතත්තා ච ගඞ්ගා භාගීරථී අයං, මහාසමුද්දා චත්තාරො ඝතං සම්පජ්ජරෙ මම.
4541. අයං ච පඨවී ඝොරා අප්පමාණා අසඞ්ඛියා, මම සඞ්කප්පමඤ්ඤාය භවතෙ මධුසක්ඛරා.
4542. චතුදීපා{1} ඉමෙ රුක්ඛා පාදපා ධරණීරුහා, මම සඞ්කප්පමඤ්ඤාය කප්පරුක්ඛා භවන්ති තෙ.
4543. පඤ්ඤාසක්ඛත්තුං දෙවින්දො දෙවරජ්ජමකාරයිං, එකපඤ්ඤාසක්ඛත්තුඤ්ච චක්කවත්තී අහොසහං, පදෙසරජ්ජං විපුලං ගණනාතො අසංඛියං.
4544. චතුනවුතෙ ඉතො කප්පෙ යං දානමදදිං තදා, දුග්ගතිං නාභිජානාමි ඝතමණ්ඩස්සිදං ඵලං.
4545. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
4546. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4547. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ඝතමණ්ඩදායකො ථෙරො ඉමා ගාථායො අභාසිත්ථාති.
ඝතමණ්ඩදායකත්ථෙරස්ස අපදානං ඡට්ඨං.
427. එකධම්මසවණියත්ථෙරාපදානං
4548. පදුමුත්තරො නාම ජිනො සබ්බධම්මානපාරගූ, චතුසච්චං පකාසෙන්තො සන්තාරෙසි බහුං ජනං.
4549. අහං තෙන සමයෙන ජටිලො උග්ගතාපනො, ධුනන්තො වාකචීරානි ගච්ඡාමි අම්බරෙ තදා.
4550. බුද්ධසෙට්ඨස්ස උපරි ගන්තුං න විසහාමහං, පක්ඛීව සෙලමාසජ්ජ ගමනං න ලභාමහං.
4551. උදකෙ’වොක්කමිත්වාන එවං ගච්ඡාමි අම්බරෙ, න මෙ ඉදං භූතපුබ්බං ඉරියාපථවිකොපානං.
4552. හන්දමෙතං ගවෙසිස්සං අප්පෙව’ත්ථං ලභෙය්යහං, ඔරොහන්තො අන්තලික්ඛා සද්දමස්සොසි සත්ථුනො.
4553. සරෙන රජනීයෙන සවණීයෙන වග්ගුනා, අනිච්චතං කථෙන්තස්ස තඤ්ඤෙව උග්ගහිං තදා.
4554. අනිච්චසඤ්ඤං උග්ගය්හ අගමාසිං මමස්සමං, යාවතායුං වසිත්වාන තත්ථ කාලකතො අහං.
4555. චරිමෙ වත්තමානම්හි සද්ධම්මමසවණං සරිං, තෙන කම්මෙන සුකතෙන චෙතනාපණිධීහි ච, ජහිත්වා මානුසං දෙහං තාවතිංසමගච්ඡහං.
4556. තිංසකප්පසහස්සානි දෙවලොකෙ රමිං අහං, එකපඤ්ඤාසක්ඛත්තුඤ්ච දෙවරජ්ජමකාරයිං.
4557. එකවීසතික්ඛත්තුඤ්ච චක්කවත්තී අහොසහං, පදෙසරජ්ජං විපුලං ගණනාතො අසංඛියං.
4558. අනුභොසිං{1} සකං පුඤ්ඤං සුඛිතොහං භවාභවෙ, අනුස්සරාමි තං සඤ්ඤං සංසරන්තො භවාභවෙ, න කොටිං පටිවිජ්ඣාමි නිබ්බානං අච්චුතං පදං.
4559. පිතු ගෙහෙ නිසීදිත්වා සමණො භාවිතින්ද්රියො, කථයං{2} පරිදීපෙන්තො අනිච්චතමුදාහරි.
4560. අනිච්චා වත සංඛාරා උප්පාදවයධම්මිනො, උප්පජ්ජිත්වා නිරුජ්ඣන්ති තෙසං වූපසමො සුඛො.
4561. සහ ගාථං සුණිත්වාන පුබ්බසඤ්ඤමනුස්සරිං, එකාසනෙ නිසීදිත්වා අරහත්තමපාපුණිං.
4562. ජාතියා සත්තවස්සෙන අරහත්තමපාපුණිං, උපසම්පාදයී බුද්ධො ධම්මසවණස්සිදං ඵලං.
4563. සතසහස්සෙ ඉතො කප්පෙ යං ධම්මමසුණිං තදා, දුග්ගතිං නාභිජානාමි ධම්මසවණස්සිදං ඵලං.
4564. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
4565. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4566. පටිසම්භිදා චතස්සො ච විමොක්ඛාපි ච අට්ඨිමෙ, ඡළිභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා එකධම්මසවණියො ථෙරො ඉමා ගාථායො අභාසිත්ථාති.
එකධම්මසවණියත්ථෙරස්ස අපදානං සත්තමං.
428. සුචින්තිතත්ථෙරාපදානං
4567. නගරෙ හංසවතියා අහොසිං කස්සකො තදා, කසිකම්මෙන ජීවාමි තෙන පොසෙමි දාරකෙ.
4568. සුසම්පන්නං තදා ඛෙත්තං ධඤ්ඤං මෙ ඵලිතං{1} අහු, පාකකාලෙ ච සම්පත්තෙ එවං චින්තෙසහං තදා.
4569. නච්ඡන්නං නප්පතිරූපං ජානන්තස්ස ගුණාගුණං, යො’හං සඞ්ඝෙ අදත්වාන අග්ගං භුඤ්ජෙය්ය චෙ තදා.
4570. අයං බුද්ධො අසමසමො ද්වත්තිංසවරලක්ඛණො, තතො පභාවිතො සඞ්ඝො පුඤ්ඤක්ඛෙත්තො අනුත්තරො.
4571. තත්ථ දස්සාමහං දානං නවසස්සං පුරෙ පුරෙ, එවාහං චින්තයිත්වාන හට්ඨො පීණිතමානසො.
4572. ඛෙත්තතො ධඤ්ඤමාහත්වා{2} සම්බුද්ධමුපසඞ්කමිං, උපසඞ්කම්ම සමුබුද්ධං ලොකජෙට්ඨං නරාසභං, වන්දිත්වා සත්ථුනො පාදෙ ඉමං වචනමබ්රවිං.
4573. නවසස්සං ච සම්පන්නං ආයාගො පි{3} ච ත්වං මුනෙ, අනුකම්පමුපාදාය අධිවාසෙහි චක්ඛුම.
4574. පදුමුත්තරො ලොකවිදූ ආහුතීනං පටිග්ගහො, මම සඞ්කප්පමඤ්ඤාය ඉමං{4} වචනමබ්රවි.
4575. “චත්තාරො ච පටිපන්නා චත්තාරො ච ඵලෙ ඨිතා, එස සඞ්ඝො උජුභූතො පඤ්ඤාසීලසමාහිතො.
4576. යජන්තානං මනුස්සානං පුඤ්ඤපෙක්ඛානපාණිනං, කරොතොපධිකං පුඤ්ඤං සඞ්ඝෙ දින්නං මහප්ඵලං.
4577. තස්මිං සඞ්ඝෙ පදාතබ්බං{1} නවසස්සං{2} තථෙතරං, සඞ්ඝතො උද්දිසිත්වාන භික්ඛූ නෙත්වාන සංඝරං, පටියත්තං ඝරෙ යන්තං{3} භික්ඛුසඞ්ඝස්ස දෙහි ත්වං.”
4578. සඞ්ඝතො උද්දිසිත්වාන භික්ඛු නෙත්වානහං ඝරං, යං ඝරෙ පටියත්තං මෙ භික්ඛුසඞ්ඝස්සදාසහං.
4579. තෙන කම්මෙන සුකතෙන චෙතනා පණිධීහි ච, ජහිත්වා මානුසං දෙහං තාවතිංසමගච්ඡහං.
4580. තත්ථ මෙ සුකතං ව්යම්හං සොවණ්ණං සප්පභස්සරං, සට්ඨියොජනමුබ්බෙධං තිංසයොජනවිත්ථතං.
(එකූනවීසතිමං භාණවාරං.)
4581. ආකිණ්ණං භවනං මය්හං නාරීගණසමාකුලං, තත්ථ භුත්වා පිවිත්වා ච වසාමි තිදසෙ අහං.
4582. සතානං තීණික්ඛත්තුං ච දෙවරජ්ජමකාරයිං, සතානං පඤ්චක්ඛත්තුං ච චක්කවත්තී අහොසහං, පදෙසරජ්ජං විපුලං ගණනාතො අසඞ්ඛියං.
4583. භවාභවෙ සංසරන්තො ලභාමි අමිතං ධනං, භොගෙ මෙ ඌනතා නත්ථි නවසස්සස්සිදං ඵලං.
4584. හත්ථියානං අස්සයානං සිවිකං සන්දමානිකං, ලභාමි සබ්බමෙවෙතං නවසස්සස්සිදං ඵලං.
4585. නවවත්ථං නවඵලං නවග්ගරසභොජනං, ලභාමි සබ්බමෙවෙතං නවසස්සස්සිදං ඵලං.
4586. කොසෙය්යකම්බලියානි ඛොමකප්පාසිකානි ච, ලභාමි සබ්බමෙවෙතං නවසස්සස්සිදං ඵලං.
4587. දාසීගණං දාසගණං නාරියො ච අලඞ්කතා, ලභාමි සබ්බමෙවෙතං නවසස්සස්සිදං ඵලං.
4588. න මං සීතං වා උණ්හං වා පරිළාහො න විජ්ජති, අථො චෙතසිකං දුක්ඛං හදයෙ මෙ න විජ්ජති.
4589. ඉමං ඛාද ඉමං භුඤ්ජ ඉමම්හි සයනෙ සය, ලභාමි සබ්බමෙවෙතං නවසස්සස්සිදං ඵලං.
4590. අයං පච්ඡිමකොදානි චරිමො වත්තතෙ භවො, අජ්ජාපි දෙය්යධම්මො{1} මෙ ඵලං තොසෙති සබ්බදා.
4591. නවසස්සං දදිත්වාන සඞ්ඝෙ ගණවරුත්තමෙ, අට්ඨානිසංසෙ අනුභොමි කම්මානුච්ඡවිකෙ මම.
4592. වණ්ණවා යසවා හොමි මහාභොගො අනීතිකො, මහෙසක්ඛො{2} සදා හොමි අභෙජ්ජපරිසො සදා.
4593. සබ්බෙ මං අපචායන්ති යෙ කෙචි පඨවිස්සිතා, දෙය්යධම්මා ච යෙ කෙචි පුරෙ පුරෙ ලභාමහං.
4594. භික්ඛුසඞ්ඝස්ස වා මජ්ඣෙ බුද්ධසෙට්ඨස්ස සම්මුඛා, සබ්බෙපි සමතික්කම්ම දෙන්ති මය්හෙව{3} දායකා.
4595. පඨමං නවසස්සං හි දත්වා සඞ්ඝෙ ගණුත්තමෙ, ඉමානිසංසෙ අනුභොමි නවසස්සස්සිදං ඵලං.
4596. සතසහස්සෙ ඉතො කප්පෙ යං දානමදදිං තදා, දුග්ගතිං නාභිජානාමි නවසස්සස්සිදං ඵලං.
4597. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
4598. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4599. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සුචින්තිතො ථෙරො ඉමා ගාථායො අභාසිත්ථාති.
සුචින්තිතත්ථෙරස්ස අපදානං අට්ඨමං.
429. සොණ්ණකිඞ්කණියත්ථෙරාපදානං
4600. සද්ධාය අභිනික්ඛම්ම පබ්බජිං අනගාරියං, වාකචීරධරො ආසිං තපොකම්මමපස්සිතො.
4601. අත්ථදස්සී තු භගවා ලොකජෙට්ඨො නරාසභො, උප්පජ්ජි තම්හි සමයෙ තාරයන්තො මහාජනං.
4602. බලඤ්ච වත මෙ ඛීණං ව්යාධිනා පරමෙන තු, බුද්ධසෙට්ඨං සරිත්වාන පුලිනෙ ථූපමුත්තමං-
4603. කරිත්වා හට්ඨචිත්තොහං සහත්ථෙන සමොකිරිං, සොණ්ණකිඞ්කණිපුප්ඵානි උදග්ගමනසො අහං.
4604. සම්මුඛා විය සම්බුද්ධං ඵූපං පරිචරිං අහං, තෙන චෙතොපසාදෙන අත්ථදස්සිස්ස තාදිනො.
4605. දෙවලොකං ගතො සන්තො ලභාමි විපුලං සුඛං, සුවණ්ණවණ්ණො තත්ථාසිං බුද්ධපූජායිදං ඵලං.
4606. අසීතිකොටියො මය්හං නාරියො සමලඞ්කතා, සදා මය්හං උපට්ඨන්ති බුද්ධපූජායිදං ඵලං.
4607. සට්ඨිතුරියසහස්සානි භෙරියො පණවානි ච, සඞ්ඛා ච දෙණ්ඩිමා{1} තත්ථ වග්ගුං නදන්ති{2} දුන්දුභි.