4268. සුමෙධො නාම සම්බුද්ධො අග්ගො කාරුණිකො මුනි, විවෙකකාමො ලොකග්ගො හිමවන්තමුපාගමි.
4269. අජ්ඣොගහෙත්වා හිමවං සුමෙධො ලොකනායකො, පල්ලඞ්කමාභූජිත්වාන නිසීදි පුරිසුත්තමො.
4270. සමාධිං සො සමාපන්නො සුමෙධො ලොකනායකො, සත්තරත්තින්දිවං බුද්ධො නිසීදි පුරිසුත්තමො.
4271. ඛාරිකාජං{1} ගහෙත්වාන වනමජ්ඣොගහිං අහං, තත්ථද්දසාසිං සම්බුද්ධං ඔඝතිණ්ණමනාසවං.
4272. සම්මජ්ජනිං ගහෙත්වාන සම්මජ්ජිත්වාන අස්සමං, චතුදණ්ඩෙ ථම්භිත්වාන{2} අකාසිං මණ්ඩපං තදා.
4273. සාලපුප්ඵං ආහරිත්වා මණ්ඩපං ඡාදයිං අහං, පසන්නචිත්තො සුමනො අභිවන්දිං තථාගතං.
4274. යං වදන්ති සුමෙධොති භූරිපඤ්ඤං සුමෙධසං, භික්ඛුසඞ්ඝෙ නිසීදිත්වා ඉමා ගාථා අභාසථ.
4275. බුද්ධස්ස ගිරමඤ්ඤාය සබ්බෙ දෙවා සමාගමුං, අසංසයං බුද්ධසෙට්ඨො ධම්මං දෙසෙති චක්ඛුමා.
4276. සුමෙධො නාම සම්බුද්ධො ආහුතීනං පටිග්ගහො, දෙවසඞ්ඝෙ නිසීදිත්වා ඉමා ගාථා අභාසථ.
4277. “යො මෙ සත්තාහං මණ්ඩපං ධාරයී සාලඡාදිතං, තමහං කිත්තයිස්සාමි සුණාථ මම භාසතො.
4278. දෙවභූතො මනුස්සො වා හෙමවණ්ණො භවිස්සති, පහූතභොගො හුත්වාන කාමභොගී භවිස්සති.
4279. සට්ඨිනාගසහස්සානි සබ්බාලඞ්කාර භූසිතා, සුවණ්ණකච්ඡා මාතඞ්ගා හෙමකප්පනවාසසා.
4280. ආරූළ්හා ගාමණීයෙහි තොමරඞ්කුසපාණිභි, සායංපාතො{3} උපට්ඨානං ආගමිස්සන්ති’මං නරං, තෙහි නාගෙහි පරිවුතො රමිස්සති අයං නරො.
4281. සට්ඨිඅස්සසහස්සානි සබ්බාලඞ්කාරභූසිතා, ආජානීයා ව ජානියා සින්ධවා සීඝවාහිනො.
4282. ආරූළ්හා ගාමණීයෙහි ඉල්ලියාචාපධාරිහි, පරිවාරෙස්සන්තිමං නිච්චං බුද්ධපූජායිදං ඵලං.
4283. සට්ඨිරථසහස්සානි සබ්බාලඞ්කාරභූසිතා, දීපා අථොපි වෙය්යග්ඝා සන්නද්ධා උස්සිතද්ධජා.
4284. ආරූළ්හා ගාමණීයෙහි චාපහත්ථෙහි වම්මිහි, පරිවාරෙස්සන්තිමං නිච්චං බුද්ධපූජායිදං ඵලං.
4285. සට්ඨිගාමසහස්සානි පරිපුණ්ණානි සබ්බසො, පහූතධනධඤ්ඤානි සුසමිද්ධානි සබ්බසො, සදා පාතුභවිස්සන්ති බුද්ධපූජායිදං ඵලං.
4286. හත්ථි අස්සා රථා පත්තී සෙනා ච චතුරඞ්ගිනී, පරිවාරෙස්සන්තිමං නිච්චං බුද්ධපූජායිදං ඵලං.
4287. අට්ඨාරසෙ කප්පසතෙ දෙවලොකෙ රමිස්සති, සහස්සක්ඛත්තුං රාජා ච චක්කවත්තී භවිස්සති.
4288. සතානං තීණික්ඛත්තුඤ්ච දෙවරජ්ජං කරිස්සති, පදෙසරජ්ජං විපුලං ගණනාතො අසඞ්ඛියං.
4289. තිංසකප්පසහස්සම්හි ඔක්කාකකුලසම්භවො, ගොතමො නාම නාමෙන සත්ථා ලොකෙ භවිස්සති.
4290. තස්ස ධම්මෙසු දායාදො ඔරසො ධම්මනිම්මිතො, සබ්බාසවෙ පරිඤ්ඤාය විහරිස්සතනාසවො”
4291. තිංසකප්පසහස්සම්හි අද්දසං ලොකනායකං, එත්ථන්තරමුපාදාය ගවෙසිං අමතං පදං.
4292. ලාභා මය්හං සුලද්ධං මෙ යමහඤ්ඤාසි සාසනං, තිස්සො විජ්ජා අනුප්පත්තා කතං බුද්ධස්ස සාසනං.
4293. නමො තෙ පුරිසාජඤ්ඤ නමො තෙ පුරිසුත්තම, තව ඤාණං පකිත්තෙත්වා පත්තොම්හි අචලං පදං.
4294. යං යං යොනුපපජ්ජාමි දෙවත්තං අථ මානුසං, සබ්බත්ථ සුඛිතො හොමි ඵලං මෙ ඤාණකිත්තනෙ,
4295. ඉදං පච්ඡිමකං මය්හං චරිමො වත්තතෙ භවො, නාගොව බන්ධනං ඡෙත්වා විහරාමි අනාසවො.
4296. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
4297. ස්වාගතං වන මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4298. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා භද්දාලි ථෙරො ඉමා ගාථායො අභාසිත්ථාති.
භද්දාලිත්ථෙරස්ස අපදානං පඨමං.
412. එකඡත්තියත්ථෙරාපදානං
4299. චන්දභාගානදීතීරෙ අස්සමො සුකතො මම, සුසුද්ධපුලිනාකිණ්ණා පණ්ණසාලා සුමාපිතා.
4300. උත්තානකූලා නදිකා සුපතිත්ථා මනොරමා, මච්ඡකච්ඡපසම්පන්නා සුසුමාරනිසෙවිතා.
4301. අච්ඡා මයූරා දීපී ච කරවීකා ච සාලිකා, කූජන්ති සබ්බදා එතෙ සොභයන්තා මම’ස්සමං.
4302. කොකිලා මඤ්ජුභාණී ච හංසා ච මධුරස්සරා, අභිකූජන්ති තෙ තත්ථ සොභයන්තා මමස්සමං.
4303. සීහා ව්යග්ඝා වරාහා ච චකා{1} කොකතරච්ඡකා, ගිරිදුග්ගම්හි නාදෙන්ති සොභයන්තා මමස්සමං.
4304. එණීමිගා ච සරභා භෙරණ්ඩා සූකරා බහූ, ගිරිදුග්ගම්හි නාදෙන්ති සොභයන්තා මමස්සමං.
4305. උද්දාලකා චම්පකා ච පාටලී සින්දුවාරකා{2}, අතිමුත්තා අසොකා ච පුප්ඵන්ති මම අස්සමෙ.
4306. අඞ්කොලා යූථිකා චෙව සත්තලී බිම්බිජාලිකා, කණ්ණිකා කණිකාරා ච පුප්ඵන්ති මම අස්සමෙ.
4307. නාගා සාලා ච සළලා පුණ්ඩරීකෙත්ථ පුප්ඵිතා, දිබ්බගන්ධං සම්පවන්තා සොභයන්ති මමස්සමං.
4308. අජ්ජුනා අසනා චෙත්ථ මහානාමා ච පුප්ඵිතා, සාලා ච කඞ්ගුපුප්ඵා ච සොභන්ති මමස්සමං.
4309. අම්බා ජම්බූ ච තිලකා නිම්බා ච සාලකල්යාණී, දිබ්බගන්ධං සම්පවන්තා සොභයන්ති මමස්සමං.
4310. අසොකා ච කපිත්ථා ච භගිනිමාලෙත්ථ{1} පුප්ඵිතා, දිබ්බගන්ධං සම්පවන්තා සොභයන්ති මමස්සමං.
4311. කදම්බා කදලී චෙව ඉසිමුග්ගා ච රොපිතා, ධුවං ඵලානි ධාරෙන්ති සොභයන්තා මමස්සමං.
4312. හරීතකා ආමලකා අම්බා ජම්බූ විභීතකා, කොලා භල්ලාතකා බිල්ලා ඵලිනො මම අස්සමෙ,
4313. අවිදූරෙ පොක්ඛරණී සුපතිත්ථා මනොරමා, මන්දාලකෙහි සඤ්ඡන්නා පදුමුප්පලකෙහි ච.
4314. ගබ්භං ගණ්හන්ති පදුමා අඤ්ඤෙ පුප්ඵන්ති කෙසරී, ඔපත්තකණ්ණිකා චෙව පුප්ඵන්ති මම අස්සමෙ.
4315. පාඨීනා පාවුසා මච්ඡා වලජා{2} මුඤ්ජරොහිතා, අච්ඡොදකම්හි විචරං සොභයන්ති මමස්සමං.
4316. නයිතා අම්බගන්ධී ච අනුකූලෙ ච කෙතකා, දිබ්බගන්ධං සම්පවන්තා සොභයන්ති මමස්සමං.
4317. මධූ භිසම්හා සවති ඛීරසප්පි මුලාළිහි, දිබ්බගන්ධං සම්පවන්තා සොභයන්ති මමස්සමං.
4318. පුලිනා සොභනා තත්ථ ආකිණ්ණා ජලසෙවිතා, ඔපුප්ඵා පුප්ඵිතා සෙන්ති සොභයන්තා මමස්සමං.
4319. ජටාභාරෙන භරිතා අජිනුත්තරවාසනා, වාකචීරධරා සබ්බෙ සොභයන්ති මමස්සමං.
4320. යුගමත්තමපෙක්ඛන්තා නිපකා සන්තවුත්තිනො, කාමභොගෙ අනපෙක්ඛා වසන්ති මම අස්සමෙ.
4321. පරූළ්හකච්ඡනඛලොමා පඞ්කදන්තා රජස්සිරා, රජොජල්ලධරා සබ්බෙ වසන්ති මම අස්සමෙ.
4322. අභිඤ්ඤාපාරමිප්පත්තා අන්තලික්ඛචරා ච තෙ, උග්ගච්ඡන්තා නභං එතෙ සොභයන්ති මමස්සමං.
4323. තෙහි සිස්සෙහි පරිවුතො වසාමි විපිනෙ තදා, රත්තින්දිවං න ජානාමි සදා ඣානසමප්පිතො.
4324. භගවා තම්හි සමයෙ අත්ථදස්සී මහාමුනි, තමන්ධකාරං නාසෙන්තො උප්පජ්ජි ලොකනායකො.
4325. අථ අඤ්ඤතරො සිස්සො ආගච්ඡි මම සන්තිකං, මන්තෙ අජ්ඣෙතුකාමො සො ඡළඞ්ගං නාමලක්ඛණං.
4326. බුද්ධො ලොකෙ සමුප්පන්නො අත්ථදස්සී මහාමුනි, චතුසච්චං පකාසෙන්තො දෙසෙති අමතං පදං.
4327. තුට්ඨහට්ඨො පමුදිතො ධම්මන්තරගතාසයො, අස්සමා අභිනික්ඛම්ම ඉමං වචනමබ්රවිං:
4328. “බුද්ධො ලොකෙ සමුප්පන්නො බත්තිංසවරලක්ඛණො, හථ සබ්බෙ ගමිස්සාම සම්මාසම්බුද්ධසන්තිකං.”
4329. ඔවාදපටිකරා තෙ සද්ධම්මෙ පාරමිඞ්ගතා, සාධූ’ති සම්පටිච්ඡිංසු උත්තමත්ථං ගවෙසකා.
4330. ජටාභාරභරිතා තෙ අජිනුත්තරවාසිනො, උත්තමත්ථං ගවෙසන්තො{1} නික්ඛමිංසු වනා තදා.
4331. භගවා තම්හි සමයෙ අත්ථදස්සී මහායසො, චතුසච්චං පකාසෙන්තො දෙසෙති අමතං පදං.
4332. සෙතච්ඡත්තං ගහෙත්වාන බුද්ධසෙට්ඨස්ස ධාරයිං, එකාහං ධාරයිත්වාන බුද්ධසෙට්ඨමවන්දහං.
4333. අත්ථදස්සී තු භගවා ලොකජෙට්ඨො නරාසභො, භික්ඛුසඞ්ඝෙ නිසීදිත්වා ඉමා ගාථා අභාසථ:
4334. “යො මෙ ඡත්තමධාරෙසි පසන්නො සෙහි පාණිහි, තමහං කිත්තයිස්සාමි සුණාථ මම භාසතො.
4335. ඉමස්ස ජායමානස්ස දෙවත්තෙ අථ මානුසෙ, ධාරෙස්සති සදා ඡත්තං ඡත්තදානස්සිදං ඵලං.
4336. සත්තසත්තතිකප්පානි දෙවලොකෙ රමිස්සති, සහස්සක්ඛත්තුං රාජා ච වක්කවත්තී භවිස්සති.
4337. සත්තසත්තතික්ඛත්තුඤ්ච දෙවරජ්ජං කරිස්සති, පදෙසරජ්ජං විපුලං ගණනාතො අසඞ්ඛියං.
4338. අට්ඨාරසෙ කප්පසතෙ ගොතමො සක්යපුඞ්ගවො, තමන්ධකාරං නාසෙන්තො උප්පජ්ජිස්සති චක්ඛුමා.
4339. තස්ස ධම්මෙසු දායාදො ඔරසො ධම්මනිම්මිතො, සබ්බාසවෙ පරිඤ්ඤාය විහරිස්සතනාසවො.”
4340. යතො අහං කම්මමකං ඡත්තං බුද්ධස්ස ධාරයං, එත්ථන්තරෙ න ජානාමි සෙතච්ඡත්තං අධාරිතං.
4341. ඉදං පච්ඡිමකං මය්හං චරිමො වත්තතෙ භවො, ඡත්තධාරණමජ්ජාපි වත්තතෙ නිච්චකාලිකං.
4342. අහො මෙ සුකතං කම්මං අත්ථදස්සිස්ස තාදිනො, සබ්බාසවපරික්ඛීණො නත්ථි’දානි පුනබ්භවො.
4343. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
4344. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4345. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා එකඡත්තියො ථෙරො ඉමා ගාථායො අභාසිත්ථාති.
එකඡත්තියත්ථෙරස්ස අපදානං දුතියං.
413. තිණසූලකඡදනියත්ථෙරාපදානං
4346. ජාතිජරඤ්ච මරණං පච්චවෙක්ඛිං අහං තදා, එකතො අභිනික්ඛම්ම පබ්බජිං අනගාරියං.
4347. චරමානො’ නුපුබ්බෙන ගඞ්ගාතීර මුපාගමිං, තත්ථද්දසාසිං පඨවිං ගඞ්ගාතීරෙ සමුන්නතං.
4348. අසස්මං තත්ථ මාපෙත්වා වසාමි අස්සමෙ අහං, සුකතො චඞ්කමො මය්හං නානාදිජගණායුතො.
4349. මමුපෙන්ති ච විස්සත්ථා කූජන්ති ච මනොහරං, රමමානො සහ තෙහි වසාමි අස්සමෙ අහං.
4350. මම අස්සමසාමන්තා මිගරාජා චතුක්කමො, ආසයා අභිනික්ඛම්ම ගජ්ජි සො අසනී විය.
4351. නදිතෙ මිගරාජෙ ච හාසො මෙ උපපජ්ජථ, මිගරාජං ගවෙසන්තො අද්දසං ලොකනායකං.
4352. දිස්වානහං දෙවදෙවං තිස්සං ලොකග්ගනායකං, හට්ඨො හට්ඨෙන චිත්තෙන පූජයිං නාගකෙසරං.
4353. උග්ගච්ඡන්තංව සුරියං සාලරාජංව පුප්ඵිතං, ඔසධිංව විරොචන්තං සන්ථවිං ලොකනායකං.
4354. තව ඤාණෙන සබ්බඤ්ඤූ මොචෙසි’මං සදෙවකං, තවං ආරාධයිත්වාන ජාතියා පරිමුච්චරෙ.
4355. අදස්සනෙන සබ්බඤ්ඤූ බුද්ධානං සබ්බදස්සිනං, පතන්ත්යවීචිනිරයං රාගදොසෙහි ඔඵුටා.{1}
4356. තව දස්සනමාගම්ම සබ්බඤ්ඤූ ලොකනායක, පමුච්චන්ති භවා සබ්බෙ ඵුසන්ති අමතං පදං.
4357. යදා බුද්ධා චක්ඛුමන්තො උප්පජ්ජන්ති පභඞ්කරා, කිලෙසෙ ඣාපයිත්වාන ආලොකං දස්සයන්ති තෙ.
4358. කිත්තයිත්වාන සම්බුද්ධං තිස්සං ලොකග්ගනායකං, හට්ඨො හට්ඨෙන චිත්තෙන තිණසූලං අපූජයිං.
4359. මම සඞ්කප්පමඤ්ඤාය තිස්සො ලොකග්ගනායකො, සකාසනෙ නිසීදිත්වා ඉමා ගාථා අභාසථ:
4360. “යො මං පුප්ඵෙහි ඡාදෙසි පසන්නො සෙහි පාණිහි, තමහං කිත්තයිස්සාමි සුණාථ මම භාසතො.
4361. පඤ්චවීසතික්ඛත්තුං සො දෙවරජ්ජං කරිස්සති, පඤ්චසත්තතික්ඛත්තුඤ්ච චක්කචත්තී භවිස්සති.