1705. මහාදුන්දුභිනාමා ච{4} සොළසා’සුං රථෙසභා, තිංසකප්පසහස්සම්හි රාජානො චක්කවත්තිනො.
1706. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා සරණගමනීයො ථෙරො ඉමා ගාථායො අභාසිත්ථාති.
සරණගමනීයත්ථෙරස්ස අපදානං තතියං.
114. එකාසනියත්ථෙරාපදානං.
1707. වරුණො නාම නාමෙන දෙවරාජා අහං තදා, උපට්ඨහෙසිං සම්බුද්ධං සයොග්ගබලවාහනො.
1708. නිබ්බුතෙ ලොකනාථම්හි අත්ථදස්සිනරුත්තමෙ, තුරියං සබ්බමාදාය අගමං බොධිමුත්තමං.
1709. වාදිතෙන ච නච්චෙන සම්මතාලසමාහිතො, සම්මුඛා විය සම්බුද්ධං උපට්ඨිං බොධිමුත්තමං.
1710. උපට්ඨහිත්වා තං බොධිං ධරණීරුහපාදපං, පල්ලඞ්කං ආභුජිත්වාන තත්ථ කාලකතො අහං.
1711. සකකම්මාභිරද්ධො’හං පසන්නො බොධිමුත්තමෙ, තෙන චිත්තප්පසාදෙන නිම්මානං උපපජ්ජහං.
1712. සට්ඨි තුරියසහස්සානි පරිවාරෙන්ති මං සදා, මනුස්සෙසු ච දෙවෙසු වත්තමානං භවාභවෙ.
1713. සුබාහු නාම නාමෙන චතුත්තිංසාසු ඛත්තියා සත්තරතනසම්පන්නා පඤ්ච කප්පසතෙ ඉතො.
1714. තිවිධග්ගී නිබ්බුතා මය්හං භවා සබ්බෙ සමූහතා, ධාරෙමි අන්තිමං දෙහං සම්මාසම්බුද්ධසාසනෙ.
1715. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා එකාසනියො ථෙරො ඉමා ගාථායො අභාසිත්ථාති.
එකාසනියත්ථෙරස්ස අපදානං චතුත්ථං.
115. සුවණ්ණපුප්ඵියත්ථෙරාපදානං.
1716. විපස්සී නාම භගවා ලොකජෙට්ඨො නරාසභො, නිසින්නො ජනකායස්ස දෙසෙති අමතං පදං.
1717. තස්සාහං ධම්මං සුත්වාන දිපදින්දස්ස තාදිනො, සොණ්ණපුප්ඵානි චත්තාරි බුද්ධස්ස අභිරොපයිං.
1718. සුවණ්ණච්ඡදනං ආසි යාවතා පරිසා තදා, බුද්ධාභා ච සුවණ්ණාහා ආලොකො විපුලො අහු.
1719. උදග්ගචිත්තො සුමනො වෙදජාතො කතඤ්ජලී, විත්තිසඤ්ජනනො තෙසං දිට්ඨධම්මසුඛාවහො.
1720. ආයාචිත්වාන සම්බුද්ධං වන්දිත්වාන ච සුබ්බතං, පාමොජ්ජං ජනයිත්වාන සකං භවනුපාගමිං.
1721. භවනෙ උපවිට්ඨො’හං බුද්ධසෙට්ඨං අනුස්සරිං, තෙන චිත්තප්පසාදෙන තුසිතං උපපජ්ජහං.
1722. එකනවුතෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි බුද්ධපූජායිදං ඵලං.
1723. සොළසා’සිංසු රාජානො නෙමිසම්මත නාමකා, තෙතාළීසෙ ඉතො කප්පෙ චක්කවත්තී මහබ්බලා.
1724. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සුවණ්ණපුප්ඵියො ථෙරො ඉමා ගාථායො අභාසිත්ථාති.
සුවණ්ණපුප්ඵියත්ථෙරස්ස අපදානං පඤ්චමං.
116. චිතකපූජකත්ථෙරාපදානං.
1725. වසාමි රාජායතනෙ සාමච්චො සපරිජ්ජනො, පරිනිබ්බුතෙ භගවති සිඛිනෙ ලොකබන්ධුනෙ{1}.
1726. පසන්නචිත්තො සුමනො චිතකං අගමාසහං, තුරියං තත්ථ වාදෙත්වා ගන්ධමාලං සමොකිරිං.
1727. චිතම්භි පූජං කත්වාන{2} වන්දිත්වා චිතකං අහං, පසන්නචිත්තො සුමනො සකං භවනුපාගමිං.
1728. භවනෙ උපවිට්ඨො’හං චිතපූජං{3} අනුස්සරිං, තෙන කම්මෙන දිපදින්දෙ ලොකජෙට්ඨෙ නරාසභෙ.
1729. අනුභොත්වාන සම්පත්තිං දෙවෙසු මනුජෙසු ච, පත්තොම්හි අචලං ඨානං හිත්වාන ජයපරාජයං.
1730. එකතිංසෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි චිතපූජායිදං ඵලං.
1731. එකූනතිංසෙ කප්පම්හි ඉතො සොළස රාජානො,{4} උග්ගතා නාම නාමෙන චක්කවත්තී මහබ්බලා.
1732. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා චිතකපූජකො ථෙරො ඉමා ගාථායො අභාසිත්ථාති.
චිතකපූජකත්ථෙරස්ස අපදානං ඡට්ඨං.
117. බුද්ධසඤ්ඤකත්ථෙරාපදානං.
1733. යදා විපස්සී ලොකග්ගො ආයුසංඛාරමොස්සජි, පඨවී සම්පකම්පිත්ථ මෙදිනී ජලමෙඛලා.
1734. ඔතතං විත්ථතං{5} මය්හං සුවිචිත්තවටංසකං,{6} භවනම්පි පකම්පිත්ථ බුද්ධස්ස ආයුසංඛයෙ.
1735. තාසො මය්හං සමුප්පන්නො භවනෙ සම්පකම්පිතෙ, උප්පාතො{7} නු කිමත්ථාය ආලොකො විපුලො අහු.
1736. වෙස්සවණො ඉධාගම්ම නිබ්බාපෙසි මහාජනං, “පාණභුතෙ{8} භයං නත්ථි එකග්ගා හොථ සංවුතා.
1737. අහො බුද්ධො අහො ධම්මා{9} අහො නො සත්ථු සම්පදා. යස්මිං උප්පජ්ජමානම්හි පඨවී සම්පකම්පති.”
1738. බුද්ධානුභාවං කිත්තෙත්වා කප්පං සග්ගම්හි මොදහං, අවසෙසෙසු කප්පෙසු කුසලං චරිතං{10} මයා.
1739. එකනවුතෙ ඉතො කප්පෙ යං සඤ්ඤමලභිං තදා, දුග්ගතිං නාභිජානාමි බුද්ධසඤ්ඤායිදං ඵලං.
1740. ඉතො චුද්දසකප්පම්හි රාජා ආසිං පතාපවා, සමිතො නාම නාමෙන චක්කවත්තී මහබ්බලො.
1741. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා බුද්ධසඤ්ඤකො ථෙරො ඉමා ගාථායො අභාසිත්ථාති.
බුද්ධසඤ්ඤකත්ථෙරස්ස අපදානං සත්තමං.
118. මග්ගසඤ්ඤකත්ථෙරාපදානං.
1742. පදුමුත්තරබුද්ධස්ස සාවකා වනචාරිනො, විප්පනට්ඨා බ්රහාරඤ්ඤෙ අන්ධාව අනුසූයරෙ.
1743. අනුස්සරිත්වා සම්බුද්ධං පදුමුත්තරනාමකං, තස්ස තෙ මුනිනො පුත්තා විප්පනට්ඨා මහාවනෙ.
1744. භවනා ඔරුහිත්වාන අගමං භික්ඛුසන්තිකං{1}, තෙසං මග්ගඤ්ච ආචික්ඛිං භොජනඤ්ච අදාස’හං.
1745. තෙන කම්මෙන දිපදින්දෙ ලොකජෙට්ඨෙ නරාසභෙ, ජාතියා සත්තවස්සො’හං අරහත්තමපාපුණිං.
1746. සචක්ඛූ නාම නාමෙන ද්වාදස චක්කවත්තිනො, සත්තරතනසම්පන්නා පඤ්චකප්පසතෙ ඉතො.
1747. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා මග්ගසඤ්ඤකො ථෙරො ඉමා ගාථායො අභාසිත්ථාති.
මග්ගසඤ්ඤකත්ථෙරස්ස අපදානං අට්ඨමං.
119. පච්චුපට්ඨානසඤ්ඤකත්ථෙරාපදානං.
1748. අත්ථදස්සිම්හි සුගතෙ නිබ්බුතෙ සමනන්තරා, යක්ඛයොනිං උපපජ්ජිං යසං පත්තො ච’හං තදා.
1749. දුල්ලද්ධං වත මෙ ආසිං දුප්පභාතං දුරුට්ඨිතං, යං මෙ භොගෙ විජ්ජමානෙ පරිනිබ්බායි චක්ඛුමා.
1750. මම සඞ්කප්පමඤ්ඤාය සාගරො නාම සාවකො, මමුද්ධරිතුකාමො සො ආගච්ඡි මම සන්තිකං{1}.
1751. “කින්නු සොචසි මා භාසි චර ධම්මං{2} සුමෙධස, අනුප්පදින්නා බුද්ධෙන සබ්බෙසං බීජසම්පදා.
1752. යො ච පූජෙය්ය සම්බුද්ධං තිට්ඨන්තං ලොකනායකං, ධාතුං සාසපමත්තං හි නිබ්බුතස්සාපි පූජයෙ.
1753. සමෙ චිත්තප්පසාදම්භි සමං පුඤ්ඤං මහග්ගතං, තස්මා ථූපං කරිත්වාන පූජෙහි ජිනධාතුයො”.
1754. සාගරස්ස වචො සුත්වා බුද්ධථූපං අකාසහං, පඤ්ච වස්සෙ පරිචරිං මුනිනො ථූපමුත්තමං.
1755. තෙන කම්මෙන දිපදින්දෙ ලොකජෙට්ඨෙ නරාසභෙ, සම්පත්තිං අනුභොත්වාන අරහත්තං අපාපුණිං.
1756. භූරිපඤ්ඤා ච චත්තාරො සත්තකප්පසතෙ ඉතො, සත්තරතනසම්පන්නා චක්කවත්තී මහබ්බලා.
1757. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පච්චුපට්ඨානසඤ්ඤකො ථෙරො ඉමා ගාථායො අභාසිත්ථාති.
පච්චුපට්ඨානසඤ්ඤකත්ථෙරස්ස අපදානං නවමං.
120. ජාතිපූජකත්ථෙරාපදානං.
1758. ජායන්තස්ස විපස්සිස්ස අලොකො විපුලො අහු, පඨවී ච පකම්පිත්ථ සසාගරා{3} සපබ්බතා.
1759. නෙමිත්තා ච වියාකංසු බුද්ධො ලොකෙ භවිස්සති, අග්ගො ච සබ්බසත්තානං ජනතං උද්ධරිස්සති.
1760. නෙමිත්තානං සුණිත්වාන ජාතිපූජමකාසහං, එදිසා පූජනා නත්ථි යාදිසා ජාතිපූජනා.
1761. සංවරිත්වාන{4} කුසලං සකං චිත්තං පසාදයිං, ජාතිපූජං කරිත්වාන තත්ථ කාලකතො අහං.
1762. යං යං යොනුපපජ්ජාමි දෙවත්තං අථ මානුසං, සබ්බෙ සත්තෙ අතිභොමි ජාතිපූජායිදං ඵලං.
1763. ධාතියො{1} මං උපට්ඨන්ති මම චිත්තවසානුගා, න තා{2} සක්කොන්ති කොපෙතුං ජාතිපූජායිදං ඵලං.
1764. එකනවුතෙ ඉතො කප්පෙ යං පූජමකරිං තදා, දුග්ගතිං නාභිජානාමි ජාතිපූජායිදං ඵලං.
1765. සුපාරිචාරියා නාම චතුත්තිංස ජනාධිපා, ඉතො තතියකප්පම්භි චක්කවත්තී මහබ්බලා.
1766. පටිසම්භිදා චතස්සො විමොක්ඛා’පි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ජාතිපූජකො ථෙරො ඉමා ගාථායො අභාසිත්ථාති.
ජාතිපූජකත්ථෙරස්ස අපදානං දසමං.
උද්දානං:
පරිවාර සුමඞ්ගලා සරණාසන පුප්ඵකා, චිතපූජී බුද්ධසඤ්ඤී මග්ගුපට්ඨාන ජාතිනා, ගාථායො නවුතී වුත්තා ගණිතායො විභාවිහි.
මහාපරිවාරවග්ගො ද්වාදසමො.
13. සෙරෙය්යකවග්ගො
121. සෙරෙය්යකත්ථෙරාපදානං.
1767. අජ්ඣායකො මන්තධරො තිණ්ණං වෙදාන පාරගූ, අබ්භොකාසෙ ඨිතො සන්තො අද්දසං ලොකනායකං.
1768. සීහං යථා වනචරං ව්යග්ඝරාජංව නිත්තසං, තිධා පභින්නමාතඞ්ගං කුඤ්ජරංව මහෙසිනං.
1769. සෙරෙය්යකං ගහෙත්වාන ආකාසෙ උක්ඛිපිං අහං, බුද්ධස්ස ආනුභාවෙන පරිවාරෙන්ති සබ්බතො{3}.
1770. අධිට්ඨාසි මහාවීරො සබ්බඤ්ඤූ ලොකනායකො, සමන්තා පුප්ඵච්ඡදනා{4} ඔකිරිංසු නරාසභං.
1771. තතො සා පුප්ඵකඤ්චුකා{5} අන්තොවණ්ටා බහීමුඛා, සත්තාහං ඡදනං හුත්වා{6} තතො අන්තරධායථ.
1772. තං ච අච්ඡරියං දිස්වා අබ්භුතං ලොමහංසනං, බුද්ධෙ චිත්තං පසාදෙසිං සුගතෙ ලොකනායකෙ.
1773. තෙන චිත්තප්පසාදෙන සුක්කමූලෙන චොදිතො, කප්පානං සතසහස්සං දුග්ගතිං නුපපජ්ජහං.
1774. පණ්ණරසසහස්සම්භි කප්පානං පඤ්චවීස තෙ, චිත්තමාලාසනාමා{1} ච චක්කවත්තී මහබ්බලා.
1775. පටිසම්භිදා චතස්සො විමොක්ඛා’පි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සෙරෙය්යකො ථෙරො ඉමා ගාථායො අභාසිත්ථාති.