30. ඛොමදායකත්ථෙරාපදානං
998. නගරෙ බන්ධුමතියා අහොසිං වාණිජො තදා, තෙනෙ’ව දාරං පොසෙමි රොපෙමි බීජසම්පදං.
999. රථියං පටිපන්නස්ස විපස්සිස්ස මහෙසිනො, එකං ඛොමං මයා දින්නං කුසලත්ථාය සත්ථුනො.
1000. එකනවුතෙ ඉතො කප්පෙ යං ඛොමං අදදිං තදා, දුග්ගතිං නාභිජානාමි, ඛොමදානස්සි’දං ඵලං.
1001. සත්තවීසෙ ඉතො කප්පෙ එකො සින්ධවසන්දනො, සත්තරතනසම්පන්නො චතුදීපම්හි ඉස්සරො.
1002. පටිසම්භිදා -පෙ- බුද්ධස්ස සාසනං.
ඉත්ථං සුදං ආයස්මා ඛොමදායකො ථෙරො ඉමා ගාථායො අභාසිත්ථාති.
ඛොමදායකත්ථෙරස්සාපදානං දසමං.
උද්දානං:
සුභූති උපවානො ච සරණො සීලගාහකො, අන්නසංසාවකො ධූපො පුලිනො උත්තරියෙන{1} ච. අඤ්ජලී ඛොමදායී ච දසෙව තතියෙ ගණෙ, පඤ්චාසීති සතං වුත්තා ගාථායො සබ්බපිණ්ඩිතා.
සුභූතිවග්ගො තතියො.
චතුත්ථං භාණවාරං.
4. කුණ්ඩධානවග්ගො
31. කුණ්ඩධානත්ථෙරාපදානං
1003. සත්තාහං පටිසල්ලීනං සයම්භුං අග්ගපුග්ගලං, පසන්නචිත්තො සුමනො බුද්ධසෙට්ඨං උපට්ඨහිං.
1004. වුට්ඨිතං කාලමඤ්ඤාය පදුමුත්තරං මහාමුනිං, මහන්තිං{2} කදලීකණ්ණිං ගහෙත්වා උපගඤ්ඡ’හං.
1005. පටිග්ගහෙත්වා{3} භගවා තං ඵලං{4} ලොකනායකො, මම චිත්තං පසාදෙන්තො පරිභුඤ්ජි මහාමුනි.
1006. පරිභුඤ්ජිත්වාන සම්බුද්ධො සත්ථවාහො අනුත්තරො, සකාසනෙ{5} නිසීදිත්වා ඉමා ගාථා අභාසථ.
1007. “යෙ වසන්ති සමෙතාරො{6} යක්ඛා ඉමම්හි පබ්බතෙ, අරඤ්ඤෙ භූතභව්යානි සුණන්තු වචනං මම.
1008. යො සො බුද්ධං උපට්ඨාසි{7} මිගරාජා ච කෙසරී{8} තමහං කිත්තයිස්සාමි සුණාථ මම භාසතො.
1009. සො’යමෙකාදසක්ඛත්තුං{1} දෙවරාජා භවිස්සති, චතුත්තිංසක්ඛත්තුඤ්ච{2} චක්කවත්තී භවිස්සති.
1010. කප්පසතසහස්සම්හි ඔක්කාකකුලසම්භවො, ගොතමො නාම ගොත්තෙන සත්ථා ලොකෙ භවිස්සති.
1011. අක්කොසිත්වාන සමණෙ සීලවන්තෙ අනාසවෙ, පාපකම්මවිපාකෙන නාමධෙය්යං ලභිස්සති{3}.
1012. තස්ස ධම්මෙසු දායාදො ඔරසො ධම්ම නිම්මිතො, කුණ්ඩධානොති නාමෙන සාවකො සො භවිස්සති.
1013. පවිවෙකමනුයුත්තො ඣායී ඣානරතො අහං, තොසයිත්වාන සත්ථාරං විහරාමි අනාසවො.
1014. සාවකග්ගෙහි{4} පරිවුතො භික්ඛුසඞ්ඝපුරක්ඛතො, භික්ඛුසඞ්ඝෙ නිසීදිත්වා සලාකං ගාහයී ජිනො.
1015. එකංසං චීවරං කත්වා වන්දිත්වා ලොකනායකං, වදතං වරස්ස පුරතො පඨමං අග්ගහෙස’හං
1016. තෙන කම්මෙන භගවා දසසහස්සීපකම්පකො, භික්ඛුසඞ්ඝෙ නිසීදිත්වා අග්ගට්ඨානෙ ඨපෙසි මං.
1017. විරියං මෙ ධුරධොරය්හං යොගක්ඛෙමාධිවාහනං, ධාරෙමි අන්තිමං දෙහං සම්මාසම්බුද්ධසාසනෙ.
1018. පටිසම්භිදා -පෙ- බුද්ධස්ස සාසනං.
ඉත්ථං සුදං ආයස්මා කුණ්ඩධානො ථෙරො ඉමා ගාථායො අභාසිත්ථාති.
කුණ්ඩධානත්ථෙරස්සාපදානං පඨමං.
32. සාගතත්ථෙරාපදානං.
1019. සොභිතො නාම නාමෙන අහොසිං බ්රාහ්මණො තදා, පුරක්ඛතො සසිස්සෙහි ආරාමං අගමාස’හං
1020. භගවා තම්හි සමයෙ භික්ඛුසඞ්ඝපුරක්ඛතො, ආරාමද්වාරා නික්ඛම්ම අට්ඨාසි පුරිසුත්තමො.
1021. තමද්දසාසිං සම්බුද්ධං දන්තං දන්තපුරක්ඛතං, සකං චිත්තං පසාදෙත්වා සන්ථවිං ලොකනායකං.
1022. “යෙ කෙචි පාදපා සබ්බෙ මහියා තෙ විරූහරෙ, බුද්ධිමන්තො තථා සත්තා රූහන්ති ජිනසාසනෙ.
1023. සත්ථවාහො’සි සප්පඤ්ඤො මහෙසී{1} බහුකෙ ජනෙ, විපථා උද්ධරිත්වාන පථං ආචික්ඛසෙ තුවං.
1024. දන්තො අන්තපරිකිණ්ණො ඣායී ඣානරතෙහි ච, ආතාපී පහිතත්තෙහි උපසන්තෙහි තාදිහි.
1025. අලඞ්කතො පරිසාහි{2} පුඤ්ඤාණෙහි{3} සොභසි, පභා නිද්ධාවතෙ තුය්හං සුරියොදයනෙ{4} යථා.
1026. පසන්නචිත්තං දිස්වාන මහෙසී පදුමුත්තරො, භික්ඛුසංඝෙ ඨිතො සත්ථා ඉමා ගාථා අභාසථ.
1027. යො සො හාසං ජනෙත්වාන මමං කිත්තෙසි බ්රාහ්මණො, කප්පානං සතසහස්සං දෙවලොකෙ රමිස්සති.
1028. තුසිතා හි චවිත්වාන සුක්කමූලෙන චොදිතො, ගොතමස්ස භගවතො සාසනෙ පබ්බජිස්සති.
1029. තෙන කම්මෙන සුකතෙන{5} අරහත්තං{6} ලභිස්සති, සාගතො නාම නාමෙන හෙස්සති සත්ථු සාවකො.
1030. පබ්බජිත්වාන කායෙන පාපකම්මං විවජ්ජයිං, වචීදුච්චරිතං හිත්වා ආජීවං පරිසොධයිං.
1031. එවං විහරමානො’හං තෙජොධාතුසු කොවිදො, සබ්බාසවෙ පරිඤ්ඤාය විහරාමි අනාසවො.
1032. පටිසම්භිදා -පෙ- බුද්ධස්ස සාසනං.
ඉත්ථං සුදං ආයස්මා සාගතො ථෙරො ඉමා ගාථායො අභාසිත්ථාති.
සාගතත්ථෙරස්සාපදානං දුතියං.
33. මහාකච්චානත්ථෙරාපදානං.{*}
1033. පදුමුත්තරනාථස්ස පදුමං නාම චෙතියං, සිලාසනං{7} කාරයිත්වා සුවණ්ණෙනා’භිලෙපයිං.
1034. රතනාමයඡත්තඤ්ච පග්ගය්හ වාළවීජනිං, බුද්ධස්ස අභිරොපෙසිං ලොකබන්ධුස්ස තාදිනො.
1035. යාවතා දෙවතා භුම්මා සබ්බෙ සන්නිපතුං තදා, රතනාමයඡත්තානං විපාකං කථයිස්සති.
1036. තඤ්ච සබ්බං සුණිස්සාම කථයන්තස්ස සත්ථුනො, භිය්යො හාසං ජනෙය්යාම සම්මාසම්බුද්ධසාසනෙ.
1037. හෙමාසනෙ නිසීදිත්වා සයම්භූ අග්ගපුග්ගලො, භික්ඛුසඞ්ඝපරිබ්බූළ්හො ඉමා ගාථා අභාසථ.
1038. යෙනි’දං ආසනං දින්නං සොවණ්ණරතනාමයං, තමහං කිත්තයිස්සාමි සුණාථ මම භාසතො.
1039. තිංස කප්පානි දෙවින්දො දෙවරජ්ජං කරිස්සති. සමන්තා යොජනසතං ආභායා’භිභවිස්සති.
1040. මනුස්සලොකං ආගන්ත්වා චක්කවත්තී භවිස්සති, පභස්සරොති නාමෙන උග්ගතෙජො භවිස්සති.
1041. දිවා වා යදි රත්තිං සතරංසීව උග්ගතො, සමන්තා අට්ඨරතනං උජ්ජොතෙස්සති ඛත්තියො.
1042. කප්පසතසහස්සම්හි ඔක්කාකකුලසම්භවො, ගොතමො නාම නාමෙන සත්ථා ලොකෙ භවිස්සති.
1043. තුසිතා හි චවිත්වාන සුක්කමූලෙන චොදිතො, කච්චානො නාම නාමෙන බ්රහ්මබන්ධු භවිස්සති.
1044. සො පච්ඡා පබ්බජිත්වාන අරහා හෙස්සත’නාසවො, ගොතමො ලොකපජ්ජොතො අග්ගට්ඨානෙ ඨපෙස්සති.
1045. සඞ්ඛිත්තපුච්ඡිතං පඤ්හං විත්ථාරෙන කථෙස්සති, කථයන්තො ච තං පඤ්හං අජ්ඣාසං{1} පූරයිස්සති”
1046. අඩ්ඪෙ කුලෙ අභිජාතො බ්රාහ්මණො මන්තපාරගූ, ඔහාය ධනධඤ්ඤානි පබ්බජිං අනගාරියං.
1047. සඞ්ඛිත්තෙනපි පුච්ඡන්තෙ විත්ථාරෙන කථෙම’හං, අජ්ඣාසං{1} තෙසං පූරෙමි, තොසෙමි දිපදුත්තමං.
1048. තොසිතො මෙ මහාවීරො සයම්භූ අග්ගපුග්ගලො, භික්ඛුසඞ්ඝෙ නිසීදිත්වා එතදග්ගෙ ඨපෙසි මං.
1049. පටිසම්භිදා -පෙ- බුද්ධස්ස සාසනං.
ඉත්ථං සුදං ආයස්මා මහාකච්චානො ථෙරො ඉමා ගාථායො අභාසිත්ථාති.
මහාකච්චානත්ථෙරස්සාපදානං තතියං.
34. කාළුදායිත්ථෙරාපදානං.
1050. පදුමුත්තරබුද්ධස්ස{1} ලොකජෙට්ඨස්ස තාදිනො, අද්ධානං පටිපන්නස්ස චරතො චාරිකං තදා.
1051. සුඵුල්ලං පදුමං ගය්හ උප්පලං මල්ලිකඤ්චහං, පරමන්නං ගහෙත්වාන අදාසිං සත්ථුනො අහං.
1052. පරිභුඤ්ජි මහාවීරො පරමන්නං{2} සුභොජනං, තඤ්ච පුප්ඵං ගහෙත්වාන ජනස්ස සම්පදස්සයී.
1053. “ඉට්ඨං කන්තං පියං ලොකෙ ජලජං පුප්ඵමුත්තමං, සුදුක්කරං තෙන කතං යො{3} මෙ පුප්ඵං අදාසි’දං{4}.
1054. යො පුප්ඵමභිරොපෙසි පරමන්නඤ්ච’දාසි මෙ, තමහං කිත්තයිස්සාමි සුණාථ මම භාසතො.
1055. දස චට්ඨක්ඛත්තුං සො{5} දෙවරජ්ජං කරිස්සති, උප්පලං පදුමඤ්චාපි මල්ලිකඤ්ච තදුත්තරි.
1056. අස්ස පුඤ්ඤවිපාකෙන දිබ්බගන්ධසමායුතං, ආකාසෙ ඡදනං කත්වා ධාරයිස්සති තාවදෙ.
1057. පඤ්චවීසතික්ඛත්තුඤ්ච චක්කවත්තී භවිස්සති, පථව්යා රජ්ජං පඤ්චසතං වසුධං ආවසිස්සතී.
1058. කප්පසතසහස්සම්හි ඔක්කාකකුලසම්භවො, ගොතමො නාම ගොත්තෙන සත්ථා ලොකෙ භවිස්සති.
1059. සකකම්මාභිරද්ධො සො සුක්කමූලෙන චොදිතො, සක්යානං නන්දිජනනො ඤාතිබන්ධු භවිස්සති.
1060. සො පච්ඡා පබ්බජිත්වාන සුක්කමූලෙන චොදිතො, සබ්බාසවෙ පරිඤ්ඤාය නිබ්බායිස්සත’නාසවො.
1061. පටිසම්භිදා ච’නුප්පත්තං කතකිච්චමනාසවං, ගොතමො ලොකබන්ධු සො එතදග්ගෙ ඨපෙස්සති.
1062. පධානපහිතත්තො සො උපසන්තො නිරූපධි, උදායි නාම නාමෙන හෙස්සති සත්ථු සාවකො.”
1063. රාගො දොසො ච මොහො ච{6} මානො මක්ඛො ච ධංසිතො, සබ්බාසවෙ පරිඤ්ඤාය විහරාමි අනාසවො.
1064. තොසයිඤ්චාපි{7} සම්බුද්ධං ආතාපී නිපකො අහං, පමොදිතො ච{8} සම්බුද්ධො එතදග්ගෙ ඨපෙසි මං.
1065. පටිසම්භිදා -පෙ- බුද්ධස්ස සාසනං.
ඉත්ථං සුදං ආයස්මා කාළුදායී ථෙරො ඉමා ගාථායො අභාසිත්ථාති.
කාළුදායිත්ථෙරස්සාපදානං චතුත්ථං.
35. මොඝරාජත්ථෙරාපදානං.
1066. අත්ථදස්සී තු භගවා සයම්භූ අපරාජිතො, භික්ඛුසඞ්ඝපරිබ්බූළ්හො රථියං පටිපජ්ජථ.
1067. සිස්සෙහි සම්පරිවුතො ඝරම්හා අභිනික්ඛමිං, නික්ඛමිත්වානහං තත්ථ අද්දසං ලොකනායකං.
1068. අභිවාදිය{1} සම්බුද්ධං සිරෙ කත්වාන අඤ්ජලිං, සකං චිත්තං පසාදෙත්වා සන්ථවිං ලොකනායකං.
1069. “යාවතා රූපිනො සත්තා අරූපී වා අසඤ්ඤිනො, සබ්බෙ තෙ තව ඤාණම්භි අන්තො හොන්ති සමොගධා{2}.
1070. සුඛුමච්ඡිකජාලෙන උදකං යො පරික්ඛිපෙ, යෙ කෙචි උදකෙ පාණා අන්තො ජාලෙ භවන්ති තෙ.
1071. යෙසඤ්ච චෙතනා අත්ථි රූපිනො ච අරූපිනො, සබ්බෙ තෙ තව ඤාණම්භි අන්තො හොන්ති සමොගධා.
1072. සමුද්ධරසි’මං ලොකං අන්ධකාරසමාකුලං, තව ධම්මං සුණිත්වාන කඞ්ඛාසොතං තරන්ති තෙ.
1073. අවිජ්ජානිවුතො ලොකො අන්ධකාරෙන ඔත්ථටො, තව ඤාණම්භි ජොතන්තෙ අන්ධකාරා පධංසිතා.
1074. තුවං චක්ඛූ’සි සබ්බෙසං මහාතමපනූදනො, තව ධම්මං සුණිත්වාන නිබ්බායති බහුජ්ජනො.”
1075. පිඨරං{3} පූරයිත්වාන මධුඛුද්දං{4} අනෙළකං, උභොහත්ථෙහි පග්ගය්හ උපනෙසිං මහෙසිනො.
1076. පටිගණ්හි මහාවීරො සහත්ථෙන{5} මහාඉසි, භුඤ්ජිත්වා තඤ්ච සබ්බඤ්ඤූ වෙහාසං නභමුග්ගමි.