183. ඉද්ධිං වීමංසමානා තෙ වත්තන්ති නිච්චකාලිකං, පඨවිං තෙ පකම්පෙන්ති සාරම්භෙන දුරාසදා.
184. කීළමානා ච තෙ සිස්සා කීළන්ති ඣායකීළිතං, ජම්බුතො ඵලමානෙන්ති මම සිස්සා දුරාසදා.
185. අඤ්ඤෙ ගච්ඡන්ති ගොයානං අඤ්ඤෙ පුබ්බවිදෙහකං{1} අඤ්ඤෙ ච උත්තරකුරුං එසනාය දුරාසදා.
186. පුරතො ඛාරිං පෙසෙන්ති පච්ඡතො’ව වජන්ති තෙ, චතුබ්බීසසහස්සෙහි ඡාදිතං හොති අම්බරං.
187. අග්ගිපාකී අනග්ගී ච දන්තො දුක්ඛලිකා පි ච, අසමෙන කොට්ටකා{2} කෙචි පවත්තඵලභොජනා.
188. උදකොරොහනා{3} කෙචි සායං පාතො සුචීරතා, තොයාභිසෙචනකරා{4} මම සිස්සා දුරාසදා.
189. පරූළ්හකච්ඡනඛලොමා පඞ්කදන්තා රජස්සිරා, ගන්ධිතා සීලගන්ධෙන මම සිස්සා දුරාසදා.
190. පාතොව සන්නිපතිත්වා{5} ජටිලා උග්ගතාපනා, ලාභාලාභං පකිත්තෙත්වා ගච්ඡන්ති අම්බරෙ තදා.
191. එතෙසං පක්කමන්තානං මහාසද්දො පවත්තති, අජිනචම්මසද්දෙන මොදිතා{6} හොන්ති දෙවතා.
192. දිසො දිසං පක්කමන්ති අන්තලික්ඛචරා ඉසී, සකෙ බලෙනුපත්ථද්ධා{7} තෙ ගච්ඡන්ති යදිච්ඡකං.
193. පඨවීකම්පකා එතෙ සබ්බෙව නභචාරිනො, උග්ගතෙජා දුප්පසභා සාගරො’ව අඛොභියා.
194. ඨානවඞ්කමිනො{8} කෙචි කෙචි නෙසජ්ජිකා ඉසී, පවත්තභොජනා කෙචි මම සිස්සා දුරාසදා.
195. මෙත්තාවිහාරිනො එතෙ හිතෙසී සබ්බපාණිනං, අනත්තුක්කංසකා සබ්බෙ න තෙ වම්භෙන්ති කස්සචි.
196. සීහරාජාව‘සම්භිතා{9} ගජරාජාව ථාමවා, දුරාසදා ව්යග්ඝාරිව ආගච්ඡන්ති මම’න්තිකෙ.
197. විජ්ජාධරා දෙවතා ච නාගාගන්ධබ්බරක්ඛසා, කුම්භණ්ඩා දානවා ගරුළා උපජීවන්ති තං සරං.
198. තෙ ජටාඛාරිභරිතා{1} අජිනුත්තරවාසනා{2}, අන්තලික්ඛචරා සබ්බෙ උපජීවන්ති තං සරං.
199. සදානුච්ඡවිකා එතෙ අඤ්ඤමඤ්ඤං සගාරවා, චතුබ්බීසසහස්සානං ඛිපිතසද්දො{3} න විජ්ජති.
200. පාදෙ පාදං නික්ඛිපන්තා අප්පසද්දා සුසංවුතා, උපසඞ්කම්ම සබ්බෙ’ව සිරසා වන්දරෙ මමං.
201. තෙහි සිස්සෙහි පරිවුතො සන්තෙහි ච තපස්සිහි, වසාමි අස්සමෙ තත්ථ ඣායී ඣානරතො අහං.
202. ඉසීනං සීලගන්ධෙන පුප්ඵගන්ධෙන චූභයං, ඵලීනං ඵලගන්ධෙන ගන්ධිතො හොති අස්සමො.
203. රත්තින්දිවං න ජානාමි අරති මෙ න විජ්ජති, සකෙ සිස්සෙ ඔවදන්තො භිය්යො හාසං ලභාම’හං.
204. පුප්ඵානං පුප්ඵමානානං ඵළානඤ්ච විපච්චතං දිබ්බා ගන්ධා පවායන්ති සොභයන්තා මම’ස්සමං
205. සමාධිම්හා වුට්ඨහිත්වා ආතාපී නිපකො අහං, ඛාරිභාරං ගහෙත්වාන වනං අජ්ඣොගහිං තදා.
206. උප්පාතෙ සුපිනෙ චාපි ලක්ඛණෙසු සුසික්ඛිතො, පවත්තමානං{4} මන්තපදං ධාරයාමි අහං තදා.{5}
207. අනොමදස්සී භගවා ලොකජෙට්ඨො නරාසභො, විවෙකකාමො සම්බුද්ධො හිමවන්තමුපාගමි.
208. අජ්ඣොගහෙත්වා හිමවන්තං අග්ගො කාරුණිකො මුනි, පල්ලඞ්කං ආභුජිත්වාන නිසීදි පුරිසුත්තමො.
209. තත්ථ’ද්දසාසිං{6} සම්බුද්ධං සප්පභාසං මනොරමං, ඉන්දීවරං’ව ජලිතං ආදිත්තං’ව හුතාසනං.
210. ජලන්තං දීපරුක්ඛං’ව විජ්ජුං’ව ගගනෙ{7} යථා, සුඵුල්ලං සාලරාජා ව අද්දසං ලොකනායකං.
211. අයං නාගො මහාවීරො දුක්ඛස්ස’න්තකරො මුනි, ඉමං දස්සනමාගම්ම සබ්බදුක්ඛා{8} පමුච්චරෙ.
212. දිස්වාන’හං දෙවදෙවං ලක්ඛණං උපධාරයිං, බුද්ධො නු ඛො න වා බුද්ධො හන්ද පස්සාමි{9} චක්ඛුමං.
213. සහස්සාරානි චක්කානි දිස්සන්ති චරණුත්තමෙ, ලක්ඛණානි’ස්ස දිස්වාන නිට්ඨං ගච්ඡිං තථාගතෙ.
214. සම්මජ්ජනිං ගහෙත්වාන සම්මජ්ජිත්වාන’හං තදා, අථ{1} පුප්ඵෙ සමානෙත්වා බුද්ධසෙට්ඨං අපූජයිං.
215. පූජයිත්වාන සම්බුද්ධං ඔඝතිණ්ණමනාසවං, එකංසං අජිනං කත්වා නමස්සිං ලොකනායකං.
216. යෙන ඤාණෙන සම්බුද්ධො විහරිත්ථ{2} අනාසවො, තං ඤාණං කිත්තයිස්සාමි සුණාථ මම භාසතො.
217. සමුද්ධරසි’මං ලොකං සයම්භූ අමිතොදය, තව දස්සනමාගම්ම කඞ්ඛාසොතං තරන්ති තෙ.
218. තුවං සත්ථා ච කෙතූ ච ධජො යූපො ච පාණිනං, පරායණො පතිට්ඨා ච දීපො ච දිපදුත්තමො.
219. සක්කා සමුද්දෙ උදකං{3} පමෙතුං ආළ්හකෙන වා, න ත්වෙව තව සබ්බඤ්ඤූ ඤාණං සක්කා පමෙතවෙ.
220. ධාරෙතුං පඨවිං සක්කා ඨපෙත්වා තුලමණ්ඩලෙ, න ත්වෙව තව සබ්බඤ්ඤුඤාණං සක්කා ධරෙතවෙ.
221. ආකාසං මිනිතුං සක්කා රජ්ජුයා අඞ්ගුලෙන වා, න ත්වෙව තව සබ්බඤ්ඤුඤාණං සක්කා පමෙතවෙ.
222. මහාසමුද්දෙ උදකං පඨවිං චා’ඛිලං ජහෙ{4}, බුද්ධඤාණං උපාදාය උපමාතො{5} න යුජ්ජරෙ.
223. සදෙවකස්ස ලොකස්ස චිත්තං යෙසං{6} පවත්තති. අන්තොජාලීකතා{7} එතෙ තව ඤාණම්හි චක්ඛුම.
224. යෙන ඤාණෙන පත්තොසි කෙවලං බොධිමුත්තමං, තෙන ඤාණෙන සබ්බඤ්ඤූ මද්දසි පරතිත්ථියෙ.
225. ඉමා ගාථා ථවිත්වාන{8} සුරුචී නාම තාපසො, අජිනං පත්ථරිත්වාන පඨවියං නිසීදි සො.
226. චුල්ලාසීතිසහස්සානි අජ්ඣොගාළ්හො මහණ්ණවෙ, අච්චුග්ගතො තාවදෙව ගිරිරාජා පවුච්චති.
227. තාව අච්චුග්ගතො නෙරූ ආයතො විත්ථතො ච සො, චුණ්ණිතො අණුභෙදෙන කොටිසතසහස්සසො{1}
228. ලක්ඛෙ ඨපියමානම්හි පරික්ඛයමගච්ඡථ, න ත්ථෙව තව සබ්බඤ්ඤූ ඤාණං සක්කා පමෙතවෙ{2}.
229. සුඛුමච්ඡිකෙන ජාලෙන උදකං යො පරික්ඛිපෙ, යෙ කෙචි උදකෙ පාණා අන්තොජාලීකතා සියුං.
230. තථෙව හි මහාවීර යෙ කෙචි පුථු තිත්ථියා, දිට්ඨිගහනපක්ඛන්තා{3} පරාමාසෙන මොහිතා.
231. තව සුද්ධෙන ඤාණෙන අනාවරණදස්සිනා, අන්තොජාලගතා{4} එතෙ ඤාණං තෙ නාතිවත්තරෙ.
232. භගවා තම්හි සමයෙ අනොමදස්සී මහායසො, වුට්ඨහිත්වා සමාධිම්හා දිසං ඔලොකයී ජිනො.
233. අනොමදස්සීමුනිනො නිසභො නාම සාවකො, පරිවුතො සතසහස්සෙහි සන්තචිත්තෙහි තාදිහි.
234. ඛීණාසවෙහි සුද්ධෙහි ඡළභිඤ්ඤෙහි ඣායිහි{5}, චිත්තමඤ්ඤාය බුද්ධස්ස උපෙසි{6} ලොකනායකං.
235. අන්තලික්ඛෙ ඨිතා තත්ථ පදක්ඛිණමකංසු තෙ, නමස්සන්තා පඤ්ජලිකා ඔතරුං බුද්ධසන්තිකෙ.
236. අනොමදස්සී භගවා ලොකජෙට්ඨො නරාසභො, භික්ඛුසඞ්ඝෙ{7} නිසීදිත්වා සිතං පාතුකරී ජිනො.
237. වරුණො නාමු’පට්ඨාකො සබ්බඤ්ඤුස්ස මහෙසිනො{8}, එකංසං චීවරං කත්වා අපුච්ඡි ලොකනායකං.
238. “කො නු ඛො භගවා හෙතු සීතකම්මස්ස සත්ථුනො? න හි බුද්ධා අහෙතූ හි සීතං පාතුකරොන්ති තෙ.”
239. අනොමදස්සී භගවා ලොකජෙට්ඨො නරාසභො, සඞ්ඝමජ්ඣෙ{9} නිසීදිත්වා ඉමං ගාථමභාසථ.
240. ‘යො මං පුප්ඵෙන පූජෙසි ඤාණඤ්චාපි අනුත්ථවි, තමහං කිත්තයිස්සාමි සුණාථ මම භාසතො.’
241. බුද්ධස්ස ගිරමඤ්ඤාය සබ්බෙ දෙවා සමාගතා, සද්ධම්මං සොතුකාමා තෙ සම්බුද්ධං උපසඞ්කමුං.
242. දසසු{1} ලොකධාතූසු දෙවතා යා{2} මහිද්ධිකා, සද්ධම්මං සොතුකාමා තෙ සම්බුද්ධං උපසඞ්කමුං.
243. “හත්ථි අස්සා රථා පත්ති සෙනා ච චතුරඞ්ගිනී, පරිවාරෙස්සන්ති ‘මං{3} නිච්චං බුද්ධපූජායිදං ඵලං.
244. සට්ඨිතුරියසහස්සානි භෙරියො සමලඞ්කතා, උපට්ඨිස්සන්ති’මං{4} නිච්චං බුද්ධපූජායි’දං ඵලං.
245. සොළසිත්ථිසහස්සානි නාරියො සමලඞ්කතා, විචිත්තවත්ථාභරණා ආමුත්තමණිකුණ්ඩලා.
246. අළාරපම්හා හසුලා{5} සුසඤ්ඤා තනුමජ්ඣිමා, පරිවාරෙස්සන්ති’මං{3} නිච්චං බුද්ධපූජායි’දං ඵලං.
247. කප්පසතසහස්සානි දෙවලොකෙ රමිස්සති, සහස්සක්ඛත්තුං චක්කවත්තී රාජා රට්ඨෙ භවිස්සති.
248. සහස්සක්ඛත්තුං දෙවින්දො දෙවරජ්ජං කරිස්සති, පදෙසරජ්ජං විපුලං ගණනාතො අසඞ්ඛියං.
249. පච්ඡිමභවෙ සම්පත්තෙ{6} මනුස්සත්තං ගමිස්සති, බ්රාහ්මණී ‘සාරියා’ නාම ධාරයිස්සති කුච්ඡිනා.
250. මාතුයා නාමගොත්තෙන පඤ්ඤායිස්සත’යං නරො, සාරිපුත්තො’ති නාමෙන තික්ඛපඤ්ඤො භවිස්සති.
251. අසීතිකොටී{7} ඡඩ්ඩෙත්වා පබ්බජිස්සත’කිඤ්චනො, ගවෙසන්තො සන්තිපදං චරිස්සති මහිං ඉමං.
252. අපරිමෙය්යෙ{8} ඉතො කප්පෙ ඔක්කාකකුලසම්භවො, ගොතමො නාම ගොත්තෙන සත්ථා ලොකෙ භවිස්සති.
253. තස්ස ධම්මෙසු දායාදො ඔරසො ධම්මනිම්මිතො, සාරිපුත්තො ‘ති නාමෙන හෙස්සති අග්ගසාවකො.
254. අයං භාගීරථී{9}ගඞ්ගා හිමවන්තා පභාවිතා, මහාසමුද්දමප්පෙති තප්පයන්ති මහොදධිං.
255. තථෙවා ‘යං සාරිපුත්තො සකෙ තීසු{10} විසාරදො, පඤ්ඤාය පාරමිං ගන්ත්වා තප්පයිස්සති පාණිනො.
256. හිමවන්තං උපාදාය සාගරඤ්ච මහොදධිං, එත්ථ’න්තරෙ යං පුලිනං ගණනාතො අසඞ්ඛියං.
257. තම්පි සක්කා අසෙසෙන සඞ්ඛාතුං ගණනා යථා, න ත්වෙව සාරිපුත්තස්ස පඤ්ඤාය’න්තො භවිස්සති.
258. ලක්ඛෙ ඨපියමානම්භි ඛීයෙ ගඞ්ගාය වාලුකා, න ත්වෙව සාරිපුත්තස්ස පඤ්ඤාය’න්තො භවිස්සති.
259. මහාසමුද්දෙ ඌමියො ගණනාතො අසඞ්ඛියා, තථෙව සාරිපුත්තස්ස පඤ්ඤාය’න්තො න හෙස්සති.
260. ආරාධයිත්වා සම්බුද්ධං ගොතමං සක්යපුඞ්ගවං, පඤ්ඤාය පාරමිං ගන්ත්වා හෙස්සති අග්ගසාවකො
261. පවත්තිතං ධම්මචක්කං සක්යපුත්තෙන තාදිනා, අනුවත්තෙස්සතී සම්මා{1} වස්සෙන්තො{2} ධම්මවුට්ඨියො.
262. සබ්බමෙතං අභිඤ්ඤාය ගොතමො සක්යපුඞ්ගවො, භික්ඛුසඞ්ඝෙ නිසීදිත්වා අග්ගට්ඨානෙ ඨපෙස්සති.
263. අහො මෙ සුකතං කම්මං අනොමදස්සිස්ස සත්ථුනො, යස්සා’හං කාරං කත්වාන සබ්බත්ථ පාරමිං ගතො.
264. අපරිමෙය්යෙ කතං කම්මං ඵලං දස්සෙසි මෙ ඉධ, සුමුත්තො සරවෙගොව කිලෙසෙ ඣාපයිං අහං.
265. අසඞ්ඛතං ගවෙසන්තො නිබ්බානං අචලං පදං, විචිනං තිත්ථියෙ සබ්බෙ තදා’හං සංසරිං භවෙ.
266. යථාපි ව්යාධිතො පොසො පරියෙසෙය්ය ඔසධං, විචිනෙය්ය වනං{3} සබ්බං ව්යාධිතො පරිමුත්තියා.
267. අසඞ්ඛතං ගවෙසන්තො නිබ්බානං අමතං පදං, අබ්බොකිණ්ණං{4} පඤ්චසතං පබ්බජිං ඉසිපබ්බජං.
268. ජටිභාරෙන භරිතො අජිනුත්තරනිවාසනො{5} අභිඤ්ඤාපාරමිං ගන්ත්වා බ්රහ්මලොකං අගච්ඡ’හං.
269. නත්ථි බාහිරකෙ{6} සුද්ධි ඨපෙත්වා ජිනසාසනං, යෙ කෙචි බුද්ධිමා සත්තා සුජ්ඣන්ති ජිනසාසනෙ.
270. අත්තකාරමයං{7} එතං නයිදං ඉතිහීතිහං,{8} අසඞ්ඛතං ගවෙසන්තො කුතිත්ථං සඤ්චරිං අහං.
271. යථා සාරත්ථිකො පොසො කදලිං ඡෙත්වාන ඵාලයෙ, න තත්ථ සාරං වින්දෙය්ය සාරෙන රිත්තකො හි සො.
272. තථෙව තිත්ථියා ලොකෙ නානාදිට්ඨි බහුජ්ජනා, අසඞ්ඛතෙන රිත්තා’සෙ{1} සාරෙන කදලී යථා.
273. පච්ඡිමභවෙ සම්පත්තෙ{2} බ්රහ්මබන්ධු අහොස’හං, මහාභොගං{3} ඡඩ්ඩයිත්වා පබ්බජිං අනගාරියං.
(පඨමභාණවාරං)
274. අජ්ඣායකො මන්තධරො තිණ්ණං වෙදානපාරගූ, බ්රාහ්මණො සඤ්ජයො නාම තස්ස මූලෙ වසාමහං.
275. සාවකො තෙ මහාවීර අස්සජි නාම බ්රාහ්මණො, දුරාසදො උග්ගතෙජො පිණ්ඩාය චරතී තදා.{4}
276. තමද්දසාසිං{5} සප්පඤ්ඤං මුනිං මොනෙ සමාහිතං, සන්තචිත්තං මහානාගං සුඵුල්ලං පදුමං යථා.
277. දිස්වා මෙ චිත්තමුප්පජ්ජි{6} සුදන්තං සුද්ධමානසං, උසභං පවරං වීරං අරහා’යං භවිස්සති.
278. පාසාදිකො ඉරීයති අභිරූපො සුසංවුතො, උත්තමෙ දමථෙ දන්තො අමතදස්සි{7} භවිස්සති.
279. යන්නූනා’හං උත්තමත්ථං පුච්ඡෙය්යං තුට්ඨමානසං, සො මෙ පුට්ඨො කථෙස්සති පටිපුච්ඡාම’හං තදා.
280. පිණ්ඩපාතං{8} චරන්තස්ස පච්ඡතො අගමාස’හං, ඔකාසං පටිමානෙන්තො පුච්ඡිතුං අමතං පදං.
281. වීථන්තරෙ{9} අනුප්පත්තං උපගන්ත්වාන පුච්ඡ’හං, කථං ගොත්තො’සි ත්වං වීර කස්ස සිස්සො’සි මාරිස?