3991. නදී ච සන්දතී තත්ථ සූපතිත්ථා මනොරමා, අනුපතිත්ථෙ ජායන්තී පදුමුප්පලකා බහූ.
3992. පාඨීනා පාවුසා මච්ඡා වලජා මුඤ්ජරොහිතා, මච්ඡකච්ඡපසඤ්ඡන්නා නදිකා සන්දතෙ සදා.
3993. තිමිරා පුප්ඵිතා තත්ථ අසොකා ඛුද්දමාලකා, පුන්නාගා ගිරිපුන්නාගා සම්පවන්ති මමස්සමං.
3994. කුටජා පුප්ඵිතා තත්ථ තිණසූලවනානි ච, සාලා ච සලලා තත්ථ චම්පකා පුප්ඵිතා බහූ.
3995. අජ්ජුනා අතිමුත්තා ච මහානාමා ච පුප්ඵිතා, අසනා මධුගන්ධී ච පුප්ඵිතා තෙ මමස්සමෙ.
3996. උද්දාලකා පාටලිකා යූථිකා ච පියඞ්ගුකා, බිම්බිජාලකසඤ්ඡන්නා සමන්තා අඩ්ඪයොජනං.
3997. මාතඞ්ගවා{1} සත්තලියො පාටලී සින්දුවාරකා, අඞ්කොලකා බහූ තත්ථ තාලකූටා ච{2} පුප්ඵිතා.
3998. සෙලෙය්යකා බහූ තත්ථ පුප්ඵිතා මම අස්සමෙ, එතෙසු පුප්ඵමානෙසු{3} සොභන්ති පාදපා බහූ, සමන්තා තෙන ගන්ධෙන වායතෙ මම අස්සමො.
3999. හරීතකා ආමලකා අම්බා ජම්බූ විභීටකා,{4} කොලා භල්ලාතකා බිල්ලා ඵාරුසකඵලානි ච.
4000. තින්දුකා ච පියාලා ච මධුකා කාසුමාරියො,{5} ලබුජා පනසා තත්ථ කදලී බදරීඵලා.{6}
4001. අම්බාටකා බහූ තත්ථ වල්ලිකාරඵලානි ච, බීජපූරසපාරියො{7} ඵලිතා මම අස්සමෙ.
4002. ආළකා ඉසිමුග්ගා ච තතො මොදඵලා බහූ, අවටා පක්කභරිතා පිලකඛුදුම්බරානි ච.
4003. පිප්ඵලී මරිචා තත්ථ නිග්රොධා ච කපිත්ථනා, උදුම්බරකා බහවො කණ්ඩපක්කා ච පාරියො{8}
4004. එතෙ චඤ්ඤෙ ච බහවො ඵලිතා අස්සමෙ මම, පුප්ඵරුක්ඛාපි බහවො පුප්ඵිතා මම අස්සමෙ.
4005. ආලුවා ච කළම්බා ච බිලාලී තක්කලානි ච, ආලකා තාලකා චෙව විජ්ජන්ති අස්සමෙ මම.
4006. අස්සමස්සා’විදූරෙ මෙ මහාජාතස්සරො අහු, අච්ඡොදකො සීතජලො පුතතිත්ථො මනොරමො.
4007. පදුමුප්පලා බහූ තත්ථ පුණ්ඩරීකසමායුතා, මන්දාලකෙහි සඤ්ඡන්නා නානාගන්ධසමෙරිතා.
4008. ගබ්භං ගණ්යහන්ති පදුමා අඤ්ඤෙ පුප්ඵන්ති කෙසරී, ඔපුප්ඵපත්තා තිට්ඨන්ති පදුමකණ්ණිකා{1} බහූ.
4009. මධු භිසම්හා සවති ඛීරං සප්පි මුලාළිභි, සමන්තා තෙන ගන්ධෙන නානා ගන්ධසමෙරිතා.
4010. කුමුදා අම්බගන්ධී ච නයිතා දිස්සරෙ බහූ, ජාතස්සරස්සානුකූලං කෙතකා පුප්ඵිතා බහූ.
4011. සුඵුල්ලා බන්ධුජීවා ච සෙතචාරී සුගන්ධිකා, කුම්භීලා සුංසුමාරා ච ගහකා තත්ථ ජායරෙ.
4012. උග්ගාහකා අජගරා තත්ථ ජාතස්සරෙ බහූ, පාඨීනා පාවුසා මච්ඡා වලජා{2} මුඤ්ජරොහිතා.
4013. මච්ඡකච්ඡප සඤ්ඡන්නා අථො සම්පටකෙහි ච, පාරෙවතා රවිහංසා කුකුත්ථා{3} ච නදීචරා.
4014. දින්දිභා චක්කවාකා ච චම්පකා ජීවජීවකා, කලන්දකා උක්කුසා ච සෙනකා උද්ධරා බහූ.
4015. කොට්ඨකා සුකපොතා ච කුලීරා{4} චමරා බහූ, කාරෙණියො{5} ච තිලකා උපජීවන්ති තං සරං.
4016. සීහා ව්යග්ඝා ච දීපී ච අච්ඡකොකතරච්ඡකා, වානරා කින්නරා චෙව දිස්සන්ති මම අස්සමෙ.
4017. තානි ගන්ධානි ඝායන්තො භක්ඛයන්තො ඵලානහං, ගන්ධොදකං පිවන්තො ච වසාමි මම අස්සමෙ.
4018. එණිමිගා වරාහා ච පසදා ඛුද්දරූපකා, අග්ගිකා ජොතිකා චෙව වසන්ති මම අස්සමෙ.
4019. හංසා කොඤ්චා මයූරා ච සාළිකා පි ච කොකිලා, මඤ්ජරිකා බහූ තත්ථ කොසිකා පොට්ඨසීසකා.
4020. පිසාචා දානවා චෙව කුම්භණ්ඩා රක්ඛයා බහූ, ගරුළා පන්නගා චෙව වසන්ති මම අස්සමෙ.
4021. මහානුභාවා ඉසයො සන්තචිත්තා සමාහිතා, කමණ්ඩලුධරා සබ්බෙ අජිනුත්තරවාසනා, තෙ ජටාභාරභරිතා{1} වසන්ති මම අස්සමෙ.
4022. යුගමත්තඤ්ච පෙක්ඛන්තා නිපකා සන්තවුත්තිනො, ලාභාලාභෙන සන්තුට්ඨා වසන්ති මම අස්සමෙ.
4023. වාකචීරං ධුනන්තා තෙ ඵොටෙන්තා’ජිනචම්මකං, සබලෙහි උපත්ථද්ධා ගච්ඡන්ති අම්බරෙ සදා.{2}
4024. න තෙ දකං ආහරන්ති කට්ඨං වා අග්ගිදාරුකං, සයඤ්ච උපසම්පන්නා පාටිහීරස්සිදං ඵලං.
4025. ලොහදොණීං ගහෙත්වාන වනමජ්ඣෙ වසන්ති තෙ, කුඤ්ජරාව මහානාගා අසම්භීතාව කෙසරී.
4026. අඤ්ඤෙ ගච්ඡන්ති ගොයානං අඤ්ඤෙ පුබ්බවිදෙහකං,{3} අඤ්ඤෙ ච උත්තරකුරුං සකං බලමවස්සිතා,{4} තතො පිණ්ඩං ආහරිත්වා පරිභුඤ්ජන්ති එකතො.
4027. සබ්බෙසං පක්කමන්තානං උග්ගතෙජාන තාදිනං, අජිනචම්මසද්දෙන වනං සද්දායතෙ තදා.
4028. එදිසා තෙ මහාවීර සිස්සා උග්ගතපා මම, පරිවුතො අහං තෙහි වසාමි මම අස්සමෙ.
4029. තොසිතා සකකම්මෙන විනීතාපි සමාගතා, ආරාධයිංසු මං එතෙ සකකම්මාභිලාසිනො, සීලවන්තො ච නිපකා අප්පමඤ්ඤාසු කොවිදා.
4030. පදුමුත්තරො ලොකවිදූ ආහුතීනං පටිග්ගහො, සමයං සංවිදිත්වාන උපගච්ඡි විනායකො.
4031. උපගන්ත්වාන සම්බුද්ධො ආතාපී නිපකො මුනි, පත්තං පග්ගය්හ සම්බුද්ධො භික්ඛාය මමුපාගමි.
4032. උපාගතං මහාවීරං ජලජුත්තමනායකං, තිණසන්ථරං පඤ්ඤපෙත්වා{5} සාලපුප්ඵෙහි ඔකිරිං.
4033. නිසීදෙත්වාන{6} සම්බුද්ධං හට්ඨො සංවිග්ගමානසො, ඛිප්පං පබ්බතමාරුය්හ අගරුං අග්ගහිං අහං.
4034. කුම්භමත්තං ගහෙත්වාන පනසං දෙවගන්ධිකං, ඛන්ධෙ ආරොපයිත්වාන උපගච්ඡිං විනායකං.
4035. ඵලං බුද්ධස්ස දත්වාන අගරුං අනුලිම්පහං, පසන්නචිත්තො සුමනො බුද්ධසෙට්ඨං අවන්දහං.{1}
4036. පදුමුත්තරො ලොකවිදූ ආහුතීනං පටිග්ගහො, ඉසිමජ්ඣෙ නිසීදිත්වා ඉමා ගාථා අභාසථ:
4037. “යො මෙ ඵලඤ්ච අගරුං ආසනඤ්ච අදාසි මෙ, තමහං චිත්තයිස්සාමි සුණාථ මම භාසතො.
4038. ගාමෙ වා යදි වා’රඤ්ඤෙ පබ්භාරෙසු ගුහාසු වා, ඉමස්ස චිත්තමඤ්ඤාය නිබ්බත්තිස්සති භොජනං.
4039. දෙවලොකෙ මනුස්සෙ වා උපපන්නො අයං නරො, භොජනෙහි ච වත්ථෙහි පරිසං තප්පයිස්සති.
4040. උපපජ්ජති යං යොනිං දෙවත්තං අථ මානුසං, අක්ඛොභභොගො හුත්වාන සංසරිස්සත’යං නරො.
4041. තිංස කප්පසහස්සානි දෙවලොකෙ රමිස්සති, සහස්සක්ඛත්තුං රාජා ච චක්කවත්තී භවිස්සති.
4042. එකසත්තතික්ඛත්තුඤ්ච දෙවරජ්ජං කරිස්සති, පදෙසරජ්ජං විපුලං ගණනාතො අසංඛියං.
4043. කප්පසතසහස්සම්හි ඔක්කාකකුලසම්භවො, ගොතමො නාම නාමෙන සත්ථා ලොකෙ භවිස්සති.
4044. තස්ස ධම්මෙසු දායාදො ඔරසො ධම්මනිම්මිතො,{2} සබ්බාසවෙ පරිඤ්ඤාය විහරිස්සත’නාසවො.”
4045. සුලද්ධලාභො ලද්ධො මෙ යො’හං අද්දක්ඛිං නායකං, තිස්සො විජ්ජා අනුප්පත්තා කතං බුද්ධස්ස සාසනං.
4046. ගාමෙ වා යදි වා’රඤ්ඤෙ පබ්භාරෙසු ගුහාසු වා, මම සඞ්කප්පමඤ්ඤාය භොජනං හොති මෙ සදා.
4047. කිලෙසා ඣාපිතා මය්හං භවා සබ්බෙ සමූහතා, නාගො’ච බන්ධනං ඡෙත්වා විහරාමි අනාසවො.
4048. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4049. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා උපසීවො ථෙරො ඉමා ගාථායො අභාසිත්ථාති.
උපසීවත්ථෙරස්ස අපදානං පඤ්චමං.
406. නන්දකත්ථෙරාපදානං
4050. මිගලුද්දො පුරෙ ආසිං අරඤ්ඤෙ කානනෙ අහං, පසදං මිගමෙසන්තො සයම්භුං අද්දසං ජිනං.{1}
4051. අනුරුද්ධො නාම සම්බුද්ධො සයම්භූ අපරාජිතො, විවෙකකාමො සො ධීරො වනමජ්ඣොගහී තදා.
4052. චතුදණ්ඩෙ ගහෙත්වාන චතුට්ඨානෙ ඨපෙසහං, මණ්ඩපං සුකතං කත්වා පදුමපුප්ඵෙහි ඡාදයිං.
4053. මණ්ඩපං ඡාදයිත්වාන සයම්භූං අභිවාදයිං, ධනුං තත්ථෙව නික්ඛිප්ප පබ්බජිං අනගාරියං.
4054. පබ්බජිතස්ස අචිරං{2} ව්යාධි මෙ උපපජ්ජථ, පුබ්බකම්මං සරිත්වාන තත්ථ කාලකතො අහං.
4055. පුබ්බකම්මෙන සංයුත්තො තුසිතං අගමාසහං, තත්ථ සොණ්ණමයං ව්යම්හං නිබ්බත්තති යදිච්ඡකං.
4056. සහස්සයුත්තහවාහිං දිබ්බයානමධිට්ඨිතො, ආරුහිත්වාන තං යානං ගච්ඡාමහං යදිච්ඡකං.
4057. තතො මෙ නීයමානස්ස දෙවභූතස්ස මෙ සතො, සමන්තා යොජනසතං මණ්ඩපො මෙ ධරීයතී.
4058. සයනෙ’හං තුවට්ටාමි අච්චන්තං{3} පුප්ඵසන්ථතෙ, අන්තළික්ඛා ච පදුමා වස්සන්ති{4} නිච්චකාලිකං.
4059. මරීචිකෙ ඵන්දමානෙ තප්පමානෙ ච ආතපෙ, න මං තාපෙති ආතාපො මණ්ඩපස්ස ඉදං ඵලං.
4060. දුග්ගතිං සමතික්කන්තො අපායා පිහිතා මම, මණ්ඩපෙ රුක්ඛමූලෙ වා සන්තාපො මෙ න විජ්ජති.
4061. මහීසඤ්ඤං අධිට්ඨාය ලොණතොයං තරාමහං, තස්ස මෙ සුකතං කම්මං බුද්ධපූජායිදං ඵලං.
4062. අපථම්පි{5} පථං කත්වා ගච්ඡාමි අනිලඤ්ජසෙ, අහො මෙ සුකතං කම්මං බුද්ධපූජායිදං ඵලං.
4063. පුබ්බෙනිවාසං ජානාමි දිබ්බචක්ඛු විසොධිතං, ආසවා මෙ පරික්ඛීණා බුද්ධපූජායිදං ඵලං.
4064. ජහිතා පුරිමා ජාතී බුද්ධස්ස ඔරසො අහං, දායාදො’ම්හි ච සද්ධම්මෙ බුද්ධපූජායිදං ඵලං.
4065. ආරාධිතො’ම්හි සුගතං ගොතමං සක්යපුඞ්ගවං, ධම්මද්ධජො ධම්මදායාදො බුද්ධපූජායිදං ඵලං.
4066. උපට්ඨිත්වාන සම්බුද්ධං ගොතමං සක්යපුඞ්ගවං, පාරඞ්ගමනියං මග්ගං අපුච්ඡිං ලොකනායකං.
4067. අජ්ඣිට්ඨො කථයී බුද්ධො ගම්භීරං නිපුණං පදං, තස්සාහං ධම්මං සුත්වාන පත්තොම්හි ආසවක්ඛයං.
4068. අහො මෙ සුකතං කම්මං පරිමුත්තොම්හි ජාතියා, සබ්බාසවපරික්ඛීණො නත්ථිදානි පුනබ්භවො.
4069. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
4070. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4071. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා නන්දකො ථෙරො ඉමා ගාථායො අභාසිත්ථාති.
නන්දකත්ථෙරස්ස අපදානං ඡට්ඨං.
407. හෙමකත්ථෙරාපදානං
4072. පබ්භාරකූටං නිස්සාය අනොමො නාම තාපසො, අස්සමං සුකතං කත්වා පණ්ණසාලෙ වසී තදා.
4073. සිද්ධං තස්ස තපොකම්මං සිද්ධිපත්තො සකෙ බලෙ, සකසාමඤ්ඤවික්කන්තො ආතාපී නිපකො මුනි.
4074. විසාරදො සසමයෙ පරවාදෙ ච කොවිදො, පට්ඨො භූමන්තලික්ඛම්හි උප්පාතම්හි ච කොවිදො.
4075. වීතසොකො නිරාරම්භො අප්පාහාරො අලොලුපො, ලාභාලාභෙන සන්තුට්ඨො ඣායී ඣානරතො මුනි.
4076. පියදස්සී නාම සම්බුද්ධො අග්ගො කාරුණිකො මුනි, සත්තෙ තාරෙතුකාමො සො කරුණාය ඵරී තදා.
4077. බොධනෙය්යං ජනං දිස්වා පියදස්සී මහාමුනි, චක්කවාළසහස්සම්පි ගන්ත්වා ඔවදතෙ මුනි.
4078. මමුද්ධරිතුකාමො සො මමස්සමමුපාගමි, න දිට්ඨො මෙ ජිනො පුබ්බෙ න සුතො පි ච කස්ස චි.
4079. උප්පාතා සුපිනා මය්හං ලක්ඛණා සුප්පකාසිතා, පට්ඨො භූමන්තලික්ඛම්හි නක්ඛත්තපදකොවිදො.
4080. සො’හං බුද්ධස්ස සුත්වාන තත්ථ චිත්තං පසාදයිං, භුඤ්ජන්තො{1} වා නිසින්නො වා සරාමි නිච්චකාලිකං.
4081. මයි එවං සරන්තම්හි භගවාපි අනුස්සරි, බුද්ධං අනුස්සරන්තස්ස පීති මෙ හොති තාවදෙ.
4082. කාලඤ්ච පුනරාගම්ම උපෙසි මං මහාමුනි, සම්පත්තෙපි න ජානාමි අයං බුද්ධො මහාමුනි.
4083. අනුකම්පකො කාරුණිකො පියදස්සී මහාමුනි, සඤ්ජානාපෙසි අත්තානං අහං බුද්ධො සදෙවකෙ.
4084. සඤ්ජානිත්වාන සම්බුද්ධං පියදස්සිං මහාමුනිං සකං චිත්තං පසාදෙත්වං ඉදං වචනමබ්රවිං: