ඉත්ථං සුදං ආයස්මා ඤාණසඤ්ඤකො ථෙරො ඉමා ගාථායො අභාසිත්ථාති.
ඤාණසඤ්ඤකත්ථෙරස්ස අපදානං අට්ඨමං.
129. ගන්ධපුප්ඵියත්ථෙරාපදානං.{*}
1856. සුවණ්ණවණ්ණො සම්බුද්ධො විපස්සී දක්ඛිණාරහො, පුරක්ඛතො සාවකෙහි ආරාමා අභිනික්ඛමි.
1857. දිස්වාන’හං බුද්ධසෙට්ඨං සබ්බඤ්ඤුං තමනාසකං, පසන්නචිත්තො සුමනො ගන්ධපුප්ඵං{2} අපූජයිං.
1858. තෙන චිත්තප්පසාදෙන දිපදින්දස්ස තාදිනො, හට්ඨො හට්ඨෙන චිත්තෙන පුන වන්දිං තථාගතං.
1859. එකනවුතෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි බුද්ධපූජායිදං ඵලං.
1860. එකතාළීසි’තො කප්පෙ චරණො{3} නාම ඛත්තියො, සත්තරතනසම්පන්නො චක්කවත්තී මහබ්බලො.
1861. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා ගන්ධපුප්ඵියො{4} ථෙරො ඉමා ගාථායො අභාසිත්ථාති.
ගන්ධපුප්ඵියත්ථෙරස්ස අපදානං නවමං.
130. පදුමපූජකත්ථෙරාපදානං.
1862. හිමවන්තස්ස අවිදූරෙ ගොතමො නාම පබ්බතො, නානාරුක්ඛෙහි සඤ්ඡන්නො මහාභූතගණාලයො.
1863. වෙමජ්ඣම්භි ච තස්සාසි අස්සමො අභිනිම්මිතො, පුරක්ඛතො සසිස්සෙහි වසාමි අස්සමෙ අහං.
1864. “ආයන්තු මෙ සිස්සගණා පදුමං ආහරන්තු මෙ, බුද්ධපූජං කරිස්සාම දිපදින්දස්ස තාදිනො”
1865. එවන්ති තෙ පටිස්සුත්වා පදුමං ආහරිංසු මෙ, තත්ථ{5} නිමිත්තං කත්වා’හං බුද්ධස්ස අභිරොපයිං.
1866. සිස්සෙ තදා සමානෙත්වා සාධුකං අනුසාසහං, මා ඛො තුම්හෙ පමජ්ජිත්ථ අප්පමාදො සුඛාවහො.
1867. එවං සමනුසාසිත්වා තෙ සිස්සෙ{1} වචනක්ඛමෙ, අප්පමාදගුණෙ යුත්තො තදා කාලකතො අහං.
1868. එකනවුතෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි බුද්ධපූජායිදං ඵලං.
1869. එකපඤ්ඤාසකප්පම්භි රාජා ආසිං ජලුත්තමො, සත්තරතනසම්පන්නො චක්කවත්තී මහබ්බලො.
ඉත්ථං සුදං ආයස්මා පදුමපූජකො ථෙරො ඉමා ගාථායො අභාසිත්ථාති.
පදුමපූජකත්ථෙරස්ස අපදානං දසමං.
උද්දානං:
සෙරෙය්යකො පුප්ඵථූපී පායසො’දකි{2} ථොමකො, ආසනී ඵලසඤ්ඤී ච ගන්ධපදුමපුප්ඵියො, පඤ්චුත්තරසතා ගාථා භණිතා අත්ථදස්සිහි.
සෙරෙය්යකවග්ගො තෙරසමො.
14. සොභිතවග්ගො
131. සොභිතත්ථෙරාපදානං.
1870. පදුමුත්තරො නාම ජිනො ලොකජෙට්ඨො නරාසභො, මහතො ජනකායස්ස දෙසෙති අමතං පදං.
1871. තස්සාහං වචනං සුත්වා වාචාසභිමුදීරයිං{3}, අඤ්ජලිං පග්ගහෙවොන එකග්ගො ආසහං තදා.
1872. යථා සමුද්දො උදධීනමග්ගො, නෙරූ නගානං පවරො සිලුච්චයො, තථෙව යෙ චිත්තවසෙන වත්තරෙ, න බුද්ධඤාණස්ස කලං උපෙන්ති තෙ.
1873. ධම්මෙ විධිං{4} ඨපෙත්වාන බුද්ධො කාරුණිකො ඉසි, භික්ඛුසංඝෙ නිසීදිත්වා ඉමා ගාථා අභාසථ:
1874. “යො සො ඤාණං පකිත්තෙසි බුද්ධම්හි ලොකනායකො, කප්පානං සතසහස්සං දුග්ගතිං න ගමිස්සති.
1875. කිලෙසෙ ඣාපයිත්වාන එකග්ගො සුසමාහිතො, සොභිතො නාම නාමෙන හෙස්සති සත්ථුසාවකො”
1876. පඤ්ඤාසෙ කප්පසහස්සෙ සත්තෙවාසුං යසුග්ගතා, සත්තරතනසම්පන්නො චක්කවත්තී මහබ්බලො.
1877. කිලෙසා ඣාපිතා මය්හං භවා සබ්බෙ සමූහතා,{1} තිස්සො විජ්ජා අනුප්පත්තා කතං බුද්ධස්ස සාසනං.
1878. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා සොභිතො ථෙරො ඉමා ගාථායො අභාසිත්ථාති.
සොභිතත්ථෙරස්ස අපදානං පඨමං.
132. සුදස්සනත්ථෙරාපදානං.
1879. විතත්ථානදියා{2} තීරෙ පිලක්ඛො{3} ඵලිතො අහු, තාහං රුක්ඛං ගවෙසන්තො අද්දසං ලොකනායකං.
1880. කෙතකං පුප්ඵිතං දිස්වා වණ්ටෙ ඡෙත්වාන’හං තදා, බුද්ධස්ස අභිරොපෙසිං සිඛිනො ලොකබන්ධුනො.
1881. යෙන ඤාණෙන පත්තො’සි අච්චුතං අමතං පදං, තං ඤාණං අභිපූජෙමි බුද්ධසෙට්ඨ මහාමුනි.
1882. ඤාණම්භි පූජං කත්වාන පිලක්ඛං{4} අද්දසං අහං, පටිලද්ධොම්භි තං පඤ්ඤං{5} ඤාණපූජායිදං ඵලං.
1883. එකතිංසෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි ඤාණපූජායිදං ඵලං.
1884. ඉතො තෙරසකප්පම්භි ද්වාදසාසුං ඵලුග්ගතා, සත්තරතනසම්පන්නා චක්කවත්තී මහබ්බලො.
1885. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා සුදස්සනො ථෙරො ඉමා ගාථායො අභාසිත්ථාති.
සුදස්සනත්ථෙරස්ස අපදානං දුතියං.
133. චන්දනපූජකත්ථෙරාපදානං.
1886. චන්දභාගානදීතීරෙ අහොසිං කින්නරො තදා, පුප්ඵභක්ඛො ච’හං ආසිං පුප්ඵනිවසනො තථා{6}.
1887. අත්ථදස්සී තු භගවා ලොකජෙට්ඨා නරාසභො, විපිනග්ගෙන{7} නිය්යාසි හංසරාජාව අම්බරෙ.
1888. “නමො තෙ පුරිසාජඤ්ඤ චිත්තං තෙ සුවිසොධිතං, පසන්නමුඛනෙත්තො’සි{8} විප්පසන්නමුඛින්ද්රියො.
1889. ඔරොහිත්වාන ආකාසා භූරිපඤ්ඤො සුමෙධසො, සඞ්ඝාටිං පත්ථරිත්වාන පල්ලඞ්කෙන උපාවිසි.
1890. විලීනං චන්දනාදාය අගමාසිං ජිනන්තිකං, පසන්නචිත්තො සුමනො බුද්ධස්ස අභිරොපයිං.
1891. අභිවාදෙත්වාන සම්බුද්ධං ලොකජෙට්ඨං නරාසභං, පාමොජ්ජං ජනයිත්වාන සක්කාමිං උත්තරාමුඛො.
1892. අට්ඨාරසෙ කප්පසතෙ චන්දනං යං අපූජයිං, දුග්ගතිං නාභිජානාමි බුද්ධපූජායිදං ඵලං.
1893. චතුද්දසෙ කප්පසතෙ ඉතො ආසිංසු තෙ තයො, රොහිතා{1} නාම නාමෙන චක්කවත්තී මහබ්බලො.
1894. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා චන්දනපූජකො ථෙරො ඉමා ගාථායො අභාසිත්ථාති.
චන්දනපූජකත්ථෙරස්ස අපදානං තතියං.
අට්ඨමභාණවාරං.
134. පුප්ඵඡදනියත්ථෙරාපදානං.
1895. සුනන්දො නාම නාමෙන බ්රාහ්මණො මන්තපාරගූ, අජ්ඣායකො යාජයොගො{2} වාජපෙය්යං අයාජයී.
1896. පදුමුත්තරො ලොකවිදූ අග්ගො කාරුණිකො ඉසි, ජනතං අනුකම්පන්තො අම්බරෙ චඞ්කමි තදා.
1897. චඞ්කමිත්වාන සම්බුද්ධො සබ්බඤ්ඤූ ලොකනායකො, මෙත්තාය අඵරී සත්තෙ අප්පමාණං නිරූපධි.
1898. වණ්ටෙ ඡෙත්වාන පුප්ඵානි බ්රාහ්මණො මන්තපාරගූ, සබ්බෙ සිස්සෙ සමානෙත්වා ආකාසෙ උක්ඛිපාපයි.
1899. යාවතා නගරං ආසි පුප්ඵානං ඡදනං තදා, බුද්ධස්ස ආනුභාවෙන සත්තාහං න විගච්ඡථ.
1900. තෙනෙව සුක්කමූලෙන අනුභොත්වාන සම්පදා, සබ්බාසවෙ පරිඤ්ඤාය තිණ්ණො ලොකෙ විසත්තිකං.
1901. එකාදසෙ කප්පසතෙ පඤ්චතිංසා’සු ඛත්තියා, අම්බරංස සනාමා තෙ චක්කවත්තී මහබ්බලො.
ඉත්ථං සුදං ආයස්මා පුප්ඵජදනියො ථෙරො ඉමා ගාථායො අභාසිත්ථාති.
පුප්ඵඡදනියත්ථෙරස්ස අපදානං චතුත්ථං.
135. රහොසඤ්ඤකත්ථෙරාපදානං
1902. හිමවන්තස්සාවිදූරෙ වසභො නාම පබ්බතො, තස්මිං පබ්බතපාදම්හි අස්සමො ආසි මාපිතො.
1903. තීණි සිස්සසහස්සානි වාචෙසිං බ්රාහ්මණො{1} තදා, සංහරිත්වාන{2} තෙ සිස්සෙ එකමන්තං උපාවිසිං.
1904. එකමන්තං නිසීදිත්වා බ්රාහ්මණො මන්තපාරගූ, බුද්ධවෙදං{3} ගවෙසන්තො ඤාණෙ චිත්තං පසාදයිං.
1905. තත්ථ චිත්තං පසාදෙත්වා නිසීදිං පණ්ණසන්ථරෙ, පල්ලඞ්කමාභුජිත්වාන තත්ථ කාලකතො අහං.
1906. එකතිංසෙ ඉතො කප්පෙ යං සඤ්ඤමලභිං තදා, දුග්ගතිං නාභිජානාමි ඤාණසඤ්ඤායිදං ඵලං.
1907. සත්තවීසතිකප්පම්හි{4} රාජා සිරිධරො අහුං, සත්තරතනසම්පන්නො චක්කවත්තී මහබ්බලො.
1908. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා රහොසඤ්ඤකො ථෙරො ඉමා ගාථායො අභාසිත්ථාති.
රහොසඤ්ඤකත්ථෙරස්ස අපදානං පඤ්චමං.
136. චම්පකපුප්ඵියත්ථෙරාපදානං.
1909. කණිකාරංව ජොතන්තං නිසින්නං පබ්බතන්තරෙ, ඔභාසෙන්තං දිසා සබ්බා ඔසධිං විය තාරකං.
1910. තයො මාණවකා ආසුං සකෙ සිප්පෙ සුසික්ඛිතා, ඛාරිභාරං ගහෙත්වාන අන්වෙන්ති මම පච්ඡතො.
1911. පුටකෙ සත්ත පුප්ඵානි නික්ඛිත්තානි තපස්සිනා, ගහෙත්වා තානි ඤාණම්භි වෙස්සභුස්සාභිරොපයිං.
1912. එකතිංසෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි ඤාණපූජායිදං ඵලං.
1913. එකූනතිංසෙ කප්පම්හි විපුලාභ සනාමකො, සත්තරතනසම්පන්නො චක්කවත්තී මහබ්බලො.
1914. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා චම්පකපුප්ඵියො ථෙරො ඉමා ගාථායො අභාසිත්ථාති.
චම්පකපුප්ඵියත්ථෙරස්ස අපදානං ඡට්ඨං.
137. අත්ථසන්දස්සකෙත්ථරාපදානං.
1915. විසාලමාලෙ ආසීනො අද්දසං ලොකනායකං, ඛීණාසවං බලප්පත්තං භික්ඛුසඞ්ඝපුරක්ඛතං.
1916. සතසහස්සා තෙවිජ්ජා ඡළභිඤ්ඤා මහිද්ධිකා, පරිවාරෙන්ති සම්බුද්ධං කො දිස්වා නප්පසීදති.
1917. ඤාණෙ උපනිධා යස්ස න විජ්ජති සදෙවකෙ, අනන්තඤාණං සම්බුද්ධං කො දිස්වා නප්පසීදති.
1918. ධම්මකායඤ්ච දීපෙන්තං කෙවලං රතනාකරං, විකොපෙතුං{1} න සක්කොන්ති කො දිස්වා නප්පසීදති.
1919. ඉමාහි තීහි ගාථාහි නාරදො සරගච්ඡියො{2}, පදුමුත්තරං ථවිත්වාන සම්බුද්ධං අපරාජිතං.
1920. තෙන චිත්තප්පසාදෙන බුද්ධසන්ථවනෙන ච, කප්පානං සතසහස්සං දුග්ගතිං නුපපජ්ජහං{3}.
1921. ඉතො තිංසෙ කප්පසතෙ සුමිත්තො නාම ඛත්තියො, සත්තරතනසම්පන්නො චක්කවත්තී මහබ්බලො.
1922. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා අත්ථසන්දස්සකො ථෙරො ඉමා ගාථායො අභාසිත්ථාති.