4443. නදීසොතපටිභාගා භොගා නිබ්බත්තරෙ මම, පරිමෙතුං න සක්කොමි පත්ථොදනස්සිදං ඵලං.
4444. ඉමං ඛාද ඉමං භුඤ්ජ ඉමම්හි සයනෙ සය, තෙනාහං සුඛිතො හොමි පත්ථොදනස්සිදං ඵලං.
4445. චතුනවුතෙ ඉතො කප්පෙ යං දානමදදිං තදා, දුග්ගතිං නාභිජානාමි පත්ථොදනස්සිදං ඵලං.
4446. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
4447. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4448. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පත්ථොදනදායකො ථෙරො ඉමා ගාථායො අභාසිත්ථාතී.
පත්ථොදනදායකත්ථෙරස්ස අපදානං නවමං.
420. මඤ්චදායකත්ථෙරාපදානං
4449. පරිනිබ්බුතෙ කාරුණිකෙ සිද්ධත්ථෙ ලොකනායකෙ, විත්ථාරිතෙ පාවචනෙ දෙවමානුසසක්කතෙ.
4450. චණ්ඩාලො ආසහං තත්ථ ආසන්දිපීඨකාරකො, තෙන කම්මෙන ජීවාමි තෙන පොසෙමි දාරකෙ.
4451. ආසන්දිං සුකතං කත්වා පසන්නො සෙහි පාණිහි, සයමෙවුපගන්ත්වාන භික්ඛුසඞ්ඝස්ස’දාසහං.
4452. තෙන කම්මෙන සුකතෙන චෙතනාපණිධීහි ච, ජහිත්වා මානුසං දෙහං තාවතිංසමගච්ඡහං.
4453. දෙවලොකගතො සන්තො මොදාමි තිදසඞ්ගණෙ,{1} සයනානි මහග්ඝානි නිබ්බත්තන්ති යදිච්ඡකං.
4454. පඤ්ඤාසක්ඛත්තුං දෙවින්දො දෙවරජ්ජමකාරයිං, අසීතික්ඛත්තුං රාජා ච චක්කවත්තී අහොසහං.
4455. පදෙසරජ්ජං විපුලං ගණනාතො අසඞ්ඛියං, සුඛිතො යසවා හොමි මඤ්චදානිස්සිදං ඵලං.
4456. දෙවලොකා චවිත්වාන එමි චෙ මානුසං භවං, මහාරහා සුසයනා සයමෙව භවන්ති මෙ.
4457. අයං පච්ඡිමකො මය්හං චරිමො වත්තතෙ භවො, අජ්ජාපි සයනෙ කාලෙ{1} සයනං උපතිට්ඨති.
4458. චතුනවුතෙ ඉතො කප්පෙ යං දානමදදිං තදා, දුග්ගතිං නාභිජානාමි මඤ්චදානස්සිදං ඵලං.
4459. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
4460. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4461. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා මඤ්චදායකො ථෙරො ඉමා ගාථායො අභාසිත්ථාති.
මඤ්චදායකත්ථෙරස්ස අපදානං දසමං.
උද්දානං:
භද්දාලී එකඡත්තො ච තිණසූලො ච මංසදො, නාගපල්ලවිකො දීපී උච්ඡඞ්ගී යාගුදායකො. පත්ථොදනී මඤ්චදදො ගාථායො ගණිතා චිහ, ද්වෙසතානි ච ගාථානං ගාථා චෙකා තදුත්තරිං.{*}
භද්දාලිවග්ගො ද්වාචත්තාළිසතිමො.
43. සකිංසම්මජ්ජකවග්ගො
421. සකිංසම්මජ්ජකත්ථෙරාපදානං.
4462. විපස්සිනො භගවතො පාටලිං බොධිමුත්තමං, දිස්වාව තං පාදපග්ගං තත්ථ චිත්තං පසාදයිං.
4463. සම්මජ්ජනිං ගහෙත්වාන බොධිං සම්මජ්ජි තාවදෙ, සම්මජ්ජිත්වාන තං බොධිං අවන්දිං පාටලිං අහං.
4464. තත්ථ චිත්තං පසාදෙත්වා සිරෙ කත්වාන අඤ්ජලිං, නමස්සමානො තං බොධිං ගච්ඡිං පටිකූටී{2} අහං.
4465. චාරිමග්ගෙන{3} ගච්ඡාමි සරන්තො බොධිමුත්තමං, අජගරො මං පීළෙසි ඝොරරූපො මහාබලො.
4466. ආසන්නෙ මෙ කතං කම්මං ඵලෙන තොසයී මමං, කළෙබරං{1} මෙ ගිලති දෙවලොකෙ රමාමහං
4467. අනාවිලං මම චිත්තං විසුද්ධං පණ්ඩරං සදා, සොකසල්ලං න ජානාමි චිත්තසන්තාපනං මම.
4468. කුට්ඨං ගණ්ඩො කිලාසො ච අපමාරො විතච්ඡිකා, දද්දු කණ්ඩු ච මෙ නත්ථි ඵලං සම්මජ්ජනෙ ඉදං.{2}
4469. සොකො ච පරිදෙවො ච හදයෙ මෙ න විජ්ජති, අභන්තං උජුකං චිත්තං ඵලං සම්මජ්ජනෙ ඉදං.
4470. සමාධීසු න සජ්ජාමි{3} විසදං හොති මානසං, යං යං සමාධිමිච්ඡාමි සො සො සම්පජ්ජතෙ මම.{4}
4471. රජනීයෙ න රජ්ජාමි අථො දොසනියෙසු ච,{5} මොහනීයෙ න මුය්හාමි ඵලං සම්මජ්ජනෙ ඉදං.
4472. එකනවුතෙ ඉතො{6} කප්පෙ යං කම්මමකරිං තදා, දුග්ගතිං නාභිජානාමි ඵලං සම්මජ්ජනෙ ඉදං.
4473. කිලෙසා ඣාපිතා මය්හං භවා සබ්බෙ සමූහතා, නාගො’ච බන්ධනං ඡෙත්වා විහරාමි අනාසවො.
4474. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4475. පටිසම්භිදා චතස්සො විමොක්ඛා පි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සකිංසම්මජ්ජකො ථෙරො ඉමා ගාථායො අභාසිත්ථාති.
සකිංසම්මජ්ජකත්ථෙරස්ස අපදානං පඨමං.
422. එකදූස්සදායකත්ථෙරාපදානං
4476. නගරෙ හංසවතියා අහොසිං තිණහාරකො, තිණහාරෙන ජීවාමි තෙන පොසෙමි දාරකෙ.
4477. පදුමුත්තරො නාම ජිනො සබ්බධම්මානපාරගූ, තමන්ධකාරං නාසෙත්වා උප්පජ්ජි ලොකනායකො.
4478. සකෙ ඝරෙ නිසීදිත්වා එවං චිත්තෙසි තාවදෙ, බුද්ධො ලොකෙ සමුප්පන්නො දෙය්යධම්මො න විජ්ජති.
4479. ඉදං මෙ සාටකං එකං නත්ථි මෙ කොචි දායකො, දුක්ඛො නිරයසම්ඵස්සො රොපයිස්සාමි දක්ඛිණං.
4480. එවාහං චින්තයිත්වාන සකං චිත්තං පසාදයිං, එකං දුස්සං ගහෙත්වාන බුද්ධසෙට්ඨස්සදාසහං.
4481. එකදුස්සං දදිත්වාන උක්කුට්ඨිං සම්පවත්තයිං, යදි බුද්ධො ත්වං වීර තාරෙහි මං මහාමුනි.
4482. පදුමුත්තරො ලොකවිදූ ආහුතීනං පටිග්ගහො, මම දානං පකිත්තෙන්තො අකා මෙ අනුමොදනං:
4483. “ඉමිනා එකදුස්සෙන චෙතනාපණිධීහි ච, කප්පසතසහස්සානි විනිපාතං න ගච්ඡසි.
4484. ඡත්තිංසක්ඛත්තුං දෙවින්දො දෙවරජ්ජං කරිස්සසි, තෙත්තිංසක්ඛත්තුං රාජා ච චක්කවත්තී භවිස්සසි.
4485. පදෙසරජ්ජං විපුලං ගණනාතො අසඞ්ඛියං, දෙවලොකෙ මනුස්සෙ වා සංසරන්තො තුවං භවෙ.
4486. රූපවා ගුණසම්පන්නො අනවක්කන්තදෙහවා, අක්ඛොභං අමිතං දුස්සං ලභිස්සසි යදිච්ඡකං.”
4487. ඉදං වත්වාන සම්බුද්ධො ජලජුත්තමනායකො, නභං අබ්භුග්ගමී ධීරො හංසරාජා’ව අම්බරෙ.
4488. යං යං යොනුපපජ්ජාමි දෙවත්තං අථ මානුසං, භොගෙ මෙ ඌනතා නත්ථි එකදුස්සස්සිදං ඵලං.
4489. පදුද්ධාරෙ පදුද්ධාරෙ දුස්සං නිබ්බත්තතෙ මම, හෙට්ඨා දුස්සම්හි තිට්ඨාමි උපරිච්ඡදනං මම.
4490. චක්කවාළමුපාදාය සකානනං සපබ්බතං, ඉච්ඡමානො චහං අජ්ජ දුස්සෙහච්ඡාදයෙය්ය තං.
4491. තෙනෙව එකදුස්සෙන සංසරන්තො භවාභවෙ, සුවණ්ණවණ්ණො හුත්වාන සංසරාමි භවාභවෙ.
4492. විපාකං එකදුස්සස්ස නාජ්ඣගං කත්ථචික්ඛයං, අයං මෙ අන්තිමා ජාති විපච්චති ඉධාපි මෙ.
4493. සතසහස්සෙ ඉතො කප්පෙ යං දුස්සමදදිං තදා, දුග්ගතිං නාභිජානාමි එකදුස්සස්සිදං ඵලං.
4494. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
4495. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4496. පටිසම්භිදා චතස්සො විමොක්ඛා’පි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා එකදුස්සදායකො ථෙරො ඉමා ගාථායො අභාසිත්ථාති.
එකදුස්සදායකත්ථෙරස්ස අපදානං දුතියං.
423. එකාසනදායකත්ථෙරාපදානං
4497. හිමවන්තස්ස අවිදූරෙ ගොසිතො නාම පබ්බතො, අස්සමො සුකතො මය්හං පණ්ණසාලා සුමාපිතා.
4498. නාරදො ඉති නාමෙන කස්සපො ඉති මං විදූ, සුද්ධිමග්ගං ගවෙසන්තො වසාමි ගොසිතෙ තදා.
4499. පදුමුත්තරො නාම ජිනො සබ්බධම්මානපාරගූ, විවෙකකාමො සම්බුද්ධො ආගච්ඡි අනිලඤ්ජසා.
4500. වනග්ගෙ ගච්ඡමානස්ස දිස්වා රංසිං මහෙසිනො, කට්ඨමඤ්චං පඤ්ඤපෙත්වා අජිනඤ්ච අපත්ථරිං.
4501. ආසනං පඤ්ඤපෙත්වාන සිරෙ කත්වාන අඤ්ජලිං, සොමනස්සං පවෙදෙත්වා ඉදං වචනමබ්රවිං:
4502. සල්ලකත්තො මහාවීර ආතුරානං තිකිච්ඡකො, මමං රොගපරෙතස්ස තිකිච්ඡං දෙහි නායක.
4503. කල්ලත්ථිකා යෙ පස්සන්ති බුද්ධසෙට්ඨ තුවං මුනෙ, ධුවත්ථසිද්ධිං පප්පොන්ති එතෙසං ජජ්ජරො භවො.
4504. න මෙ දෙය්යං තව අත්ථි{1} පවත්තඵලභොජි’හං, ඉදං මෙ ආසනං අත්ථි නිසීදි කට්ඨමඤ්චකෙ.
4505. නිසීදි තත්ථ භගවා අසම්භීතො’ව{2} කෙසරී, මුහුත්තං වීතිනාමෙත්වා ඉදං වචනමබ්රවී:
4506. “විස්සත්ථො{3} හොහි මා භායී ලද්ධො ජොතිරසො තයා, යං තුය්හං පත්ථිතං සබ්බං පරිපූරිස්සතනාගතෙ.{4}
4507. න මොඝං තං කතං තුය්හං පුඤ්ඤක්ඛෙත්තෙ අනුත්තරෙ, සක්කා උද්ධරිතුං අත්තා යස්ස චිත්තං පණීහිතං.
4508. ඉමිනාසනදානෙන චෙතනාපණිධීහි ච, කප්පසතසහස්සානි විනිපාතං න ගච්ඡසි.
4509. පඤ්ඤාසක්ඛත්තුං දෙවින්දො දෙවරජ්ජං කරිස්සසි, අසීතික්ඛත්තුං රාජා ච චක්කවත්තී භවිස්සසි.
4510. පදෙසරජ්ජං විපුලං ගණනාතො අසඞ්ඛියං, සබ්බත්ථ සුඛිතො හුත්වා සංසාරෙ සංසරිස්සසි.”
4511. ඉදං වත්වාන සම්බුද්ධො ජලජුත්තමනායකො, නභං අබ්භුග්ගමී ධීරො හංසරාජාව අම්බරෙ.
4512. හත්ථියානං අස්සයානං සරථං සන්දමානිකං, ලභාමි සබ්බමෙවෙතං එකාසනස්සිදං ඵලං.
4513. කානනං පවිසිත්වාපි යදා ඉච්ඡාමි ආසනං, මම සඞ්කප්පමඤ්ඤාය පල්ලඞ්කො උපතිට්ඨති.
4514. වාරිමජ්ඣගතො සන්තො යදා ඉච්ඡාමි ආසනං, මම සඞ්කප්පමඤ්ඤාය පල්ලඞ්කො උපතිට්ඨති.
4515. යං යං යොනුපපජ්ජාමි දෙවත්තං අථ මානුසං, පල්ලඞ්කසතසහස්සානි පරිවාරෙන්ති මං සදා.
4516. දුවෙ භවෙ සංසරාමි දෙවත්තෙ අථ මානුසෙ, දුවෙ කුලෙ පජායාමි ඛත්තියෙ අථ බ්රාහ්මණෙ.
4517. එකාසනං දදිත්වාන පුඤ්ඤක්ඛෙත්තෙ අනුත්තරෙ, ධම්මපල්ලඞ්කමාදාය විහරාමි අනාසවො.
4518. සතසහස්සෙ ඉතො කප්පෙ යං දානමදදිං තදා, දුග්ගතිං නාභිජානාමි එකාසනස්සිදං ඵලං.
4519. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
4520. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4521. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා එකාසනදායකො ථෙරො ඉමා ගාථායො අභාසිත්ථාති.
එකාසනදායකත්ථෙරස්ස අපදානං තතියං.
424. සත්තකදම්බපුප්ඵියත්ථෙරාපදානං
4522. හිමවන්තස්ස අවිදූරෙ කදම්බො{1} නාම පබ්බතො, තස්මිං පබ්බතපස්සම්හි සත්ත බුද්ධා වසිංසු තෙ.
4523. කදම්බං පුප්ඵිතං දිස්වා පග්ගහෙත්වාන අඤ්ජලිං, සත්ත මාලා ගහෙත්වාන පුඤ්ඤචිත්තෙන ඔකිරිං.