2105. කුමුදං පුප්ඵතෙ තත්ථ චක්කමත්තානි ජායරෙ, ඔචිනාමි ච තං පුප්ඵං ඛලිතො සමිතී තදා.
2106. අත්ථදස්සී තු භගවා දිපදින්දො නරාසභො, පුප්ඵං සමොචිතං දිස්වා ආගච්ඡි මම සන්තිකං.
2107. උපාගතඤ්ච සම්බුද්ධං දෙවදෙවං නරාසභං, සඞ්ගම්ම පුප්ඵං පග්ගය්හ බුද්ධස්ස අභිරොපයිං.
2108. යාවතා හිමවන්තන්තා පරිසා සා තදා අහු, තාවච්ඡදනසම්පන්නො අගමාසි තථාගතො.
2109. අට්ඨාරසෙ කප්පසතෙ යං පුප්ඵමභිරොපයිං, දුග්ගතිං නාභිජානාමි බුද්ධපූජායිදං ඵලං.
2110. ඉතො පණ්ණරසෙ කප්පෙ සත්තාහෙසුං ජනාධිපා, සහස්සරථනාමා තෙ චක්කවත්තී මහබ්බලා.
2111. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කුමුදමාලියො ථෙරො ඉමා ගාථායො අභාසිත්ථාති.
කුමුදමාලියත්ථෙරස්ස අපදානං පඨමං.
172. නිස්සෙණිදායකත්ථෙරාපදානං.
2112. කොණ්ඩඤ්ඤස්ස භගවතො ලොකජෙට්ඨස්ස තාදිනො, ආරොහත්ථාය පාසාදං නිස්සෙණී කාරිතා මයා.
2113. තෙන චිත්තප්පසාදෙන අනුභොත්වාන සම්පදා, ධාරෙමි අන්තිමං දෙහං සම්මාසම්බුද්ධසාසනෙ.
2114. එකතිංසම්භි කප්පානං සහස්සම්හි තයො අහූ, සම්බහුලා නාම රාජානො චක්කවත්තී මහබ්බලා.
2115. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා නිස්සෙණිදායකො ථෙරො ඉමා ගාථායො අභාසිත්ථාති.
නිස්සෙණිදායකත්ථෙරස්ස අපදානං දුතියං.
173. රත්තිපුප්ඵියත්ථෙරාපදානං.
2116. මිගලුද්දො පුරෙ ආසිං අරඤ්ඤෙ කානනෙ අහං, විපස්සිං අද්දසං බුද්ධං දෙවදෙවං නරාසභං.
2117. රත්තිකං පුප්ඵිතං දිස්වා කුටජං ධරණීරුහං, සමූලං පග්ගහෙත්වාන උපනෙසිං මහෙසිනො.
2118. එකනවුතෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි පුප්ඵදානස්සිදං ඵලං.
2119. ඉතො ච අට්ඨමෙ කප්පෙ සුප්පසන්නසනාමකො, සත්තරතනසම්පන්නො රාජාහොසිං මහබ්බලො.
2120. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා රත්තිපුප්ඵියො ථෙරො ඉමා ගාථායො අභාසිත්ථාති.
රත්තිපුප්ඵියත්ථෙරස්ස අපදානං තතියං.
174. උදපානදායකත්ථෙරාපදානං.
2121. විපස්සිනො භගවතො උදපානො කතො මයා, පිණ්ඩපාතඤ්ච දත්වාන නිය්යාතෙසිං අහං තදා.
2122. එකනවුතෙ ඉතො කප්පෙ යං කමම්මකරිං තදා, දුග්ගතිං නාභිජානාමි උදපානස්සිදං ඵලං.
2123. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා උදපානදායකො ථෙරො ඉමා ගාථායො අභාසිත්ථාති.
උදපානදායකත්ථෙරස්ස අපදානං චතුත්ථං.
175. සීහාසනදායකත්ථෙරාපදානං.
2124. නිබ්බුතෙ ලොකනාථම්භි පදුමුත්තරනායකෙ, පසන්නචිත්තො සුමනො සීහාසනමදාසහං.
2125. පහුතගන්ධමාලෙහි{1} දිට්ඨධම්මෙ සුඛාවහෙ, තත්ථ පූජං කරිත්වාන{2} නිබ්බායති බහුජ්ජනො.
2126. පසන්නචිත්තො සුමනො වන්දිත්වා බොධිමුත්තමං, කප්පානං සතසහස්සං දුග්ගතිං නූපපජ්ජහං.
2127. පණ්ණරසසහස්සම්හි කප්පානං අට්ඨ ආසු තෙ{3}, සිලුච්චය සනාමා ච රාජානො චක්කවත්තිනො.
2128. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සීහාසනදායකො ථෙරො ඉමා ගාථායො අභාසිත්ථාති.
සීහාසනදායකත්ථෙරස්ස අපදානං පඤ්චමං.
176. මග්ගදත්තිකත්ථෙරාපදානං
2129. අනොමදස්සී භගවා දිපදින්දො නරාසභො, දිට්ඨධම්මසුඛත්ථාය අබ්භොකාසම්හි චඞ්කමි.
2130. පසන්නචිත්තො සුමනො වන්දිත්වා පුප්ඵමොකිරිං, උද්ධතෙ පාදෙ පුප්ඵානි සීසමුද්ධනි{1} තිට්ඨරෙ.
2131. වීසකප්පසහස්සම්හි ඉතො පඤ්ච ජනා අහූ, පුප්ඵච්ඡදනියා නාම චක්කවත්තී මහබ්බලා.
2132. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා මග්ගදත්තිකො ථෙරො ඉමා ගාථායො අභාසිත්ථාති.
මග්ගදත්තිකත්ථෙරස්ස අපදානං ඡට්ඨං.
177. එකදීපියත්ථෙරාපදානං
2133. පදුමුත්තරස්ස මුනිනො සලලෙ බොධිමුත්තමෙ, පසන්නචිත්තො සුමනො එකදීපං අදාසහං.
2134. භවෙ නිබ්බත්තමානම්හි නිබ්බත්තෙ පුඤ්ඤසඤ්චයෙ, දුග්ගතිං නාභිජානාමි දීපදානස්සිදං ඵලං.
2135. සොළසකප්පසහස්සෙ ඉතො තෙ චතුරො ජනා, චන්දාභා නාම නාමෙන චක්කවත්තී මහබ්බලා.
2136. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා එකදීපියො ථෙරො ඉමා ගාථායො අභාසිත්ථාති.
එකදීපියත්ථෙරස්ස අපදානං සත්තමං.
නවමං භාණවාරං.
178. මණිපූජකත්ථෙරාපදානං.
2137. ඔරෙන හිමවන්තස්ස නදිකා{2} සම්පවත්තථ, තස්සා චානුපඛෙත්තම්භි සයම්භූ වසතෙ තදා.
2138. මණිං පග්ගය්හ පල්ලඞ්කං සාධුචිත්තං මනොරමං, පසන්නචිත්තො සුමනො බුද්ධස්ස අභිරොපයිං.
2139. චතුනවුතෙ ඉතො කප්පෙ යං මණිං අභිරොපයිං, දුග්ගතිං නාභිජානාමි බුද්ධපූජායිදං ඵලං.
2140. ඉතො ච ද්වාදසෙ කප්පෙ සතරංසි සනාමකා, අට්ඨ තෙ ආසුං රාජානො චක්කවත්තී මහබ්බලා.
2141. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා මණිපූජකො ථෙරො ඉමා ගාථායො අභාසිත්ථාති.
මණිපූජකත්ථෙරස්ස අපදානං අට්ඨමං.
179. තිකිච්ඡකත්ථෙරාපදානං.
2142. නගරෙ බන්ධුමතියා වෙජ්ජො ආසිං සුසික්ඛිතො, ආතුරානං සදුක්ඛානං මහාජනසුඛාවහො.{1}
2143. ව්යාධිතං සමණං දිස්වා සීලවන්තං මහාජුතිං, පසන්නචිත්තො සුමනො භෙසජ්ජමදදිං තදා.
2144. අරොගො ආසි තෙනෙව සමණො සංවුතින්ද්රියො, අසොකො නාම නාමෙන උපට්ඨාකො විපස්සිනො.
2145. එකනවුතෙ ඉතො කප්පෙ යමොසධමදාසභං, දුග්ගතිං නාභිජානාමි භෙසජ්ජස්ස ඉදං ඵලං.
2146. ඉතො ච අට්ඨමෙ කප්පෙ සබ්බොසධසනාමකො, සත්තරතනසම්පන්නො චක්කවත්තී මහබ්බලො.
2147. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා තිකිච්ඡකො ථෙරො ඉමා ගාථායො අභාසිත්ථාති.
තිකිච්ඡකත්ථෙරස්ස අපදානං නවමං.
180. සඞ්ඝුපට්ඨාකත්ථෙරාපදානං.
2148. වෙස්සභුම්භි භගවති අහොසාරාමිකො අහං, පසන්නචිත්තො සුමනො උපට්ඨිං සංඝමුත්තමං.
2149. එකතිංසෙ ඉතො කප්පෙ යං කම්මමකරිං තදා, දුග්ගතිං නාභිජානාමි උපට්ඨානස්සිදං ඵලං.
2150. ඉතො තෙ සත්තමෙ කප්පෙ සත්තෙවාසුං සමොදකා, සත්තරතනසම්පන්නො චක්කවත්තී මහබ්බලා.
2151. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සඞ්ඝුපට්ඨාකො ථෙරො ඉමා ගාථායො අභාසිත්ථාති.
සඞ්ඝුපට්ඨාකත්ථෙරස්ස අපදානං දසමං.
උද්දානං:
කුමුදො අථ නිස්සෙණී රත්තිකො උදපානදො සීහාසනී මග්ගදදො එකදීපි මණිප්පදො තිකිච්ඡකො උපට්ඨාකො එකූනපඤ්ඤාස ගාථකාති.
කුමුදවග්ගො අට්ඨාරසමො.
19. කුටජපුප්ඵියවග්ගො
181. කුටජපුප්ඵියත්ථෙරාපදානං.
2152. සුවණ්ණවණ්ණං සම්බුද්ධං සතරංසිං’ව උග්ගතං, දිසං අනුවිලොකෙන්තං ගච්ඡන්තං අනිලඤ්ජසෙ.
2153. කුටජං පුප්ඵිතං දිස්වා සංවිත්ථතසමොත්ථතං, රුක්ඛතො ඔචිනිත්වාන ඵුස්සස්ස අභිරොපයිං.
2154. ද්වෙනවුතෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි බුද්ධපූජායිදං ඵලං.
2155. ඉතො සත්තරසෙ කප්පෙ තයො ආසිංසු පුප්ඵිතා{1}, සත්තරතනසම්පන්නා චක්කවත්තී මහබ්බලා.
2156. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කුටජපුප්ඵියො ථෙරො ඉමා ගාථායො අභාසිත්ථාති.
කුටජපුප්ඵියත්ථෙරස්ස අපදානං පඨමං.
182. බන්ධුජීවකත්ථෙරාපදානං.
2157. සිද්ධත්ථො නාම සම්බුද්ධො සයම්භු සබ්භි වණ්ණිතො, සමාධිං සො සමාපන්නො නිසීදි පබ්බතන්තරෙ.
2158. ජාතස්සරෙ ගවෙසන්තො දකජං පුප්ඵමුත්තමං, බන්ධුජීවකපුප්ඵානි අද්දසං සමනන්තරං.
2159. උභො හත්ථෙහි පග්ගය්හ උපගච්ඡිං මහාමුනිං, පසන්නචිත්තො සුමනො සිද්ධත්ථස්සාභිරොපයිං.
2160. චතුනවුතෙ ඉතො{2} කප්පෙ යං පුප්ඵමභිරොපයිං, දුග්ගතිං නාභිජානාමි පුප්ඵපූජායිදං ඵලං.
2161. ඉතො චතුද්දසෙ{3} කප්පෙ එකො ආසිං ජනාධිපො, සමුද්දකප්පො නාමෙන චක්කවත්තී මහබ්බලො.
2162. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා බන්ධුජීවකො ථෙරො ඉමා ගාථායො අභාසිත්ථාති.
බන්ධුජීවකත්ථෙරස්ස අපදානං දුතියං.
183. කොටුම්බරියත්ථෙරාපදානං.
2163. කණිකාරං’ව ජොතන්තං නිසින්නං පබ්බතන්තරෙ, අප්පමෙය්යං’ව උදධිං විත්ථතං{1} ධරණිං යථා.