1512. රුක්ඛමූලෙ නිසින්නො’හං ව්යාධිතො පරමෙන ච, පරමකාරුඤ්ඤපත්තො’ම්හි අරඤ්ඤෙ කානනෙ අහං.
1513. අනුකම්පං උපාදායං තිස්සො සත්ථා උපෙසි මං, සො’හං නිපන්නකො සන්තො සිරෙ කත්වාන අඤ්ජලිං.
1514. පසන්නචිත්තො සුමනො සබ්බසත්තානමුත්තමං, සම්බුද්ධං අභිවාදෙත්වා තත්ථ කාලකතො අහං.
1515. ද්වෙනවුතෙ ඉතො කප්පෙ යං වන්දිං පුරිසුත්තමං, දුග්ගතිං නාභිජානාමි වන්දනාය ඉදං ඵලං.
1516. ඉතො පඤ්චමකෙ කප්පෙ පඤ්චෙවාසුං මහාසිඛා, සත්තරතනසම්පන්නා චක්කවත්තී මහබ්බලා.
1517. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා නිපන්නඤ්ජලියො ථෙරො ඉමා ගාථායො අභාසිත්ථාති.
නිපන්නඤ්ජලියත්ථෙරස්ස අපදානං තතියං.
84. අධොපුප්ඵියත්ථෙරාපදානං.
1518. අභිභූ නාම සො භික්ඛු සිඛිනො අග්ගසාවකො, මහානුභාවො තෙවිජ්ජො හිමවන්තං උපාගමී{1}.
1519. අහම්පි හිමවන්තම්හි රමනීයස්සමෙ ඉසි, වසාමි අප්පමඤ්ඤාසු ඉද්ධිසු ච තදා වසී.
1520. පක්ඛජාතො වියාකාසෙ පබ්බතං අධිවත්තයිං{2}, අධොපුප්ඵං ගහෙත්වාන ආගච්ඡිං{3} පබ්බතං අහං.
1521. සත්ත පුප්ඵානි ගණ්හිත්වා මත්ථකෙ ඔකිරිං අහං, ආලොකිතෙ ච වීරෙන{4} පක්කාමිං පාචිනාමුඛො.
1522. ආවාසං අභිසම්භොසිං පත්වාන අස්සමං අහං, ඛාරිභාරං ගහෙත්වාන පාවිසිං{5} පබ්බතන්තරං.
1523. අජගරො මං පීළෙසි ඝොරරූපො මහබ්බලො, පුබ්බකම්මං සරිත්වාන කත්ථ කාලකතො අහං.
1524. එකතිංසෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි පුප්ඵපූජායිදං ඵලං.
1525. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා අධොපුප්ඵියො ථෙරො ඉමා ගාථායො අභාසිත්ථාති.
අධොපුප්ඵියත්ථෙරස්ස අපදානං චතුත්ථං.
85. රංසිසඤ්ඤකත්ථෙරාපදානං
1526. පබ්බතෙ හිමවන්තම්භි වාසං කප්පෙසහං පුරෙ, අජිනුත්තරවාසො’හං{1} වසාමි පබ්බතන්තරෙ.
1527. සුවණ්ණවණ්ණං සම්බුද්ධං සතරංසිංව භානුමං, වනන්තරගතං දිස්වා සාලරාජං’ව පුප්ඵිතං.
1528. රංස්යා{2} චිත්තං පසාදෙත්වා විපස්සිස්ස මහෙසිනො, පග්ගය්හ අඤ්ජලිං වන්දිං සිරසා උක්කුටී{3} අහං.
1529. එකනවුතෙ ඉතො කප්පෙ යං කම්මමකරිං තදා, දුග්ගතිං නාභිජානාමි රංසිසඤ්ඤායිදං ඵලං.
1530. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා රංසිසඤ්ඤකො ථෙරො ඉමා ගාථායො අභාසිත්ථාති.
රංසිසඤ්ඤකත්ථෙරස්ස අපදානං පඤ්චං.
86. දුතියරංසිසඤ්ඤකත්ථෙරාපදානං
1531. පබ්බතෙ හිමවන්තම්භි වාකචීරධරො අහං, චඞ්කමඤ්ච සමාරූළ්හො නිසීදිං පාචිනාමුඛො.
1532. පබ්බතෙ සුගතං දිස්වා ඵුස්සං ඣානරතං තදා, අඤ්ජලිං පග්ගහෙත්වාන රංස්යා{4} චිත්තං පසාදයිං.
1533. ද්වෙනවුතෙ ඉතො කප්පෙ යං සඤ්ඤමලභිං තදා, දුග්ගතිං නාභිජානාමි රංසිසඤ්ඤායිදං ඵලං.
1534. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා රංසිසඤ්ඤකො ථෙරො ඉමා ගාථායො අභාසිත්ථාති.
දුතියරංසිසඤ්ඤකත්ථෙරස්ස අපදානං ඡට්ඨං.
87. ඵලදායකත්ථෙරාපදානං.
1535. පබ්බතෙ හිමවන්තම්භි ඛුරාජිනධරො අහං, ඵුස්සං ජිනවරං දිස්වා ඵලහත්ථො ඵලං අදං.
1536. යමහං ඵලමදාසිං විප්පසන්නෙන චෙතසා, භවෙ නිබ්බත්තමානම්හි ඵලං නිබ්බත්තතෙ මම.
1537. ද්වෙනවුතෙ ඉතො කප්පෙ යං ඵලං අදදිං අහං, දුග්ගතිං නාභිජානාමි ඵලදානස්සිදං ඵලං.
1538. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා ඵලදායකො ථෙරො ඉමා ගාථායො අභාසිත්ථාති.
ඵලදායකත්ථෙරස්ස අපදානං සත්තමං.
88. සද්දසඤ්ඤකත්ථෙරාපදානං.
1539. පබ්බතෙ හිමවන්තම්භි වසාමි පණ්ණසන්ථරෙ, ඵුස්සස්ස ධම්මං භණතො සද්දෙ චිත්තං පසාදයිං.
1540. ද්වෙනවුතෙ ඉතො කප්පෙ යං කම්මමකරිං තදා, දුග්ගතිං නාභිජානාමි පුඤ්ඤකම්මස්සිදං ඵලං.
1541. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා සද්දසඤ්ඤකො ථෙරො ඉමා ගාථායො අභාසිත්ථාති.
සද්දසඤ්ඤකත්ථෙරස්ස අපදානං අට්ඨමං.
89. බොධිසිඤ්චකත්ථෙරාපදානං
1542. විපස්සිස්ස භගවතො මහාබොධිමහො අහු, පබ්බජ්ජූපගතො සන්තො උපගච්ඡිං මහං අහං{1}.
1543. කුසුමොදකමාදාය බොධියා ඔකිරිං අහං, “මොචයිස්සති නො මුත්තො නිබ්බාපෙස්සති නිබ්බුතො”.
1544. එකනවුතෙ ඉතො කප්පෙ යං බොධිමභිසිඤ්චයිං, දුග්ගතිං නාභිජානාමි බොධිසිඤ්චායිදං{2} ඵලං.
1545. තෙත්තිංසෙ වත්තමානම්හි කප්පෙ ආසුං ජනාධිපා, උදකාසෙචනා නාම අට්ඨෙතෙ චක්කවත්තිනො.
1546. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා බොධිසිඤ්චකො{3} ථෙරො ඉමා ගාථායො අභාසිත්ථාති.
බොධිසිඤ්චකත්ථෙරස්ස අපදානං නවමං.
90. පදුමපුප්ඵියත්ථෙරාපදානං
1547. පොක්ඛරවනං පවිට්ඨො භඤ්ජන්තො පදුමානහං, අද්දසං ඵුස්සසම්බුද්ධං බත්තිංසවරලක්ඛණං.
1548. පදුමපුප්ඵං ගහෙත්වාන ආකාසෙ උක්ඛිපිං අහං, පසන්නකම්මං කත්වාන{4} පබ්බජිං අනගාරියං.
1549. පබ්බජිත්වාන කායෙන මනසා සංවුතෙන ච, වචීදුච්චරිතං හිත්වා ආජීවං පරිසොධයිං.
1550. ද්වෙනවුතෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි බුද්ධපූජායිදං ඵලං.
1551. පදුමාභාසනාමා අට්ඨාරස මහීපතී, අට්ඨාරස්සු කප්පෙසු අට්ඨතාළීසමාසිසුං.
1552. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා පදුමපුප්ඵියො ථෙරො ඉමා ගාථායො අභාසිත්ථාති.
පදුමපුප්ඵියත්ථෙරස්ස අපදානං දසමං.
උද්දානං:
තිමිර නඞ්ගලීපුප්ඵි නිපන්නඤ්ජලිකො අධො ද්වෙ රංසිසඤ්ඤී ඵලදො සද්දසඤ්ඤී ච සෙචකො පදුමපුප්ඵි ච ගාථායො ඡප්පඤ්ඤාස පකිත්තිතා.
තිමිරපුප්ඵියවග්ගො නවමො.
10. සුධාපිණ්ඩියවග්ගො
91. සුධාපිණ්ඩියත්ථෙරාපදානං.
1553. පූජාරහෙ පූජයතො බුද්ධෙ යදි ව සාවකෙ පපඤ්චසමතික්කන්තෙ තිණ්ණසොකපරිද්දවෙ.
1554. තෙ තාදිසෙ පූජයතො නිබ්බුතෙ අකුතොභයෙ, න සක්කා පුඤ්ඤං සඞ්ඛාතුං ඉදමෙත්තමපි{1} කෙනෙචි.
1555. චතුන්නමපි දීපානං ඉස්සරං යො’ධ කාරයෙ, එකිස්සා පූජනායෙතං කලං නාග්ඝති සොළසිං.
1556. සිද්ධත්ථස්ස නරග්ගස්ස චෙතියෙ එළිතන්තරෙ, සුධාපිණ්ඩො මයා දින්නො විප්පසන්නෙන චෙතසා.
1557. චතුනවුතෙ ඉතො කප්පෙ යං කම්මමකරිං තදා, දුග්ගතිං නාභිජානාමි පටිසඞ්ඛාරස්සිදං ඵලං.
1558. ඉතො තිංසතිකප්පම්හි පටිසඞ්ඛාරසව්හයා සත්තරතනසම්පන්නා තෙරස චක්කවත්තිනො.
1559. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා සුධාපිණ්ඩියො ථෙරො ඉමා ගාථායො අභාසිත්ථාති.
සුධාපිණ්ඩියත්ථෙරස්ස අපදානං පඨමං.
92. සුචින්තිතත්ථෙරාපදානං.
1560. තිස්සස්ස ලොකනාථස්ස සුද්ධාපීඨ{1}මදාසහං, හට්ඨො හට්ඨෙන චිත්තෙන බුද්ධස්සාදිච්චබන්ධුනො.
1561. අට්ඨතිංසෙ ඉතො කප්පෙ රාජා ආසිං මහාරුචී, භොගො ච විපුලො ආසි සයනං ච අනප්පකං.
1562. පීඨං බුද්ධස්ස දත්වාන විප්පසන්නෙන චෙතසා, අනුභොමි සකං කම්මං පුබ්බෙ සුකතමත්තනො.
1563. ද්වෙනවුතෙ ඉතො කප්පෙ යං පීඨමදදිං තදා, දුග්ගතිං නාභිජානාමි පිඨදානස්සිදං ඵලං.
1564. අට්ඨතිංසෙ ඉතො කප්පෙ තයො තෙ චක්කවත්තිනො, රුචි උපරුචි චෙව මහාරුචි තතීයකො.
1565. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා සුචින්තිතො ථෙරො ඉමා ගාථායො අභාසිත්ථාති.
සුචින්තිතත්ථෙරස්ස අපදානං දුතියං.
93. අඩ්ඪචෙලකත්ථෙරාපදානං.
1566. තිස්සස්සාහං භගවතො උපඩ්ඪදුස්සමදාසහං, පරමකාපඤ්ඤපත්තොම්හි{2} දුග්ගන්ධෙන{3} සමප්පිතො.
1567. උපඩ්ඪදුස්සං දත්වාන කප්පං සග්ගම්හි මොදහං, අවසෙසෙසු කප්පෙසු කුසලං කාරිතං{4} මයා.
1568. ද්වෙනවුතෙ ඉතො කප්පෙ යං දුස්සමදදිං තදා, දුග්ගතිං නාභිජානාමි දුස්සදානස්සිදං ඵලං.
1569. එකූනපණ්ණෙ{5}කප්පම්හි රාජානො චක්කවත්තිනො, සමන්නච්ඡදනා{6} නාම බත්තිංසාසුං ජනාධිපා.
1570. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා අඩ්ඪචෙලකො ථෙරො ඉමා ගාථායො අභාසිත්ථාති.
අඩ්ඪචෙලකත්ථෙරස්ස අපදානං තතියං.
94. සූචිදායකත්ථෙරාපදානං.
1571. කම්මාරොහං පුරෙ ආසිං බන්ධුමායං පුරුත්තමෙ, සූචිදානං මයා දින්නං විපස්සිස්ස මහෙසිනො.
1572. වජිරග්ගසමං ඤාණං හොති කම්මෙන තාදිසා{1}, විරාගො’ම්හි විමුත්තො’ම්හි පත්තො’ම්භි ආසවක්ඛයං.
1573. අතීතෙ ච භවෙ සබ්බෙ වත්තමානෙ ච’නාගතෙ, ඤාණෙන විචිනිං සබ්බං සූචිදානස්සිදං ඵලං.
1574. එකනවුතෙ ඉතො කප්පෙ සත්තාසුං වජිරව්හයා{2}, සත්තරතනසම්පන්නා චක්කවත්තී මහබ්බලා.