3825. කිලෙසා ඣාපිතා මය්හං භවා සබ්බෙ සමූහතා, සබ්බෙසවා පරික්ඛීණා විහරාමි අනාසවො.
3826. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
3827. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සලලමණ්ඩපියො ථෙරො ඉමා ගාථායො අභාසිත්ථාති.
සලලමණ්ඩපියත්ථෙරස්ස අපදානං අට්ඨමං.
399. සබ්බදායකත්ථෙරාපදානං.
3828. මහාසමුද්දං ඔගය්හ භවනං මෙ සුනිම්මිතං, සුනිම්මිතා පොක්ඛරණී චක්කවාකූපකූජිතා.{1}
3829. මන්දාලකෙහි සඤ්ඡන්නා පදුමුප්පලකෙහි ච, නදී ච සන්දතෙ තත්ථ සුපතිත්ථා මනොරමා.
3830. මච්ඡකච්ඡපසඤ්ඡන්නා නානාදිජසමොත්ථතා, මයූරකොඤ්චාභිරුදා කොකිලාදීහි වග්ගුහි.
3831. පාරෙවතා රවිහංසා චක්කවාකා නදීචරා, දින්දිභා සාළිකා චෙත්ථ පම්පකා{2} ජීවජීවකා.
3832. හංසා කොඤ්චාභිනදිතා{3} කොසියා පිඞ්ගලා බහූ, සත්තරතනසම්පන්නො මණිමුත්තිකවාලුකා.
3833. සබ්බසොණ්ණමයා රුක්ඛා නානාගන්ධසමෙරිතා, උජ්ජොතෙන්ති දිවාරත්තිං භවනං සබ්බකාලිකං.
3834. සට්ඨිතුරියසහස්සානි සායං පාතො පවජ්ජරෙ, සොළසිත්ථිසහස්සානි පරිවාරෙන්ති මං සදා.
3835. අභිනික්ඛම්ම භවනා සුමෙධං ලොකනායකං, පසන්නචිත්තො සුමනො වන්දයිං තං මහායසං.
3836. සම්බුද්ධං අභිවාදෙත්වා සසඞ්ඝං තං නිමන්තයිං, අධිවාසෙසි සො ධීරො සුමෙධො ලොකනායකො.
3837. මම ධම්මකථං කත්වා උය්යොජෙසි මහාමුනි, සම්බුද්ධං අභිවාදෙත්වා භවනං මෙ උපාගමිං.
3838. ආමන්තයිං පරිජනං සබ්බෙ සන්නිපතාථ වො, පුබ්බන්හසමයං බුද්ධො භවනං ආගමිස්සති.
3839. ලාභා අම්හං සුලද්ධං නො යෙ වසාම තවන්තිකෙ, මයම්පි බුද්ධසෙට්ඨස්ස පූජං කස්සාම සත්ථුනො.
3840. අන්නං පානං පට්ඨපෙත්වා කාලමාරොචයිං අහං, වසීසතසහස්සෙහි උපෙසි ලොකනායකො.
3841. පඤ්චඞ්ගිකෙහි තුරියෙහි පච්චුග්ගමනමකාසහං, සබ්බසොවණ්ණමයෙ පීඨෙ නිසීදි පුරිසුත්තමො.
3842. උපරිච්ඡදනං ආසි සබ්බසොණ්ණමයං තදා, වීජනියො පවායන්ති භික්ඛුසඞ්ඝස්ස අන්තරෙ.
3843. පහූතෙන’න්නපානෙන භික්ඛුසංඝමතප්පයිං, පච්චෙකදුස්සයුගලෙ භික්ඛුසඞ්ඝස්ස’දාසහං.
3844. යං වදන්ති සුමෙධොති ලොකාහුතිපටිග්ගහං, භික්ඛුසඞ්ඝෙ නිසීදිත්වා ඉමා ගාථා අභාසථ.
3845. “යො මං{1} අන්නෙන පානෙන සබ්බෙ ඉමෙ ච තප්පයි,{2} තමහං කිත්තයිස්සාමි සුණාථ මම භාසතො.
3846. අට්ඨාරසෙ කප්පසතෙ දෙවලොකෙ රමිස්සති, සහස්සක්ඛත්තුං රාජා ච චක්කවත්තී භවිස්සති.
3847. උපගච්ඡති{3} යං යොනිං දෙවත්තං අථ මානුසං, සබ්බදා සබ්බසොවණ්ණං ඡදනං ධාරයිස්සති.
3848. තිංසකප්පසහස්සම්හි ඔක්කාකකුලසම්භවො, ගොතමො නාම නාමෙන සත්ථා ලොකෙ භවිස්සති.
3849. තස්ස ධම්මෙසු දායාදො ඔරසො ධම්මනිම්මිතො, සබ්බාසවෙ පරිඤ්ඤාය නිබ්බායිස්සතනාසවො{1}.
3850. භික්ඛුසඞ්ඝෙ නිසීදිත්වා සීහනාදං නදිස්සති චිතකෙ ඡත්තං ධාරෙන්ති හෙට්ඨාඡත්තම්භි ඩය්හථ.
3851. සාමඤ්ඤං මෙ අනුප්පත්තං කිලෙසා ඣාපිතා මයා{2}, මණ්ඩපෙ රුක්ඛමූලෙ වා සන්තාපො මෙ න විජ්ජති.
3852. තිංසකප්පසහස්සම්හි යං දානමදදිං තදා, දුග්ගතිං නාභිජානාමි සබ්බදානස්සිදං ඵලං.
3853. කිලෙසා ඣාපිතා මය්හං භවා සබ්බෙ සමූහතා, සබ්බාසවා පරික්ඛීණා විහරාමි අනාසවො.
3854. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
3855. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සබ්බදායකො ථෙරො ඉමා ගාථායො අභාසිත්ථාති.
සබ්බදායකත්ථෙරස්ස අපදානං නවමං.
400. අජිතත්ථෙරාපදානං
3856. පදුමුත්තරො නාම ජිනො සබ්බධම්මානපාරගූ, අජ්ඣොගහෙත්වා{3} හිමවන්තං නිසීදි ලොකනායකො.
3857. නා’හං අද්දක්ඛිං සම්බුද්ධං නපි සද්දං සුණොමහං, මම භක්ඛං ගවෙසන්තො ආහිණ්ඩාමි වනෙ තදා.
3858. තත්ථ’ද්දසාසිං සම්බුද්ධං බත්තිංසවරලක්ඛණං{4}, දිස්වාන චිත්තමාපජ්ජිං{5} සත්තො කො නාම’යං භවෙ’
3859. ලක්ඛණානි විලොකෙත්වා මම විජ්ජං අනුස්සරිං, සුතං හි මෙ’තං වුද්ධානං පණ්ඩිතානං සුභාසිතං.
3860. තෙසං යථා තං වචනං අයං බුද්ධො භවිස්සති, යන්නූනාහං සක්කරෙය්යං ගතිං මෙ සොධයිස්සති.
3861. ඛිප්පං අස්සමමාගන්ත්වා මධුතෙලං ගහිං අහං, කොළම්බකං ගහෙත්වාන උපගච්ඡිං නරාසභං.{6}
3862. තිදණ්ඩකෙ ගහෙත්වාන අබ්භොකාසෙ ඨපෙසහං, පදීපං පජ්ජලෙත්වාන{7} අට්ඨක්ඛත්තුං අවන්දහං.
3863. සත්තරත්තින්දිවං බුද්ධො නිසීදි පුරිසුත්තමො, තතො රත්යා විවසානෙ වුට්ඨාසි ලොකනායකො.
3864. පසන්නචිත්තො සුමනො සත්තරත්තින්දිවං අහං, දීපං බුද්ධස්ස පාදාසිං පසන්නො සෙහි පාණිහි.
3865. සබ්බෙ වනා ගන්ධමයා පබ්බතෙ ගන්ධමාදනෙ, බුද්ධස්ස අනුභාවෙන{1} උපගච්ඡුං තදා ජිනං{2}.
3866. යෙ කෙචි පුප්ඵගන්ධාසෙ පුප්ඵිතා ධරණීරුහා, බුද්ධස්ස අනුභාවෙන සබ්බෙ සන්නිපතුං තදා.
3867. යාවතා හිමවන්තම්හි නාගා ච ගරුළා උභො, ධම්මඤ්ච සොතුකාමා තෙ ආගච්ඡුං බුද්ධසන්තිකං.
3868. දෙවලො නාම සමණො බුද්ධස්ස අග්ගසාවකො, වසීසතසහස්සෙහි බුද්ධසන්තිකුපාගමි.
3869. පදුමුත්තරො ලොකවිදූ ආහුතීනං පටිග්ගහො, භික්ඛුසඞ්ඝෙ නිසීදිත්වා ඉමා ගාථා අභාසථ.
3870. යො මෙ දීපං පදීපෙසි පසන්නො සෙහි පාණිහි, තමහං කිත්තයිස්සාමි සුණාථ මම භාසතො.
3871. සට්ඨිකප්පසහස්සානි දෙවලොකෙ රමිස්සති, සහස්සක්ඛතුං රාජා චක්කවත්තී භවිස්සති.
3872. ඡත්තිංසක්ඛත්තුං දෙවින්දො දෙවරජ්ජං කරිස්සති, පඨවියං සත්තසතං විපුලං රජ්ජං කරිස්සති, පදෙසරජ්ජං විපුලං ගණනාතො අසඞ්ඛියං.
3873. ඉමිනා දීපදානෙන දිබ්බචක්ඛු භවිස්සති, සමන්තතො අට්ඨකොසං{3} පස්සිස්සති අයං සදා.
3874. දෙවලොකා චවන්තස්ස නිබ්බත්තන්තස්ස ජන්තුනො, දිවා වා යදි වා රත්තිං පදීපං ධාරයිස්සති.
3875. ජායමානස්ස සත්තස්ස{4} පුඤ්ඤකම්මසමඞ්ගිනො, යාවතා නගරං හොති තාවතා ජොතයිස්සති.
3876. උපපජ්ජති යං යොනිං දෙවත්තං අථ මානුසං, අස්සෙව දීපදානස්ස අට්ඨදීපඵලෙන හි, න ජයිස්සන්ති’මං{5} ජන්තු දීපදානස්සිදං ඵලං.
3877. කප්පසතසහස්සම්හි ඔක්කාකකුලසම්භවො, ගොතමො නාම නාමෙන සත්ථා ලොකෙ භවිස්සති.
3878. තස්ස ධම්මෙසු දායාදො ඔරසො ධම්මනිම්මිතො, සබ්බාසවෙ පරිඤ්ඤාය නිබ්බායිස්සතනාසවො.
3879. තොසයිත්වාන සම්බුද්ධං ගොතමං සක්යපුඞ්ගවං, අජිතො නාම නාමෙන හෙස්සති සත්ථුසාවකො.
3880. සට්ඨිකප්පසහස්සානි දෙවලොකෙ රමිං අහං, තත්රාපි මෙ දීපසතං ජොතතෙ සබ්බකාලිකං.
3881. දෙවලොකෙ මනුස්සෙ වා නිද්ධාවන්ති පභා මම, බුද්ධසෙට්ඨං සරිත්වාන භීයො හාසං ජනෙසහං.
3882. තුසිතා’හං චවිත්වාන ඔක්කමිං මාතුකුච්ඡියං, ජායමානස්ස සත්තස්ස ආලොකො විපුලො අහු.
3883. අගාරා අභිනික්ඛම්ම පබ්බජිං අනගාරියං, බාවරිං උපසඞ්කම්ම සිස්සත්තං අජ්ඣුපාගමිං.
3884. හිමවන්තෙ වසන්තො’හං අස්සොසිං ලොකනායකං, උත්තමත්ථං ගවෙසන්තො උපගච්ඡිං විනායකං.
3885. දන්තො බුද්ධො දමෙතාවී ඔඝතිණ්ණො නිරූපධි, නිබ්බානං කථයී බුද්ධො සබ්බදුක්ඛප්පමොචනං.
3886. තං මෙ ආගමනං සිද්ධං තොසිතො හි මහාමුනි{1}, තිස්සො විජ්ජා අනුප්පත්තා කතං බුද්ධස්ස සාසනං.
3887. සතසහස්සෙ ඉතො කප්පෙ{2} යං දීපමදදිං තදා, දුග්ගතිං නාභිජානාමි දීපදානස්සිදං ඵලං.
3888. කිලෙසා ඣාපිතා මය්හං භවා සබ්බෙ සමූහතා, සබ්බාසවා පරික්ඛීණා විහරාමි අනාසවො
3889. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
3890. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා අජිතො ථෙරො ඉමා ගාථායො අභාසිත්ථාති.
අජිතත්ථෙරස්ස අපදානං දසමං.
උද්දානං:
පිළින්දිවච්ඡො සෙලො ච සබ්බකිත්තී මධුන්දදො, කූටාගාරී බක්කුලො ච ගිරි සලලසව්හයො, සබ්බදො අජිතො චෙව ගාථායො ගණිතා ඉහ, සතානි පඤ්ච ගාථානං වීසති ච තදුත්තරි.
පිළින්දිවච්ඡවග්ගො චත්තාළීසතිමො.
අථවග්ගුද්දානං:
පදුමාරක්ඛදො චෙව උම්මා{1} ගන්ධොදකෙන ච, එකපදම සද්දසඤ්ඤී මන්දාරං බොධි වන්දකො, අවණ්ටඤ්ච පිළින්දී ච ගාථායො ගණිතා පි ච,{2} චතුසත්තති ගාථායො එකාදස සතානි ච.
පදුමවග්ගදසකං.
චතුත්ථං සතකං සමත්තං{3}.
සුත්තන්තපිටකෙ
ඛුද්දකනිකායෙ
අපදානපාළි
දුතියො භාගො
නමො තස්ස භගවතො අරහතො සම්මාසම්බුද්ධස්ස.
41. මෙත්තෙය්යවග්ගො
401. තිස්සමෙත්තෙය්යත්ථෙරාපදානං{*}
3891. පබ්භාරකූටං නිස්සාය සොභිතො නාම තාපසො, පවත්තඵලං භුඤ්ජිත්වා වසතී පබ්බතන්තරෙ.
3892. අග්ගිං දාරුං ආහරිත්වා උජ්ජාලෙසිං අහං තදා, උත්තමත්ථං ගවෙසන්තො බ්රහ්මලොකූපපත්තියා.
3893. පදුමුත්තරො ලොකවිදූ ආහුතීනං පටිග්ගහො, මමුද්ධරිතුකාමො සො ආගච්ඡි මම සන්තිකෙ.
3894. “කිං කරොසි මහාපුඤ්ඤ දෙහි මෙ අග්ගිදාරුකං, අහමග්ගිං පරිචරෙ තතො මෙ සුද්ධි හෙහිති.”{1}
3895. “සුභද්දකො ත්වං මනුජෙ දෙවතෙ ත්වං පජානසි, තුවමග්ගිං{2} පරිචර හන්ද තෙ අග්ගිදාරුකං.”
3896. තතො කට්ඨං ගහෙත්වාන අග්ගිං උජ්ජාලයී ජිනො, න තත්ථ කට්ඨං පජ්ඣායි පාටිහීරං{3} මහෙසිනො.
3897. “න තෙ අග්ගි පජ්ජලති ආහුතී තෙ න විජ්ජති, නිරත්ථකං වතං තුය්හං අග්ගිං පරිචරස්සු මෙ.”
3898. “කීදිසො සො{4} මහාවීර අග්ගි තව පවුච්චති, මහම්පි කථයස්සෙ’තං උභො පරිචරාමසෙ.”
3899. “හෙතුධම්මනිරොධාය කිලෙසසමනාය ච, ඉස්සා මච්ඡරියං හිත්වා තයො එතෙ මමා’හුතී.”
3900. “කීදිසො ත්වං මහාවීර කථං ගොත්තො’සි මාරිස, ආචාරපටිපත්තී තෙ බාළ්හං ඛො මම රුච්චතී.”
3901. “ඛත්තියම්භි කුලෙ ජාතො අභිඤ්ඤා පාරමිං ගතො, සබ්බාසවපරික්ඛීණො නත්ථිදානි පුනබ්භවො.”
3902. “යදි බුද්ධොසි සබ්බඤ්ඤූ පභඞ්කර තමොනුද, නමස්සිස්සාමි තං දෙව දුක්ඛස්සන්තකරො තුවං”