2945. තං පුප්ඵං ඔචිනිත්වාන සුගන්ධං ගන්ධිතං සුභං, ථූපං කරිත්වා{1} පුලිනෙ බුද්ධස්ස අභිරොපයිං.
2946. ද්වෙනවුතෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
2947. එකම්හි නවුතෙ කප්පෙ එකො ආසිං තමොනුදො, සත්තරතනසම්පන්නො චක්කවත්තී මහබ්බලො.
2948. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පුන්නාගපුප්ඵියො ථෙරො ඉමා ගාථායො අභාසිත්ථාති.
පුන්නාගපුප්ඵියත්ථෙරස්ස අපදානං තතියං.
334. එකදුස්සදායකත්ථෙරාපදානං.
2949. නගරෙ හංසවතියා අහොසිං තිණහාරකො, තිණහාරෙන ජීවාමි තෙන පොසෙමි දාරකෙ.
2950. පදුමුත්තරො නාම ජිනො සබ්බධම්මානපාරගූ, තමන්ධකාරං නාසෙත්වා උප්පජ්ජි ලොකනායකො.
2951. සකෙ ඝරෙ නිසීදිත්වා එවං චින්තෙසහං තදා, බුද්ධො ලොකෙ සමුප්පන්නො දෙය්යධම්මො ච නත්ථි මෙ.
2952. ඉදං මෙ සාටකං එකං නත්ථි මෙ කොචි දායකො, දුක්ඛො නිරයසම්ඵස්සො රොපයිස්සාමි දක්ඛිණං.
2953. එවා’හං චින්තයිත්වාන සකං චිත්තං පසාදයිං, එකං දුස්සං ගහෙත්වාන බුද්ධසෙට්ඨස්සදාසහං.
2954. එකං දුස්සං දදිත්වාන උක්කුට්ඨිං සම්පවත්තයිං, යදි බුද්ධො තුවං වීර තාරෙහි මං මහාමුනි.
2955. පදුමුත්තරො ලොකවිදූ ආහුතීනං පටිග්ගහො, මම දානං පකිත්තෙන්තො අකා මෙ අනුමොදනං:
2956. “ඉමිනා එකදුස්සෙන චෙතනාපණිධීහි ච, කප්පසතහස්සානි විනිපාතං න ගච්ඡති.
2957. ඡත්තිංසක්ඛත්තුං දෙවින්දො දෙවරජ්ජං කරිස්සති, තෙත්තිංසක්ඛත්තුං රාජා ච චක්කවත්තී භවිස්සති.
2958. පදෙසරජ්ජං විපුලං ගණනාතො අසංඛියං, දෙවලොකෙ මනුස්සෙ වා සංසරන්තො තුවං භවෙ.
2959. රූපවා ගුණසම්පන්නො අනවක්කන්තදෙහවා, අක්ඛොභං අමිතං දුස්සං ලභිස්සසි යදිච්ඡකං.”
2960. ඉදං වත්වාන සම්බුද්ධො ජලජුත්තමනාමකො, නභං අබ්භුග්ගමී ධීරො හංසරාජාව අම්බරෙ.
2961. යං යං යොනුපපජ්ජාමි දෙවත්තං අථ මානුසං, භොගෙ මෙ ඌනතා නත්ථි එකදුස්සස්සිදං ඵලං.
2962. පදුද්ධාරෙ පදුද්ධාරෙ දුස්සං නිබ්බත්තතෙ මම, හෙට්ඨාදුස්සම්භි තිට්ඨාමි උපරිච්ඡදනං මම.
2963. චක්කවාළමුපාදාය සකානනං සපබ්බතං, ඉච්ඡමානො ච’ හං අජ්ජ දුස්සෙහි ඡාදයෙය්ය’හං.
2964. තෙනෙව එකදුස්සෙන සංසරන්තො භවාභවෙ, සුවණ්ණවණ්ණො හුත්වාන සංසරාමි භවාභවෙ.
2965. විපාකං එකදුස්සස්ස නාජ්ඣගං කත්ථවික්ඛයං, අයං මෙ අන්තිමා ජාති විපච්චති ඉධාපි මෙ.
2966. සතසහස්සෙ ඉතො කප්පෙ යං දුස්සමදදිං තදා, දුග්ගතිං නාභිජානාමි එකදුස්සස්සිදං ඵලං.
2967. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
2968. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා එකදුස්සදායකො ථෙරො ඉමා ගාථායො අභාසිත්ථාති.
එකදුස්සදායකත්ථෙරස්ස අපදානං චතුත්ථං.
335. ඵුසිතකම්පියත්ථෙරාපදානං
2969. විපස්සී නාම සම්බුද්ධො ලොකජෙට්ඨො නරාසභො, ඛීණාසවෙහි සහිතො සඞ්ඝාරාමෙ වසී තදා.
2970. ආරාමද්වාරා නික්ඛම්ම විපස්සී ලොකනායකො, සහ සතසහස්සෙහි අට්ඨඛීණාසවෙහි තු{1}.
2971. අජිනෙන නිවත්ථො’හං වාකචීරධරො’පි ච, කුසුම්භොදකමාදාය{2} සම්බුද්ධං උපසඞ්කමිං.
2972. සකං චිත්තං පසාදෙත්වා වෙදජාතො කතඤ්ජලී, කුසුම්භොදකමාදාය{2} බුද්ධමබ්භුක්කිරිං අහං.
2973. තෙන කම්මෙන සම්බුද්ධො ජලජුත්තමනාමකො, මම කම්මං පකිත්තෙත්වා අගමා යෙන පත්ථිතං.
2974. ඵුසිතා පඤ්චසහස්සා යෙහි පූජෙසහං තදා,{3} අඩ්ඪතෙය්යසහස්සෙ හි දෙවරජ්ජං අකාරයිං.
2975. අඩ්ඪතෙය්යසහස්සෙ හි චක්කවත්තී අහොසහං, අවසෙසෙන කම්මෙන අරහත්තමපාපුණිං.
2976. දෙවරාජා යදා හොමි මනුජාධිපතී යදා, තමෙව නාමධෙයං මෙ ඵුසිතො නාම හොම’හං.
2977. දෙවභූතස්ස සන්තස්ස අථාපි මානුසස්ස වා, සමන්තා ව්යාමතො මය්හං ඵුසිතංව පවස්සති.
2978. භවා උග්ඝාටිතා මය්හං කිලෙසා ඣාපිතා මම, සබ්බාසවපරික්ඛීණො ඵුසිතස්ස ඉදං ඵලං.
2979. චන්දනස්සෙව මෙ කායා තථා ගන්ධො පවායති, සාරීරිකො මමං{1} ගඣො අඩ්ඪකොසෙ පවායති.
2980. දිබ්බගන්ධං සම්පවන්තං පුඤ්ඤකම්මසමඞ්ගිනං, ගන්ධං ඝත්වාන ජානන්ති ඵුසිතො ආගතො ඉධ.
2981. සාඛාපලාස කට්ඨානි තිණානි පි ච සබ්බසො, මම සඞ්කප්පමඤ්ඤාය ගන්ධො සම්පජ්ජතෙ ඛණෙ.
2982. සතසහස්සෙ ඉතො කප්පෙ චන්දනං අභිපූජයිං, දුග්ගතිං නාභිජානාමි ඵුසිතස්ස ඉදං ඵලං.
2983. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ඵුසිතකම්පියො ථෙරො ඉමා ගාථායො අභාසිත්ථාති.
ඵුසිතකම්පියත්ථෙරස්ස අපදානං පඤ්චමං.
336. පභඞ්කරත්ථෙරාපදානං.
2984. පදුමුත්තරස්ස භගවතො{2} ලොකජෙට්ඨස්ස තාදිනො, විපිනෙ චෙතියං ආසි වාළමිගසමාකුලෙ.
2985. න කොචි විසහි ගන්තුං චෙතියං අභිවන්දිතුං, තිණකට්ඨලතොනද්ධං පලුග්ගං ආසි චෙතියං.
2986. වනකම්මිකො තදා ආසිං පිතුපෙතාමහෙන’හං{3}, අද්දසං විපිනෙ ථූපං ලුග්ගං තිණලතාකුලං.
2987. දිස්වානාහං බුද්ධථූපං ගරුචිත්තං උපට්ඨහිං, “බුද්ධසෙට්ඨස්ස ථූපො’යං පලුග්ගො අච්ඡතී වනෙ.
2988. නච්ඡන්නං නප්පතිරූපං ජානන්තස්ස ගුණාගුණං, බුද්ධථූපමසොධෙත්වා අඤ්ඤං කම්මං පයොජයෙ.”
2989. තිණං කට්ඨඤ්ච{4} වල්ලිඤ්ච සොධයිත්වාන චෙතියෙ, වන්දිත්වා අට්ඨවාරානි පතිකුටිකො අගච්ඡහං.
2990. තෙන කම්මෙන සුකතෙන චෙතනාපණිධීහි ච, ජහිත්වා මානුසං දෙහං තාවතිංසමගච්ඡහං.
2991. තත්ථ මෙ සුකතං ව්යම්හං සොවණ්ණං සප්පභස්සරං, සට්ඨියොජනමුබ්බෙධං තිංසයොජනවිත්ථතං.
2992. තිසතානි ච වාරානි දෙවරජ්ජමකාරයිං, පඤ්චවීසතික්ඛත්තුඤ්ච චක්කවත්තී අහොස’හං.
2993. භවාභවෙ සංසරන්තො මහාභොගං ලභාමහං, භොගෙ මෙ ඌනතා නත්ථි සොධනාය ඉදං ඵලං.
2994. සිවිකා හත්ථික්ඛන්ධෙන විපිනෙ ගච්ඡතො මම, යං යං දිසාහං ගච්ඡාමි සරණං සම්පජ්ජතෙ{1} වනං.
2995. ඛාණුං වා කණ්ටකං වාපි නාහං පස්සාමි චක්ඛුනා, පුඤ්ඤකම්මෙන සංයුත්තො සයමෙවාපනීයරෙ.
2996. කුට්ඨං ගණ්ඩො කිලාසො ච අපමාරො විතච්ඡිකා, දද්දුං කච්ඡු ච මෙ නත්ථි සොධනාය ඉදං ඵලං.
2997. අඤ්ඤම්පි මෙ අච්ඡරියං බුද්ධථූපම්හි සොධිතෙ,{2} නාභිජානාමි මෙ කායෙ ජාතං පිලකබින්දුකං.
2998. අඤ්ඤම්පි මෙ අච්ඡරියං බුද්ධථූපම්හි සොධිතෙ, දුවෙ භවෙ සංසරාමි දෙවත්තෙ අථ මානුසෙ.
2999. අඤ්ඤම්පි මෙ අච්ඡරියං බුද්ධථූපම්හි සොධිතෙ, සුවණ්ණවණ්ණො සබ්බත්ථ සප්පභාසො භවාමහං.
3000. අඤ්ඤම්පි මෙ අච්ඡරියං බුද්ධථූපම්හි සොධිතෙ, අමනාපං විවජ්ජති මනාපං උපිට්ඨති.
3001. අඤ්ඤම්පි මෙ අච්ඡරියං බුද්ධථූපම්හි සොධිතෙ, විසුද්ධං හොති මෙ චිත්තං එකග්ගං සුසමාහිතං.
3002. අඤ්ඤම්පි මෙ අච්ඡරියං බුද්ධථූපම්හි සොධිතෙ, එකාසනෙ නිසීදිත්වා අරහත්තමපාපුණිං.
3003. සතසහස්සෙ ඉතො කප්පෙ යං කම්මමකරිං තදා, දුග්ගතිං නාභිජානාමි සොධනාය ඉදං ඵලං.
3004. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පභඞ්කරො ථෙරො ඉමා ගාථායො අභාසිත්ථාති.
පහඞ්කරත්ථෙරස්ස අපදානං ඡට්ඨං.
337. තිණකුටිදායකත්ථෙරාපදානං.
3005. නගරෙ බන්ධුමතියා අහොසිං පරකම්මිකො, පරකම්මායනෙ යුත්තො පරභත්තං අපස්සිතො.
3006. රහොගතො නිසීදිත්වා එවං චින්තෙසහං තදා, “බුද්ධො ලොකෙ සමුප්පන්නො අධිකාරො ච නත්ථි මෙ.
3007. කාලො ගතිං{1} සොධෙතුං ඛණො මෙ පටිපාදිතො, දුක්ඛො නිරයසම්ඵස්සො අපුඤ්ඤානං හි පාණිනං”.
3008. එවාහං චින්තයිත්වාන කම්මසාමිං උපාගමිං, එකාහං කම්මං යාචිත්වා විපිනං පාවිසිං අහං.
3009. තිණකට්ඨඤ්ච වල්ලිඤ්ච ආහරිත්වාන’හං තදා, තිදණ්ඩකෙ ඨපෙත්වාන අකං තිණකුටිං අහං.
3010. සඞ්ඝස්සත්ථාය කුටිකං නිය්යාතෙත්වාන තං අහං, තදහෙයෙව ආගන්ත්වා කම්මසාමිං උපාගමිං.
3011. තෙන කම්මෙන සුකතෙන තාවතිංසමගච්ඡහං, තත්ථ මෙ සුකතං ව්යම්භං තිණකුටිකාය නිම්මිතං.{2}
3012. සහස්සකණ්ඩං සතභෙණ්ඩු ධජාලු හරිතාමයං,{3} සතසහස්සනිය්යූහා ව්යම්හෙ පාතුභවිංසු මෙ.
3013. යං යං යොනුපපජ්ජාමි දෙවත්තං අථ මානුසං, මම සඞ්කප්පමඤ්ඤාය පාසාදො උපතිට්ඨති.
3014. භයං වා ඡම්භිතත්තං ලොමහංසො න විජ්ජති, තාසං මම න ජානාමි තිණකුටිකායි’දං ඵලං.
3015. සීහව්යග්ඝා ච දීපී ච අච්ඡකොකතරච්ඡකා, සබ්බෙ මං පරිවජ්ජෙන්ති තිණකුටිකායි’දං ඵලං.
3016. සිරිංසපා{4} ච භූතා ච අභිකුම්භණ්ඩරක්ඛසා, තෙ පි මං පරිවජ්ජෙන්ති තිණකුටිකායි’දං ඵලං.
3017. න පාපසුපිනස්සා’හං{5} සරාමි දස්සනං මම, උපට්ඨිතා සති මය්හං තිණකුටිකායි’දං ඵලං.
3018. තායෙව තිණකුටිකාය අනුභොත්වාන සම්පදා, ගොතමස්ස භගවතො ධම්මං සච්ඡිකරිං අහං.
3019. එකනවුතෙ ඉතො කප්පෙ යං කම්මමකරිං තදා, දුග්ගතිං නාභිජානාමි තිණකුටිකායි’දං ඵලං.
3020. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා තිණකුටිදායකො ථෙරො ඉමා ගාථායො අභාසිත්ථාති.
තිණකුටිදායකත්ථෙරස්ස අපදානං සත්තමං.
338. උත්තරෙය්යදායකත්ථෙරාපදානං
3021. නගරෙ හංසවතියා අහොසිං බ්රාහ්මණො තදා, අජ්ඣායකො මන්තධරො තිණ්ණං වෙදාන පාරගූ.
3022. පුරක්ඛතො සසිස්සෙහි ජාතිමා ච සුසික්ඛිතො, තොයාභිසෙවනත්ථාය නගරා නික්ඛමිං තදා.
3023. පදුමුත්තරො නාම ජිනො සබ්බධම්මාන පාරගූ, ඛීණාසවසහස්සෙහි නගරං පාවිසී ජිනො.
3024. සුචාරුරූපං දිස්වාන අනෙජකාරිතං{1} විය, පරිවුතමරහන්තෙහි දිස්වා චිත්තං පසාදයිං.
3025. සිරසි{2} අඤ්ජලිං කත්වා නමස්සිත්වාන සුබ්බතං, පසන්නචිත්තො සුමනො උත්තරීයමදාසහං.
3026. උභො හත්ථෙහි පග්ගය්හ සාටකං උක්ඛිපිං අහං, යාවතා බුද්ධපරිසා තාව ඡාදෙසි සාටකො.
3027. පිණ්ඩචාරං චරන්තස්ස මහාභික්ඛුගණාදිනො, ඡදං කරොන්තො අට්ඨාසි හාසයන්තො මමං තදා.
3028. ඝරතො නික්ඛමන්තස්ස සයම්භූ අග්ගපුග්ගලො, විථියංව ඨිතො සත්ථා අකා මෙ{3} අනුමොදනං.
3029. “පසන්නචිත්තො සුමනො යො මෙ පාදාසි සාටකං, තමහං කිත්තයිස්සාමි සුණොථ මම භාසතො: