3547. කප්පසතසහස්සානි පල්ලඞ්කා චතුරස්සකා, පරිචාරෙන්ති මං නිච්චං සංවිභාගරතො අහං.
3548. භිසියො සුගතෙ දත්වා සඞ්ඝෙ ගණවරුත්තමෙ, ඡානිසංසෙ අනුභොමි කම්මානුච්ඡවිකෙ මම.
3549. සමගත්තො අපචිතො{5} මුදුකො චාරුදස්සනො, ලභාමි ඤාණපරිවාරං භිසිදානස්සිදං ඵලං.
3550. තූලිකා විකතිකායො කට්ඨිස්සා චිත්තකා බහූ, වරපොත්ථකෙ කම්බලෙ ච ලභාමි විවිධෙ අහං.
3551. පාවාරිකො ච මුදුකෙ මුදුකාජිනවෙණියො, ලභාමි විවිධත්ථාරෙ භිසිදානස්සිදං ඵලං.
3552. යතො සරාමි අත්තානං යතො පත්තො’ස්මි විඤ්ඤුතං අතුච්ඡො ඣානමඤ්චො’ම්හි භිසිදානස්සිදං ඵලං.
3553. බිම්බොහනෙ ජිනෙ දත්වා සඞ්ඝෙ ගණවරුත්තමෙ, ඡානිසංසෙ අනුභොමි කම්මානුච්ඡවිකෙ මම.
3554. උණ්ණිකෙ පදුමකෙ ච අථො ලොහිතචන්දනෙ, බිම්බොහනෙ උපධෙමි{1} උත්තමඞ්ගං සදා මම.
3555. අට්ඨඞ්ගිකෙ මග්ගවරෙ සාමඤ්ඤෙ චතුරො ඵලෙ, තෙසු ඤාණං උපනෙත්වා{2} විහරෙ සබ්බකාලිකං.
3556. දානෙ දමෙ සඤ්ඤමෙ ච අප්පමඤ්ඤාසු රූපිසු, තෙසු ඤාණං උපනෙත්වා{3} විහරෙ සබ්බකාලිකං.
3557. වත්තෙ ගුණෙ පටිපත්තිආචාරකිරියාසු ච, ඤාණං උපදහිත්වාන විහරෙ සබ්බදා අහං.
3558. චඞ්කමෙ වා පධානෙ වා විරියෙ බොධිපක්ඛියෙ, තෙසු ඤාණං උපනෙත්වා විහරාමි යථිච්ඡකං.
3559. සීලං සමාධි පඤ්ඤා ච විමුත්තී ච අනුත්තරා, තෙසු ඤාණං උපනෙත්වා විහරාමි සුඛං අහං.
3560. ඵලපීඨෙ{4} ජිනෙ දත්වා සඞ්ඝෙ ගණවරුත්තමෙ, ද්වානිසංසෙ අනුභොමි කම්මානුච්ඡවිකෙ මම.
3561. සොණ්ණමයෙ මණිමයෙ දන්තසාරමයෙ බහූ, පල්ලඞ්කසෙට්ඨෙ වින්දාමි ඵලපීඨස්සිදං ඵලං.
3562. පාදපීඨෙ ජිනෙ දත්වා සඞ්ඝෙ ගණවරුත්තමෙ, ද්වානිසංසෙ අනුභොමි කම්මානුච්ඡවිකෙ මම.
3563. ලභාමි බහුකෙ යානෙ පාදපීඨස්සිදං ඵලං, දාසිදාසා ච භරියා යෙ චඤ්ඤෙ අනුජීවිනො, සම්මා පරිචරන්තෙ මං පාදපීඨස්සිදං ඵලං.
3564. තෙලානබ්භඤ්ජනෙ{5} දත්වා සඞ්ඝෙ ගණවරුත්තමෙ, පඤ්චානිසංසෙ අනුභොමි කම්මානුච්ඡවිකෙ මම
3565. අව්යාධිතා රූපවතා ඛිප්පං ධම්මනිසන්තිතා, ලාභිතා අන්නපානස්ස ආයුපඤ්චමකං මම.
3566. සප්පිතෙලඤ්ච දත්වා සඞ්ඝෙ ගණවරුත්තමෙ, පඤ්චානිසංසෙ අනුභොමි කම්මානුච්ඡවිකෙ මම.
3567. ථාමවා රූපසම්පන්නො පහට්ඨතනුජො සදා, අව්යාධි විසදො හොමි සප්පිතෙලස්සිදං ඵලං.
3568. මුඛසොධනකං දත්වා බුද්ධෙ සඞ්ඝෙ ගණුත්තමෙ, පඤ්චානිසංසෙ අනුභොමි කම්මානුච්ඡවිකෙ මම.
3569. විසුද්ධකණ්ඨො මධුරසරො කාසසාසවිවජ්ජිතො, උප්පලගන්ධො මුඛතො උපවායති මෙ සදා.
3570. දධිං දත්වාන සම්පන්නං බුද්ධෙ සඞ්ඝෙ ගණුත්තමෙ, භුඤ්ජාමි අමතං චිත්තං{1} වරං කායගතාසතිං.
3571. වණ්ණගන්ධරසොපෙතං මධුං දත්වා ජිනෙ ගණෙ, අනූපමං අතුලියං පිවෙ මුත්තිරසං අහං.
3572. යථාභූතං රසං දත්වා බුද්ධෙ සඞ්ඝෙ ගණුත්තමෙ, චතුරො ඵලෙ අනුභොමි කම්මානුච්ඡවිකෙ මම.
3573. අන්නං පානඤ්ච දත්වා බුද්ධෙ සඞ්ඝෙ ගණුත්තමෙ, දසානිසංසෙ අනුභොමි කම්මානුච්ඡවිකෙ මම.
3574. ආයුමා බලවා ධීරො මණ්ණවා යසවා සුඛී, ලාභී අන්නස්ස පානස්ස සූරො පඤ්ඤාණවා සදා, ඉමෙ ගුණෙ පටිලභෙ සංසරන්තො භවෙ අහං.
3575. ධූපං දත්වාන සුගතෙ සඞ්ඝෙ ගණවරුත්තමෙ, දසානිසංසෙ අනුභොමි කම්මානුච්ඡවිකෙ මම.
3576. සුගන්ධදෙහො යසවා සීඝපඤ්ඤො ච කිත්තිමා, තික්ඛපඤ්ඤො භූරිපඤ්ඤො හාසගම්භීරපඤ්ඤවා.
3577. වෙපුල්ලජවනපඤ්ඤො සංසරන්තො භවාභවෙ, තස්සෙව වාහසා’දානි පත්තො සන්තිසුඛං සිවං.
3578. ස්වාගතං වත මෙ ආසි මම බුද්ධස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
3579. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
3580. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පිළින්දිවච්ඡො ථෙරො ඉමා ගාථායො අභාසිත්ථාති.
පිළින්දිවච්ඡත්ථෙරස්ස අපදානං පඨමං.
391. සෙලත්ථෙරාපදානං
3581. නගරෙ හංසවතියා වීථිසාමී අහොසහං, මමං{1} ඤාති සමානෙත්වා ඉදං වචනමබ්රවිං.
3582. බුද්ධො ලොකෙ සමුප්පන්නො පුඤ්ඤක්ඛෙත්තමනුත්තරං,{2} ආසි සො{3} සබ්බලොකස්ස ආහුතීනං පටිග්ගහො.
3583. ඛත්තියා නෙගමා චෙව මහාසාලා ච බ්රාහ්මණා, පසන්නචිත්තා සුමනා පූගධම්මං අකංසු තෙ.
3584. හත්ථාරොහා අනීකට්ඨා රථිකා පත්තිකාරකා, පසන්නචිත්තා සුමනා පූගධම්මං අකංසු තෙ.
3585. උග්ගා ච රාජපුත්තා ච වෙසියානා ච බ්රාහ්මණා, පසන්නචිත්තා සුමනා පූගධම්මං අකංසු තෙ.
3586. ආළාරිකා කප්පකා ච{4} න්හාපකා මාලකාරකා, පසන්නචිත්තා සුමනා පූගධම්මං අකංසු තෙ.
3587. රජකා පෙසකාරා ච චම්මකාරා ච න්හාපිකා, පසන්නචිත්තා සුමනා පූගධම්මං අකංසු තෙ.
3588. උසුකාරා භමකාරා චම්මිකා චෙව{5} තච්ඡකා, පසන්නචිත්තා සුමනා පූගධම්මං අකංසු තෙ.
3589. කම්මාරා සොණ්ණකාරා ච තිපුලොහකරා තථා, පසන්නචිත්තා සුමනා පූගධම්මං අකංසු තෙ.
3590. භතකා චෙටකා චෙව දාසකම්මකරා බහූ’ යථාසකෙන ථාමෙන පූගධම්මං අකංසු තෙ.
3591. උදහාරා කට්ඨහාරා කස්සකා තිණහාරකා, යථාසකෙන ථාමෙන පූගධම්මං අකංසු තෙ.
3592. පුප්ඵිකා මාලිකා චෙව පණ්ණිකා ඵලහාරකා, යථාසකෙන ථාමෙන පූගධම්මං අකංසු තෙ.
3593. ගණිකා කුම්භදාසී ච පූවිකා මච්ඡිකාපි ච, යථාසකෙන ථාමෙන පූගධම්මං අකංසු තෙ.
3594. එථ සබ්බෙ සමාගන්ත්වා ගණං බන්ධම එකතො, අධිකාරං කරිස්සාම පුඤ්ඤක්ඛෙත්තෙ අනුත්තරෙ.
3595. තෙ මෙ සුත්වාන වචනං ගණං බන්ධිංසු තාවදෙ, උපට්ඨානසාලං සුකතං භික්ඛුසඞ්ඝස්ස කාරයුං.
3596. නිට්ඨාපෙත්වාන තං සාලං උදග්ගො තුට්ඨමානසො, පරෙතො තෙහි සබ්බෙහි සම්බුද්ධං උපසඞ්කමිං.
3597. උපසඞ්කම්ම සම්බුද්ධං ලොකනාථං නරාසභං, වන්දිත්වා සත්ථුනො පාදෙ ඉදං වචනමබ්රවිං.
3598. ඉමෙ තීණි සතා වීර පුරිසා එකතො ගණා, උපට්ඨානසාලං සුකතං නිය්යාතෙන්ති{1} තවං{2} මුනි.
3599. භික්ඛුසඞ්ඝස්ස පුරතො සම්පටිච්ඡිත්ව චක්ඛුමා, තිණ්ණං සතානං පුරතො ඉමා ගාථා අභාසථ:
3600. “තිසතං පි ච ජෙට්ඨො ච අනුවත්තිංසු එකතො, සම්පත්තිං හි{3} කරිත්වාන සබ්බෙ අනුභවිස්සථ.
3601. පච්ඡිමභවෙ{4} සම්පත්තෙ සීතිභාවමනුත්තරං, අජරං අමතං සන්තං නිබ්බානං ඵස්සයිස්සථ.”
3602. එවං බුද්ධො වියාකාසි සබ්බඤ්ඤූ සමණුත්තරො, බුද්ධස්ස වචනං සුත්වා සොමනස්සං පවෙදයිං.
3603. තිංසකප්පසහස්සානි දෙවලොකෙ රමිං අහං, දෙවාධිපො පඤ්චසතං දෙවරජ්ජමකාරයිං.
3604. සහස්සක්ඛත්තුං රාජා ච චක්කවත්ති අහොසහං, දෙවරජ්ජං කරොන්තස්ස මහාදෙවා අවන්දිසුං.
3605. ඉධ මානුසෙක රජ්ජෙ{5} පරිසා හොන්ති බන්ධවා, පච්ඡිමභවෙ සම්පත්තෙ වාසෙට්ඨො නාම බ්රාහ්මණො.
3606. අසීතිකොටිනිචයො තස්ස පුත්තො අහොසහං, සෙලො ඉතී මමං නාමං ඡළඞ්ගෙ පාරමිඞ්ගතො.
3607. ජඞ්ඝාවිහාරං විචරං සසිස්සෙහි පුරක්ඛෙතො, ජටාඛාරිකභරිතං කෙණියං නාම තාපසං.
3608. පටියත්තාහුතිං දිස්වා ඉදං වචනමබ්රවිං: ආවාහො වා විවාහො චා රාජා වා තෙ නිමන්තිතො.
3609. ආහුතිං යිට්ඨුකාමො’හං බ්රාහ්මණෙ දෙවසම්මතෙ, න නිමන්තෙමි රාජානං ආහුති මෙ න විජ්ජති.
3610. න චත්ථි මය්හං ආවාහො විවාහො මෙ න විජ්ජති, සක්යානං නන්දිජනනො සෙට්ඨො ලොකෙ සදෙවකෙ.
3611. සබ්බලොකහිතත්ථාය සබ්බසත්තසුඛාවහො, සො මෙ නිමන්තිතො අජ්ජ තස්සෙතං පටියාදනං.
3612. තිම්බරූසකවණ්ණාභො අප්පමෙය්යො අනූපමො, රූපෙනාසදිසො බුද්ධො ස්වාතනාය නිමන්තිතො.
3613. උක්කාමුඛපහට්ඨො’ව ඛදිරඞ්ගාරසන්නිභො, විජ්ජූපමො මහාවීරො සො මෙ බුද්ධො නිමන්තිතො.
3614. පබ්බතග්ගෙ යථා අච්චි පුණ්ණමායෙව චන්දිමා, නළග්ගිවණ්ණසඞ්කාසො සො මෙ බුද්ධො නිමන්තිතො.
3615. අසම්භීතො භයාතීතො භවන්තකරණො මුනි, සීහූපමො මහාවීරො සො මෙ බුද්ධො නිමන්තිතො.
3616. කුසලො බුද්ධධම්මෙහි අප්පසය්හො පරෙහි සො, නාගූපමො මහාවීරො සො මෙ බුද්ධො නිමන්තිතො.
3617. සද්ධම්මාචාරකුසලො බුද්ධනාගො අසාදිසො, උසභූපමො මහාවීරො සො මෙ බුද්ධො නිමන්තිතො.
3618. අනන්තවණ්ණො අමිතයසො විචිත්තසබ්බලක්ඛණො, සක්කූපමො මහාවීරො සො මෙ බුද්ධො නිමන්තිතො.
3619. වසී ගණී පතාපී ච තෙජස්සී ච දුරාසදො, බ්රහ්මූපමො මහාවීරො සො මෙ බුද්ධො නිමන්තිතො.
3620. පත්තධම්මො දසබලො බලාතිබලපාරගූ, ධරණූපමො මහාවීරො සො මෙ බුද්ධො නිමන්තිතො.
3621. සීලවීචිසමාකිණ්ණො ධම්මවිඤ්ඤාණඛොභිතො, උද්ධූපමො මහාවීරො සො මෙ බුද්ධො නිමන්තිතො.
3622. දුරාසදො දුප්පසහො අචලො උග්ගතො බ්රහා, නෙරූපමො මහාවීරො සො මෙ බුද්ධො නිමන්තිතො.
3623. අනන්තඤාණො අසමසමො අතුලො අග්ගතං ගතො, ගගනූපමො මහාවීරො සො මෙ බුද්ධො නිමන්තිතො.
{*}
3624. පතිට්ඨා භයභීතානං තාණො සරණගාමිනං, අස්සාසකො මහාවීරො සො මෙ බුද්ධො නිමන්තිතො.
3625. ආසයො බුද්ධිමන්තානං පුඤ්ඤක්ඛෙත්තං සුඛෙසිනං, රතනාකරො මහාවීරො සො මෙ බුද්ධො නිමන්තිතො.
3626. අස්සාසකො වෙදකරො සාමඤ්ඤඵලදායකො, මෙඝුපමො මහාවීරො සො මෙ බුද්ධො නිමන්තිතො.
3627. ලොකචක්ඛු මහාතෙජො සබ්බතමවිනොදනො, සුරියූපමො මහාවීරො සො මෙ බුද්ධො නිමන්තිතො.
3628. ආරම්මණවිමුත්තීසු සහාවදස්සනො මුනි, චන්දූපමො මහාවීරො සො මෙ බුද්ධො නිමන්තිතො.
3629. වුද්ධො{1} සමුස්සිතො ලොකෙ ලක්ඛණෙහි අලඞ්කතො, අප්පමෙය්යො මහාවීරො සො මෙ බුද්ධො නිමන්තිතො.
3630. යස්ස ඤාණං අප්පමෙය්යං සීලං යස්ස අනූපමං, විමුත්ති අසදිසා යස්ස සො මෙ බුද්ධො නිමන්තිතො.
3631. යස්ස ධිති අසදිසා ථාමො යස්ස අචින්තියො, යස්ස පරක්කමො ජෙට්ඨො සො මෙ බුද්ධො නිමන්තිතො.
3632. රාගො දොසො ච මොහො ච විසා සබ්බෙ සමූහතා, අගදූපමො මහාවීරො සො මෙ බුද්ධො නිමන්තිතො.
3633. කිලෙසව්යාධි{2} බහුදුක්ඛසබ්බතමවිනොදනො{3}, වෙජ්ජූපමො මහාවීරො සො මෙ බුද්ධො නිමන්තිතො.
3634. බුද්ධො’ති භො යං වදෙසි ඝොසොපෙසො සුදුල්ලභො, බුද්ධො බුද්ධො’ති සුත්වාන පීති මෙ උපපජ්ජථ.
3635. අබ්භන්තරමගණ්හන්තී පීති මෙ බහි නිච්ඡරෙ, සො’හං පීතිමනො සන්තො ඉදං වචනමබ්රවිං:
3636. “කහං නු ඛො සො භගවා ලොකජෙට්ඨො නරාසභො, තත්ථ ගන්ත්වා නමස්සිස්සං සාමඤ්ඤඵලදායකං.”
3637. පග්ගය්හ දක්ඛිණං බාහුං වෙදජාතො කතඤ්ජලී, ආචික්ඛි මෙ ධම්මරාජං සොකසල්ලවිනොදනං.
3638. “උදෙන්තං’ව මහාමෙඝං නීලං අඤ්ජනසන්නිභං, සාගරං විය දිස්සන්තං පස්සසෙතං මහාවනං.
3639. එත්ථ සො වසතෙ බුද්ධො අදන්තදමකො මුනි, විනයන්තො ච වෙනෙය්යෙ බොධෙන්තො බොධිපක්ඛියෙ.
3640. පිපාසිතො’ව උදකං භොජනං’ව ජිඝච්ඡිතො, ගාවී යථා වච්ඡගිද්ධා එවාහං විචිනිං ජිනං.
3641. ආචාරඋපචාරඤ්ඤූ ධම්මානුච්ඡවිසංවරං{1}. සික්ඛාපෙසිං සකෙ සිස්සෙ ගච්ඡන්තෙ ජිනසන්තිකං.
3642. දුරාසදා භගවන්තො සීහා’ව එකචාරිනො, පදෙ පදං නික්ඛිපන්තා ආගචෙඡය්යාථ මාණවා.