3030. තිංසකප්පසහස්සානි දෙවලොකෙ රමිස්සති, පඤ්ඤාසක්ඛත්තුං දෙවින්දො දෙවරජ්ජං කරිස්සති.
3031. දෙවලොකෙ වසන්තස්ස පුඤ්ඤකම්මසමඞ්ගිනො, සමන්තා යොජනසතං දුස්සච්ඡන්නං භවිස්සති.
3032. ඡත්තිංසක්ඛත්තුං රාජා ච චක්කවත්තී භවිස්සති, පදෙසරජ්ජං විපුලං ගණනාතො අසංඛියං.
3033. භවෙ සංසරමානස්ස පුඤ්ඤකම්මසමඞ්ගිනො, මනසා පත්ථිතං සබ්බං නිබ්බත්තිස්සති තාවදෙ.
3034. කොසෙය්යකම්බලීයානි ඛොමකප්පාසිකානි ච, මහග්ඝානි ච දුස්සානි පටිලච්ඡතයං නරො.{1}
3035. මනසා පත්ථිතං සබ්බං පටිලච්ඡතයං නරො, එකදුස්සස්ස විපාකං අනුභොස්සති සබ්බදා.
3036. සො පච්ඡා පබ්බජිත්වාන සුක්කමූලෙන චොදිතො, ගොතමස්ස භගවතො ධම්මං සච්ඡිකරිස්සති.”
3037. අහො මෙ සුකතං කම්මං සබ්බඤ්ඤුස්ස මහෙසිනො, එකාහං සාටකං දත්වා පත්තොම්හි අමතං පදං.
3038. මණ්ඩපෙ රුක්ඛමූලෙ වා වසතො සුඤ්ඤකෙ ඝරෙ, ධාරෙති දුස්සඡදනං සමන්තා ව්යාමතො මම.
3039. අවිඤ්ඤත්තං නිවාසෙමි චීවරං පච්චයඤ්ච’හං, ලාභී{2} අන්නස්ස පානස්ස උත්තරෙය්යස්සිදං ඵලං
3040. සතසහස්සෙ ඉතො කප්පෙ යං කම්මමකරිං තදා, දුග්ගතිං නාභිජානාමි වත්ථදානස්සිදං ඵලං.
3041. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා උත්තරෙය්යදායකො ථෙරො ඉමා ගාථායො අභාසිත්ථාති.
උත්තරෙය්යදායකත්ථෙරස්ස අපදානං අට්ඨමං.
339. ධම්මසවණියත්ථෙරාපදානං.
3042. පදුමුත්තරො නාම ජිනො සබ්බධම්මාන පාරගූ, චතුසච්චං පකාසෙන්තො සන්තාරෙසි බහුං ජනං.
3043. අහං තෙන සමයෙන ජටිලො උග්ගතාපනො, ධුනන්තො වාකචීරානි ගච්ඡාමි අම්බරෙ තදා.
3044. බුද්ධසෙට්ඨස්ස උපරි ගන්තුං න විසහාමහං, පක්ඛීව සෙලමාසජ්ජ{3} ගමනං නාලභිං{4} තදා,
3045. න මෙ ඉදං භූතපුබ්බං ඉරියස්ස විකොපනං, දකෙ යථා උම්මුජ්ජිත්වා එවං ගච්ඡාමි අම්බරෙ.
3046. උළාරභූතො මනුජො හෙට්ඨාසීනො භවිස්සති, හන්දමෙනං ගවෙසිස්සං අපි අත්ථං ලභෙය්යහං.
3047. ඔරොහන්තො අන්තලික්ඛා සදදමස්සොසිං සත්ථුනො, අනිච්චතං කථෙන්තස්ස තමහං උග්ගහිං තදා.
3048. අනිච්චසඤ්ඤමුග්ගය්හ අගමාසිං මමස්සමං, යාවතායුං වසිත්වාන තත්ථ කාලකතො අහං.
3049. චරිමෙ වත්තමානම්හි තං ධම්මසවණං සරිං, තෙන කම්මෙන සුකතෙන තාවතිංසමගච්ඡහං.
3050. තිංසකප්පසහස්සානි දෙවලොකෙ රමිං අහං, එකපඤ්ඤාසක්ඛත්තුඤ්ච දෙවරජ්ජමකාරයිං.
3051. එකසත්තකික්ඛත්තුඤ්ච චක්කවත්තී අහොසහං, පදෙසරජ්ජං විපුලං ගණනාතො අසඞ්ඛියං.
3052. පිතු ගෙහෙ{1} නිසීදිත්වා සමණො භාවිතින්ද්රියො, ගාථාය පරිදීපෙන්තො අනිච්චතමුදාහරි.{2}
3053. අනුස්සරාමි තං සඤ්ඤං සංසරන්තො භවාභවෙ, න කොටිං පටිවිජ්ඣාමි නිබ්බානං අච්චුතං පදං.
3054. අනිච්චා වත සඞ්ඛාරා උප්පාදවයධම්මිනො, උප්පජ්ජිත්වා නිරුජ්ඣන්ති තෙසං වූපසමො සුඛො.
3055. සහ ගාථං සුණිත්වාන පුබ්බකම්මං අනුස්සරිං, එකාසනෙ නිසීදිත්වා අරහත්තමපාපුණිං.
3056. ජාතියා සත්තවස්සොහං අරහත්තමපාපුණිං, උපසම්පාදයී බුද්ධො ගුණමඤ්ඤාය චක්ඛුමා.
3057. දාරකොව අහං සන්තො කරණීයං සමාපයිං, කිං මෙ කරණීයං{3} අජ්ජ සක්යපුත්තස්ස සාසනෙ.
3058. සතසහස්සෙ ඉතො කප්පෙ යං කම්මමකරිං තදා, දුග්ගතිං නාභිජානාමි සද්ධම්මසවණෙ ඵලං.
3059. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ධම්මසවණියො ථෙරො ඉමා ගාථායො අභාසිත්ථාති.
ධම්මසවණියත්ථෙරස්සඅපදානං නවමං.
340. උක්ඛිත්තපදුමියත්ථෙරාපදානං.
3060. නගරෙ හංසවතියා අහොසිං මාලිකො තදා, ඔගාහිත්වා{1} පදුමසරං සතපත්තෙ{2} ඔචිනාමහං.
3061. පදුමුත්තරො නාම ජිනො සබ්බධම්මාන පාරගූ, සහ සතසහස්සෙහි සන්තචිත්තෙහි තාදිහි.
3062. ඛීණාසවෙහි සුද්ධෙහි ඡළභිඤ්ඤෙහි සො තදා,{3} මම වුද්ධිං සමන්වෙසං ආගච්ඡි මම සන්තිකෙ.{4}
3063. දිස්වානහං දෙවදෙවං සයම්භුං ලොකනායකං, වණ්ටෙ ඡෙත්වා සතපත්තං උක්ඛිපිං අම්බරෙ තදා.
3064. යදි බුද්ධො තුවං වීර ලොකජෙට්ඨො නරාසභො, සයං ගන්ත්වා සතපත්තා මත්ථකෙ ධාරයන්තු තෙ.
3065. අධිට්ඨහි මහාවීරො ලොකෙජෙට්ඨො නරාසභො, බුද්ධස ආනුභාවෙන මත්ථකෙ ධාරයිංසු තෙ.
3066. තෙන කම්මෙන සුකතෙන චෙතනාපණිධීහි ච, ජහිත්වා මානුසං දෙහං තාවතිංසමගච්ඡහං,
3067. තස්ස මෙ සුකතං ව්යම්හං සතපත්තන්ති වුච්චති, සට්ඨියොජනමුබ්බෙධං තිංසයොජනවිත්ථතං.
3068. සහස්සක්ඛත්තුං දෙවින්දො දෙවරජ්ජං අකාරයිං, පඤ්චසත්තතික්ඛත්තුඤ්ච චක්කවත්තී අහොසහං.
3069. පදෙසරජ්ජං විපුලං ගණනාතො අසංඛියං, අනුභොමි සකං කම්මං පුබ්බෙ සුකතමත්තනො.
3070. තෙනෙවෙකපදුමෙන අනුභොත්වාන සම්පදා, ගොතමස්ස භගවතො ධම්මං සච්ඡිකරිං අහං.
3071. කිලොසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
3072. සතසහස්සෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි එකපදුමස්සිදං ඵලං.
3073. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා උක්ඛිත්තපදුමියො ථෙරො ඉමා ගාථායො අභාසිත්ථාති.
උක්ඛිත්තපදුමියත්ථෙරස්ස අපදානං දසමං.
උද්දානං:
ගන්ධධූපො ච උදකං{1} පුන්නාගඑකදුස්සිකො, ඵුසිතො ච පභඞ්කරො කුටිදො උත්තරීයකො. සවණී එකපදුමී ගාථායො තත්ථ පිණ්ඩිතා, එකං ගාථාසතඤ්චෙච චතුතාළීසමෙව ච.
ගන්ධධූපියවග්ගො{2} චතුත්තිංසතිමො.
35. එකපදුමියවග්ගො
341. එකපදුමියත්ථෙරාපදානං.
3074. පදුමුත්තරො නාම ජිනො සබ්බධම්මාන පාරගූ, භවාභවෙ විභාවෙන්තො තාරෙසි ජනතං බහුං.
3075. හංසරාජා තදා හොමි දිජානං පවරො අහං, ජාතස්සරං සමොගය්හ කීළාමි හංසකීළිතං.
3076. පදුමුත්තරො ලොකවිදූ ආහුතීනං පටිග්ගහො, ජාතස්සරස්ස උපරි ආගච්ඡි තාවදෙ ජිනො.
3077. දිස්වානහං දෙවදෙවං සයම්භූං ලොකනායකං, වණ්ටෙ ඡෙත්වාන පදුමං සතපත්තං මනොරමං.
3078. මුඛතුණ්ඩෙන පග්ගය්හ පසන්නො ලොකනායකෙ, උක්ඛිපිත්වාන ගගනෙ බුද්ධසෙට්ඨමපූජයිං.
3079. පදුමුත්තරො ලොකවිදූ ආහුතීනං පටිග්ගහො, අන්තලික්ඛෙ ඨිතො සත්ථා අකා මෙ අනුමොදනං:
3080. “ඉමිනා එකපදුමෙන චෙතනාපණිධීහි ච, කප්පානං සතසහස්සං විනිපාතං න ගච්ඡසි.”
3081. ඉදං වත්වාන සම්බුද්ධො ජලජුත්තමනාමකො, මම කම්මං පකිත්තෙත්වා අගමා යෙන පත්ථිතං.
3082. සතසහස්සෙ ඉතො කප්පෙ යං කම්මමකරිං තදා, දුග්ගතිං නාභිජානාමි බුද්ධපූජායිදං ඵලං.
3083. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා එකපදුමියො ථෙරො ඉමා ගාථායො අභාසිත්ථාති.
එකපදුමියත්ථෙරස්ස අපදානං පඨමං.
342. තිඋප්පලමාලියත්ථෙරාපදානං{*}
3084. චන්දභාගානදීතීරෙ අහොසිං වානරො තදා, අද්දසං විරජං බුද්ධං නිසින්නං පබ්බතන්තරෙ.
3085. ඔභාසෙන්තං දිසා සබ්බා සාලරාජංව ඵුල්ලිතං, ලක්ඛණබ්යඤ්ජනූපෙතං දිස්වා අත්තමනො අහුං.
3086. උදග්ගචිත්තො සුමනො පීතියා හට්ඨමානසො, තීණි උප්පලපුප්ඵානි මත්ථකෙ අභිරොපයිං.
3087. පුප්ඵානි අභිරොපෙත්වා විපස්සිස්ස මහෙසිනො, සගාරවො ගමිත්වාන{1} පක්කමිං{2} උත්තරාමුඛො.
3088. ගච්ඡන්තො පතිකුටිකො විප්පසන්නෙන චෙතසා, සෙලන්නරෙ පතිත්වාන{3} පාපුණිං ජීවිතක්ඛයං.
3089. තෙන කම්මෙන සුකතෙන චෙතනාපණිධීහි ච, ජහිත්වා මානුසං දෙහං තාවතිංසං අගච්ඡහං.
3090. සතානං තීණික්ඛත්තුඤ්ච දෙවරජ්ජමකාරයිං, සතානං පඤ්චක්ඛත්තුඤ්ච චක්කවත්තී අහොසහං.
3091. එකනවුතෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
3092. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා තිඋප්පලමාලියො ථෙරො ඉමා ගාථායො අභාසිත්ථාති.
තිඋප්පලමාලියත්ථෙරස්ස අපදානං දුතියං.
343. ධජදායකත්ථෙරාපදානං.
3093. තිස්සො නාම අහූ සත්ථා ලොකජෙට්ඨො නරාසභො, තස්සොපධික්ඛයෙ දිස්වා ධජමාරොපිතං මයා.
3094. තෙන කම්මෙන සුකතෙන චෙතනාපණිධීහි ච, ජහිත්වා මානුසං දෙහං තාවතිංසමගච්ඡහං.
3095. සතානං තීණික්ඛත්තුඤ්ච දෙවරජ්ජමකාරයිං, සතානං පඤ්චක්ඛත්තුඤ්ච චක්කවත්තී අහොසහං.
3096. පදෙසරජ්ජං විපුලං ගණනාතො අසඞ්ඛියං, අනුභොමි සකං කම්මං පුබ්බෙ සුකතමත්තනො.
3097. ද්වෙනවුතෙ ඉතො කප්පෙ යං කම්මමකරිං තදා, දුග්ගතිං නාභිජානාමි ධජදානස්සිදං ඵලං.
3098. ඉච්ඡමානො’වහං අජ්ජ සකානනං සපබ්බතං, ඛොමදුස්සෙන ඡාදෙය්යං තදා මය්හං කතෙ ඵලං.
3099. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ධජදායකො ථෙරො ඉමා ගාථායො අභාසිත්ථාති.
ධජදායකත්ථෙරස්ස අපදානං තතියං.
344. තිකිඞ්කිණිපූජකත්ථෙරාපදානං.
3100. හිමවන්තස්සාවිදූරෙ භූතගණො නාම පබ්බතො, තත්ථද්දසං පංසුකූලං දුමග්ගම්හි විලග්ගිතං.
3101. තීණි කිඞ්කිණිපුප්ඵානි ඔචිනිත්වා අහං තදා, හට්ඨො හට්ඨෙන චිත්තෙන පංසුකූලමපූජයිං.
3102. එකතිංසෙ ඉතො කප්පෙ යං කම්මමකරිං තදා, දුග්ගතිං නාභිජානාමි තිණ්ණං පුප්ඵානිදං ඵලං.
3103. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා තිකිඞ්කිණිපූජකො ථෙරො ඉමා ගාථායො අභාසිත්ථාති.
තිකිඞ්කිණිපූජකත්ථෙරස්ස අපදානං චතුත්ථං.
345. නළාගාරිකත්ථෙරාපදානං.
3104. හිමවන්තස්ස අවිදූරෙ හාරිතො නාම පබ්බතො, සයම්භූ නාරදො රුක්ඛමූලෙ වසී තදා.