2046. ජලජං කුමුදං ඡෙත්වා{3} උපනෙසිං මහෙසිනො, මම සඞ්කප්පමඤ්ඤාය පටිග්ගහි මහාමුනි.
2047. තඤ්ච දානං දදිත්වාහං සුක්කමූලෙන චොදිතො, කප්පානං සතසහස්සං දුග්ගතිං නූපපජ්ජහං.
2048. සොළසෙතො කප්පසතෙ ආසුං වරුණනාමකා, අට්ඨ එතෙ ජනාධිපා චක්කවත්තී මහබ්බලා.
2049. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කුමුදදායකො ථෙරො ඉමා ගාථායො අභාසිත්ථාති.
කුමුදදායකත්ථෙරස්ස අපදානං දසමං.
උද්දානං:
බන්ධුජීවො තම්බපුප්ඵි වීථි කක්කාරුපුප්ඵියො මන්දාරවො කදම්බී ච සූලකො නාගපුප්ඵියො පුන්නාගො කොමුදී ගාථා ඡප්පඤ්ඤාස පකිත්තිතාති.
බන්ධුජීවකවග්ගො සොළසමො.
17. සුපාරිචරියවග්ගො
161. සුපාරිචරියත්ථෙරාපදානං.
2050. පදුමො නාම නාමෙන දිපදින්දො නරාසභො, පවනා අභිනික්ඛම්ම ධම්මං දෙසෙසි චක්ඛුමා.
2051. යක්ඛානං සමයො ආසි අවිදූරෙ මහෙසිනො, යෙන කිච්චෙන සම්පත්තා අජ්ඣාපෙක්ඛිංසු තාවදෙ.
2052. බුද්ධස්ස ගිරමඤ්ඤාය අමතස්ස ච දෙසනං, පසන්නචිත්තො සුමනො අප්ඵොඨෙත්වා{1} උපට්ඨහිං.
2053. සුචිණ්ණස්ස ඵලං පස්ස උපට්ඨානස්ස සත්ථුනො, තිංසකප්පසහස්සෙසු දුග්ගතිං නුපපජ්ජහං.
2054. ඌනතිංසෙ කප්පසතෙ සමලඞ්කතනාමකො, සත්තරතනසම්පන්නො චක්කවත්තී මහබ්බලො.
2055. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සුපාරිචරියො ථෙරො ඉමා ගාථායො අභාසිත්ථාති.
සුපාරිචරියත්ථෙරස්ස අපදානං පඨමං.
162. කණවෙරපුප්ඵියත්ථෙරාපදානං
2056. සිද්ධත්ථො නාම භගවා ලොකජෙට්ඨො නරාසභො, පුරක්ඛතො සාවකෙහි නගරං පටිපජ්ජථ.
2057. රඤ්ඤො අන්තෙපුරෙ ආසිං ගොපකො අභිසම්මතො, පාසාදෙ උපවිට්ඨොහං අද්දසං ලොකනායකං.
2058. කණවෙරං ගහෙත්වාන භික්ඛුසංඝෙ සමොකිරිං, බුද්ධස්ස විසුං කත්වාන තතො භිය්යො සමොකිරිං.
2059. චතුනවුතෙ ඉතො කප්පෙ යං පුප්ඵමභිරොපයිං{2}, දුග්ගතිං නාභිජානාමි පුප්ඵපූජායිදං ඵලං.
2060. සත්තාසීතිම්හිතො කප්පෙ චතුරො ආසුං මහිද්ධිකා, සත්තරතනසම්පන්නා චක්කවත්තී මහබ්බලා.
2061. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කණවෙරපුප්ඵියො ථෙරො ඉමා ගාථායො අභාසිත්ථාති.
කණවෙරපුප්ඵියත්ථෙරස්ස අපදානං දුතියං.
163. ඛජ්ජකදායකත්ථෙරාපදානං.
2062. තිස්සස්ස ඛො භගවතො පුබ්බෙ ඵලමදාසහං, නාළිකෙරඤ්ච පාදාසිං ඛජ්ජකං අභිසම්මතං.
2063. බුද්ධස්ස තමහං දත්වා තිස්සස්ස තු මහෙසිනො, මොදාමහං කාමකරී උපපජ්ජිං යදිච්ඡකං{1}.
2064. ද්වෙ නවුතෙ ඉතො කප්පෙ යං දානමදදිං තදා, දුග්ගතිං නාභිජානාමි ඵලදානස්සිදං ඵලං.
2065. ඉතො තෙරසකප්පම්හි රාජා ඉන්දසමො අහුං{2}, සත්තරතනසම්පන්නො චක්කවත්තී මහබ්බලො.
2066. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ඛජ්ජකදායකො ථෙරො ඉමා ගාථායො අභාසිත්ථාති.
ඛජ්ජකදායකත්ථෙරස්ස අපදානං තතියං.
164. දෙසපූජකත්ථෙරාපදානං.
2067. අත්ථදස්සී තු භගවා ලොකජෙට්ඨො නරාසභො, අබ්භුග්ගන්ත්වාන වෙහාසං ගච්ඡතෙ අනිලඤ්ජසෙ.
2068. යම්හි දෙසෙ ඨිතො සත්ථා අබ්භුග්ගඤ්ඡි මහාමුනි, තාහං දෙසං අපූජෙසිං පසන්නො සෙහි පාණිහි.
2069. අට්ඨාරසෙ කප්පසතෙ අද්දසං යං මහාමුනිං, දුග්ගතිං නාභිජානාමි දෙසපූජායිදං ඵලං.
2070. එකාදසෙ කප්පසතෙ ගොසුජාත සනාමකො, සත්තරතනසම්පන්නො චක්කවත්තී මහබ්බලො.
2071. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා දෙසපූජකො ථෙරො ඉමා ගාථායො අභාසිත්ථාති.
දෙසපූජකත්ථෙරස්ස අපදානං චතුත්ථං.
165. කණිකාරච්ඡදනියත්ථෙරාපදානං.
2072. වෙස්සභූ නාම සම්බුද්ධො ලොකජෙට්ඨො නරාසභො, දිවාවිහාරාය මුනි ඔභාහිත්ථ{1} මහාවනං.
2073. කණිකාරං ඔචිනිත්වා ඡත්තං කත්වානහං තද, පුප්ඵච්ඡදනං කත්වාන බුද්ධස්ස අභිරොපයිං.
2074. එකතිංසෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි බුද්ධපූජායිදං ඵලං.
2075. ඉතො වීසතිකප්පම්හි සොණ්ණාභා අට්ඨඛත්තියා, සත්තරතනසම්පන්නා චක්කවත්තී මහබ්බලා.
2076. පටිසම්භිදා චතස්සො විමොක්ඛාපි ච අට්ඨමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කණිකාරච්ඡදනියො{2} ථෙරො ඉමා ගාථායො අභාසිත්ථාති.
කණිකාරච්ඡදනිය{3}ත්ථෙරස්ස අපදානං පඤ්චමං.
166. සප්පිදායකත්ථෙරාපදානං.
2077. ඵුස්සො නාමාථ භගවා ආහුතීනං පටිග්ගහො, ගච්ඡතෙ වීථියං වීරො නිබ්බාපෙන්තො මහාජනං.
2078. අනුපුබ්බෙන භගවා ආගච්ඡි මම සන්තිකං, තතොහං{4} පත්තං පග්ගය්හ සප්පිතෙලං අදාසහං.
2079. ද්වෙ නවුතෙ ඉතො කප්පෙ යං සප්පිමදදිං තදා, දුග්ගතිං නාභිජානාමි සප්පිදානස්සිදං ඵලං.
2080. ඡප්පඤ්ඤාසෙ ඉතො කප්පෙ එකො ආසිං සමොදකො, සත්තරතනසම්පන්නො චක්කවත්තී මහබ්බලො.
2081. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සප්පිදායකො ථෙරො ඉමා ගාථායො අභාසිත්ථාති.
සප්පිදායකත්ථෙරස්ස අපදානං ඡට්ඨං.
167. යූථිකාපුප්ඵියත්ථෙරාපදානං.
2082. චන්දභාගානදීතීරෙ අනුසොතං වජාමහං, සයම්භුං අද්දසං තත්ථ සාලරාජං’ව ඵුල්ලිතං{5}.
2083. පුප්ඵං යූථිකමාදාය උපගච්ඡිං මහාමුනිං, පසන්නචිත්තො සුමනො බුද්ධස්ස අභිරොපයිං.
2084. චතුනවුතෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
2085. සත්තසට්ඨිම්හි‘තො කප්පෙ එකො සමුද්ධරො අහුං, සත්තරතනසම්පන්නො චක්කවත්තී මහබ්බලො.
2086. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා යූථිකාපුප්ඵියො ථෙරො ඉමා ගාථායො අභාසිත්ථාති.
යූථිකාපුප්ඵියත්ථෙරස්ස අපදානං සත්තමං.
168. දුස්සදායකත්ථෙරාපදානං.
2087. තීවරායං පුරෙ රම්මෙ රාජපුත්තො අහං තදා, පණ්ණාකාරං ලභිත්වාන උපසන්තස්ස’දාසහං.
2088. අධිවාසෙසි භගවා වත්ථං හත්ථෙන ආමසි, සිද්ධත්ථො අධිවාසෙත්වා වෙහාසං නභමුග්ගමී.
2089. බුද්ධස්ස ගච්ඡමානස්ස දුස්සා ධාවන්ති පච්ඡතො, තත්ථ චිත්තං පාසාදෙසුං බුද්ධො නො අග්ගපුග්ගලො.
2090. චතුනවුතෙ ඉතො කප්පෙ යංදු ස්සමදදිං තදා, දුග්ගතිං නාභිජානාමි දුස්සදානස්සිදං ඵලං.
2091. සත්තසට්ඨිම්හි’තො කප්පෙ චක්කවත්තී තදා අහුං, පරිසුද්ධොති නාමෙන මනුජින්දො මහබ්බලො.
2092. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා දුස්සදායකො ථෙරො ඉමා ගාථායො අභාසිත්ථාති.
දුස්සදායකත්ථෙරස්ස අපදානං අට්ඨමං.
169. සමාදපකත්ථෙරාපදානං.
2093. නගරෙ බන්ධුමතියා මහාපූගගණො අහු, තෙසාහං පවරො ආසිං මම බද්ධවරා ච තෙ.
2094. තෙ සබ්බෙ සන්නිපාතෙත්වා පුඤ්ඤකම්මෙ සමාදයිං, මාලං කස්සාම සඞ්ඝස්ස පුඤ්ඤක්ඛෙත්තමනුත්තරං.
2095. සාධූ’ති තෙ පටිස්සුත්වා මම ඡන්දවසානුගා, නිට්ඨාපෙසුං{1} ච තං මාලං විපස්සිස්ස අදම්හසෙ.
2096. එකනවුතෙ ඉතො කප්පෙ යං මාලමදදිං තදා, දුග්ගතිං නාභිජානාමි මාලදානස්සිදං ඵලං.
2097. එකූනසට්ඨිකප්පම්හි{1} එකො ආසි ජනාධිපො, ආදෙය්යො නාම නාමෙන චක්කවත්තී මහබ්බලො.
2098. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සමාදපකො ථෙරො ඉමා ගාථායො අභාසිත්ථාති.
සමාදපකත්ථෙරස්ස අපදානං නවමං.
170. පඤ්චඞ්ගුලියත්ථෙරාපදානං.
2099. තිස්සො නාමාසි භගවා ලොකජෙට්ඨො නරාසභො, පවිසන්තං ගන්ධකුටිං විහාරකුසලං මුනිං.
2100. සුගන්ධමාලමාදාය අගමාසිං ජිනන්තිකං, අප්පසද්දො’ව සම්බුද්ධෙ පඤ්චඞ්ගුලිමදාසහං.
2101. ද්වෙ නවුතෙ ඉතො කප්පෙ යං ගන්ධමභිරොපයිං, දුග්ගතිං නාභිජානාමි පඤ්චඞ්ගුලිස්සිදං ඵලං.
2102. ද්වෙ සත්තතිම්හි’තො කප්පෙ රාජා ආසි සයම්පභො, සත්තරතනසම්පන්නො චක්කවත්තී මහබ්බලො.
2103. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පඤ්චඞ්ගුලියො ථෙරො ඉමා ගාථායො අභාසිත්ථාති.
පඤ්චඞ්ගුලියත්ථෙරස්ස අපදානං දසමං.
උද්දානං:
සුපාරිචාරී කණවෙරී ඛජ්ජකො දෙසපූජකො, කණිකාරො සප්පිදදො යූථිකො දුස්සදායකො මාලො ච පඤ්චඞ්ගුලිකො චතුපඤ්ඤාස ගාථකාති.
සුපාරිචරියවග්ගො සත්තරසමො.
18. කුමුදවග්ගො
171. කුමුදමාලියත්ථෙරාපදානං
2104. පබ්බතෙ හිමවන්තම්හි මහාජාතස්සරො අහු, තත්ථජො රක්ඛසො ආසිං ඝොරරූපො මහබ්බලො.